Usiuwoma Ota Evaọ Akpọ Nọ O Bi Dhe Enwenwene
1 Eware e rẹ sai nwene vẹrẹ gaga! Evaọ aso-hẹrioke, okpẹtu emama, ẹbẹbẹ ugho, ozighi esuo, hayo usi oware uyoma jọ o rẹ sai zihe ruọ uzoẹme ẹmeọta. Dede na, ere ọvona ahwo a rẹ kpọ ovao rri obọfa vẹrẹ te re. (Iruẹru 17:21; 1 Kọr. 7:31) Evaọ akpọ nana nọ o bi dhe enwenwene na, ẹvẹ ma sae rọ dẹ iroro ahwo t’obọ re ma ruẹse vuẹ ae kpahe ovuẹ Uvie na?
2 Vuhu Ọdawẹ Amọfa: Edhere jọ nọ ma rẹ rọ dẹ iroro amọfa họ ẹkwoma ẹfodẹ eware nọ e be via enẹna. Okejọ nọ ọ jẹ ta udu họ enọ e be gaviezọ kẹe re a roro didi kpahe edikihẹ rai kugbe Ọghẹnẹ, Jesu ọ fodẹ eware okpẹtu jọ nọ e jọ iroro rai. (Luk 13:1-5) Epọvo na re, nọ ma tẹ be vuẹ emamọ usi na, u re woma re ma fi usi jọ nọ u bi do kugbe ei hayo ẹme jọ nọ ọ rrọ otọ nọ o kpomahọ izuazọ ahwo nọ a rrọ okegbe na. Dede na, nọ ma tẹ be ta kpahe eme itieye na, ma rẹ yọrọ oma re ma siọ abọjọ ba ẹruọ evaọ eme esuo hayo erọ uyerakpọ.—Jọn 17:16.
3 Ẹvẹ ma sae rọ riẹ oware nọ ahwo a bi roro kpahe evaọ oke oyena? Ẹsejọhọ o rẹ mai woma re ma nọ onọ, ma vẹ gaviezọ kẹ ohwo na. (Mat. 12:34) Isiuru kpahe ahwo e rẹ wọ omai re ma muẹrohọ eriwo amọfa jẹ rehọ areghẹ nọ haro viere. Ẹme jọ nọ ọ la no ohwo nọ ma be ta usiuwoma kẹ unu ze ọ rẹ sai dhesẹ ọdawẹ ahwo buobu evaọ okegbe na yọ o rẹ sai rovie uvẹ nọ a re ro se isẹri.
4 Ẹruẹrẹhọ Edhere Ẹmeọta: Evaọ oma oruẹrẹhọ kẹ usiuwoma ota evaọ akpọ nana nọ o bi dhe enwenwene na, ma rẹ sae rehọ omobe ọ Ebaibol E rọ Jiroro na ruiruo. Iroro-ejẹ nọ i re fi obọ họ kpahe epanọ ma re ro ku eware nọ e be via kugbe ẹmeọta mai e rrọ ẹwẹ-obe avọ 3-4, eva otọ “Ethube/Ufuoma” gbe “Eware Nọ E Via Kẹle.” A rẹ sae ruẹ evuẹ itieye na evaọ Odibọgba Uvie Mai ọrọ September 2000, ẹwẹ-obe avọ 8. Okenọ whọ tẹ be ruẹrẹ edhere ẹmeọta ra, ruẹ nnọ who fi ikere ọvo jọ nọ o fo bae.
5 Nọ ma bi muẹrohọ eware nọ i bi dhe enwenwene nọ e rrọ ọdawẹ kẹ ahwo nọ a rrọ ẹkwotọ mai na, o gwọlọ re ma nwene edhere ẹmeọta mai orọ ẹvuẹ emamọ usi na lele ai re. Evaọ edhere yena, ma rẹ ta ẹme kẹ ahwo kpahe oware nọ o rrọ ọdawẹ kẹ ae. Ere ma ti ro fi obọ họ kẹ amọfa buobu riẹ Ọnọ o re nwene he evaọ ekwakwa gbe itee riẹ.—Jem. 1:17.