Epanọ Ma Sai ro Wo Onaa Ziezi Evaọ Usiuwoma Ota​—Dhesẹ kẹ Amọfa nọ Whọ Gwọlọ Ewoma Rai

Oware nọ U ro Wuzou: Jesu o je muẹrohọ ahwo omomọvo, yọ ere o je ro dhesẹ uvi ọdawẹ kẹ ae re. Wọhọ oriruo, nọ o je siwi ọzae jọ nọ o diezọ, o muẹrohọ nọ oma o be dina vo ọzae na, fikiere o te sei họ akotọ no udevie ogbotu na. (Mak 7:​31-35) O dhesẹ ororokẹ kẹ ilele riẹ keme ọ riẹ epanọ ẹgba rai o mu, fikiere o je wuhrẹ ae eware bu hrọ họ. (Jọn 16:12) Dede nọ Jesu ọ rrọ Ovie evaọ obọ odhiwu, ọ gbẹ be gwọlọ ewoma mai. (2 Tim. 4:17) U fo nọ mai Ileleikristi uzẹme ma rẹ rọ aro kele iei. (1 Pita 2:21; 1 Jọn 3:​16, 18) U te no ere no, usiuwoma nọ ma be ta u ti te ahwo udu ziezi nọ ma te wo ororokẹ kẹ ohwo nọ ma be ta usiuwoma kẹ, muẹrohọ oghẹrẹ nọ ọ rrọ, eware nọ e rẹ were iẹe, gbe oware nọ o be kẹe uye. Ohwo na ọ te gaviezọ ziezi otẹrọnọ o vuhumu nọ orọnikọ ma nyae ta usiuwoma jẹ kẹe ebe ọvo ho, rekọ ma gwọlọ ewoma riẹ.