“Diẹse Me re je Duku Oke?”

¹ Ere ibuobu mai i re bruenu, keme iruo e da izuazọ mai fia. A ta riẹ no nnọ oke họ oware nọ o mae ghare jẹ mae kpẹre evaọ usu eware kpobi nọ ma wo. Fikiere diẹse ma je duku oke nọ ma re ro ru eware nọ i ghine w’uzou, wọhọ isase gbe ewuhrẹ Ẹme Ọghẹnẹ?—Fil. 1:10.

² Usiavẹ na họ iroro ejẹ kpahe oware nọ ma rẹ rehọ oke nọ ma wo na ro ru, orọnikọ oke ofa nọ ma rẹ gwọlọ họ. Mai kpobi ma wo euwa 168 evaọ ẹkpoka, nọ a rẹ sae jọ usu rai raha 100 rọ wezẹ je ro ruiruo. Fikiere, ẹvẹ ma sae rọ rehọ euwa nọ i kiọkọ na ro ruiruo nọ e rẹ kẹ erere nọ ọ mae rro? Ahwo Ẹfẹsọs 5:15-17 o tuduhọ omai awọ inọ ma nya ‘wọhọ igheghẹ hẹ rekọ wọhọ iwareghẹ, re ma dẹ oke uvẹ na jẹ riẹ otọ epanọ oreva Ọnowo na o rrọ.’ Onana u dhesẹ ẹgwọlọ nọ a rẹ rọ rehọ uvẹ kpobi ro ru eware nọ Jihova ọ ta nọ e r’oja.

³ Jesu ọ rehọ edẹ mai na rọ wawo edẹ Noa. (Luk 17:26, 27) Iruẹru uzuazọ ikẹdẹ kẹdẹ e da ahwo oke oyena abọ fia. Dede na, Noa o ru uvẹ ro ku okọ ulogbo jẹ ta usiuwoma. (Hib. 11:7; 2 Pita 2:5) Ẹvẹ ọ sai ro ru ei? Ẹkwoma oreva Ọghẹnẹ nọ ọ rọ karo je yoẹme kẹe ẹkwoma eru eware ‘kpobi nọ Ọghẹnẹ ọ ta kẹe nọ o ru.’—Emu. 6:22.

⁴ Eme Ọ rẹ Karo? Jesu ọ ta nọ: “Fiki ebrẹdi ọvo ohwo ọ rẹ rọ zọ họ, rekọ fiki kẹme kẹme nọ ọ via no unu Ọghẹnẹ ze.” (Mat. 4:4) K’oka k’oka, ma re wo ‘emu abọ-ẹzi . . . evaọ ẹruoke.’ (Luk 12:42) Onana o gwọlọ isase gbe omaa uwuhrẹ omobọ ohwo orọ ikẹse kẹse re emu kpobi ọ sae daruọ omai oma re o sae ghinẹ k’omai erere. Avọ oma-uyere kẹ emu abọ-ẹzi, ma re rri rie wọhọ emu nọ a varioma theri hi, ọnọ a rẹ rọ ẹro dhẹ duwu ovovẹrẹ wọhọ epanọ ohwo ọ rẹ re-emu iwo avọ ugidi na. Ukpoye, uvi ovuhumuo ọ rẹ w’omai roma t’otọ wuhrẹ jẹ reawere eware abọ-ẹzi.

⁵ Ẹriọ emu abọ-ẹzi o re su kpohọ uzuazọ ibẹdẹ bẹdẹ. (Jọn 17:3) Oye o rẹ jọ oria ọsosuọ evaọ omaa ikẹdẹ kẹdẹ mai. Kọ ma sai duku oke nọ ma re ro ru uvẹ kẹ isase Ebaibol ikẹdẹ kẹdẹ gbe omaruẹrẹhọ kẹ iwuhrẹ Ileleikristi? E, ma sae ruẹ oke. Ma te ru ere, ma ti wo ‘osohwa ulogbo’ nọ u re no ẹriẹ gbe eruo oreva Ọghẹnẹ ze.—Ol. 19:7-11.