Rọ Aro Kele Oghẹrẹ Uruemu Jesu

¹ Dede nọ ma re ruẹ Ọmọ Ọghẹnẹ hẹ, ma rọ ẹkwoma ikuigbe uzuazọ gbe odibọgba riẹ nọ a kere fihotọ ghine you rie no udu ze. (1 Pita 1:8) Evaọ ẹmeoyo kẹ oreva Ọsẹ riẹ, ọ nya siọ ọkwa okpehru obọ odhiwu riẹ ba, ọ tẹ ze otọakpọ. Wọhọ ohwo-akpọ, ọ rọ ababọ-oriobọ gbodibo kẹ amọfa je siobọno uzuazọ riẹ fiki ahwo-akpọ. (Mat. 20:28) Ẹme Ọghẹnẹ ọ ta udu họ omai awọ nọ: “Wha jọ ẹjiroro nana ọjọ eva rai, ọnọ wha wo eva Kristi Jesu.” Ẹvẹ ma sae rọ rehọ aro kele ẹzi oma-urodheidhe riẹ?—Fil. 2:5-8.

² Okenọ Oma O tẹ be Rrọ Ohwo: Dede nọ Jesu ọ jọ gbagba, oma o rrọ riẹ ghele. Evaọ okejọ, nọ ‘oma erẹ ọnya o rrọe no,’ o se obọdẹ isẹri kẹ aye Sameria jọ. (Jọn 4:6) Ileleikristi buobu nẹnẹ a be rẹriẹ ovao ku oghẹrẹ ẹbẹbẹ ọvona. Nọ ohwo o te ru iruo evaọ ẹkpoka soso no avọ oma nọ o be rrọe, o rẹ sae jọ bẹbẹ re ọ ruẹ ẹgba nọ o re ro w’obọ evaọ iruo usiuwoma ota na. Dede na, ma tẹ be jariẹ w’obọ ẹsikpobi, ma te ruẹ nọ odibọgba Oleleikristi na o re ru omai kpokpọ evaọ abọ-ẹzi.—Jọn 4:32-34.

³ Evaọ oke ofa jọ, Jesu avọ ilele riẹ a nya kpohọ oria nọ o rẹ fọfọ re a serihọ omojọ. Dede na, ogbotu obuobu ọ tẹ rue rai koyehọ a dhẹ bru rai. Ukpenọ uzou u re dhe Jesu, ‘ohrọ ahwo na o tẹ riẹe,’ o te “mu ai eware ibuobu họ ewuhrẹ.” (Mak 6:30-34) Re a to ebe-iwuhrẹ Ebaibol họ je ru uwuhrẹ na o gwọlọ oghẹrẹ uruemu ovona. O gwọlọ omodawọ ogaga gbe uvi uyoyou kẹ ahwo. Otẹrọnọ who ri mu obe-uwuhrẹ Ebaibol họ eru evaọ enẹna ha, jọ o bẹ owhẹ hẹ evaọ oma nọ whọ be dawo re who mu ọvo jọ họ.

⁴ Rọ Eware Abọ-Ẹzi Karo: Ọkobaro obufihọ nọ ma re ru o rẹ sai fi obọ họ kẹ omai nọ ma jẹ mae tọ ẹro vi iruẹru abọ-ẹzi. Oniọvo-ọmọtẹ ọmaha jọ o kere nọ: “Oni ogbẹnyusu mẹ jọ ọ ta udu họ mai imava awọ inọ ma ru ọkobaro obufihọ kugbei evaọ amara ọvo. Eva e ghinẹ were omẹ nnọ ma ku oma kugbei. Mẹ reawere inievo na nọ mẹ te riẹ viere, yọ u kri hi a tẹ wọhọ uviuwou rọkẹ omẹ. Mẹ tẹ jẹ reawere uvẹ nọ me wo viere nọ mẹ rọ ta kpahe Jihova kẹ amọfa je wuhrẹ ai uzẹme ugbunu Uvie na. Enana kpobi i ru omẹ si kẹle Jihova gbe ukoko riẹ viere.”—Ol. 34:8.

⁵ Mai kpobi ma rẹriẹ ovao ku ẹmo ọrọ ugboma sebaẹgba mai gbe isiuru nọ ma re ro ru Jihova eva were. (Rom 7:21-23) Ma rẹ whaha ẹzi owhrewhrehe akpọ na hrọ. (Mat. 16:22, 23) Jihova ọ sae rọ ẹkwoma ẹzi ọfuafo riẹ fi obọ họ kẹ omai nọ ma je fi onana kparobọ. (Gal. 5:16, 17) Nọ ma be hẹrẹ esiwo mai ruọ akpọ ọkpokpọ okiẹrẹe Ọghẹnẹ na, joma rọ aro kele uruemu Jesu ẹkwoma isiuru Uvie na gbe isiuru amọfa nọ ma rẹ rọ karo kẹ emai.— Mat. 6:33; Rom 15:1-3.

[Study Questions]

1. Didi oghẹrẹ uruemu Jesu o dhesẹ?

2. Didi use-abọ Ileleikristi buobu a rẹriẹ ovao ku, kọ eme ọ rẹ sai fi obọ họ kẹ ai fi ei kparobọ?

3. Ẹvẹ ma sae rọ rehọ aro kele ẹzi unevaze nọ Jesu o je ro wuhrẹ?

4. Ẹvẹ ọkobaro obufihọ nọ ma re ru o sai ro fi obọ họ kẹ omai rọ aro kele oghẹrẹ uruemu Kristi?

5. Fikieme ma jẹ ruabọhọ oma nọ ma rẹ dawo gaga re ma rọ aro kele uruemu Jesu?