Kọ Ogbẹrọnọ Ẹkwotọ Obọra O te Mai Woma?
1. Eme a re se ẹkwotọ obọra?
1 Eme a re se ẹkwotọ obọra? Ukoko o te wo ẹkwotọ ologbo, owhowho-uvie ọ sae ta nọ a kẹe ẹkwotọ jọ nọ ọ kẹle riẹ nọ ọ rẹ jọ ta usiuwoma. Obe A Koko Omai Họ na o se evaọ ẹwẹ obe avọ 103 nọ: “Re who wo ẹkwotọ nọ ọ kẹle owhẹ oma u re ru ei lọhọ kẹ owhẹ rehọ oke nọ who fihọ kẹ usiuwoma ota na ro ruiruo vọvọ. Ofariẹ, whọ rẹ sai zizie owhowho-uvie ọfa re o lele owhẹ ta usiuwoma evaọ ẹkwotọ obọ ra.”
2. Ẹvẹ ma sae rọ ta usiuwoma evaọ ẹkwotọ obọmai je lele ukoko mai kpohọ usiuwoma?
2 Hai Lele Ukoko Ra Kpohọ Usiuwoma Ghele: Otẹrọnọ who wo ẹkwotọ obọra nọ ọ kẹle oria iruo ra, whọ sae jariẹ ta usiuwoma evaọ oke eriosehọ uvo hayo taure who te ti kpo. Oniọvo jọ o te bi ruiruo kẹle owhẹ, whai imava wha sae jariẹ ta usiuwoma. Hayo o tẹ kẹle uwou ra, whẹ avọ ahwo uwou ra wha sae jariẹ ta usiuwoma evaọ owọwọ. Otẹrọnọ who kuomagbe ahwo ukoko ra kpohọ usiuwoma ha, lẹ re who te ti muhọ. (Fil. 4:6) Ofariẹ, dede nọ who wo ẹkwotọ obọra, who re lele ukoko ra kpohọ usiuwoma ghele. Who re lele utu usiuwoma ota ra kpohọ usiuwoma maero evaọ Ẹdẹ-Ọmaha avọ Ẹdoka nọ ahwo buobu a re kpohọ usiuwoma na.
3. Fikieme ẹkwotọ obọ ohwo u je woma?
3 Oware nọ U Je Woma: Nọ who te wo ẹkwotọ obọra, o rẹ lọhọ re who kpohọ usiuwoma oke kpobi nọ whọ gwọlọ. Whọ te kaki muhọ nọ orọnọ who ti kuomagbe inievo efa evaọ oria nọ a kokohọ họ na. Oke yena nọ whọ sai fiba oke usiuwoma ra na u te epanọ ahwo jọ a sai ro ru ọkobaro obufihọ hayo ọrọ oke kpobi. Nọ orọnọ ahwo nọ a te gaviezọ kẹ owhẹ a thabọ no oria ra ha na, whọ te sae kaki zihe bru rai re who wuhrẹ ai. Ahwo buobu a ruẹ nọ ẹkwotọ obọrai nọ a rẹ jọ ta usiuwoma u fi obọ họ kẹ ae nọ a rẹ rọ riẹ ahwo ẹkwotọ na ziezi. Ahwo ẹkwotọ na a vẹ jẹ riẹ owhowho-uvie na, mae ro otẹrọnọ, ọ sae ta usiuwoma nya ẹkwotọ na duwu vrẹ ẹsiẹvo taure owhowho-uvie ọfa ọ tẹ te rehọ iẹe. Ẹkwotọ obọra nọ who re wo o sai fi obọ họ kẹ owhẹ ta usiuwoma na ziezi vi epaọ anwẹdẹ.—2 Tim. 4:5.