Obe-Uwuhrẹ Ebaibol nọ O rẹ Wha Ilele Ze
1 “Keme ọ be whaha omẹ ame ọhọ na?” ere ọwharọ obọ Etiopia na ọ nọ evaọ okenọ Filip ‘ọ ta usiuwoma kẹe kpahe Jesu no.’ (Iruẹru 8:27-39) Rọkẹ ọwharọ na, o wo uyoyou kẹ ikere efuafo Ọghẹnẹ no vẹre, yọ okenọ o wo obufihọ ẹzi no obọ Filip ze no, ọ tẹ nwane rọwo re ọ jọ olele. Rekọ orọnikọ ahwo kpobi u re muẹro ho inọ o gwọlọ nọ a rẹ kiẹ Ikereakere na riwi k’oma rai.
2 U woma kẹhẹ, ukoko Jihova o k’omai ibroshọ okpokpọ na no, Eme Ọghẹnẹ Ọ Gwọlọ Mi Omai?, re o tuduhọ ahwo awọ kiẹ ovuẹ Ebaibol na rọkẹ edẹ mai na riwi. Ovuẹ nọ o rọ evaọ ibroshọ na u re si ahwo nọ a riẹ ese t’ere he urru enọ e riẹ umutho jọ ọvo kpahe Ebaibol na. A ru okwakwa ezi onana wọhọ ọruẹrẹkpahe kẹ obe-uwuhrẹ Ebaibol.
3 Okenọ a te bi muọ obe-uwuhrẹ Ebaibol họ, u re fiobọhọ re a kiẹ obọdẹ iroro nọ a jẹ fihọ uko-obeva ọ Odibọgba Uvie Mai ọrọ June 1996 na riwi kpahe oghẹrẹ nọ a sai ro ru uwuhrẹ nọ u re w’ẹvi evaọ obe ọ Eriariẹ na. Evaọ etoke uwuhrẹ na, he roro kpahe ẹnyaharo nọ ọmọ-uwuhrẹ na o bi wo re whọ sae riẹ abọ nọ ọ jẹ gwọlọ obufihọ. T’udu họ ọmọ-uwhurẹ na awọ re ọ ruẹrẹ-oma-kpahe kẹ uwuhrẹ riẹ re oke u te te, je se ikere na. Iyo nọ ọ rẹ kẹ evaọ eme obọriẹ e rẹ sai dhesẹ ovuhumuo riẹ nọ o n’udu ze rọkẹ uzẹme na. Ahwo nọ a re se ebe Ukoko-Ulogbo efa je kpohọ iwuhrẹ ukoko ẹsikpobi, a re wo ẹnyaharo vẹrẹ vẹrẹ. T’udu họ iẹe awọ re ọ ta eware nọ o bi wuhrẹ na kẹ amọfa evaọ uvẹ kpobi. R’oma kpotọ dhesẹ kẹe eware nọ o gwọlọ nọ o re ru re o wo ẹnyaharo ẹzi. Ma re ru uwuhrẹ kugbe ahwo iroro-ivẹ ribri hi. U fo re emọ-uwuhrẹ a rehọ unevaze ro wuhrẹ, wo edikihẹ ọgaga kẹ uzẹme na, jẹ nyaharo kpohọ omarọkẹ gbe ame-ọhọ.
4 Evaọ iviuwou jọ, a bi ru uwuhrẹ vrẹ ọvuọvo, kemena ahwo uviuwou na sa-sa a wo ọvuọ iwuhrẹ rai. Dede na, re a ru uwuhrẹ uviuwou na evaọ oria ovo o rẹ sae woma evaọ ẹsibuobu, kemena u re fiobọhọ si uviuwou na kokohọ evaọ abọ ẹzi.
5 Ujaje Jesu họ, ma nyai ru ilele. (Mat. 28:19) Re ma ru ere, ma re ru obe-uwuhrẹ Ebaibol hrọ onọ u re fiobọhọ kẹ emọ-uwuhrẹ na re a nyaharo te epanọ a rẹ sae rọ nọ inọ, “Keme ọ be whaha omẹ ame ọhọ na?”