Uwuhrẹ 1

Isase Egbagba

Eme o gwọlọ nọ who re ru?

Se eme nọ e rọ obe na dẹẹ do via. Whọ la eme vrẹ hẹ, bru abọjọ eme, hayo rọ ẹme jọ ro nwene ọfa ha. Se eme na liọ. Muẹrohọ oka-ukpehọ gbe usi nọ a si họ ubiẹme.

FIKIEME U JE WUZOU?

Isase nọ a rẹ rọ oma totọ se je se gbagba yọ abọ ologbo jọ nọ a re ro kpeze eriariẹ egbagba uzẹme Ebaibol na.

IKEREAKERE na e ta nọ o rọ oreva Ọghẹnẹ re oghoghẹrẹ ahwo kpobi “a ze te riẹ uzẹme na.” (1 Tim. 2:4) Rọwokugbe onana, evaọ okenọ ma te bi se do via no Ebaibol na ze, isiuru mai re ma kpeze eriariẹ egbagba na i re kpomahọ oghẹrẹ nọ ma re se.

Ẹgba nọ a re ro se do via no Ebaibol na ze gbe ebe efa nọ e f’otọ Ebaibol na u wuzou kẹ izoge gbe ekpako. Wọhọ Isẹri Jihova, ma wo owha-iruo nọ ma rẹ rọ ghale eriariẹ kpahe Jihova gbe idhere riẹ kugbe amọfa. Oyena o gwọlọ ese kẹ omọvo hayo utu ahwo. Ma re je ru oghẹrẹ isase yena evaọ uviuwou na. Evaọ Isukulu Odibọgba Esuo-Ọghẹnẹ na, emamọ uvẹ o riẹ kẹ inievo emezae gbe erọ emetẹ, emaha te ekpako, re a wo ohrẹ nọ u re fiobọhọ fi ẹnyaharo họ ese do via rai.

Ese Ebaibol na evaọ ẹgbede, makọ rọkẹ utu ahwo jọ hayo kẹ ukoko, yọ oware nọ ma re se gboja gaga. Ọghẹnẹ o gie ẹwolo ku Ebaibol na. Fibae, “ẹme Ọghẹnẹ ọ rẹjọ bẹdẹ, avọ iruo . . . jẹ riẹ ẹjiroro obọ eva.” (Hib. 4:12) Ẹme Ọghẹnẹ o wo eriariẹ eghaghae nọ a re wo no oria ofa ze he. O sai fiobọhọ kẹ ohwo riẹ Ọghẹnẹ uzẹme ọvo na je wo emamọ usu kugbe ei, jẹ sai thihakọ ebẹbẹ uzuazọ ziezi. U dhesẹ edhere kpohọ uzuazọ ebẹdẹ bẹdẹ evaọ akpọ ọkpokpọ Ọghẹnẹ. Ute mai o rẹ jọ re ma dao utho ẹgba mai kpobi ro se Ebaibol na ziezi.—Ol. 119:140; Jer. 26:2.

Epanọ A re Ro Se Gbagba. Emamọ isase u wo abọ sa-sa, rekọ ẹriẹ se gbagba họ owojẹ ọsosuọ. Oyena u dhesẹ nọ ma rẹ daoma se uzedhe oware nọ o rọ obe na. Yọroma re whọ se eme ba evo, bru abọ ekuhọ eme no, hayo se eme thọ fikinọ i tho eme efa.

Re who se eme gbagba, u re fo re who wo otoriẹ eme nọ e wariẹ e riẹ họ. Oyena o rẹ gwọlọ emamọ omaruẹrẹkpahe. Eva omoke, nọ who bi wo ona nọ who re ro rri kparo je roro iroro nọ e rẹ nya liọliọ na, ẹgbagba isase ra ọ te nyaharo.

Oka-ukpehọ usi nọ a kpehọ ẹme yọ ekwakwa nọ e r’oja evaọ ẹvẹrẹ nọ a re kere. Oka-ukpehọ o sai dhesẹ oria nọ a re jo dhizu, epanọ a re dhizu kri te, gbe ẹsejọhọ enwene uvo. Evaọ evẹrẹ jọ, nọ who gbe nwene uvo ho evaọ okenọ oka-ukpehọ na o tẹ gwọlọ ere o sai nwene onọ kpohọ ẹme gheghe, hayo o sai nwene otofa ẹme na kpobi. Rekọ, evaọ ẹsejọ, iruo oka-ukpehọ na o rẹ roma hwa epanọ izi ẹvẹrẹ na e rọ. Evaọ evẹrẹ buobu, o lọhọ họ re who se gbagba ababọ ẹro nọ who re muhọ usi nọ a ro kpoka họ eme na—te enọ a kere via gbe enọ whọ rẹ riẹ no eme nọ e wariẹ e riẹ họ na ze. Enana i re kpomahọ edo ibieme nọ oka na o rọ. Daoma riẹ epanọ oka-ukpehọ avọ usi nọ a re si họ ẹme i re ruiruo evaọ ẹvẹrẹ ra. Onana yọ usiavẹ nọ a rẹ rọ riẹ se. Kareghẹhọ nọ ute ra họ re amọfa a riẹ otọ eme nọ who bi se, orọnikọ re who se eme do via ọvo ho.

O gwọlọ ewuhrẹ re who te ti wo ona nọ who re ro se gbagba. Se edhe-ẹme ọvo, jẹ wariẹ sei bẹsenọ whọ rẹ sai sei ababọ uvumọ osethọ. Who ve kpohọ edhe-ẹme ọfa. Evaọ ukuhọ riẹ, daoma se ewẹ-obe buobu ababọ evo, ẹwariẹ, hayo osethọ ibiẹme na. Whọ tẹ j’owọ nana no, ta kẹ ohwo jọ re o muẹrohọ isase ra re ọ riobọhọ oria nọ who jo se thọ kpobi.

Evaọ abọjọ akpọ na, ababọ emamọ ude-oruẹ gbe emamọ ikpẹ i re fiba ẹbẹbẹ isase. Otẹrọnọ o lọhọ re a rẹriẹ ovao ku jẹ kpọ enana vi ziezi, ababọ avro ẹnyaharo ọ rẹ jọ isase.

Evaọ omoke, a sai zizie inievo-emezae nọ i re se ziezi re a w’obọ evaọ isase ẹgbede ọrọ obe nọ a bi wuhrẹ eva Uwuhrẹ Obe Ukoko gbe Uwuhrẹ Uwou-Eroro na. Rekọ re whọ nyate uvẹ-ọghọ oyena ziezi, o gwọlọ vi eme na nọ whọ rẹ sai se gba ọvo. Re whọ sae jọ emamọ osisase ẹgbede evaọ ukoko na, u re fo re who wo emamọ uruemu evaọ isase omobọ ra. Onana o gwọlọ ẹriẹ inọ ẹme kpobi evaọ uhie-ẹme u wo ẹkẹ iruo riẹ. Whọ rẹ sai gbabọkẹ eme na jọ re ẹme nọ who bi se o vẹ ghele he. Who te se eme thọ, makọ evaọ okenọ who te bi se kẹ omobọ ra, otofa uhie-ẹme na o sae bada owhẹ aro. Oware jọ nọ o rẹ sae wha osethọ ze họ ababọ eroro kpahe usi nọ a si fihọ eme na hayo eme nọ e wariẹ e riẹ họ na. Daoma re who wo otoriẹ oware nọ ubiẹme ovuovo u dhesẹ evaọ oria nọ o jọ roma via na. Je roro kpahe epanọ oka-ukpehọ na u ro kpomahọ otofa uhie-ẹme na. Kareghẹhọ nọ eme buobu i re kugbe re otofa ẹme o tẹ lahwe. Muẹrohọ enana re evaọ okenọ who te bi se do via, whọ vẹ sai se eme wọhọ ekru—ukpenọ who re se eme na ọvuọvo. Ewo otoriẹ uvevẹ orọ eme nọ who bi se yọ emamọ owojẹ kpohọ epanọ who re ro kpeze eriariẹ egbagba kẹ amọfa ẹkwoma isase ẹgbede.

Ọkpako Oleleikristi nọ o wo eriariẹ ziezi họ ọnọ Pọl ukọ na o kere se nọ: ‘Ruabọhọ isase ogbotu.’ (1 Tim. 4:13) U re vevẹ inọ onana yọ oria nọ mai kpobi ma jọ wo ẹgwọlọ ẹnyaharo.

EPANỌ A RE RO LEI T’OBỌ

Wuhrẹ! Wuhrẹ! Wuhrẹ! Yọ who re ru ewuhrẹ na do via.

Ta kẹ ohwo jọ re o muẹrohọ isase ra re ọ riobọhọ oria nọ who jo se thọ.

Who te bi ru uwuhrẹ omobọ ra, gba oma ra họ re whọ romatotọ se.

Ukpenọ who re se eme na ọvo, wuhrẹ re who se ekru eme kugbe.

ORIA IRUO: Whọ tẹ ruẹrẹ oma kpahe no ziezi, ta kẹ ogbẹnyusu hayo ohwo uviuwou ra jọ re o rri Ebaibol lele owhẹ nọ who bi se oria jọ no Matiu uzou avọ 5 rite 7 do via na. Ta kẹe re ọ d’owhẹ ji oke kpobi nọ who te (1) vo ẹme jọ, (2) se ẹme jọ thọ hayo nwene othotha ẹme na, hayo (3) gbabọkẹ usi nọ a si fihọ ẹme jọ hayo oka-ukpehọ nọ o gwọlọ izudhe hayo enwene uvo. U re woma re a ru onana o tẹ kawo isiava hayo isiasa evaọ iminiti ikpe.

[Ẹkpẹti nọ o rrọ ẹwẹ-obe avọ 84]

OKA-UKPEHỌ

Ifustọpo (.) u dhesẹ nọ who re serihọ.

Ekọma (,) o gwọlọ izudhe omojọ, keme eme efa e rọ obaro riẹ.

Esẹmikolọno (;) u dhesẹ izudhe nọ o kpẹre vi orọ eriosehọ rekọ nọ u theri vi orọ ekọma.

Ikolọno (:) u dhesẹ emuhọ uhie eware hayo ẹme omọfa nọ a wariẹ; o rẹ gwọlọ izudhe rekọ ababọ enwene uvo.

Oka enuọtehe (!) u dhesẹ uvo ọ ẹme nọ ọ nya te iroro gaga.

Oka onọ (?) o rẹ gwọlọ nọ a kpare uvo omojọ ro se ẹme na.

Eka ẹme-ọwariẹ (“ ” hayo ‘ ’) o rẹ sai dhesẹ nọ a rẹ rehọ izudhe mu eme nọ a kpe oka họ na (dina dhizu otẹrọnọ e rọ abọjọ ẹme na; dhizu viere otẹrọnọ uhie ẹme ososo).

Edashe (—), a tẹ rehọ iẹe hẹriẹ eme jọ no edekọ, o rẹ dina gwọlọ enwene uvo hayo esi ẹme.

Usi nọ o wariẹ oria họ ( ) gbe ebrakẹte [ ] e rẹ sae hẹriẹ eme nọ a rẹ dina rọ uvo kpotọ se. A re du se eria nọ a si eme no ze nọ a siusi wariẹ hẹ, yọ eme nọ a fihọ ebrakẹte re u ru eme nọ a bi se na gbunu u du gwọlọ enwene uvo ho.