Obufihọ Kẹ Amọfa Re A Wuhrẹ Ẹgwọlọ Ọghẹnẹ

“Keme owha-omẹ ohọre. Ure yoma kẹ omẹ mẹ gbẹ ta usiuwoma ha!”—1 AHWO KỌRINT 9:16.

1, 2. (a) Iruo akuava vẹ Jihova ọ gwọlọ nọ ma wo abọ kugbe? (b) Eme ahwo eva ezi a re wuhrẹ hrọ re a ruẹse jọ omọvo enọ e te rria Uvie Ọghẹnẹ na?

JIHOVA o wo usiuwoma kẹ ohwo-akpọ. O wo Uvie, yọ ọ gwọlọ nọ ahwo evaọ oria kpobi a yo kpahe iẹe! Nọ ma te wuhrẹ usiuwoma ọnana no, Ọghẹnẹ ọ rẹ gwọlọ nọ ma ghale iẹe kugbe amọfa. Onana yọ iruo ẹko ivẹ. Orọ ọsosuọ, ma re whowho usiuwoma Uvie Ọghẹnẹ na hrọ. Evaọ eruẹaruẹ riẹ kpahe ‘ekuhọ eyero eware enana,’ Jesu ọ ta nọ: “A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.”—Matiu 24:3, 14.

² Abọ avivẹ iruo nana u kpomahọ ewuhrẹ ahwo nọ a dede ewhowho Uvie na rehọ ziezi. Nọ ọ kparoma ze no, Jesu ọ tẹ ta kẹ ogbotu obuobu ilele riẹ nọ: “Fikiere wha wuhrẹ ahwo erẹwho kpobi, wha họ ae ame evaọ odẹ Ọsẹ, gbe Ọmọ gbe Ẹzi Ẹri, wha wuhrẹ ai, re a ru eware kpobi nọ mẹ vuẹ owhai: ri, mẹ avọ owhai a gbẹ rọ kẹse kẹse, makọ te urere akpọ na.” (Matiu 28:19, 20) ‘Eware nọ Kristi o juzi’ nọ a ru erọ obọ riẹ hẹ; o wuhrẹ amọfa re a yoẹme kẹ ijaje Ọghẹnẹ, hayo ẹgwọlọ riẹ. (Jọn 14:23, 24; 15:10) Fikiere, re a wuhrẹ amọfa ‘koko eware nọ Kristi o juzi rai’ u kpomahọ obufihọ kẹ ai re a wuhrẹ ẹgwọlọ Ọghẹnẹ. Ahwo evezi a rẹ nyate ẹgwọlọ Ọghẹnẹ hrọ re a ruẹse jọ otọ Uvie riẹ.

3. Eme họ Uvie Ọghẹnẹ, kọ eme o ti rugba nọ u ru ovuẹ Uvie na họ usi uwoma?

³ Eme họ Uvie Ọghẹnẹ? Kọ eme o re ti rugba nọ u ru ovuẹ Uvie na họ oghẹrẹ usi uwoma otiọye? Uvie Ọghẹnẹ yọ egọmeti obọ odhiwu. O rọ ghaghae gaga kẹ udu Jihova, keme ọye o ti ro ru odẹ riẹ fo, si afuẹwẹ kpobi noi. Uvie na họ okwakwa nọ Jihova o ti ro ruiruo re a jọ otọakpọ na ru oreva riẹ wọhọ epanọ a rọ obọ odhiwu ruẹ. Oyejabọ nọ Jesu o je wuhrẹ omai re ma lẹ kẹ Uvie Ọghẹnẹ re o ze ọ tẹ jẹ ta k’omai re ma kaki fi ei họ oware ọsosuọ evaọ izuazọ mai. (Matiu 6:9, 10, 33) Kọ whọ ruẹ oware nọ o soriẹ no nọ u je wuzou kẹ Jihova inọ ma re wuhrẹ amọfa kpahe Uvie riẹ?

Use-Abọ Orọnikọ Owha Ogbẹgbẹdẹ Hẹ

4. Ẹvẹ a sai ro dhesẹ iẹe inọ owha-iruo mai re ma ta usiuwoma na o rọ owha ogbẹgbẹdẹ hẹ?

⁴ Kọ o rọ owha ogbẹgbẹdẹ re a ta usiuwoma na? Vievie! Re a dhesiẹe: O rọ owha-iruo ọsẹ na re ọ kuọ uviuwou riẹ. O gbe ru ere he o rẹ wọhọ ẹsiọ ẹrọwọ Oleleikristi na. Pọl ukọ na o kere nọ: “Otẹrọnọ ohwo jọ ọ sae guọlọ kẹ imoni riẹ hẹ, yọ ọ sae guọlọ kẹ uwou riẹ gbe he, ohwo ọyena ọ vro orọwọ na no, o te je yoma vi ohwo nọ ọ rọwo ho.” (1 Timoti 5:8) Rekọ owha-iruo oyena yọ owha ogbẹgbẹdẹ kẹ ọzae Oleleikristi na? O rẹ jọ ere he otẹrọnọ o you uviuwou riẹ, keme o te you rai ọ rẹ gwọlọ ko ai.

5. Dede nọ iruo usiuwoma ota gbe aru-ilele na e rọ owha-iruo, fikieme ma jẹ rọ evawere w’abọ kugbe ai?

⁵ Epọvo na re, iruo usiuwoma ota gbe o rọ aru-ilele na yọ owha-iruo, ẹgwọlọ, onọ izuazọ mai e rọ oma hwa. Enẹ Pọl o fi rie họ: “Keme ohwa-omẹ ohọre. Ure yoma kẹ omẹ mẹ gbẹ ta usiuwoma ha!” (1 Ahwo Kọrint 9:16; wawo Izikiẹl 33:7-9.) Ghele, uyoyou o be wọ omai ta usiuwoma na, orọnikọ fikinọ owha-iruo mai ọvo ho. Orọ ọsosuọ, ma you Ọghẹnẹ, rekọ ma you erivẹ mai re, yọ ma riẹ epanọ u wuzou te rọ kẹ ai re a yo usiuwoma na. (Matiu 22:37-39) O rẹ kẹ ai ẹruore obaro. Uvie Ọghẹnẹ ọ rẹ te kpọ oziẹbro-okienyẹ vi, o ve ti si okienyẹ kpobi no, o ve ti zihe udhedhẹ gbe okugbe ze—eyena kpobi rọkẹ eghale ebẹdẹ bẹdẹ erọ ahwo nọ e be roma kpotọ kẹ esuo okiẹrẹe riẹ. Kọ o gbẹ rọ oghọghọ k’omai, ẹhẹ jẹ jaja omai oma, re ma ghale usiuwoma utioye kugbe amọfa?—Olezi 110:3.

6. Fikieme iruo usiuwoma ota gbe aru-ilele na o jẹ wha emamọ use-abọ ze?

⁶ Eva okiovo na, usiuwoma ota gbe iruo aru-ilele na o wha use-abọ ze. Ahwo a rọ oghoghẹrẹ. Ahwo kpobi a wo isiuru hayo ẹgba ọvo na ha. Ejọ e riobe, efa e riẹ tere he. Isase—onọ o jọ oware isiuru nọ a jẹ hai ro le oke haro vẹre na—a bi rri rie enẹna wọhọ oware ehoo. Ehoo-isase, onọ a dhesẹ wọhọ “uruemu hayo eyero ọriẹse rekọ ababọ isiuru evaọ ere oruo na,” yọ ẹbẹbẹ nọ o be rro makọ evaọ erẹwho nọ i re se eha nọ a riobe gaga dede. Kọ ẹvẹ ma sai ro fiobọhọ kẹ ahwo nọ i no eria sa-sa ze je wo oghoghẹrẹ isiuru re a wuhrẹ oware nọ Ọghẹnẹ ọ gwọlọ mi ai?—Wawo 1 Ahwo Kọrint 9:20-23.

Oma-Thọvẹrẹ re Ma Fiobọhọ k’Amọfa

7. Ẹvẹ ‘ọrigbo nọ o wo ẹrọwọ avọ areghẹ’ na ọ rọ thọ omai no re ma fiobọhọ k’amọfa wuhrẹ ẹgwọlọ Ọghẹnẹ?

⁷ Iruo use-abọ o rẹ lọhọ omojọ otẹrọnọ who wo ekwakwa nọ i fo iruo na. Okwakwa nọ u fo iruo jọ nẹnẹ a rẹ sai ru ei woma viere hayo tube nwene iei odẹ notha dede fiki ẹgwọlọ ọkpokpọ. Ere ọvo na o rọ kpahe iruo mai orọ ewhowho ovuẹ Uvie Ọghẹnẹ na. Evaọ ikpe na kpobi, ‘ọrigbo nọ o wo ẹrọwọ avọ areghẹ’ na ọ rehọ ekwakwa nọ ma nwane gwọlọ rọ kẹ omai no, ebe nọ a ruẹrẹ fihọ kẹ uwuhrẹ Ebaibol. (Matiu 24:45) Fikiere a thọ omai vẹrẹ no re ma fiobọhọ kẹ ahwo ‘erẹwho kpobi gbe erua gbe . . . erọo-unu’ re a wuhrẹ kpahe ẹgwọlọ Ọghẹnẹ. (Eviavia 7:9) N’oke ruoke, a be rehọ ebe ekpokpọ ze re e nyate ẹgwọlọ ekpokpọ evaọ akpọ ọnana. Joma roro kpahe iriruo jọ.

8. (a) Didi abọ obe na “Let God Be True” o wo no evaọ ẹwha haro ewuhrẹ Ebaibol? (b) Didi okwakwa kẹ uwuhrẹ Ebaibol a siobọno evaọ 1968, kọ ẹvẹ a rọ rehọ ona ruẹrẹ iẹe họ? (c) Ẹvẹ obe Uzẹme na o ro fiobọhọ no evaọ iruo aru-ilele na?

⁸ No 1946 rite 1968, obe na “Let God Be True” a rehọ e riẹ ruiruo wọhọ okwakwa obọdẹ kẹ uwuhrẹ Ebaibol, yọ a kporo unu nọ ute ole 19,250,000 evaọ evẹrẹ 54. Nọ a siobọ noi evaọ 1968, obe na Uzẹme nọ U re Suohwo kpo Uzuazọ Ebẹdẹbẹdẹ a rehọ e riẹ ruiruo gaga evaọ ikpe buobu evaọ ewuhrẹ Ebaibol kugbe ahwo nọ i wo isiuru. Vẹre, o jọ oware odode re ahwo jọ a wuhrẹ kugbe Isẹri Jihova nukpe ruọ ukpe yọ a rẹ họ-ame he. Rekọ a ruẹrẹ obe onana họ re ọmọ-uwuhrẹ na ọ kpahe ẹme fihọ, avọ uduotahawọ re o fi oware nọ o bi wuhrẹ na họ iruo. Eme u no rie ze? Obe na Jehovah’s Witnesses—Proclaimers of God’s Kingdom o ta nọ: “Evaọ ikpe iruo esa nọ i muhọ evaọ September 1, 1968, je kuhọ evaọ August 31, 1971, ahwo 434,906 e họ-ame—onọ o rọ akuava bu vi ahwo nọ e họ-ame evaọ ikpe iruo esa nọ i kpemu!” Anwọ okenọ a ro siobọ noi, obe Uzẹme na o vaha kẹre gaga no—bu vi 107,000,000 evaọ evẹrẹ 117.

9. Didi ewoma ọrọ obe ọ Ria Bẹdẹ Bẹdẹ na, kọ didi ẹgba o wo no evaọ oma iwhowho Uvie na?

⁹ Evaọ 1982 obe na Whọ Sae Ria Bẹdẹ Bẹdẹ eva Aparadase ọ Otọakpọ u te zihe ruọ ugogo obe nọ a bi ro wuhrẹ Ebaibol. Obe onana u wo ifoto nọ i bu vi 150, ọvuọvo avọ eme nọ a kere fihọ otọ riẹ nọ i ru ifoto na vevẹ ziezi. Odibọgba Uvie Mai ọrọ October 1982 (ọrọ Oyibo) o ta nọ: “Evaọ etoke ikpe 20 nọ obe na ‘Let God Be True’ ọ jọ ugogo obe nọ ma je ro ru uwuhrẹ na (no 1946 rite udevie ikpe 1960) iwhowho Uvie ekpokpọ nọ i kuomagbe omai i bu vi 1,000,000. Iwhowho-uvie 1,000,000 efa i te kuomagbe nọ obe Uzẹme nọ U re Suohwo kpo Uzuazọ Ebẹdẹbẹdẹ na u zihe ruọ ugogo obe uwuhrẹ mai nọ a siobọ noi evaọ 1968. Evaọ efihiruo obe uwuhrẹ ọkpokpọ mai na, Whọ Sae Ria Bẹdẹ Bẹdẹ eva Aparadase ọ Otọakpọ, kọ ma te ruẹ oghẹrẹ ẹvi otiọye na evaọ unu iwhowho Uvie na? O te jọ ere, otẹrọnọ o rọ oreva Jihova!” O rọ vevẹ nọ o ghinẹ jọ oreva Jihova, keme no 1982 rite 1995, ahwo nọ i bu vi 2,700,000 i kuomagbe unu iwhowho Uvie na!

10. Didi okwakwa okpokpọ a siobọno evaọ 1995, kọ ẹvẹ u re ro fiobọhọ kẹ emọ-iwuhrẹ Ebaibol ru vẹrẹ evaọ ẹnyaharo ẹzi?

¹⁰ Jesu ọ ta nọ: “Ivuẹvu na i ghine bu, rekọ iruiruo e rẹ kakaọ.” (Matiu 9:37) Uzẹme, ivuẹvu na e ghinẹ rọ ruaro. Iruo buobu e gbẹ riẹ nọ ma re ru. Evaọ ekuotọ jọ ahwo a re dhuye họ kẹ iwuhrẹ Ebaibol. Fikiere avọ irẹro ẹkẹre eriariẹ Ọghẹnẹ vẹrẹ vẹrẹ, evaọ 1995 ‘ọrigbo nọ o wo ẹrọwọ avọ areghẹ’ na ọ tẹ rọ obe okpokpọ ze, obe ewẹ-obe 192 nọ uzoẹme riẹ o rọ Eriariẹ Nọ I Re Su Kpohọ Uzuazọ Ebẹdẹ Bẹdẹ. Okwakwa oghaghae onana o tẹro vi iwuhrẹ erue he. O rehọ izẹme Ebaibol via liọliọ. Ma rẹro nọ o ti ru emọ-iwuhrẹ Ebaibol ru vẹrẹ omojọ evaọ ẹnyaharo ẹzi rai. Obe Eriariẹ na u muọ iruo họ eru no evaọ udhu akpọ na avọ unu ọ 45,500,000 nọ a kporo no evaọ evẹrẹ 125 avọ efafa kpohọ evẹrẹ 21 nọ e gbẹ rọ edhere.

11. Didi okwakwa uwoma a siobọno re u fiobọhọ wuhrẹ ahwo nọ e riobe vievie he hayo enọ e riẹ ese ziezi hi, kọ ẹvẹ u ro fiobọhọ no evaọ ọruẹrẹfihotọ ewuhrẹ akpọ soso mai?

¹¹ N’oke ruọ oke, ‘ọrigbo ẹrọwọ’ na o re kporo ebe nọ e rọ kẹ umutho ahwo jọ hayo rọkẹ oghẹrẹ ahwo jọ ọvo. Wọhọ oriruo, k’ẹvẹ kpahe ahwo nọ e rẹ gwọlọ obufihọ obọdẹ fiki uruemu ẹwho hayo egagọ rai? Ẹvẹ ma sai ro fiobọhọ kẹ ai wuhrẹ ẹgwọlọ Ọghẹnẹ? Evaọ 1982 ma te wo oware nọ ma nwane gwọlọ—ibroshọ ewẹ-obe 32 na Reawere Uzuazọ Otọakpọ Bẹdẹ Bẹdẹ! Ibroshọ ọnana nọ iwoho e vọ na ọ rọ okwakwa obọdẹ evaọ ewuhrẹ ahwo nọ a riẹ ese vievie he hayo enọ e riẹ ese ziezi hi. O wo eme ehri iwuhrẹ Ikereakere elọlọhọ nọ a rẹ kaki wo otoriẹ rai. Anwọ okenọ a ro siobọ noi, ibroshọ Reawere Uzuazọ na o ruiruo gaga no evaọ ọruẹrẹfihotọ ewuhrẹ akpọ soso mai. Bu vi unu ọ 105,100,000 a kporo no evaọ evẹrẹ 239, nọ u ru rie họ obe Watch Tower Society nọ a mae kporo kpobi rite inẹnẹ!

12, 13. (a) No anwọ 1990 ze, edhere okpokpọ vẹ ‘ọrigbo ẹrọwọ na’ ọ rọ lahwe no re ọrọ nyate oghẹrẹ ahwo sa-sa? (b) Ẹvẹ ma sae rọ rehọ ividio Ukoko-Ulogbo na ruiruo evaọ odibọgba mai? (c) Okwakwa okpokpọ vẹ a siobọno kẹle re u fiobọhọ evaọ iruo aru-ilele mai na?

¹² Fiba ebe nọ a kporo, muhọ evaọ 1990 ‘ọrigbo ẹrọwọ na’ ọ tẹ k’omai edhere uwuhrẹ okpokpọ nọ ma rẹ rọ nyate ogbotu buobu—ekasẹte ividio. Evaọ October ukpe oyena, a te siobọno ividio iminiti 55 na Jehovah’s Witnesses—The Organization Behind the Name—ividio ọsosuọ nọ Watch Tower Society o tu kporo. Ividio ọnana nọ ọ rọ wowoma na, avọ evuẹ obufihọ na, a kporo i rie evaọ evẹrẹ 35 no, nọ u dhesẹ ukoko akpọ soso ahwo Jihova nọ e roma kẹ no bi ru ujaje Jesu gba re a whowho usiuwoma na evaọ otọakpọ na soso. A mae ruẹrẹ ividio na họ re u fiobọhọ evaọ iruo aru-ilele mai na. Iwhowho Uvie na a raha oke he evaọ efihiruo okwakwa okpokpọ onana evaọ odibọgba. Ejọ a rẹ whae kpohọ usiuwoma ota, a ve dhesiẹe hayo momo iei kẹ ahwo nọ i wo isiuru. U kri hi, nọ a siobọ noi no, ọsẹro ọnyawariẹ jọ o te kere nọ: “Ividio u zihe ruọ oware nọ a be rọ nyate iroro gbe ibiudu ima ahwo no evaọ ikpe-udhusoi avọ 21 na, fikiere o rọ irẹro mai inọ ividio ọnana ọ te jọ emuhọ ividio nọ Ukoko-Ulogbo o ti fihọ iruo evaọ iruo Uvie na evaọ akpọ na soso.” Uzẹme, a kporo ividio efa no, kugbe ọrọ abasa na The Bible—A Book of Fact and Prophecy gbe Jehovah’s Witnesses Stand Firm Against Nazi Assault. Otẹrọnọ ividio Ukoko-Ulogbo na e rọ ẹvẹrẹ ra, kọ who fi rai họ iruo no evaọ odibọgba ra?a

¹³ Kẹle na a rehọ okwakwa okpokpọ, ibroshọ ọ Eme Ọghẹnẹ Ọ Gwọlọ Mi Omai? na, rọ k’omai no re u fiobọhọ evaọ iruo aru-ilele mai na. Fikieme a je kporo iei? Ẹvẹ a rẹ rọ rehọ iẹe ruiruo?

Ọkiẹriwo Okwakwa Okpokpọ

14, 15. Amono a ruẹrẹ ibroshọ Eme Ọghẹnẹ Ọ Gwọlọ na kẹ, kọ eme e rọ eva riẹ?

¹⁴ Obe okpokpọ na Eme Ọghẹnẹ Ọ Gwọlọ Mi Omai? a kporo i riei kẹ ahwo enọ e rọwo Ọghẹnẹ jẹ be kẹ Ebaibol na adhẹẹ. Esẹro enyawariẹ gbe imishọnare Gilead nọ i wo eriariẹ evaọ ikpe buobu evaọ ekuotọ nọ i bi rovie aro tha họ enọ i fiobọhọ evaọ ọruẹrẹfihọ ibroshọ ọnana. U wo oma uwuhrẹ nọ u kodo ziezi, nọ u duobọ te igogo iwuhrẹ Ebaibol. Eme riẹ e rọ sasasa, lọlọhọ, jẹ rọ liọliọ. Evaọ oke ovo na, a nwani ru eme riẹ lọhọ hrọ họ. Orọnikọ “ame-ivie” ọvo ọ rehọ kẹ hẹ rekọ “emu ọgaga” re ro no Ẹme Ọghẹnẹ ze evaọ edhere nọ ọ rẹ sai vẹ ahwo buobu ẹro.—Ahwo Hibru 5:12-14.

¹⁵ Kẹle na iwhowho Uvie evaọ ekuotọ sa-sa a nwane yare oghẹrẹ obe otiọye no. Wọhọ oriruo, uwou-ogha Watch Tower Society evaọ Papua New Guinea o kere nọ: “Iwuhrẹ egagọ nọ i bi kpeke i reghe ahwo aro no. A gwọlọ eme uzẹme nọ e rọ liọliọ, enọ eria Ebaibol sa-sa e tha uke enọ a rẹ sae kiẹ riwi evaọ Ebaibol obọ rai. A gwọlọ obe nọ o rọ vevẹ jẹ rọ liọliọ kpahe oware nọ Ọghẹnẹ ọ gwọlọ mi Ileleikristi uzẹme jegbe iruemu-ẹwho gbe iruẹru nọ ọ jẹrehọ họ.” Ibroshọ Eme Ọghẹnẹ Ọ Gwọlọ na yọ oware nọ ma nwane gwọlọ re u fiobọhọ kẹ ahwo itieye na wuhrẹ ẹgwọlọ Ọghẹnẹ.

16. (a) Kọ amono a rẹ mai wo erere no eme elọlọhọ ibroshọ ọkpokpọ na ze? (b) Ẹvẹ ahwo nọ e rọ ẹkuotọ ra a sai ro wo erere no ibroshọ Eme Ọghẹnẹ Ọ Gwọlọ na ze?

¹⁶ Ẹvẹ whọ rẹ rọ rehọ okwakwa okpokpọ onana ruiruo? Orọ ọsosuọ, a rẹ sae rehọ iẹe wuhrẹ kugbe ahwo nọ i wo ẹbẹbẹ isase hayo enọ i wo oma obe u se he. Ahwo itieye na a rẹ sai wo erere no edhesẹ ọlọlọhọ ibroshọ ọnana ze. Nọ a kiẹ ọrọ ọsosuọ obe nana nọ o kaki te ai obọ riwi no, iwou-ogha Watch Tower a te kere enẹ: “Ibroshọ na o ti fiobọhọ gaga evaọ abọ orẹwho na buobu nọ ahwo a rẹ sae jọ keria se obe oke krẹkri hi.” (Brazil) “Erara jọ e riẹ enọ e rẹ sai se ẹvẹrẹ obọ rai hi gbe enọ i gbe wo ẹbẹbẹ evaọ ese ẹvẹrẹ French. Ibroshọ ọnana yọ obufihọ evaọ ewuhrẹ kugbe ahwo itieye na.” (France) Kọ whọ sai roro kpahe ahwo evaọ ẹkuotọ ra enọ e rẹ sai wo erere no ibroshọ Eme Ọghẹnẹ Ọ Gwọlọ na ze?

17. Evaọ edhere vẹ ibroshọ ọkpokpọ na o ti ro wo iruo evaọ ekuotọ buobu, kọ fikieme?

¹⁷ Orọ avivẹ, evaọ ekuotọ buobu ibroshọ na o ti wo iruo evaọ emuhọ iwuhrẹ Ebaibol kugbe ahwo nọ e be dhozọ Ọghẹnẹ makọ epanọ a riobe te. Dede, a rẹ daoma re a rehọ obe ọ Eriariẹ Nọ I Re Su Kpohọ Uzuazọ Ebẹdẹ Bẹdẹ na mu ewuhrẹ họ. Rekọ ẹsejọ o rẹ mae lọhọ re a rehọ ibroshọ na mu uwuhrẹ họ. Nọ oke o tẹ kuvẹ, a ve nwene uwuhrẹ na kpohọ obe Eriariẹ na, ugogo obe mai gbe onọ ma mae salọ kẹ obọfihọ uwuhrẹ na. Kpahe efihiruo ibroshọ Eme Ọghẹnẹ Ọ Gwọlọ ọnana, iwou-egha Watch Tower a kere nọ: “Re a mu uwuhrẹ Ebaibol họ o rọ bẹbẹ, yọ o wọhọ nọ uvẹ nọ a re ro mu uwuhrẹ họ o mae lọhọ nọ iwhowho-uvie a tẹ rehọ ibroshọ muhọ.” (Germany) “Oghẹrẹ ibroshọ otiọna o te mai woma evaọ emuhọ iwuhrẹ Ebaibol, onọ a rẹ sai nwene kpohọ obe Eriariẹ na.” (Italy) “Dede nọ ahwo Japan a riobe gaga, ibuobu rai a riẹ kpahe iwuhrẹ Ebaibol na tere he. Ibroshọ na yọ omamọ okwakwa nọ a rẹ rọ j’owọ ruọ obe Eriariẹ na.”—Japan.

18. Eme ma rẹ kareghẹhọ kpahe ẹnyate ẹgwọlọ Ọghẹnẹ?

¹⁸ Iwou-egha Ukoko-Ulogbo evaọ akpọ na soso a yare ibroshọ ọnana no, yọ a kẹ uvẹ no re a fae fihọ evẹrẹ 221. Jọ obe okpokpọ onana o wo emamọ iruo re o fiobọhọ k’omai wuhrẹ amọfa oware nọ Jihova Ọghẹnẹ ọ gwọlọ mi ai. Rọ kẹ abọ mai, joma kareghẹhọ nọ ẹnyate ẹgwọlọ Ọghẹnẹ, kugbe ujaje na re a ta usiuwoma je ru ilele, o rẹ k’omai uvẹ ulogbo nọ ma re ro dhesẹ kẹ Jihova epanọ ma you rie te. Ẹhẹ, oware nọ Ọghẹnẹ ọ gwọlọ mi omai o rọ owha ogbẹgbẹdẹ hẹ. Oye họ edhere nọ o mai woma ẹria!—Olezi 19:7-11.

[Footnotes]

Kọ Whọ Sae k’Iyo Nana Vevẹ?

◻ Didi iruo akuava Jihova ọ gwọlọ nọ idibo riẹ a w’abọ kugbe?

◻ Fikieme owha-iruo mai re ma ta usiuwoma je ru ilele o gbẹ rọ owha ogbẹgbẹdẹ k’omai hi?

◻ Didi ekwakwa ‘ọrigbo nọ o wo ẹrọwọ avọ areghẹ’ na ọ rọ kẹ no nọ ma re ro ruiruo evaọ iruo aru-ilele mai na?

◻ Amono a ruẹrẹ ibroshọ Eme Ọghẹnẹ Ọ Gwọlọ na họ kẹ, kọ ẹvẹ ma sae rọ rehọ iẹe ruiruo evaọ odibọgba mai na?

[Picture on page 15]

Iruo usiuwoma ota gbe aru-ilele mai na e rọ owha ogbẹgbẹdẹ hẹ

[Pictures on page 17]

“Let God Be True” (1946, a wariẹ kporo iei 1952): 19,250,000 evaọ evẹrẹ 54 (Orọ Oyibo a dhesẹ na)

“Uzẹme nọ U re Suohwo kpo Uzuazọ Ebẹdẹbẹdẹ” (1968): 107,000,000 evaọ evẹrẹ 117 (Orọ French a dhesẹ na)

“Whọ Sae Ria Bẹdẹ Bẹdẹ eva Aparadase ọ Otọakpọ” (1982): 80,900,000 evaọ evẹrẹ 130 (Orọ Russian a dhesẹ na)

“Eriariẹ Nọ I Re Su Kpohọ Uzuazọ Ebẹdẹ Bẹdẹ” (1995): 45,500,000 evaọ evẹrẹ 125 (Orọ German a dhesẹ na)