Kọ Who Bi Fi Eware nọ Who Wuhrẹ Evaọ Okokohọ Ubrotọ “Otu-Iwuhrẹ Ẹme Ọghẹnẹ” na h’Iruo?
1 Ohwo kpobi nọ o kpohọ okokohọ ubrotọ n’okpo na ọ rẹ sae ruẹ nọ ahwo Jihova a gba riẹ mu no re a ru iruo rai gba wọhọ otu-iwuhrẹ Ẹme Ọghẹnẹ. (Mat. 28:19, 20) Nọ who no okokohọ na ze, didi igogo eme uthubro whọ jiroro nọ who re fihọ iruo evaọ uzuazọ ra gbe evaọ iruo odibọgba na?
2 Ikereakere nọ A Kẹ Ẹgba na I Wo Erere kẹ Ewuhrẹ: Uzoẹme ẹdẹ ọsosuọ na u fielo họ 2 Timoti 3:16. Ovuẹ ọsogba na u dhesẹ nọ rọkẹ “Omathọkpahe Ziezi Wọhọ Enọ I Bi Wuhrẹ Amọfa Ẹme Ọghẹnẹ,” ma re riwi ẹme Ọghẹnẹ ghaghae, rehọ iẹe avọ adhẹẹ vi ẹjiroro gbe uruemu anwae ahwo-akpọ kpobi, jẹ rehọ iẹe ruiruo kẹse kẹse. Ma rẹ jẹ lẹ kẹ ẹzi ọfuafo kẹdẹ kẹdẹ re o fiobọhọ k’omai evaọ odibọgba mai je ruiruo re ma bọ ubi oviede riẹ—uyoyou. Yọ ma rẹ kuvẹ re ukoko otọakpọ Jihova u wuhrẹ omai wọhọ egbodibo ẹkwoma iwuhrẹ ukoko na kpobi.
3 Ọzọhọkugbe-eriariẹ Edisoi-Oka na, “Ewuhrẹ Omobọ Mai Nọ Ma Bi Wuhrẹ Amọfa Na,” o dhesẹ nọ ma rẹ jọ iriruo evaọ (1) ẹnya lele izi Ọghẹnẹ evaọ k’abọ k’abọ uruemu Ileleikristi, (2) ẹyọrọ iruemu uwuhrẹ osegboja, gbe (3) esino iruemu gbe iyero udu gbe iroro nọ Ẹdhọ ọ sai ro ruiruo. Ofariẹ, ma wuhrẹ idhere nọ i w’iruo nọ ma rẹ rọ thọ iviuwou mai no ẹyao ifoto ẹbẹba akpọ na. A tuduhọ eyewọ awọ re a fi oriruo h’otọ evaọ ẹwhaha ẹro ọ jẹlẹ riwi ughe ọfariẹ-ogbe re a je muẹrohọ oghẹrẹ nọ emọ rai a be rọ Itanẹte ruiruo gbe etẹlivisiọne i riwo rai. Kọ eme ọruẹrẹfihotọ Edisoi-Oka na vẹ who muhọ efihiruo no?
4 Ẹme urere ẹdẹ ọyena o ru ọtamuo mai ga viere re ma riwi elo Jihova ghaghae, re ma jọ kẹle utu ẹrọwọ, erọ Ọghẹnẹ nọ a romu na, re ma je fiba udhedhẹ ahwo Jihova. Kọ who se obe okpokpọ na no Isaiah’s Prophecy—Light for All Mankind II?
5 Ete Ziezi re A Wuhrẹ Amọfa: Ikere uzoẹme ẹdẹ avivẹ na họ 2 Timoti 2:2. Nọ whọ jẹ gaviezọ kẹ ọzọhọkugbe-eriariẹ ohiohiẹ Ẹdẹ-Ọmaha na, kọ who muẹrohọ iroro-ejẹ kpahe epanọ a rẹ rọ (1) gwọlọ enọ i te via, (2) rẹrote isiuru rai, je (3) wuhrẹ ae re a koko eware kpobi nọ Kristi o j’uzi rai? Kọ who bi fi oware nọ who wuhrẹ h’iruo—nọ o tẹ make kao re who dhesẹ ugogo ẹme jọ no Ikereakere na ze kẹ ọnọ o wo uwou je fi otọhotọ họ kẹ iweze obaro?
6 Ọruẹrẹfihotọ uvo na o fiẹgba họ epanọ u wuzou te re a raro kẹle Owuhrẹ Ologbo na, Jesu. Evaọ idhere vẹ whọ be rọ daoma re whọ raro kele iei? Rono oware nọ who wuhrẹ no ọzọhọkugbe-eriariẹ avivẹ ẹdẹ ọyena ze, ẹvẹ who roro nọ whọ sai ro “Wo Erere Vọvọ Viere No Ewuhrẹ Ọghẹnẹ Ze”? Didi iroro-ejẹ who fihọ iruo no re who ru etoke ezọgaviẹ ra theri viere evaọ etoke uwuhrẹ omobọ ra gbe iwuhrẹ ukoko?
7 Ababọ avro, obe nọ o be tha na Wo Erere no Ewuhrẹ ọ Isukulu Odibọgba Esuo-Ọghẹnẹ Ze u ti fiobọhọ k’omai rro evaọ ẹgba mai wọhọ iruẹme gbe otu-iwuhrẹ Ẹme Ọghẹnẹ. A te tẹrovi ekwakwa ẹmeọta nọ idibo ẹrọwọ Ọghẹnẹ evaọ etoke Ebaibol a wo. Uwuhrẹ ovuovo evaọ obe-uwuhrẹ okpokpọ na u wo ekpẹti nọ i dhesẹ oware nọ o gwọlọ nọ ma re ru kpẹkpẹe, oware nọ u je wuzou, gbe epanọ a re ro ru ei. A fi oria-iruo kugbei. Inievo-emetẹ i wo oghẹrẹ ẹkeria-ẹmeọta 29 nọ a rẹ salọ no ze evaọ okenọ a te bi ru ẹme rai. Evaọ obaro, a ti ru inwene nọ a whowho na evaọ oghẹrẹ nọ a re ru isukulu na. Kọ who wo emamọ uruemu ekẹse kẹse orọ ewuhrẹ gbe omaruẹrẹhọ re whọ ruẹsi wo erere vọvọ no Isukulu Odibọgba Esuo-Ọghẹnẹ na ze k’oka k’oka?
8 Wha Jọ Iwuhrẹ Fiki Epanọ Oke na U te No Na: Ahwo Hibru 5:12 o ruẹrẹ idu ogbotu na kpahe kẹ ọruẹrẹfihotọ Ẹdoka na. Ọzọhọkugbe-eriariẹ ohiohiẹ na, “Eruẹaruẹ Malakae E Be Ruẹrẹ Omai Kpahe kẹ Ẹdẹ Jihova,” o tuduhọ omai awọ re ma rehọ eware mai nọ e mai woma kẹ Ọghẹnẹ je mukpahe oghẹrẹ iruẹru ẹghẹ kpobi re ma sae zọ vrẹ ẹdẹ ologbo gbe ọrọ idudu Jihova na. Edrama na, “Rọ Adhẹẹ Kẹ Udu-Esuo Jihova,” e rehọ ẹgba dhesẹ epanọ omoya, isiuru-ọkwa-okpehru, ihri-eriọ, gbe ẹtalamu abọ ọthọthọ Kora ọrọ oke anwae gbe utu riẹ u ro su kpohọ ọkparesuọ arokeke wọso Jihova omariẹ. Ẹme nọ o lele i rie na ọ tẹrovi ẹgwọlọ ọgbọna nọ a rẹ rọ romakpotọ kẹ udu-esuo Ọghẹnẹ evaọ iviuwou gbe ukoko na. Ovuẹ ogbotu na, “Amono A Bi Wuhrẹ Erẹwho Kpobi Uzẹme Na?,” o kẹ imuẹro inọ Isẹri Jihova a bi ru ere, wo ohẹriẹ no Kristẹndọm, enọ e be rọ ugbunu gheghe ta nọ a bi wuhrẹ amọfa uzẹme Ebaibol na.
9 U re vevẹ, Jihova o bi wuhrẹ omai re ma nyaharo viere wọhọ iwuhrẹ erọ Ẹme riẹ. Joma fi oware nọ ma wuhrẹ h’iruo, ‘be sẹro oma mai gbe uwuhrẹ mai, re ma ruẹsi siwi oma mai gbe ahwo nọ a be kezọ ẹme mai.’—1 Tim. 4:16.