Ahwo Kpobi A Ghọghọ Kpahe Obusino Obe Okpokpọ na Evaọ Okokohọ Ubrotọ
Obe Okpokpọ na U ru Eriariẹ Ọghẹnẹ Vevẹ
1 Evaọ okokohọ ubrotọ mai nọ ọ vrẹ no na, ẹvẹ ọruẹrẹfihotọ na kpobi ọ were omai eva te! Oghọghọ mai o vọ kiọkọ evaọ uvo Ẹdẹ-Ọmaha nọ ma yo owhowhovia kpahe obe okpokpọ na, Eriariẹ Nọ I Re Su Kpohọ Uzuazọ Ebẹdẹ Bẹdẹ, gbe evuẹ efa nọ i lele i rie. Ima-odu ahwo akpọ a gwọlọ eriariẹ nọ Ọghẹnẹ ọvo ọ rẹ sae kẹ—eriariẹ Ọghẹnẹ gbe ọrọ Ọmọ riẹ, Jesu Kristi.—Itẹ 2:1-6; Jọn 17:3.
2 Ẹvẹ ọnọ o ru ẹme na o dhesẹ abọ ọvuọvo obe na vevẹ te! Izoẹme na nọ i re siuru, etadhesẹ nọ i w’iruo, edhesẹ abọwoma uzẹme na, enọ elọlọhọ, gbe, evaọ urere uzou kpobi, ẹkpẹti nọ izoẹme riẹ o rọ “Dawo Eriariẹ Ra” erọ abọ eware nọ i ti siọ ahwo kpobi nọ a bi sei urru. Rekọ maero emọ-uwuhrẹ Ebaibol mai a ti wo erere nọ a bi wo ehri iwuhrẹ Ebaibol na.
3 Etoke ẹme ekuhọ evaọ Ẹdẹ-Ọmaha gbe Ẹdoka, a tudu họ omai awọ nọ ma rehọ obe okpokpọ onana ruiruo evaọ ewuhrẹ iviuwou. Enẹna, ẹsejọhọ ma riẹ eware nọ e riẹe eva no. Ababọ avro whọ t’ẹme kpahe igogo-eme nọ who ti wo h’iroro no okenọ who ti fi obe okpokpọ onana họ ada evaọ obọ otafe.
4 Igogo-Eme nọ A rẹ Kiẹriwi: Whọ rẹ sae kareghẹhọ nọ okenọ a jẹ t’ẹme kpahe uzoẹme na “Oware nọ Ahwo-Akpọ a jẹ Gwọlọ Eriariẹ Ọghẹnẹ,” ọnọ ọ jẹ t’ẹme na o fi ẹgba họ igogo-eme buobu, nọ i kugbe enana: (1) Okenọ whọ be rehọ obe onana ru uwuhrẹ, u w’iroro re a rehọ eme efa fibae he, nọ e sae ruru igogo-eme na; tẹrovi oware nọ obe na u bi dhesẹ evaọ uzou ọvuọvo. (2) Izou na i theri ga hrọ họ fikiere whọ sae wuhrẹ ọvuọvo re koke koke nọ who te bi ru uwuhrẹ. (3) Evaọ ekuhọ uzou kpobi, enọ nọ e rọ ẹkpẹti nọ uzoẹme riẹ orọ “Dawo Eriariẹ Ra” o te kẹ ọkiẹkpemu kpẹkpẹ ababọ eme buobu.
5 Ero Ruiruo Evaọ Obe Ewuhrẹ Ebaibol: Iwhowho-uvie buobu a nọ no sọ u fo re a nwene obe uwuhrẹ Ebaibol rai kpohọ obe okpokpọ onana. Otẹrọnọ whọ nya thabọ no evaọ obe nọ who bi wuhrẹ enẹna, u w’iroro re who wuhrẹ obe oyena re. Ogbẹ rọ ere he, ma jiroro riẹ nọ who nwene kpohọ obe Eriariẹ na. Otẹrọnọ ibroshọ hayo omobe-ovẹvẹ who ro mu obe uwuhrẹ Ebaibol họ, dhesẹ obe okpokpọ na evaọ ẹruoke re whọ rehiẹe ruiruo evaọ uwuhrẹ na. Evuẹ efa kpahe ero ruiruo obe Eriariẹ na e te rehọ oma via evaọ Odibọgba Uvie Mai evaọ emerao nọ e be tha na.
6 Jihova ọ rehọ obe okpokpọ na kẹ re u fiobọhọ k’omai wuhrẹ amọfa kpahe eriariẹ nọ i re su kpohọ uzuazọ ebẹdẹ bẹdẹ. Enẹna u fo re ma ruẹrẹ oma kpahe ziezi re ma wo abọ vọvọ evaọ iruo nọ e rọ otọ na.