Kọ Whọ Ruẹrẹ Oke Họ no kẹ Uwuhrẹ Omobọ Ra?
UKPE n’ukpo, Ugboma Esuo na a ru inwene jọ evaọ iwuhrẹ ukoko na re ma sai wo oke ziezi kẹ uwuhrẹ omobọ mai gbe orọ uviuwou. Whọ tẹ rrọ ọnọ o wuzou uviuwou, daoma who fi oke họ nọ who re ro ru uwuhrẹ kugbe aye gbe emọ ra. Ọzae avọ aye nọ i wo emọ họ a rẹ rehọ oke nana wuhrẹ kugbe. Enọ e rọo ho a rẹ sae rehọ oke nana ru ewuhrẹ Ebaibol omobọ rai.
Inievo buobu a kere ileta uyere no fiki ọruẹrẹfihotọ uwuhrẹ Ebaibol uviuwou na. Wọhọ oriruo, Kevin, ọkpako ukoko, o kere nọ: “Inievo nọ e rrọ ukoko mẹ a be ruẹ unu yere owhai hi. Mai ekpako na ma keria no ta kpahe oware nọ ma rẹ rehọ owọwọ na ru wọhọ epanọ Ugboma Esuo na o ta, inọ ma rẹ rehọ owọwọ na wuhrẹ kugbe iviuwou mai.”
Jodi, ọnọ ọzae riẹ ọ rrọ ọkpako ukoko, o kere nọ: “Ma wo emetẹ esa, ọjọ ikpe 15, ọfa 11, ubreyẹ mai ikpe 2. Kẹle na ma kwa kpohọ ukoko obọ rọ t’ẹme. O gwọlọ oke gbe omodawọ gaga re ma ruẹrẹ oma họ kẹ iwuhrẹ na kpobi. Fiki enwene nana, ma wo owọwọ ọfa no nọ ma re ro ru uwuhrẹ uviuwou!”
John avọ JoAnn, ọzae avọ aye nọ e rrọ ekobaro oke-kpobi, a kere nọ: “Uwuhrẹ uviuwou mai o jẹ jọ ẹsikpobi hi keme ma jẹ hae gwae kugbe iruẹru efa erọ ukoko na. Ọruẹrẹfihotọ ọkpokpọ nana yọ okẹ nọ u no obọ Jihova ze nọ o rẹ lẹliẹ omai dikihẹ ga evaọ abọ-ẹzi, otẹrọnọ ma rehọ oke na ru iruo ziezi.”
Tony, oniọvo-ọmọzae nọ o wo aye he nọ ọ rrọ oware wọhọ ikpe 25 o fi owọwọ Edivẹ-Oka họ kẹ uwuhrẹ omobọ riẹ. Ọ rẹ rehọ oke ofa evaọ oka na ruẹrẹ oma kpahe kẹ iwuhrẹ ukoko. Rekọ Tony ọ ta nọ: “Me re rẹro Edivẹ-Oka na gaga.” Fikieme? Ọ ta nọ: “Owọwọ yena họ obọdẹ oke nọ me wo kugbe Jihova. Mẹ rẹ rehọ euwa ivẹ wuhrẹ eware nọ i re ru usu mẹ kugbe Jihova ga. Fikinọ me wo oke ziezi no kẹ uwuhrẹ o be lẹliẹ omẹ raha oke roro kpahe oria Ebaibol nọ me se.” Eme o no rie ze no? “Ohrẹ Jihova o bi te udu mẹ vi epaọ ọsosuọ.” Kọ ọ kẹ oriruo jọ? “Mẹ jọ obe Insight na se kpahe usu nọ o jọ udevie Devidi avọ Jonatan. Me wuhrẹ eware buobu kpahe uruemu ababọ oriobọ ọrọ Jonatan. Oriruo riẹ o fi obọ họ kẹ omẹ ruẹ epanọ emamọ ogbẹnyusu ọ rẹ jọ. Me re rẹro eware ekpokpọ nọ me bi ti wuhrẹ evaọ owọwọ Edivẹ-Oka!”
Ababọ avro, idibo Jihova kpobi a ti wo erere ziezi otẹrọnọ a ginẹ rehọ oke nana ru uwuhrẹ Ebaibol uviuwou.