Rehọ Eware nọ E Via Kẹle Rọ Kpare Isiuru
1 Kọ whọ gwọlọ re whọ hai wo emamọ ẹjiroro nọ i re ru odibọgba ra kpokpọ jẹ kpare isiuru ahwo fihọ ovuẹ Ebaibol na? O tẹ rọ ere, rehọ eware nọ e via kẹle evaọ akpọ na gbe ẹwho ra ro mu ẹmeọta họ. Whọ sae fodẹ eware nọ e via kẹle evaọ ẹwho gbe orẹwho na hayo eware iyẹrẹ akpọ so-so. Eware enana i re dhe enwenwene. (1 Kọr. 7:31) Roro kpahe iriruo enana.
2 Ebẹbẹ ugho gbe ẹghare eware yọ ugogo ọdawẹ ahwo. Fikiere, whọ sae ta nọ:
◼ “Kọ who yo no nnọ [fodẹ oware na] o be wariẹ ghare?” Hayo whọ sae ta kpahe ẹbẹbẹ ababọ-iruo otẹrọnọ ekọmpene ilogbo jọ i si iruiruo buobu no iruo. Rono oghẹrẹ nọ whọ gwọlọ rọ t’ẹme na haro ze, whọ sae jẹ nọ inọ: “Kọ u gb’owhẹ unu no ẹdẹjọ kpahe oware nọ o soriẹ nọ eyero uzuazọ ọ jẹ ga tenẹ?” hayo “Kọ who roro nọ enẹ ẹrria uzuazọ ọ te jọ bẹbẹ ẹsikpobi?”
3 Iyẹrẹ ozighi, wọhọ okpẹtu evaọ iviuwou hayo evaọ udevie emọ isukulu, e rẹ kẹ otọhotọ kẹ ẹmeọta ọfa. Whọ sae nọ inọ:
◼ “Kọ who yo kpahe [fodẹ okpẹtu jọ evaọ ẹwho na]?” Kẹsena whọ vẹ nọ inọ “Eme who roro nọ ọ be lẹliẹ ozighi bu enẹ evaọ akpọ na?” hayo “Kọ who roro nọ oke o be tha nọ ma sai ti ro wo omofọwẹ?”
4 Iyẹrẹ ọraha ẹvo, etọ nọ i nuhu, hayo ozighi omoma evaọ kabọ kabọ akpọ na e rẹ jẹ kẹ ekwakwa nọ a rẹ rọ kpare isiuru. Wọhọ oriruo, whọ sae nọ inọ:
◼ “Kọ Ọghẹnẹ họ ọnọ ọ be wha [fodẹ okpẹtu emama jọ] ze?” Hayo whọ sae fodẹ ozighi omoma nọ ọ via kẹle na whọ vẹ jẹ ta nọ: “Otẹrọnọ ohwo kpobi ọ gwọlọ udhedhẹ, fikieme o jẹ rọ bẹbẹ re a woi tobọ?”
5 Fiẹrohotọ kẹ eware nọ e via kẹle nọ whọ sai ro mu ẹmeọta ra họ. Whọ sai duku iroro-ejẹ nọ i re fiobọhọ evaọ otọ uzoẹme na “Eware nọ E Via Kẹle,” evaọ omobe na Ebaibol E rọ Jiroro, ẹwẹ-obe avọ 4. Ghele na, whaha abọ jọ nọ whọ rẹ jọ evaọ eme ọ esuo hayo eme-avro uyerakpọ. Ukpoye, si iroro kpohọ Ikereakere na gbe Uvie Ọghẹnẹ wọhọ ifue ebẹdẹ bẹdẹ ọvuọvo rọkẹ ebẹbẹ ahwo-akpọ.