W’Obọ Vọvọ Evaọ Ivuẹvu Na
1 Eruẹaro Jihova oke anwae jegbe Jesu Kristi omariẹ a ta kpahe iruo ekokohọ. (Aiz. 56:8; Izik. 34:11; Jọn 10:16) A bi ru iruo itieye na gba enẹna nọ a bi whowho emamọ usi Uvie na wariẹ akpọ na họ na. (Mat. 24:14) Ohẹriẹ nọ o rọ udevie enọ e be gọ Ọghẹnẹ gbe enọ e be gọe he o be romavia vevẹ. (Mal. 3:18) Eme onana u dhesẹ k’omai?
2 Owha-Iruo Omobọ Ohwo: Ma rẹ sai wuhrẹ no oriruo Pọl ze, ọnọ o duoma họ ẹwhaharo odibọgba Oleleikristi na vọvọ. Ọ rehọ e riẹ wọhọ owha-iruo re ọ ta usiuwoma na re ahwo kpobi a sai wo uvẹ nọ a re ro yo emamọ usi na re a jẹ zọ. Onana o wọ riẹ ruiruo kẹ ae ababọ eriosehọ. (Rom 1:14-17) Ma te roro kpahe uyero imuozọ nọ ahwo-akpọ a rẹriẹ ovao ku nẹnẹ, kọ ma tube wo owha-iruo ologbo na re ma ta usiuwoma evaọ ẹkwotọ nọ a ghale k’omai?—1 Kọr. 9:16.
3 Oke Owojẹ Ọkpakpata: A rẹ sae rehọ iruo usiuwoma ota na wawọ ogbo nọ a rẹ dhẹ. A rẹ gwọlọ ahwo je fiobọhọ kẹ ae kpohọ oria adhẹzọ taure u te ti lehie hrọ. Oke u tulo ho. Izuazọ e rrọ awa! Agbẹta nọ Jesu ọ rọ tuduhọ ilele riẹ awọ re a “lẹ Olori ivuẹvu na re o vi iruiruo kpobọ ivuẹvu riẹ.”—Mat. 9:38.
4 Fikinọ a vuhu ovẹrẹ inẹnẹ mu no, iruiruo Uvie buobu a ru ẹkẹ-abọ rai rro no evaọ iruẹru uzuazọ-usiwo onana. Ọmọ ikpe ikpe-gbọ jọ nọ a re se Hirohisa ọ be rria uwou ọyewọ-ọvo kugbe inievo emaha ene riẹ. Ọ be kẹ uviuwou riẹ obufihọ ugho ẹkwoma ẹkpama eva ighọjọ esa irioke re ọ nyae zẹ ebe-usi. O make rọ ere na, Hirohisa ọ gwọlọ ru iruo viere evaọ odibọgba na, fikiere o te muọ iruo ọkobaro oke-kpobi họ. Kọ idhere jọ e riẹ nọ whọ sai ro w’obọ vọvọ viere evaọ iruo nana nọ a te wariẹ vievie he na?
5 “Oke nọ a fihọ o rẹ kpẹkpẹe.” (1 Kọr. 7:29) Fikiere, j’oma dao ẹgba mai kpobi evaọ iruo nọ e mai wuzou nọ a bi ru evaọ otọakpọ nẹnẹ na—ewhowho emamọ usi Uvie na gbe eruo ilele. Jesu ọ rehọ odibọgba nana ro dhesẹ iruo ivuẹvu. (Mat. 9:35-38) Ẹkwoma abọ-owo mai vọvọ evaọ ivuẹvu na, iyẹrẹ iruo mai e sai kugbe obufihọ kẹ ohwo jọ re o zihe ro abọjọ otu obuobu ọrọ egegagọ nọ a dhesẹ evaọ Eviavia 7:9, 10 na.