Ọruẹrẹfihotọ Ọkpokpọ kẹ Ẹdẹ Okokohọ Obọdẹ
1 Fikieme ma je whowho usi uwoma na ababọ eriosehọ? Didi ute ohwo o re te taure ọ tẹ te jọ ọnọ o re whowho emamọ usi na? Ẹvẹ enọ e maki wo omovuọ hayo enọ e rẹ dhozọ a sae rọ rehọ iroro obọ rai wo obọ evaọ usiuwoma ota kẹ amọfa? Enana gbe enọ efa nọ e rẹ kpọ iroro a te kẹ iyo rai evaọ ọruẹrẹfihotọ ẹdẹ okokohọ obọdẹ nọ o ti muhọ evaọ March, uzoẹme riẹ họ “Ete Wọhọ Egbodibo Emamọ Usi Na.”—Wawo 2 Ahwo Kọrint 3:5.
2 Wọhọ ahwo Jihova, ma rẹ yọrọ oma mai kpahe uruemu mai hrọ. Izoge na a te kẹ iriruo ọbọga kpahe epanọ a rọ sae whaha ọgbahọ otu rai. A te kẹ esẹ gbe ini uduotahawọ kpahe ẹgwọlọ nọ a re ro wuhrẹ emọ rai wọhọ egbodibo Ọghẹnẹ. A ti fiobọhọ k’omai kpobi vuhu epanọ u wuzou te re ma ta usiuwoma gbe eghale nọ i re noi tha tomai avọ ahwo nọ e gaviezọ k’omai.—1 Tim. 4:16.
3 Ababọ avro, ame-ọhọ na ọ te jọ oware ulogbo evaọ ẹdẹ ọyena. Taure onana o tẹ te via, a te kẹ ẹme nọ u no Ebaibol ze nọ a te mae kpọ riwi ahwo ọkpokpọ nọ e rehọ oma rai mudhe no. Dede, ahwo kpobi a rẹ gaviezọ ziezi nọ a be t’ẹme kpahe ame-ọhọ je ru otoriẹ riẹ vevẹ na. Ohwo kpobi nọ ọ gwọlọ nọ ọ te họ-ame evaọ ẹdẹ okokohọ obọdẹ na ọ rẹ kake vuẹ ọsẹro ukoko na fihọ otọ re ọ sae rọ ẹruoke ruẹrẹ ekpako efa họ re a kiẹ enọ nọ a fihọ na riwi kugbe enọ e be te họ-ame na.
4 Oware ulogbo ọfa họ ẹme nọ ọrara nọ avi ze ọ te ta. Uzoẹme riẹ họ “Ete gbe Omaruẹrẹhọ Wọhọ Egbodibo Ọghẹnẹ.” A te t’ẹme kpahe eruẹrẹfihotọ ene nọ e viodẹ nọ e rẹ ruẹrẹ omai họ wọhọ egbodibo, yọ iriruo nọ e rẹ bọ ẹrọwọ ga e te jọ udevie ẹme na re.
5 Moma ra enẹna re whọ sae jariẹ evaọ ọruẹrẹfihotọ na kpobi. Jọ u muowhẹ ẹro nọ who zizie ahwo nọ i wo isiuru gbe emọ-uwuhrẹ re ae oma rai a wo erere no ẹdẹ ewuhrẹ Ọghẹnẹ ọnana ze. Evaọ edhere ọnana o sae ro mu omai ẹro nọ ma “te gbagba” wọhọ egbodibo emamọ usi na.