UWUHRẸ AVỌ 5

Isase Egbagba

1 Timoti 4:13

OWARE NỌ O GWỌLỌ: Se eme nọ e rrọ obe na dẹẹ do via.

Ruẹrẹ oma kpahe ziezi. Daoma riẹ oware nọ o soriẹ nọ a ro kere eme nọ e rrọ etẹe na. Wuhrẹ epanọ a re se ekru ẹme kugbe viukpenọ who re kele eme na. Whaha eme obọra nọ who re fiba oware nọ who bi se, ẹme jọ nọ who re vo, hayo ẹme ọfa nọ who re ro nwene ẹme. Muẹrohọ ifustọpo, ekọma, gbe eka itieye efa.

Ta kẹ ogbẹnyusu ra jọ re ọ gaviezọ kẹ isase ra je dhesẹ eme nọ who se thọ kẹ owhẹ.
Se ẹme kpobi gbagba. Whọ gbẹ riẹ oghẹrẹ nọ a re ro se ẹme jọ họ, rri obe-ofeme, gaviezọ kẹ ikporakporo obe na, hayo ta kẹ ohwo nọ ọ riẹ ese ziezi re o fiobọhọ kẹ owhẹ.
Ta ẹme vevẹ. Se eme na no unu ze vevẹ avọ uzou ra nọ whọ kpọvi, re who je rovie unu ra ziezi. Daoma riẹ oghẹrẹ nọ a rẹ sae ghale ẹme ọvuọvo re whọ rọ ere sei do via.

Whọ jọ omodawọ epanọ who re ro se ubiẹme kpobi gbagba o ga hrọ họ, ogbẹrọ ere he o vẹ te wọhọ ẹsenọ whọ be ya omọfa.