Ọruẹrẹfihotọ Okokohọ Okogho Ọkpokpọ

Akpọ na ọ rẹ gwọlọ ru omai roro nọ uyereakpọ nana o te jọ bẹdẹ bẹdẹ. Rekọ oware nọ Ebaibol e ta kpahe akpọ na u wo ohẹriẹ. (1 Jọn 2:15-17) Ebaibol na i fiobọhọ k’omai vuhumu inọ ‘efe nọ ma re koko họ akpọ na’ yọ ilale ifofe. Fikiere, re a bọ ahwo Ọghẹnẹ ga, ọruẹrẹfihotọ okokohọ okogho ọrọ ukpe iruo 2007 na u ti ru uzoẹme na vẹ ‘Kọ Okọ Họ obọ Odhiwu.’—Mat. 6:19, 20.

Iroro ilale efe o rrọ abọjọ oware nọ a jọ Ahwo Ẹfẹsọs 2:2 dhesẹ wọhọ ‘ogaga ofou na, ẹzi nọ o bi ru iruo eva emọ udu uyoma enẹna.’ Wọhọ epanọ ofou gheghe na ọ rrọ oria kpobi, nọ ma rẹ sae wẹ rehọ lọlọhọ na, ere “ẹzi akpọ na” ọ da eyero-akpọ nana fia. (1 Kọr. 2:12) Okpomahọ riẹ ọ ga te epanọ a ro dhesẹ iẹe wọhọ ogaga nọ o be kpọ ahwo. Ọruẹrẹfihotọ okokohọ okogho ọkpokpọ na o ti fiobọhọ k’omai whaha iroro ilale efe akpọ na je fiobọhọ k’omai tẹrovi eware nọ e mai wuzou. (Mat. 6:33) Fibae, ọruẹrẹfihotọ na o ti fiobọhọ k’omai rọ ẹro so Jihova nọ ma be wha iruo odibọgba mai haro ghelọ itunyẹ gbe edawọ nọ ma sae rẹriẹ ovao dhe na.

Daoma re whọ ruẹ nọ whọ rẹ jariẹ evaọ edẹ ivẹ na jẹ ruẹ nọ whọ “gaviezọ vi epaọ ọsosuọ.” (Hib. 2:1, NW ) Kere eme jọ kpẹkpẹ nọ whọ sai fihọ iruo evaọ uzuazọ ra gbe evaọ odibọgba ra. Nọ whọ tẹ jariẹ no emuhọ rite ekuhọ okokohọ nana nọ ọ vọ avọ emu abọ-ẹzi ọpoporiẹ na, who ti wo uduotahawọ gbe ọbọga nọ whọ te rọ ruabọhọ ‘koko efe họ obọ odhiwu’!