“Nọ Wha Te Rueriẹ E He, Wha You Rie”

“Nọ wha te rueriẹ e he, wha you rie; makinọ enẹna wha be ruẹ e he na, wha rọwo riẹ, wha tẹ rẹ ghọghọ avọ oghọghọ ulogbo nọ a sai gbiku riẹ hẹ.”—1 PITA 1:8.

1. Dedenọ ohwo ọvo evaọ otọakpọ nẹnẹ ọ ruẹ Jesu hu, ẹvẹ ahwo egagọ jọ a be rọ daoma dhesẹ omarọkẹ rai kẹe?

OHWO ọvuọvo nọ ọ rọ uzuazọ evaọ otọakpọ nẹnẹ nọ ọ ruẹ Jesu Kristi no ọ rọ họ. Ghele, ima ahwo a be ta nọ a you rie. Kukpe kukpe evaọ January 9, evaọ Manila, obọ Philippines, a re si ẹmema ologbo Jesu Kristi nọ o rọ uruwhere nya iyẹrẹ na kpobi wariẹ evaọ oware nọ a dhesẹ wọhọ odhesẹvia egagọ okafe nọ o mae viodẹ kpobi evaọ orẹwho na. Ogbotu na nọ oma u bi mu na a ve tunye haro je bi gele ohwohwo; ahwo a rẹ tubẹ gadiẹ ehru ohwohwo dede re a ruẹse kaobọ te ẹmema na. Oware nọ o soriẹ nọ ahwo buobu a jẹ nyaze na họ ẹjaja ehaa na. Ghele, ibuobu rai yọ ahwo nọ a ghinẹ gwọlọ bigba Jesu. Eva edhesẹ imuẹro rai, a rẹ wha ufiare oka uruwhere hayo kpohọ ichọche kẹse kẹse. Ghele, kọ a sai rri ẹdhọgọ otiọye na wọhọ egagọ uzẹme?

2, 3. (a) Amono evaọ udevie ilele Jesu a ghinẹ ruẹ je yo eme riẹ? (b) Amono efa evaọ ikpe-udhusoi ọsosuọ na a you Jesu je fi ẹrọwọ họ iẹe, dede nọ a rehọ ẹro rueriẹ hẹ?

² Evaọ ikpe-udhusoi ọsosuọ, ahwo idu buobu e jariẹ evaọ ẹkuotọ Rom ọrọ Judia, Sameria, Pẹria, gbe Galili enọ e rehọ aro rai ghinẹ ruẹ Jesu Kristi je yo eme riẹ. A jẹ gaviezọ nọ o je ru uzẹme omosasọ kpahe Uvie Ọghẹnẹ vevẹ. A rehọ aro rai ruẹ eware igbunu nọ o ru. Ejọ rai a te zihe ruọ ilele riẹ nọ e roma kẹ, enọ u muẹro nọ ọye họ “Kristi na, Ọmọ Ọghẹnẹ uzuazọ.” (Matiu 16:16) Ghele, ahwo nọ Pita ukọ na o kere ileta ọsosuọ riẹ nọ ẹzi ọ kpọ se a jọ usu ahwo enana ha.

³ Ahwo nọ Pita o kere se a jẹ rria ofẹ ẹkuotọ Rom ọrọ Pọntus, Galesha, Kapadosia, Esia, gbe Bithinia—aikpobi evaọ okogho Turkey ọgbọna. Ro se ai Pita o kere nọ: “Nọ wha te rueriẹ e he, wha you rie; makinọ enẹna wha be ruẹ e he na, wha rọwo riẹ, wha tẹ rẹ ghọghọ avọ oghọghọ ulogbo nọ a sai gbiku riẹ hẹ.” (1 Pita 1:1, 8) Ẹvẹ a rọ riẹ Jesu Kristi te epanọ a ro you rie je bi fi ẹrọwọ họ iẹe?

4, 5. Ẹvẹ ahwo nọ e ruẹ Jesu a ro wuhrẹ kpahe iẹe ziezi re a you rie je fi ẹrọwọ họ iẹe?

⁴ U muẹro nọ, ejọ e jọ Jerusalẹm okenọ Pita ukọ na o se isẹri kẹ ogbotu nọ e ziọ ehaa Pẹntikọst evaọ 33 C.E. Nọ ehaa na o vrẹ no ilele buobu a tẹ daji Jerusalẹm re a gbe wuhrẹ mi ikọ na. (Iruẹru 2:9, 41, 42; wawo 1 Pita 1:1.) Evaọ erẹ imishọnare buobu nọ ọ nya, Pọl ukọ na ọ tẹ wha odibọgba ajọwha haro evaọ usu ahwo enana re enọ e be rria eria nọ Pita o vi ileta ọsosuọ Ebaibol nọ a rọ odẹ riẹ se na kpohọ.—Iruẹru 18:23; 19:10; Ahwo Galesha 1:1, 2.

⁵ Fikieme ahwo yena, enọ e re ruẹ Jesu hu na, a ro bigbae ga tere? Evaọ edẹ mai na, kọ eme jabọ ima ahwo efa, evaọ akpọ na kpobi, a ro you rie ga tere?

Eware nọ A Yo

6. (a) Otẹrọnọ who yo Pita nọ o je se isẹri kpahe Jesu eva Pẹntikọst 33 C.E., eme whọ hai wuhrẹ? (b) Ẹvẹ onana u kpomahọ ahwo 3,000 jọ enọ e jọ etẹe?

⁶ Otẹrọnọ whọ jọ Jerusalẹm okenọ Pita ọ t’ẹme kẹ ogbotu ehaa eyena evaọ 33 C.E., kọ eme whọ hai wuhrẹ kpahe Jesu? Ababọ avro, eware igbunu nọ o ru i dhesẹ nọ Ọghẹnẹ o vi rie ze. Inọ, dede nọ erahaizi a kpe Jesu, ọ gbẹ rọ evaọ uki hi rekọ a kpare riẹ no uwhu ze no jegbe nọ a kpare riẹ kpohọ odhiwu no ziọ obọze Ọghẹnẹ. Inọ ghinọ Jesu họ Kristi na, Mesaya nọ eruẹaro na a kere kpahe na. Inọ ẹkwoma Jesu Kristi, a ro ku ẹzi ọfuafo họ ilele riẹ re a se isẹri kẹ ahwo erẹwho kpobi kpahe eware igbunu nọ Ọghẹnẹ o bi ru ẹkwoma Ọmọ riẹ. Eme enana i duobọ te idu ahwo buobu enọ i yo eme Pita, yọ ahwo 3,000 e họ-ame wọhọ Ileleikristi. (Iruẹru 2:14-42) Otẹrọnọ whọ jọ etẹe, kọ whọ hae j’owọ yena?

7. (a) Otẹrọnọ whọ jọ evaọ Antiọk okenọ Pọl ukọ na ọ jọ obei ta usiuwoma, eme whọ hai wuhrẹ? (b) Fikieme ejọ evaọ ogbotu na a rọ rọwo jẹ ghale usiuwoma na kugbe amọfa?

⁷ Otẹrọnọ whọ jọ usu ahwo na okenọ Pọl ukọ na o je wuhrẹ evaọ Antiọk evaọ ẹkuotọ Rom ọrọ Galesha na, kọ eme ọfa whọ hai wuhrẹ kpahe Jesu? Whọ jẹ hai yo Pọl nọ ọ be ta nọ eruẹaro na a ruẹaro kpahe Jesu inọ isu Jerusalẹm a reti bruoziẹ uwhu kpei. Whọ hai yo re kpahe ahwo nọ a rọ ẹro ruẹ ẹkparomatha Jesu. Ababọ avro, eme nọ Pọl o ru vẹ na o hai si owhẹ urru inọ ẹkwoma Jesu nọ a kpare no uwhu ze na, Jihova ọ rọ kẹ imuẹro nọ ghinọ ọnana họ Ọmọ Ọghẹnẹ. Kọ o gbẹ hai ru owhẹ ghọghọ re who wuhrẹ nọ erọvrẹ izieraha o lọhọ inọ ẹkwoma ẹrọwọ fihọ Jesu o rẹ sai su kpohọ uzuazọ ebẹdẹ bẹdẹ? (Iruẹru 13:16-41, 46, 47; Ahwo Rom 1:4) Nọ a vuhu epanọ oware nọ a bi yo u wuzou te no, ejọ evaọ Antiọk a te zihe ruọ ilele, be ghale usiuwoma na kugbe amọfa avọ ajọwha, dede nọ ere oruo o rẹ wha ukpokpoma ze.—Iruẹru 13:42, 43, 48-52; 14:1-7, 21-23.

8. Otẹrọnọ whọ jọ ewuhrẹ evaọ ukoko obọ Ẹfẹsọs na nọ ileta Pọl u te ai obọ, eme whọ hai wuhrẹ?

⁸ Kọ otẹrọnọ whọ jọ ukoko Ileleikristi na evaọ obọ Ẹfẹsọs, evaọ ẹkuotọ Rom obọ Esia, evaọ okenọ ileta Pọl nọ a rọ ẹzi kere na u te ilele obei na obọ? Kọ eme whọ hai wuhrẹ noi ze kpahe ọkwa Jesu evaọ ẹjiroro Ọghẹnẹ? Evaọ ileta ọyena Pọl o ru rie vevẹ nọ ẹkwoma Kristi a te rọ rehọ eware kpobi evaọ obọ odhiwu gbe otọakpọ ze kugbe Ọghẹnẹ, inọ okẹ Ọghẹnẹ ẹkwoma Kristi u te ahwo erẹwho kpobi, inọ omomọvo enọ i whu no evaọ aro Ọghẹnẹ fiki emuemu rai vẹre a ru rai ziọ uzuazọ no ẹkwoma ẹrọwọ evaọ Kristi, jegbe nọ fiki ọruẹrẹfihotọ ọnana, o wariẹ lọhọ no kẹ ahwo-akpọ re a jọ emọ iyoyou Ọghẹnẹ.—Ahwo Ẹfẹsọs 1:1, 5-10; 2:4, 5, 11-13.

9. (a) Eme u re fiobọhọ k’owhẹ riẹ sọ who wo otoriẹ oware nọ Pọl o kere se ahwo Ẹfẹsọs na? (b) Ẹvẹ eware nọ a je wuhrẹ kpahe Jesu na i ro kpomahọ inievo ekuotọ Rom nọ Pita ọ t’ẹme fodẹ na?

⁹ Kọ ovuhumuo kẹ enana kpobi o hai ru uyoyou ra kẹ Ọmọ Ọghẹnẹ kodo viere? Kọ uyoyou oyena o hai kpomahọ uzuazọ ikẹdẹ kẹdẹ ra, wọhọ epanọ ukọ na o ru rie vevẹ evaọ izou 4 rite 6 ọrọ obe ahwo Ẹfẹsọs na? Kọ ovuhumuo otiọye na o hae wọ owhẹ re whọ kiẹ eware nọ e mae rọ owhẹ oja evaọ uzuazọ riwi ziezi? Fiki uyoyou kẹ Ọghẹnẹ gbe uyere kẹ Ọmọ riẹ, kọ whọ hai ru inwene nọ a gwọlọ re eruo oreva Ọghẹnẹ o jọ oware ọsosuọ evaọ uzuazọ ra? (Ahwo Ẹfẹsọs 5:15-17) Rọ kpahe oghẹrẹ nọ eware nọ Ileleikristi obọ Esia, Galesha, gbe ekuotọ Rom efa a je wuhrẹ i kpomahọ ai, Pita ukọ na o kere se ai nọ: “Nọ wha te rueriẹ [Jesu Kristi] he, wha you rie; . . . wha rọwo riẹ, wha tẹ rẹ ghọghọ avọ oghọghọ ulogbo nọ a sai gbiku riẹ hẹ.”—1 Pita 1:8.

10. (a) Ababọ avro, eme u fiba uyoyou Ileleikristi ọsosuọ kẹ Jesu? (b) Ẹvẹ ma sai ro wo erere re?

¹⁰ Oware ofa o riẹ nọ u fiba uyoyou kẹ Ọmọ Ọghẹnẹ onọ u duobọ te Ileleikristi ọsosuọ nọ Pita o kere se na. Didi oware oye? Evaọ etoke nọ Pita o ro kere ileta ọsosuọ riẹ, o tẹ kawo yọ ebe Usiuwoma ivẹ—Matiu avọ Luk—i muọ ahwo na obọ họ ete no. Ileleikristi ikpe-udhusoi ọsosuọ nọ e ruẹ Jesu vievie he a rẹ sai se ikere Usiuwoma enana. Ma rẹ sai se ai re. Ebe Usiuwoma na e rọ iku esia ha; i wo oka ikuigbe uzẹme nọ a re fievahọ. Evaọ ikere eyena nọ a kẹ ẹgba na, ma ruẹ eware buobu nọ e via nọ uyoyou mai kẹ Ọmọ Ọghẹnẹ o je kodo gaga.

Ẹzi nọ O Dhesẹ

11, 12. Eme o rọ ẹzi nọ Jesu o dhesẹ kpahe ahwo-akpọ efa nọ u ru owhẹ you rie?

¹¹ Evaọ okerefihotọ uzuazọ Jesu, ma wuhrẹ epanọ o ro yeri kugbe amọfa. Ẹzi nọ o dhesẹ u duobọ te udu amọfa no makọ enẹna dede, bu vi ikpe 1,960 nọ o ro whu no. Oware nọ uzioraha o wha ze o bẹ ahwo nọ e rọ uzuazọ kpobi t’unu no. Ima ahwo buobu a kie ruọ ẹdhoguo-okienyẹ no, a rọ otọ ghelie fiki ẹyao, hayo fiki ẹjiroro efa akpọ nọ o bẹ rai no. Rọ kẹ ahwo itieye na kpobi, Jesu ọ ta nọ: “Whai e ruẹ uye gbe enọ e wha owha ogbẹgbẹdẹ kpobi, wha bru omẹ ze, mẹ rẹ kẹ owhai udhedhẹ. Rehọ owhowha mẹ wha, wha wuhrẹ omẹ, keme me re wowolẹ jegbọ eva i ro kpotọ, wha rẹ te ruẹ udhedhẹ kẹ izi rai. Keme owhowha mẹ o rọ lọlọhọ, owha mẹ u re vovovo.”—Matiu 11:28-30.

¹² Jesu o dhesẹ ọdawẹ kẹ iyogbere, enọ ohọo u je kpe, gbe enọ i je weri. Nọ eyero o gwọlọ ere oruo, ọ rehọ edhere igbunu ko ogbotu obuobu. (Luk 9:12-17) Ọ kẹ rai ufuoma no igbo iruemu-anwae. Ọ tẹ jẹ bọ ẹrọwọ rai ga evaọ ọruẹrẹfihotọ Ọghẹnẹ re ọ rehọ oba te ọyawọ esuo gbe eyero-ugho. Jesu ọ raha ẹzi ahwo nọ akpọ ọ bẹ no vẹre he. Avọ ẹwolẹ gbe uyoyou, ọ rehọ ona kẹ erọ omarokpotọ na ọbọga. Ọ sasa ahwo nọ e wọhọ ikpoko nọ i wiri rẹrẹ no oma jegbe enọ e wọhọ ukpẹ nọ o kẹle efu no. Nọ okioye ze rite inẹnẹ, odẹ riẹ o be kẹ ẹruore, makọ evaọ idu ahwo nọ a re rueriẹ ẹdẹvo ho dede.—Matiu 12:15-21; 15:3-10.

13. Fikieme edhere nọ Jesu o je ro yeri kugbe erahaizi u je ro si ahwo urru?

¹³ Jesu ọ jẹ eyoma-oruo rehọ họ, ghele o dhesẹ otoriẹ kẹ ahwo nọ i ruthọ evaọ uzuazọ rekọ nọ i dhesẹ ekurẹriẹ je bru ei ze rọ kẹ obufihọ. (Luk 7:36-50) Ọ rẹ keria kugbe je lele ahwo nọ a jọ okegbe na jẹ kufiẹ re emu nọ ọ tẹ riẹ nọ onana o te kẹe uvẹ nọ o re ro fiobọhọ kẹ ai evaọ ẹzi. (Matiu 9:9-13) Fiki ẹzi nọ o dhesẹ, oma o wọ ima ahwo buobu nọ e rẹ te ruẹ Jesu hu enọ e rọ oghẹrẹ eyero otiọye na re a gwọlọ riẹe je fi ẹrọwọ họ iẹe.

14. Eme u si owhẹ urru kpahe edhere nọ Jesu o ro fiobọhọ kẹ ahwo nọ e jẹ mọ, enọ e ko, hayo enọ i je weri?

¹⁴ Oghẹrẹ nọ Jesu o yeri kugbe ahwo nọ e jẹ mọ hayo enọ e ko o kẹ imuẹro omosasọ gbe ohrọ riẹ jegbe ẹgba riẹ nọ ọ rẹ rọ wha ufuoma se ai. Fikiere, nọ ọmoti o bru ei ze jẹ lẹe kẹ obufihọ, Jesu ọ rehọ ubiẹro onyẹnyẹ rri ọzae na ha. Yọ ọ ta kẹ ọzae na nọ, dede nọ ohrọ riẹ o be riẹe, ẹyao na ọ ga hrọ no jegbe nọ oware ovo o riẹ nọ ọ rẹ sai ru hu hu. Ọzae na ọ lẹ nọ: “Olori, otẹ ruọ owhẹ, whọ sai ru omẹ fua.” Ababọ izudhe, Jesu ọ tẹ nwane r’obọ te ọmoti na, anọ: “Oruomẹ; whọ rẹ fua.” (Matiu 8:2, 3) Evaọ okiọfa aye jọ nọ ọ gwọlọ nọ a re siwi iei ọ tẹ lẹlẹ r’obọ te ozọ ewu riẹ. Jesu ọ rehọ edhere owowolẹ gbe imuẹro ta ẹme kẹe. (Luk 8:43-48) Yọ nọ ọ ruẹ ohwo nọ a be wọ nya i kie, ohrọ aye-uku nọ ọ rọ uweri na nọ ọmọ ọvo riẹ o whu na u te duobọ tei udu. Dede nọ Jesu ọ se nọ ọ rẹ rehọ ogaga nọ Ọghẹnẹ ọ kẹ riẹ ru emu kẹ omobọ riẹ hẹ, ọ rehọ e riẹ kpare ọzae owhuowhu ọyena jẹ rehọ iẹe zihe kẹ oni riẹ.—Luk 4:2-4; 7:11-16.

15. Ẹvẹ ese gbe eroro kpahe iku Jesu u ro kpomahọ owhẹ?

¹⁵ Nọ ma bi se eme enana je roro kpahe ẹzi nọ Jesu o dhesẹ na, uyoyou mai u re diwi kẹ ohwo ọnana nọ o fi uzuazọ ohwo-akpọ riẹ h’otọ k’omai na re ma sae rria bẹdẹ bẹdẹ na. Dede nọ ma rueriẹ hẹ, ma bi bigbae, yọ ma gwọlọ lele ithihi riẹ.—1 Pita 2:21.

Ẹro nọ Ọ rọ So Ọghẹnẹ avọ Omarokpotọ

16. Ono Jesu ọ mae rẹriẹ ova ku, kọ eme ọ tudu họ omai awọ nọ ma ru?

¹⁶ Maero, Jesu ọ rẹriẹ ovao riẹ gbe ọmai bru Ọsẹ obọ odhiwu riẹ, Jihova Ọghẹnẹ. Ọ fodẹ ujaje nọ o mae rro kpobi evaọ Uzi na, anọ: “Whọ rẹ rehọ eva ra kpobi, gbe ẹzi ra kpobi, gbe iroro ra kpobi, you Ọnowo na Ọghẹnẹ ra.” (Matiu 22:36, 37) Ọ hrẹ ilele riẹ nọ: “Wha rọo Ọghẹnẹ.” (Mak 11:22) Okenọ a rẹriẹ ova ku ẹdawọ ologbo ọrọ ẹrọwọ rai, ọ tẹ ta kẹ ai nọ: “Hẹ lẹ.”—Matiu 26:41.

17, 18. (a) Ẹvẹ Jesu o ro dhesẹ ẹrorọsuọ riẹ kẹ Ọsẹ riẹ avọ omarokpotọ? (b) Fikieme oware nọ o ru u je wuzou k’omai tere?

¹⁷ Jesu omariẹ ọ kẹ oriruo na. Olẹ o jọ abọ ologbo evaọ uzuazọ riẹ. (Matiu 14:23; Luk 9:28; 18:1) Nọ oke u te no re ọ salọ ikọ riẹ, Jesu ọ nwane rẹro so omariẹ hẹ, dede nọ vẹre enjẹle na kpobi evaọ obọ odhiwu a jọ otọ ẹruọsa riẹ. Avọ omarokpotọ ọ raha aso jọ soso evaọ olẹ se Ọsẹ riẹ. (Luk 6:12, 13) Nọ ọ rẹriẹ ova dhe imuẹmu gbe uwhu odada, Jesu ọ tẹ jẹ rẹriẹ bru Ọsẹ riẹ, be jẹ lẹ gaga. Ọ rehọ eriwo na ha inọ ọ riẹ Setan ziezi jegbe nọ ọ sai dikihẹ kẹ ẹghẹ riẹ. Jesu o vuhu epanọ u wuzou te kẹe re ọ seba ekie. Didi ẹkoko ekie riẹ o hẹ wha se Ọsẹ riẹ! Kọ didi oware ulogbo o he vru mi ohwo-akpọ, onọ ẹruore uzuazọ rai o roma hwa idhe nọ Jesu o re ti dhe na!

¹⁸ Jesu ọ lẹ ẹsikpobi—okenọ ọ jọ kugbe ikọ riẹ evaọ uwou okpehru evaọ Jerusalẹm jẹ maero dede evaọ ọgbọ Getsemane. (Matiu 26:36-44; Jọn 17:1-26; Ahwo Hibru 5:7) Okenọ ọ jẹ ruẹ-uye evaọ ehru ure oja na, ọ jẹ poviẹ ahwo nọ i je sei ẹkoko na ha. Ikpoye, ọ lẹ kẹ enọ e be rehọ ogbori ru anọ: “Ọsẹ, rehọ vrẹ ae; keme a riẹ epanọ a re ruo ho.” (Luk 23:34) Ọ rehọ oma riẹ kpobi kẹ Ọsẹ riẹ, “o fi oma riẹ họ-otọ kẹ ọnọ o re bruoziẹ kiete.” Eme urere nọ ọ ta evaọ ehru ure oja na yọ olẹ se Ọsẹ riẹ. (1 Pita 2:23; Luk 23:46) Ẹvẹ eva e rẹ were omai te inọ, avọ udu kpobi nọ o fihọ Jihova, Jesu ọ rehọ ẹrọwọ ru iruo kpobi nọ Ọsẹ na ọ kẹ riẹ gba! Dede nọ ma re ruẹ Jesu Kristi ẹdọvo ho, ẹvẹ ma you rie te kẹ oware nọ o ru na!

Edhesẹ Uyoyou Mai rọ Kẹe

19. Evaọ edhesẹ uyoyou kẹ Jesu, didi iruemu ethọthọ ma rẹ whaha riẹriẹriẹ?

¹⁹ Ẹvẹ ma sae rọ kẹ imuẹro inọ uyoyou nọ ma wo u vi orọ igbenu ọvo? Nọ Ọsẹ riẹ, ọnọ Jesu o you na, ọ ghọ eruo emema re a je ruwẹ kẹ ai na, o rẹ sae jọ nọ ma be rọ ọghọ se Jesu vievie he otẹrọnọ ma rẹ whẹ ẹmema otiọye họ ohọre mai hayo re ma wọ emema itieye na nya iyẹrẹ vrẹ. (Ọnyano 20:4, 5; Jọn 4:24) O rẹ jọ ọghọ rọ kẹ Jesu hu otẹrọnọ ma re kpohọ ehaa egagọ, otẹ make rọ nọ ma re ru ere ẹsibuobu evaọ ẹkpoka, kpakiyọ ma be rria lele iwuhrẹ riẹ hẹ evaọ edẹ eka nọ i kiọkọ. Jesu ọ ta nọ: “Ọ nọ ọ riẹ ijaje mẹ o je koko ai, ọye họ ọnọ o you omẹ; ọnọ o you omẹ, Ọsẹ mẹ o re ti yo yei.”—Jọn 14:21, 23; 15:10.

20. Eme họ eware jọ nọ i re dhesẹ sọ ma ghine you Jesu?

²⁰ Ujaje vẹ ọ k’omai? Orọ ọsosuọ, re ma gọ Ọghẹnẹ uzẹme na, Jihova, ọye ọvo. (Matiu 4:10; Jọn 17:3) Fiki ọkwa riẹ evaọ ẹjiroro Ọghẹnẹ, Jesu o te je wuhrẹ omai nọ ma re fi ẹrọwọ họ iẹe wọhọ Ọmọ Ọghẹnẹ yọ ma re je dhesẹ iẹe via ẹkwoma ẹsiọ iruo emuemu re ma jẹ nya evaọ elo na. (Jọn 3:16-21) Ọ hrẹ omai nọ ma kake gwọlọ Uvie Ọghẹnẹ gbe ẹrẹreokie riẹ, re ma fi enana haro ẹgwọlọ eware iwo mai. (Matiu 6:31-33) O j’uzi nọ ma re you ohwohwo wọhọ epanọ o you omai. (Jọn 13:34; 1 Pita 1:22) O te je vi omai nọ ma jọ isẹri kpahe ẹjiroro Ọghẹnẹ, nwane wọhọ epanọ ọ jọ na. (Matiu 24:14; 28:19, 20; Eviavia 3:14) Dede nọ a re ruẹ Jesu ẹdẹvo ho, uvi uyoyou o be wọ Isẹri Jihova nọ i bu vi ima isoi nẹnẹ re a koko ijaje enana. Dede nọ a re rehọ ẹro rai ruẹ Jesu hu onana o be lẹliẹ ai whrehe evaọ ọtamuo rai re a yoẹme he. A be kareghẹhọ oware nọ Olori rai ọ ta kẹ Tọmọs ukọ na: “Epanọ whọ ruẹ omẹ whọ jẹ rọwo? Enọ e ruẹ hẹ nọ e rọwo ghele i wo oghale.”—Jọn 20:29.

21. Ẹvẹ ma re ro wo erere no ekpohọ ehaa Ekareghẹhọ uwhu Kristi ze, onọ a re ti ru evaọ enukpe ọnana evaọ Ẹdoka, March 23 na?

²¹ O rọ ẹruore mai nọ whọ te jọ usu ahwo nọ i ti kokohọ eva Egua Uvie Isẹri Jihova nọ ọre o te kiediwi no evaọ Ẹdoka, March 23, 1997, re whọ kareghẹhọ edhere uyoyou Ọghẹnẹ nọ o mae rro kpobi kẹ ohwo-akpọ re who je ru ehaa uwhu Ọmọ omarokpotọ riẹ, Jesu Kristi. Oware nọ a te ta je ru evaọ ehaa ọyena u re ru uyoyou ra kẹ Jihova gbe Ọmọ riẹ diwi viere u ve je ru ẹgwọlọ ra nọ who re ro koko ijaje Ọghẹnẹ viharo.—1 Jọn 5:3.

Ẹvẹ Whọ te k’Uyo?

◻ Ẹvẹ ahwo nọ a kere obe Pita ọsosuọ ro se na a te rọ riẹ je you Jesu?

◻ Eme họ eware jọ nọ Ileleikristi ọsosuọ a wuhrẹ nọ u si owhẹ urru?

◻ Eme o rọ ẹzi nọ Jesu o dhesẹ nọ o lẹliẹ uyoyou ra kẹe diwi?

◻ Fikieme omarokpotọ nọ Jesu ọ rọ rẹro so Ọghẹnẹ u je wuzou k’omai?

◻ Ẹvẹ ma sai ro dhesẹ uyoyou mai kẹ Jesu Kristi?

[Pictures on pages 28, 29]

Ma re bigba Jesu fiki ẹzi nọ o dhesẹ