Ọ Rehọ Ifonu Iwhre jọ Wuhrẹ Ahwo Ebaibol Na

Daiane yọ Osẹri Jihova nọ ọ rrọ iruo odibọgba oke-kpobi na evaọ Brazil. Ẹdẹ jọ nọ ọ jẹ ta usi uwoma kẹ ahwo evaọ ifonu, o te lele ọzae-avọ-aye jọ nọ a rọo obọ ta ẹme, yọ a gwọlọ nọ a re gbe wuhrẹ kpahe Ebaibol na. A ta kẹ Daiane inọ a gwọlọ kwa kpohọ iwhre jọ nọ o thabọ gaga, nọ ikpẹ ẹlẹtriki gbe itanẹte e rrọ họ. Ofariẹ, Osẹri Jihova ọvuọvo ọ rrọ iwhre na ha. Rekọ fikinọ a gwọlọ nọ Daiane o re gbe lele ae ta ẹme kpahe Ebaibol na, ọzae-avọ-aye na a tẹ kẹ Daiane inọmba ifonu iwhre na re o ro se ae. A te fi ẹdẹ gbe oke họ nọ Daiane o re ro se ae re a gbẹ ta ẹme.

Nọ Daiane o se ifonu iwhre na evaọ oke nọ a fihọ na, ọzae-avọ-aye na a te yo kẹe! Evaọ eka ivẹ nọ i lele i rie, Daiane o se rai isiasa soso yọ a ta ẹme kpahe Ebaibol na ziezi.

Rekọ no umuo oke yena vrẹ, nọ o te bi se ifonu na, a gbẹ jẹ tọlọ họ. Ghele na, Daiane o gbe je se ifonu na isiasa koka koka. Ohwo kpobi nọ ọ tọlọ ifonu na ọye o re lele ta ẹme kpahe Ebaibol na. Fiki enẹ nọ o je ru na, Daiane o te mu ahwo buobu Ebaibol na họ ewuhrẹ evaọ ifonu iwhre na.

Ẹdẹ jọ, nọ Daiane avọ ọzae riẹ a je wuhrẹ ọzae jọ Ebaibol na evaọ ifonu iwhre na, osu ichọche jọ evaọ iwhre na o te yo ẹme nọ a be ta na. O te dikihẹ kẹle ọzae nọ a bi wuhrẹ Ebaibol na re ọ sai yo ẹme nọ a be ta ziezi. Kẹsena osu ichọche na ọ tẹ ta nọ ọ gwọlọ lele Daiane avọ ọzae riẹ ta ẹme. Fikinọ eware nọ a ta kpahe e were riẹ gaga, ọ tẹ ta nọ a wuhrẹ iẹe Ebaibol na re!

Nọ oke o be nya na, Daiane avọ ọzae riẹ a te je wuhrẹ imazeza soso Ebaibol na evaọ ifonu iwhre na. Osu ichọche na ọ jọ usu ahwo na. Ahwo nọ a bi wuhrẹ na jọ a tubẹ rọ ifonu iwhre na thuru kugbe ewuhrẹ ukoko Isẹri Jihova no. Omọvo jọ evaọ usu rai o tube ku akpala othethei fihọ etẹe kẹle ifonu na, re ahwo nọ a bi wuhrẹ Ebaibol na a sae ruẹ oria keria.

Daiane avọ ọzae riẹ a yere Jihova rọkẹ uvẹ nọ a sae rọ ta usi uwoma Uvie na kẹ ahwo evaọ iwhre nana nọ o thabọ gaga na. Daiane ọ ta nọ, “Jihova ọ sai ru ei lọhọ re a ta usi uwoma kẹ ohwo kpobi, makọ ahwo nọ a be rria eria nọ i thabọ gaga.”