Sisẹri Evaọ Oria Kpobi Nọ Ahwo A Rọ
1 Nọ o wo ovuhumuo ẹkẹ-abọ nọ ẹzi Ọghẹnẹ o wo evaọ odibọgba riẹ no, Pọl ukọ na ọ tẹ ta nọ: “Ọghẹnẹ o ru rie ro.” O te je vuhumu nọ: ‘Mai yọ ibe iruiruo Ọghẹnẹ.’ (1 Kọr. 3:5-9) Onana yọ uvẹ ugbunu. Ẹvẹ ma sae rọ jọ ẹgbede dhesẹ nọ ma wo ovuhumuo kẹ uvẹ mai nọ ma rọ rrọ ibe iruiruo Ọghẹnẹ? Ẹkwoma ewhowho usiuwoma na rọkẹ ahwo nọ ma nyaku kpobi evaọ iruo n’uwou r’uwou gbe eria efa kpobi.
2 A k’omai ujaje nọ ma ‘ru ilele ahwo.’ (Mat. 28:19) Otẹrọnọ umutho ahwo ọvo ma nyaku evaọ odibọgba na, obọnana yọ o b’omai no, ma ve roro nọ onọ ma ru u tulo ho. Evaọ abọdekọ riẹ, ma rẹ mae reawere odibọgba mai okenọ ma te duku ahwo buobu je lele ai t’ẹme. Onana o rẹ sae jọ use-abọ, keme o gwọlọ aruọwha re ma nya kpohọ oria kpobi nọ ahwo na a rọ re ma sai lele ai t’ẹme.
3 Iriruo Nọ I w’Iruo: Ma sai sisẹri kẹ ahwo evaọ eki, igege-arozaha, eria nọ a jẹ hẹrẹ imoto, gbe eria nọ imoto buobu e rẹ kpahe. Nọ whọ tẹ rọ omoto-ofa, kọ whọ be hae ruẹrẹ oma kpahe re who sisẹri evaọ edhere? Isẹri ivẹ jọ nọ e ruọ omoto nọ ahwo buobu a jọ evaọ okenọ a je kpohọ usiuwoma-ota, a tẹ jẹ t’ẹme kpahe ifoto Aparadase nọ o rọ evaọ obe ọ Eriariẹ na, be t’ẹme kpahe eyaa Ọghẹnẹ kẹ obaro. Wọhọ epanọ a rẹro riẹ, ọmoha jọ nọ o dikihẹ kẹle ai ọ tẹ jẹ gaviezọ je wo isiuru kpahe eme nọ o yo na. Taure o te ti no omoto na, ọ tẹ rehọ obe jọ, jẹ yare nọ ohwo jọ o weze bru ei evaọ obọ uwou.
4 Iwhowho-uvie buobu a ruẹ oghọghọ no evaọ isẹri-ise ọnyakuo. Oniọvo ọmọtẹ jọ o kpohọ obọ eki otẹwho evaọ abọ uvo ẹdẹjọ, o te bigba ahwo nọ a thueki no nọ a be variẹ oma ha. O te fi ebe nọ e jọ ẹkpa riẹ kpobi họ ada. Ọzae jọ nọ ọ jẹ hẹrẹ evaọ omoto riẹ, ọ rọ evawere rehọ emagazini jọ mi ei. O je he kpohọ iwuhrẹ vẹre, yọ ẹmeọta-kugbe rai o tẹ wariẹ kpare isiuru riẹ.
5 O rọ obọdẹ uvẹ re a jiri odẹ Jihova. Ẹkwoma edhesẹ ajọwha mai evaọ iruo usiuwoma-ota na, ma je dhesẹ nọ ma ku ẹjiroro aruoriwo Ọghẹnẹ mai kufiẹ hẹ. Nọ o rọ nọ “enẹna họ oke [ọjẹrehọ]” nọ a re ro fiobọhọ kẹ amọfa na, j’oma kpohọ oria kpobi nọ ahwo a rrọ re ma sisẹri kẹ ae kpahe “ẹdẹ usiwo” Jihova.—2 Kọr. 6:1, 2.