Uwuhrẹ Omobọ-Ohwo gbe Orọ Uviuwou E r’Oja!
1. Didi ọdawẹ odidi Ugboma Esuo na u wo kẹ omai nẹnẹ, kọ fikieme?
1 Wọhọ epanọ o jọ evaọ ikpe-udhusoi ọsosuọ na, Ugboma Esuo na u wo ọdawẹ odidi kẹ idibo Jihova kpobi. (Iruẹru 15:6, 28) Nọ uye ulogbo na o be tha kpata kpata na, o r’oja re owhowho-uvie kpobi o wo usu okpekpe kugbe Jihova. Eme whọ te rehọ oke nọ ma je ro ru Uwuhrẹ Obe Ukoko vẹre na ru? A ta udu họ omai kpobi awọ re ma rehọ oke na ro ru uwuhrẹ uviuwou. Oke nana nọ ma re ro ruiruo ziezi u ti fi obọ họ k’omai kiẹ Ẹme Ọghẹnẹ riwi ziezi, je wo erere no iwuhrẹ riẹ nọ e rẹ kẹ uzuazọ ze.—Ol. 1:1-3; Rom 11:33, 34.
2. Ẹvẹ ma sae rọ ruẹrẹ owọwọ jọ họ nọ uviuwou mai u re ro kuomagbe kẹ egagọ?
2 Owọwọ nọ Uviuwou U re Kuomagbe kẹ Egagọ: Ma be ta udu họ enọ i wuzou uviuwou awọ inọ a wọ owha-iruo rai nọ Jihova ọ kẹ rai, re a ruẹ nọ a wo jẹ be nya lele emamọ ọruẹrẹfihotọ uwuhrẹ Ebaibol uviuwou ikẹse kẹse. (Izie. 6:6, 7) Inievo emezae gbe erọ emetẹ nọ i wo owha-iruo uviuwou hu a rẹ sae rehọ oke nana ru uwuhrẹ Ebaibol omobọ-ohwo gbe ekiakiẹ. O r’oja re mai kpobi ma ru uvẹ fihọ nọ ma re ro wuhrẹ je roro didi kpahe oware nọ ma wuhrẹ re ma sae yọrọ usu okpekpe kugbe Jihova ghelọ edẹ nana nọ “i re yoyoma” na.—Ẹf. 5:15, 16.
3, 4. Iroro vẹ a jẹ k’omai kpahe ebe nọ ma sai ro ru uwuhrẹ na, kọ avọ ẹjiroro vẹ?
3 Ebe nọ A Sai ro Ru Uwuhrẹ Na: Whọ sae jọ Watch Tower Publications Index hayo Watchtower Library evaọ CD-ROM gwọlọ evuẹ nọ i re fi obọ họ kẹ uviuwou ra reawere uwuhrẹ Ebaibol na. Iviuwou a sae rehọ izoẹme nọ e rẹ romavia ẹsikpobi evaọ Uwou-Eroro Na ro ru ei, izoẹme wọhọ “Eware Nọ E rẹ Wha Evawere Ze Uviuwou,” “Wuhrẹ Emọ Ra,” gbe “Rọkẹ Izoge Na.” Ofariẹ, Awake! o wo izoẹme ọ “Young People Ask” nọ e rẹ romavia othotha gbe izoẹme nọ i re siuru nọ e ta kpahe igbunu emama.
4 Nọ uviuwou na soso a tẹ roma totọ se Ebaibol na kugbe u re fi obọ họ kẹ ohwo kpobi kareghẹhọ je fi ehri-izi Ebaibol họ iruo evaọ uzuazọ rai. (Hib. 4:12) Evaọ oke-ofa, wha sai riwi ividio ukoko na jọ jẹ t’ẹme kpahe iẹe kugbe. Who wo uvẹ nọ whọ sae rọ salọ oware nọ wha re wuhrẹ gbe oghẹrẹ nọ wha re ro ru uwuhrẹ na. Kọ whọ gbẹ nọ ahwo uviuwou ra re a fodẹ oware nọ o te were ae nọ wha re wuhrẹ?
5. Fikieme uwuhrẹ Ebaibol omobọ-ohwo gbe orọ uviuwou u je wuzou gaga enẹna evaọ uzuazọ mai?
5 Oware nọ U Je Wuzou Enẹna: Ẹbọga edikihẹ abọ-ẹzi mai o rẹ lẹliẹ omai wo ẹgba ‘dikihẹ ga, re ma te ruẹ usiwo Jihova.’ (Ọny. 14:13) Esẹgbini a gwọlọ ọkpọvio Ọghẹnẹ re a sae yọrọ emọ rai evaọ ‘udevie oge ọbẹbẹ nọ ọ be barosa ru eyoma’ na. (Fil. 2:15) Emaha na a gwọlọ obufihọ re a sai yeri uzuazọ nọ o kare afuẹwẹ evaọ udevie ogbekuo nọ o rrọ isukulu nẹnẹ na. (Itẹ 22:3, 6) Enọ e rọo no a rẹ daoma re a ru usu rai kugbe Jihova ga. (Ọtausi. 4:12) Fikiere, joma rehọ oke nọ u kiọkọ na ruiruo avọ areghẹ re ma bọ ‘orọwọ ọrẹri mai’ ga ziezi!—Jud 20.