Iwhowho Uvie A n’Iyẹrẹ

Ame-Okufihọ Ibi Uzẹme na Evaọ Chile

EVAỌ udhude ofẹ ẹkpẹlobọ-ọre ọ Chile, o rẹ sae rehọ ikpe taure oso ọ tẹ te rrọ ze. Rekọ okenọ ọ tẹ rrọ ze no, otọ oyaya, onọ o vọ avọ itho na u ve nwene zihe ruọ uzedhe ekapẹte ọ idodo ekọlọ sa-sa. Ughe onana u re si iriughe no orẹwho na soso ze.

Dede na, oware ofa nọ o mai siuru o be via evaọ udevie ahwo Chile. Ame uzẹme Ebaibol o bi su te ibienẹ ẹkwotọ na kpobi, yọ ahwo oruọzewọ buobu a be “dhẹ via” zihe ruọ ilele Jesu Kristi. Edhere jọ nọ a be rọ vaha ame uzẹme nana họ ẹkwoma ifonu. Iriruo obotọ na i dhesẹ emamọ iyẹrẹ nọ i bi no edhere isẹri-ise nana ze.

• A ta kẹ ọtausiuwoma oke-kpobi jọ nọ a re se Karina re ọ jọ okokohọ okogho jọ ru odhesẹvia oghẹrẹ nọ a rẹ rehọ ifonu ta usiuwoma. Rekọ Karina ọ te rehọ edhere ọyena ta usiuwoma vẹre he. Re o ruẹse tuduhọ iẹ awọ re o w’obọ evaọ ọruẹrẹfihotọ okokohọ na, ọkpako ukoko jọ avọ aye riẹ a tẹ kiẹ eme jọ riwi kugbe Karina kpahe oghẹrẹ nọ a rẹ rehọ ifonu ta usiuwoma. A tẹ jẹ tuduhọ iẹe awọ re ọ lẹ kẹ ekpakpọ Jihova evaọ ẹme na. O te ru ere jẹ gbae mu uwhremu na re ọ daoma rehọ ifonu ta usiuwoma.

Karina ọ tẹ salọ inọmba ifonu ọ iwhre ekẹloma jọ. Ohwo jọ nọ ọ rẹ rẹrote ifonu ọ tẹ kpọe unu, koyehọ Karina ọ ta ẹjiroro nọ ọ rọ fiki riẹ fonu na vevẹ. Ọnọ ọ rẹ rẹrote ifonu na ọ tẹ kezọ ziezi, a te ru ọruẹrẹfihọ re a wariẹ t’ẹme nọ edesa e tẹ vrẹ no. Ozihebro nọ ọ rehọ ifonu ru na o tẹ wha obe uwuhrẹ Ebaibol ze, onọ a bi ru ẹkwoma ibroshọ na Eme Ọghẹnẹ Ọ Gwọlọ Mi Omai? No anwọ oke oyena ze, a be reawere uwuhrẹ isiuru nọ o rrọ jajaja, yọ Karina o vi obe sei no re ọ rọ k’iyo kẹ enọ aye na.

• Bernarda ọ rehọ uvẹ nọ u rovie rọ t’ẹme kẹ ọzae jọ nọ ọ rọ ethobọ fonu riẹ. Viukpenọ ọ dheva, Bernarda o te dhesẹ oma riẹ kẹe wọhọ omọvo Isẹri Jihova je fiobọhọ kẹe. Ẹmeọta o te lele iei, ọzae na ọ tẹ kezọ kẹe nọ o bi dhesẹ epanọ Uvie Ọghẹnẹ u ti ro si ẹdhoguo-okienyẹ no kẹle na. Ọzae na ọ tẹ rehọ inọmba ifonu riẹ kẹ Bernarda, koyehọ o ru izihebro ẹkwoma ifonu. Evaọ etoke ẹmeọta rai jọ, oniọvo na o te se oria jọ kẹe evaọ obe na Eriariẹ Nọ I Re Su Kpohọ Uzuazọ Ebẹdẹ Bẹdẹ. Ọzae na ọ tẹ nọ kpahe epanọ ọ rẹ sai ro wo obe na, koyehọ Bernarda o vi ovo jọ avọ Ebaibol sei. A te ru ọruẹrẹfihotọ re oniọvo-ọmọzae ẹkwotọ riẹ jọ o zihe bru ei, ọnọ o gbe bi “ku ame” họ “okakọ” obọbọ onana.

Ẹhẹ, evaọ otọ oyaya abọ-ẹzi orọ akpọ nana, ibi nọ i dhere e be hẹrẹ ẹdhẹvia evaọ okenọ ame uzẹme nọ ọ rẹ kẹ uzuazọ na o te kie ku ai. Idu ahwo nọ uruame u bi kpe e gbẹ be “dhẹvia” jẹ “rro” ruọ idibo ẹrọwọ Jihova Ọghẹnẹ.—Aizaya 44:3, 4.