Ẹghale Ebe-Uzizie Ekareghẹhọ nọ U ti Muhọ Evaọ April 2
1. Okevẹ ma te rọ ghale ebe-uzizie Ekareghẹhọ na, kọ ẹvẹ uzizie ẹsiẹvo ẹgbukpe nana u wuzou te?
1 No April 2 rite April 17, ma te ghale ebe-uzizie Ekareghẹhọ uwhu Kristi nọ o rrọ oware nọ o mai wuzou evaọ ukpe. Evaọ ikpe jọ nọ e vrẹ, ahwo buobu nọ ma zizie a nyaze ti kuomagbe omai. Wọhọ oriruo, evaọ ẹdẹ Ekareghẹhọ jọ, aye jọ ọ rehọ ifonu se uwou ogha inọ: “Mẹ nwani te uwou obọ, yọ mẹ ruẹ obe-uzizie evaọ otọ ẹthẹ mẹ. Mẹ gwọlọ kpohọ Ekareghẹhọ na, rekọ mẹ riẹ oke na ha.” Oniọvo na o te dhesẹ oria nọ a kere oke na fihọ evaọ obe na kẹe. Kẹsena aye na ọ tẹ ta nọ: “Mẹ te seba ẹnya ha!”
2. Eme ma rẹ sae ta nọ ma tẹ be kẹ ohwo obe-uzizie na?
2 Oghẹrẹ nọ Ma ti ro Zizie Ahwo: Nọ orọnọ oke nọ ma wo kẹ uzizie na u tulo ho na, o rẹ mai woma re ma ta ẹme kpẹkpẹe. Who te yere ohwo na no, whọ sae ta nọ: “Ma gwọlọ zizie owhẹ avọ uviuwou ra kpohọ Ekareghẹhọ ẹsiẹvo ẹgbukpe nọ ma ti ru evaọ Ẹdoka, April 17 evaọ akpọ soso. [Rehọ obe-uzizie na kẹ ohwo na.] Ẹdẹ yena ma ti ru Ekareghẹhọ uwhu Jesu. A te kẹ ovuẹ Ebaibol ọvọvẹ nọ u dhesẹ epanọ ma sai ro wo erere no ẹtanigbo Kristi ze. Obe uzizie nana u dhesẹ oke gbe oria nọ ma te jọ ru ekareghẹhọ na.”
3. Ẹvẹ ma sae rọ daoma zizie ahwo buobu?
3 Otẹrọnọ ẹkwotọ ukoko rai ọ rẹ ruaro, ekpako na a rẹ sae jiroro inọ wha nyasiọ ebe-uzizie na ba eria nọ amọfa a rẹ jọ rue rai hi evaọ iwou nọ a di ahwo họ họ. Daoma zizie ahwo nọ a rrọ izihebro ra, emọ-uwuhrẹ Ebaibol, ibe-iruiruo, ibe-emọ isukulu, imoni, gbe egbẹrioma efa. Wha tẹ be ghale obe-uzizie na evaọ Ẹdẹ-Ọmaha gbe Ẹdoka, u te kiehọ, wha fi emagazini họ ada kugbei. Kọ whọ sai ru ọkobaro obufihọ evaọ April re whọ sae rọ ere w’obọ ziezi evaọ usi-uwhowho obọdẹ nana?
4. Fikieme ma rọ gwọlọ nọ ahwo nọ a wo eva-ezi a ziọ Ekareghẹhọ na?
4 Ahwo nọ a te ziọ ekareghẹhọ na a ti yo emamọ eme buobu. A ti yo kpahe uyoyou ulogbo nọ o wọ Jihova kẹ ẹtanigbo na. (Jọn 3:16) A ti yo kpahe epanọ Uvie Ọghẹnẹ o te rọ kẹ ahwo-akpọ erere. (Aiz. 65:21-23) A te vuẹ ai re a ta kẹ eruẹrẹahwohọ inọ a gwọlọ uwuhrẹ Ebaibol nọ u ti fi obọ họ kẹ ai gbe wo eriariẹ. Ma lẹ inọ jọ ahwo buobu nọ a wo eva-ezi a jẹ uzizie nana rehọ je kuomagbe omai evaọ Ekareghẹhọ na!