Obokparọ Egagọ Uzẹme O Bi Si Kẹle
“ỌNOWO o ve ti zihe ruọ ovie akpọ kpobi.”—ZEKARAYA 14:9.
1. Eme họ eware nọ e via kẹ Ileleikristi nọ a kẹ ẹzi evaọ etoke Ẹmo Akpọ I, kọ ẹvẹ a rọ ruẹaro onana?
EVAỌ etoke ẹmo akpọ ọsosuọ, Ileleikristi nọ a kẹ ẹzi a ruẹ uye ọbẹwẹ gbe ekarọ buobu evaọ abọ erẹwho nọ i je fi ẹmo na. A whaha idhe ajiri rai rọ kẹ Jihova gaga, a te je kie ruọ eyero igbo ẹzi. A ruẹaro enana kpobi evaọ Zekaraya 14:2, nọ u dhesẹ ọwọsuọ erẹwho sa-sa mukpahe Jerusalẹm. Okpẹwho eruaruẹ ọnana họ “Jerusalem odhiwu,” Uvie Ọghẹnẹ obọ odhiwu gbe oria “agbara uvie Ọghẹnẹ [gbe] o rọ Omogodẹ na.” (Ahwo Hibru 12:22, 28; 13:14; Eviavia 22:3) Ahwo Ọghẹnẹ nọ a kẹ ẹzi evaọ otọakpọ a dikihẹ kẹ okpẹwho oyena. Enọ i wo ẹrọwọ evaọ udevie rai a zọ no ọwọsuọ na, a se nọ a re fi oma họ otọ re a gba ai no “okpẹwho na” ha.a
2, 3. (a) Ẹvẹ egagọ Jihova ọ rọ kparobọ no anwọ 1919 ze? (b) Anwọ 1935 ze, didi eware e via no?
2 Evaọ 1919 enọ a kẹ ẹzi nọ i wo ẹrọwọ na a te siobọ no ai, a tẹ jẹ nwane rehọ etoke udhedhẹ nọ u lele ẹmo na ro ruiruo. Wọhọ ahwo ẹro Jerusalẹm odhiwu, a tẹ rehọ uvẹ na ro whowho emamọ usi Uvie Ọghẹnẹ je fiobọhọ evaọ ekokohọ otu nọ i kiọkọ erọ 144,000 na. (Matiu 24:14; 2 Ahwo Kọrint 5:20) Evaọ 1931 a tẹ re odẹ Ikereakere nọ u fo rai Isẹri Jihova.—Aizaya 43:10, 12.
3 Anwọ oke oyena ze, Isẹri Ọghẹnẹ nọ a kẹ ẹzi a re ti serihọ họ. Makọ Hitler avọ ekwakwa ẹmo esuo Nazi riẹ a sae ru ai fibo ho. Makọ ukpokpoma akpọ soso dede, iruo rai e mọ ibi no evaọ akpọ kpobi. Maero anwọ ukpe ọ 1935 ze, “otu obuobu” nọ i no erẹwho sa-sa ze a kuomagbe ai no, wọhọ epanọ a ruẹaro riẹ evaọ obe Eviavia na. Enana re yọ Ileleikristi nọ e rehọ oma rai mudhe jẹ họ-ame no, yọ “a fọrọ iwu rai no a tẹ rehọ azẹ Omogodẹ [na Jesu Kristi] ru ai founo.” (Eviavia 7:9, 14) Ghele na, a rọ enọ a kẹ ẹzi hi, enọ i wo ẹruore uzuazọ obọ odhiwu. Ẹruore rai họ re a reuku oware nọ Adamu avọ Ivi a kufiẹ, koyehọ, uzuazọ ohwo ọgbagba evaọ aparadase otọakpọ. (Olezi 37:29; Matiu 25:34) Nẹnẹ na, ogbotu obuobu na a bu vi ima ahwo isoi no. Egagọ uzẹme Jihova o be kparobọ, rekọ obokparọ urere riẹ o gbẹ be tha.
Erara Evaọ Etẹmpol Ẹzi Ọghẹnẹ
4, 5. (a) Didi oria ogbotu obuobu na a be jọ gọ Jihova? (b) Didi uvẹ a be reawere riẹ, kọ evaọ erugba eruaruẹ vẹ?
4 Wọhọ epanọ a ruẹaro riẹ, ogbotu buobu na a “be gọ [Ọghẹnẹ] taso tuvo.” (Eviavia 7:15) Nọ a rọ e rọ ẹzi, izerẹ Izrẹl he na, ẹsejọhọ Jọn ọ ruẹ e rai nọ a dikihẹ evaọ etẹmpol na evaọ ọgua otafe ahwo erẹwho Egedhọ na. (1 Pita 2:5) Ẹvẹ etẹmpol ẹzi Jihova ọ rro te no, ọgua riẹ nọ ọ vọ avọ otu obuobu nana enọ, kugbe ikiọkotọ Izrẹl ẹzi na, a bi ro jiri iei!
5 Ogbotu obuobu na a be gọ Ọghẹnẹ evaọ eyero nọ a dhesẹ evaọ ọgua obeva izerẹ na ha. A whowho i rai kiẹrẹe kẹ ẹjiroro re a jọ emọ-aruakpọ, emọ ẹzi Ọghẹnẹ hẹ. (Ahwo Rom 8:1, 15) Ghele na, ẹkwoma ẹrọwọ nọ a fihọ ẹtanigbo Jesu, a wo edikihẹ ọfuafo evaọ aro Jihova. A whowho i rai kiẹrẹe avọ ẹjiroro re a jọ egbẹnyusu riẹ. (Wawo Jemis 2:21, 23.) Ae omarai a wo uvẹ nọ a rẹ rọ kẹ akpẹwẹ idhe ọjẹrehọ evaọ agbada-idhe ẹzi Ọghẹnẹ. Fikiere, evaọ otu obuobu ọnana, eruaruẹ Aizaya 56:6, 7 o bi wo orugba ologbo: “Erara nọ i kuomagbe ỌNOWO na, re a gbaodibo rọ kẹe, je you odẹ ỌNOWO na, . . . eye na mẹ rẹ te rehọ tha evaọ ugbehru ẹri mẹ na, me re ti ru ai eva-were evaọ uwou olẹ mẹ. Idhe-emahọ gbe iwẹ rai, a rehọ rae evaọ aruẹri mẹ; keme uwou mẹ a re ti se ei uwou olẹ rọkẹ erẹwho kpobi.”
6. (a) Didi idhe erara na a be rọ kẹ akpẹwẹ? (b) Eme odhe ame nọ ọ rọ ọgua izerẹ na o rẹ kareghẹ họ ae?
6 Usu idhe nọ erara enana a bi ro ru akpẹwẹ họ ‘enu rai [wọhọ eka nọ a wozẹ ziezi] nọ a bi ro jiri odẹ [Ọghẹnẹ],’ gbe “oware uwoma gbe ọghoruo.” (Ahwo Hibru 13:15, 16) Odhe ame ologbo nọ izerẹ na a rẹ rọ wozẹ oma rai yọ ekareghẹhọ obọdẹ rọ kẹ erara enana. Ae oma rai re a rẹ romakpotọ kẹ orufuọ ẹzi gbe uruemu nọ a bi ru ẹnyaharo evaọ eruvẹ Ẹme Ọghẹnẹ kẹ ai na.
Oria Ọfuafo gbe Ekwakwa Riẹ
7. (a) Ẹvẹ ogbotu obuobu na a re rri uvẹ ọkwa ozerẹ ọfuafo na? (b) Didi uvẹ ọfa erara jọ a wo no?
7 Kọ oria Ọfuafo gbe ekwakwa riẹ na i wo otofa kẹ ogbotu obuobu erara enana? Whaọ, a rẹ sae te jọ otọ eyero nọ oria Ọfuafo na u dikihẹ kẹ oke ovo ho. A wariẹ yẹ ai wọhọ emọ ẹzi Ọghẹnẹ nọ e te rria obọ odhiwu hu. Kọ onana u re ti ru ai wo ihri-eriọ hayo theuvo? Ijo. Ukpoye, a be ghọghọ evaọ uvẹ nọ a wo nọ a bi ro fiobọhọ kẹ ikiọkotọ e rọ 144,000 na, yọ a bi dhesẹ ovuhumuo odidi kẹ ẹjiroro Ọghẹnẹ nọ ọ rọ rehọ emọ ẹzi enana wọhọ emọ-aruakpọ, nọ i ti w’obọ kugbe Kristi evaọ ẹkpare ohwo-akpọ te ẹgbagba. Ere re, ogbotu obuobu erara na a bi riwi uwowou ọghoruo Ọghẹnẹ ghaghae nọ ọ rọ kẹ ae ẹruore uzuazọ ebẹdẹ bẹdẹ evaọ Aparadase otọakpọ. Erara enana jọ, wọhọ Nẹtinim oke anwae, a kẹ rai uvẹ ẹruọsa no re a fiobọhọ kẹ ọkwa ozerẹ ọrẹri na.b (Aizaya 61:5) Evaọ udevie enana Jesu ọ te jọ rehọ “emọ-ivie eva akpọ na kpobi” mu.—Olezi 45:16.
8, 9. Didi irere ogbotu obuobu na a rẹ sae wo no eroro kpahe ekwakwa oria Ọfuafo na ze?
8 Dede nọ a te sae ruọ oria Ọfuafo ẹwoho na ha, ogbotu obuobu erara na a wuhrẹ uwuhrẹ ọghaghae no ekwakwa riẹ ze. Wọhọ epanọ edaukpẹ na e gwọlọ ewhri nọ a re ku họ ae kẹse kẹse na, ere erara na a gwọlọ ẹzi ọfuafo re u fiobọhọ kẹ ae wo otoriẹ ẹnyaharo uzẹme no Ẹme Ọghẹnẹ ze ẹkwoma ‘ọrigbo ẹrọwọ avọ areghẹ na.’ (Matiu 24:45-47) Fiba oyena, ẹzi Ọghẹnẹ o bi fiobọhọ kẹ ae k’uyo kẹ uzizie onana: “Ẹzi na avọ Ọva na [ikiọkotọ nọ a kẹ ẹzi na] a tẹ ta nọ, ‘Nyaze.’ Jọ ohwo nọ o yo kpobi ọ za nọ, ‘Nyaze.’ Whai e nọ uruame u re kpe a nyaze obonẹ re wha mi ame uzuazọ na, okẹ ọvọvẹ rọ kẹ ahwo nọ a guọlọ e riẹe.” (Eviavia 22:17) Fikiere, edaukpẹ na yọ ekareghẹhọ kẹ ogbotu obuobu na kpahe owha-iruo rai re a lo wọhọ Ileleikristi jẹ whaha oware kpobi evaọ uruemu, iroro, ẹme-unu, hayo iruo nọ e rẹ dhẹ ẹzi ọfuafo Ọghẹnẹ eva.—Ahwo Ẹfẹsọs 4:30.
9 Emẹjẹ ebrẹdi na o rẹ kareghẹhọ ogbotu obuobu na nọ re a jọ omakpokpọ ẹzi, a rẹ re emuore ẹzi no Ebaibol ze kẹse kẹse hrọ je no ebe ọ ‘ọrigbo ẹrọwọ avọ areghẹ na’ ze. (Matiu 4:4) Agbada-idhe insẹnse na o kareghẹhọ ae epanọ u wuzou te re a lẹ se Jihova kẹ obọfihọ re a sae yọrọ ekiete rai. (Luk 21:36) Elẹ rai i re kugbe eme ajiri nọ i no udu ze gbe uyere-kẹ. (Olezi 106:1) Agbada-idhe insẹnse na o rẹ jẹ kareghẹhọ ae ẹgwọlọ nọ a re ro jiri Ọghẹnẹ evaọ idhere efa, wọhọ udu rai kpobi nọ a rẹ rọ so ile Uvie na evaọ iwuhrẹ Ileleikristi rai a vẹ jẹ ruẹrẹ oma kpahe ziezi re a ru emamọ ‘ewhowho ẹgbede kẹ usiwo.’—Ahwo Rom 10:10.
Obokparọ Ọgbagba ọrọ Egagọ Uzẹme
10. (a) Ẹruore orro vẹ ma rẹ sae rri kpohọ evaọ obaro? (b) Didi eware e rẹ kake via tao?
10 Nẹnẹ “ahwo buobu” nọ i no erẹwho kpobi ze a bi zurie kpohọ uwou egagọ Jihova. (Aizaya 2:2, 3) Rọwo kugbe onana, Eviavia 15:4 ọ ta nọ: “Ono ozọ u re ti muẹ re o jiri odẹ ra ha, O Ọnowo? Keme whẹ ọvo họ ọrẹri. Erẹwho kpobi e rẹ te gọ owhẹ, keme a dhesẹ oziẹobro ra via no.” Zekaraya uzou 14 u dhesẹ oware nọ u lelei rie. Evaọ obaro kẹle na, uruemu othọthọ ahwo buobu evaọ akpọ na u ti te umuo nọ a je ti kokohọ orọ urere re a fiẹmo kugbe Jerusalẹm—enọ i dikihẹ kẹ Jerusalẹm obọ odhiwu evaọ otọakpọ na. Oke oyena Jihova ọ vẹ te j’owọ. Wọhọ Ọghẹnẹ-Ọgbaẹmo, ọ “vẹ te nya e họre erẹwho eyena” enọ i yiwi họre ohọre onana.—Zekaraya 14:2, 3.
11, 12. (a) Ẹvẹ Jihova ọ te k’uyo kẹ ohọre akpọ soso mukpahe enọ e be gọe evaọ etẹmpol riẹ? (b) Eme u ti no ẹmo Ọghẹnẹ ze?
11 “Kọ onana o rẹ te jọ uye nọ ỌNOWO na ọ rẹ te rọ tehe ahwo kpobi [nọ] a bi lele Jerusalem fiẹmo: nọ a gbẹ rọ edikihẹ na oma rai u ve ti gbo no, ibiaro rai i ve ti gbo no evaọ ikparo rai, ẹrọo rai o ve ti gbo ku ai enu. Evaọ ẹdẹ ọyena ozọ ulogbo nọ u no obọ ỌNOWO na ze u ve ti mu ai, ohwowho o ve ti kru ohwo obọ, ohwowho ọ vẹ te họre ohwo.”—Zekaraya 14:12, 13.
12 Sọ uye onana onọ a te ghinẹ rẹro ruẹ hayo o rọ ẹwoho, ma rẹ hẹrẹ re ma ruẹ. Dede, oware ovo jọ u muẹro. Nọ ewegrẹ Ọghẹnẹ a be nyaharo re a họre mukpahe idibo Jihova na, odhesẹvia ogaga igbunu Ọghẹnẹ o te dae ji. Enu rai ọ te gbadi. O te jọ wọhọ ẹsenọ ẹrọo ekela rai na u gbo no. Ute nọ a je le kugbe u ti gbe vẹ evaọ aro rai hi, wọhọ ẹsenọ ibiaro rai i gbo no. Ẹgba ugbobọ rai, nọ o kẹ rai aruọwha re a ru ohọre na, o te yẹ no. Evaọ ozighi, a te rẹriẹ ova ku kpe ohwohwo evaọ edhere ologbo. Ere ewegrẹ egagọ Ọghẹnẹ otọakpọ kpobi a ti ro hwere ai kufiẹ. Ukuhọ riẹ, a vẹ te gba erẹwho na kpobi họ re a vuhu esuo-okpehru ehrugbakpọ Jihova mu. Eruaruẹ na u ve ti rugba: “ỌNOWO o ve ti zihe ruọ ovie akpọ kpobi.” (Zekaraya 14:9) Oyena o jẹ vrẹ no, a vẹ te gba Setan avọ idhivẹri riẹ nọ Esuo Odu Ikpe Kristi u bi muhọ na avọ eghale ilogbo nọ a ruẹrẹhọ kẹ ohwo-akpọ.—Eviavia 20:1, 2; 21:3, 4.
Ẹkparomatha Otọakpọ Na
13. Amono họ enọ “i kiọkọ evaọ erẹwho na kpobi”?
13 Eruaruẹ Zekaraya e tẹ gbẹ nyaharo eva uzou 14, owọ avọ 16 anọ: “Oke oyena, kohwo kohwo nọ ọ sae zọ eva udevie erẹwho na kpobi nọ e kpare ẹmo bru Jerusalem na, a re ti kpehru nya e gọ Ovie na, ỌNOWO ogbaẹmo na, kukpe kukpe, je ru eha uwou-udhu na.” Wọhọ epanọ Ebaibol ọ ta, ahwo kpobi nọ a rọ uzuazọ nẹnẹ nọ a be rria rite urere eyero omuomu ọnana yọ a dadamu rọ ewegrẹ egagọ uzẹme a te “re oja ọraha ibẹdẹ bẹdẹ.” (2 Ahwo Tẹsalọnika 1:7-9; je riwi Matiu 25:31-33, 46.) A ti wo ẹkparomatha ha. Ẹsejọhọ, enọ ‘e zọ’ na i kugbe otu erẹwho na nọ i whu taure ẹmo urere Ọghẹnẹ o tẹ te via nọ ẹruore Ebaibol kẹ ẹkparomatha ọ rọ kẹ. Jesu ọ yaa nọ: “Oke o be tha nọ enọ e rọ eva [iki ekareghẹhọ] kpobi i je ti yo uru riẹ, a vẹ te nya via, enọ i ru uwoma, e vẹ kparoma ruọ uzuazọ, enọ i ru umuomu e vẹ kparoma ruọ oziẹobro.”—Jọn 5:28, 29.
14. (a) Eme enọ a kpare ze a re ru hrọ re a te wo uzuazọ ebẹdẹ bẹdẹ? (b) Eme ọ te via kẹ ohwo nọ ọ se nọ ọ rẹ rehọ oma riẹ dhidhe kẹ Jihova re ọ jẹ gọ egagọ uzẹme he?
14 Enana nọ a kpare ze na kpobi a re ru oware jọ hrọ re ẹkparomatha rai o zihe ruọ ọrọ uzuazọ orọnikọ ọrọ oziẹobro obrukpe he. A rẹ nyaze ọgua otọakpọ etẹmpol Jihova a ve kigwẹ evaọ omarọkẹ Ọghẹnẹ ẹkwoma Jesu Kristi. Ọnọ a kpare ze kpobi nọ ọ se nọ o re ru onana ha ọ rẹ ruẹ oghẹrẹ uye ovo na nọ o hwẹ ruọ uzou erẹwho ọgbọ na. (Zekaraya 14:18) Ono ọ riẹ unuahwo nọ a te kpare ze nọ i ti kuomagbe ogbotu obuobu na ru Ehaa Uwou-Udhu ẹwoho na? Ababọ avro, a te jọ buobu, yọ etẹmpol ẹzi ologbo Jihova ọ vẹ te jẹ mae wo oruaro fiki oyena!
Ehaa Uwou-Udhu Ẹwoho Na
15. (a) Eme họ abọjọ nọ o mae rehọ oma via evaọ Ehaa Uwou-Udhu Izrẹl anwae? (b) Fikieme a jẹ rehọ iruẹ 70 ro ru akpẹwẹ evaọ etoke ehaa na?
15 Kukpe kukpe, a gwọlọ nọ Izrẹl anwae a re ru Ehaa Uwou-Udhu na. U je kri te oka ovo yọ a je he ru ei evaọ ekuhọ ekoko ivuẹvu rai. O jọ oke oghọghọ uyere-kẹ. Evaọ etoke oka yena, a rẹ rria iwou-iwhre nọ a rehọ ebe-ire ruru, maero eyao iriẹ. Ehaa nana o jẹ kareghẹhọ Izrẹl epanọ Ọghẹnẹ o ro siwi esẹ-ilogbo rai no Ijipti gbe epanọ ọ rọ sẹro rai nọ a jẹ rria evaọ iwou-iwhre okenọ a jẹ nya no eria ro eria ikpe 40 evaọ igbrẹwọ na bẹsenọ a ro te Otọ Eyaa na. (Iruo-Izerẹ 23:39-43) Evaọ oke ehaa na, iruẹ 70 a je ro dhidhe evaọ agbada-idhe etẹmpol na. Umuẹro nọ, abọ ehaa ọnana o jọ eruaruẹ ẹwoho kẹ iruo uzuazọ siwo ọgbagba nọ Jesu Kristi o ru. Ukuhọ riẹ irere idhe ẹtanigbo riẹ i ti te ahwo buobu nọ i no iviuwou 70 ohwo-akpọ nọ i no Noa ze.—Emuhọ 10:1-29; Ikeleakele 29:12-34; Matiu 20:28.
16, 17. (a) Oke vẹ Ehaa Uwou-Udhu ẹwoho na u ro muhọ, kọ ẹvẹ o rọ nyaharo? (b) Ẹvẹ ogbotu obuobu na a ro w’obọ eva ehaa na?
16 Fikiere Ehaa Uwou-Udhu anwae na o riobọhọ ekokohọ oghọghọ erahizi nọ a wariẹ dẹ kpohọ etẹmpol ẹzi ologbo Jihova. Ẹwoho Ehaa nana u muhọ evaọ Pẹntikọst 33 C.E., nọ ekokohọ oghọghọ Izrẹl ẹzi kpohọ ukoko Ileleikristi u muhọ. (Iruẹru 2:41, 46, 47) Enana nọ a kẹ ẹzi na a vuhumu nọ ae yọ “erara” evaọ akpọ Setan fikinọ uzedhe ‘ẹria rai ọ rọ obọ odhiwu.’ (1 Pita 2:11; Ahwo Filipai 3:20) Ekieno ẹrọwọ nọ u no emuhọ Kristẹndọm ze u ruru ehaa oghọghọ na evaọ ubroke. (2 Ahwo Tẹsalọnika 2:1-3) Rekọ, a wariẹ mu ehaa na họ evaọ 1919 avọ ekokohọ otu Izrẹl ẹzi ọ 144,000 nọ i kiọkọ na, kẹsiẹe ekokohọ ogbotu obuobu ọ Eviavia 7:9 no erẹwho sa-sa ze.
17 A dhesẹ ogbotu obuobu na wọhọ nọ a wo eyao iriẹ evaọ abọ rai, nọ u dhesẹ nọ ae omarai yọ enọ i bi ru Ehaa Uwou-Udhu ẹwoho na avọ oghọghọ re. Wọhọ Ileleikristi nọ e roma mudhe no, a be rọ oghọghọ wo abọ evaọ iruo ekokohọ egegagọ efa ro kpohọ etẹmpol Jihova. Ofariẹ, wọhọ erahizi, a vuhu mu nọ a wo udu nọ a rẹ rọ rria otọakpọ bẹdẹ hẹ. Ae, kugbe enọ a te kpare ze evaọ obaro, a re gbe fi ẹrọwọ họ idhe ẹtanigbo Kristi bẹsenọ a re te ẹgbagba ohwo-akpọ evaọ ukuhọ Esuo Odu Ikpe Kristi na.—Eviavia 20:5.
18. (a) Eme ọ te via evaọ ekuhọ Esuo Odu Ikpe Jesu Kristi? (b) Ẹvẹ egagọ uzẹme Jihova o ti ro fikparobọ evaọ ukuhọ riẹ?
18 Okioye, eg’Ọghẹnẹ nọ e rọ otọakpọ a ve ti dikihẹ aro riẹ evaọ ẹgbagba ohwo-akpọ ababọ ẹgwọlọ ọkwa ozerẹ obọ odhiwu. Oke na u ve te nọ Jesu Kristi ọ rẹ te “rehọ uvie na kẹ Ọghẹnẹ Ọsẹ na.” (1 Ahwo Kọrint 15:24) A ti si obọ no Setan “umutho oke” re ọ dawo uyẹ ohwo-akpọ nọ o te ẹgbagba no. Ọnọ ọ kare ẹrọwọ kpobi a te rahiẹe bẹdẹ bẹdẹ, kugbe Setan avọ idhivẹri riẹ. Ahwo nọ a kru ẹrọwọ rai a te kẹ ae uzuazọ ebẹdẹ bẹdẹ. A vẹ te jọ enọ e te rria Aparadase otọakpọ ribri. Kọ ere Ehaa Uwou-Udhu ẹwoho na ọ te rọ ze ukuhọ obokparọ ologbo. Egagọ uzẹme o ve ti fikparobọ kẹ oruaro ebẹdẹ Jihova gbe evawere ebẹdẹ ohwo-akpọ.—Eviavia 20:3, 7-10, 14, 15.
[Footnotes]
a Rọkẹ ẹmeọta kpahe owọ ọvuọvo Zekaraya uzou 14, riwi obe na Paradise Restored to Mankind—By Theocracy!, izou 21 gbe 22, nọ Watchtower Bible and Tract Society of New York, Inc., a kporo evaọ 1972.
b Rọkẹ evuẹ efa kpahe Nẹtinim ọgbọ na, rri Uwou-Eroro Na, April 15, 1992, ẹwẹ-obe 16 (ọrọ Oyibo).
Enọ Ọkiẹkpemu
◻ Ẹvẹ “Jerusalẹm” ọ rọ jọ otọ ọwọsuọ evaọ etoke ẹmo akpọ ọsosuọ?—Zekaraya 14:2.
◻ Eme ọ via kẹ ahwo Ọghẹnẹ no anwọ 1919 ze?
◻ Amono nẹnẹ a w’obọ evaọ e ru Ehaa Uwou-Udhu ẹwoho na?
◻ Ẹvẹ egagọ uzẹme o ti ro fikparobọ riẹriẹriẹ?
[Picture on page 29]
A jẹ rehọ eyao iriẹ ru Ehaa Uwou-Udhu na