Ẹkpẹti Onọ

◼ Edhere vẹ ọ mai woma nọ a re ro ru unevaze ugho ro fiobọhọ kẹ inievo nọ i wo ẹgwọlọ evaọ orẹwho ofa?

Eva ẹsejọ, ma re yo kpahe inievo nọ e rrọ orẹwho ofa nọ e gwọlọ obufihọ eware abọ-iwo fiki ukpokpoma, ọraha, gbe iyero ebẹbẹ efa. Oma o wọ inievo jọ no nọ a ro vi ugho se iwou ogha nọ e rrọ ekwotọ itieye na, avọ ẹgwọlọ rai nọ a ta inọ a rọ ugho na fiobọhọ kẹ oniọvo jọ dẹẹ, ukoko jọ dẹẹ, hayo ro ru iruo evaọ ebabọ uwou jọ dẹẹ.—2 Kọr. 8:1-4.

Nọ ọdawẹ oyoyou otiọye na nọ a re wo kẹ ibe Ileleikristi ọ rrọ oware nọ u fo ajiri na, ẹsibuobu ẹgwọlọ jọ ọ rẹ jariẹ nọ ọ mae kpata vi onọ ohwo nọ o ru unevaze na o wo họ iroro. Evaọ ẹsejọ, o rẹ sae via inọ a rọ ẹro te ugogo oware nọ oniọvo nọ o ru unevaze na o wo họ iroro no. Uzẹme, ma rẹ sai fi eva họ inọ okenọ ma te vi unevaze se uwou ogha ẹkwotọ mai kẹ iruo akpọ soso na, Ẹkpa-Ugho Ọgwa Uvie, hayo rọ kẹ ahwo nọ okpẹtu ọ via kẹ, a rẹ rehọ igho yena nọ a ro ru unevaze na ruiruo lele epanọ ohwo nọ o ru unevaze na ọ ta.

A wuhrẹ inievo nọ e rrọ iwou ogha kpobi ziezi no re a jowọ vẹrẹ vẹrẹ kẹ eware idudhe nọ e via. Evaọ iyero kpobi, uwou ogha na o rẹ jẹ Ugboma Esuo na riẹ kpahe ẹme na. Otẹrọnọ o gwọlọ obufihọ ofa, Ugboma Esuo na o sai zizie iwou ogha ekẹloma re a fiobọhọ hayo a sai vi ugho no oria nọ u wuzou Isẹri Jihova eva akpọ na soso ze ovavo.—2 Kọr. 8:14, 15.

Fikiere, who re vi unevaze kpobi nọ who bi ru kẹ iruo akpọ-soso na, ebabọ evaọ erẹwho efa, hayo unevaze kẹ ogbọdhẹ ahwo nọ okpẹtu ọ via kẹ se uwou ogha nọ o rrọ orẹwho nọ whọ be rria, whọ sae rọ ẹkwoma ukoko ra vi ai hayo rọ edhere ọfa vi ai ovavo se uwou ogha na. Enẹ ‘ọrigbo nọ o wo ẹrọwọ avọ areghẹ na’ ọ be rọ rehọ ẹro te ẹgwọlọ okugbe-inievo akpọ-soso na evaọ edhere nọ ọ rrọ kpatiẹ, ẹkwoma ọruẹrẹfihotọ sa-sa nọ Ugboma Esuo na u fihọ.—Mat. 24:45-47; 1 Kọr. 14:33, 40.