Omaa Uviuwou—Usiuwoma Ota nọ Uviuwou O rẹ Nya Kugbe
1 O rẹ were Jihova re ọ ruẹ emaha nọ i bi jiri odẹ riẹ. (Ol. 148:12, 13) Evaọ edẹ Jesu, makọ “emaha gbe emọ unuevie” dede a jiri Ọghẹnẹ. (Mat. 21:15, 16) Ere ọvona o rrọ nẹnẹ re. Esẹgbini, ẹvẹ wha sai ro fiobọhọ kẹ emọ ra re a zihe ruọ enọ e rẹ rọ ajọwha jiri Jihova evaọ odibọgba Oleleikristi na? Wọhọ epanọ a fiẹgba họ iẹe evaọ uzoẹme obehru nọ o ta kpahe iwuhrẹ ukoko na, oriruo ra họ ugogo oware na. Ọsẹ jọ ọ ta oware nọ esẹgbini kpobi e be rọ ẹro ruẹ inọ: “Emọ i re ru epanọ whọ ta ha; epanọ who bi ru a re ru!”
2 Oniọvo-ọmọtẹ jọ nọ ọsẹgboni nọ i wo ozodhẹ Ọghẹnẹ a yọrọ ọ ta nọ: “Ma rẹ kpama no uto ze evaọ ohiohiẹ Ẹdẹ-Ọmaha re ma nọ sọ ma ti kpohọ usiuwoma ota ha. Ma riẹ nọ ma te nya.” Evaọ edhere ọvona, whọ rẹ sai wuhrẹ emọ ra epanọ iruo usiuwoma ota na i wuzou te ẹkwoma omaa ẹkpoka nọ uviuwou ra u re ro kpohọ usiuwoma ota ẹsikpobi. Orọnikọ onana o rẹ lẹliẹ emọ ra wuhrẹ no ẹruẹ nọ a be ruẹ owhẹ ze ọvo ho rekọ o rẹ lẹliẹ owhẹ mu ẹro họ uruemu rai, gbe ẹnyaharo nọ a bi wo.
3 Ewuhrẹ nọ Ọ rẹ Nyaharo: Re emaha na e reawere odibọgba na, u fo nọ a re wuhrẹ ai re a sae ta usiuwoma ziezi. Oniọvo-ọmọtẹ nọ ma jọ obehru fodẹ na ọ ta re nọ: “Ma jọ ahwo nọ e jẹ hai lele ọsẹ gbe oni mai ukuke ọvo evaọ iruo usiuwoma ota rai hi. Ma riẹ nọ ma wo abọ, o tẹ make rọnọ re a kporo ẹthẹ ọvo hayo re a nyase obe ovẹvẹ ba dede. Ẹkwoma oma ruẹrẹ kpahe ziezi taure iruẹru urere ẹkpoka na i te ti te, ma jẹ riẹ oware nọ ma rẹ te ta.” Whọ rẹ sae kẹ emọ ra uwuhrẹ utioye re ẹkwoma umutho iminiti jọ nọ who re ro wuhrẹ ai jẹ ruẹrẹ ae kpahe kẹ odibọgba na koka koka, o sae jọ etoke uwuhrẹ uviuwou na hayo oke ofa.
4 Usiuwoma nọ wha rẹ ta kugbe wọhọ uviuwou o rẹ k’owhẹ uvẹ ofa nọ who re ro wuhrẹ emọ ra uzẹme na. Ọsẹ jọ nọ ọ rrọ Oleleikristi ọ rẹ rehọ ọmọtẹ riẹ gboma nọ ọ tẹ be nya ikilomita ikpe kpohọ iwhre nọ e kẹle rai re o fi emebe-evẹvẹ họ-ada kẹ ae. Ọmọtẹ na ọ kareghẹhọ nọ: “Eva etoke nọ ma jẹ hae rọ nya edhere na ọsẹ mẹ o ro wuhrẹ omẹ uzẹme na.” (Izie. 6:7) Jọ oghale utioye na u t’owhẹ re nọ who bi ru usiuwoma ota fihọ abọjọ omaa ẹkpoka uviuwou ra na.