Whai Iviuwou, Wha Kuomagbe Gọ Jihova
1 Wọhọ epaọ ikuigbe nọ ma rẹ ruẹ evaọ Ebaibol na, ahwo uviuwou a je ru eware buobu kugbe. A jẹ hai ru eware sa-sa nọ e rẹ wha erere se uviuwou na kugbe kẹdẹ kẹdẹ, jẹ gọ Jihova kugbe. (Izerẹ 10:12-14; Izie. 31:12) Evaọ eria buobu nẹnẹ, ahwo uviuwou a rẹ kaki ru eware kugbe he. Rekọ Ileleikristi a riẹ epanọ u wuzou te re a ru eware kugbe wọhọ uviuwou, maero nọ u te kpomahọ ofẹ egagọ. Ababọ avro, o rẹ were Jihova eva gaga nọ ọ tẹ ruẹ iviuwou nọ e be gọe evaọ okugbe ọvo.
2 Ta Usiuwoma Kugbe: Usu nọ ahwo uviuwou a rẹ jọ kugbe evaọ usiuwoma ota o rẹ bọ okugbe rai ga. Fikiere, u fo nọ ọkpako ukoko o re fi oke họ nọ o re ro lele aye gbe emọ riẹ kpohọ usiuwoma ota noke ruoke o tẹ make rrọ nọ o re lele amọfa evaọ ukoko na kpohọ usiuwoma. (1 Tim. 3:4, 5) Dede nọ eware i re bu esẹro ọnyawariẹ abọ gaga, a re ru uvẹ fihọ nọ a rẹ rọ jọ usu kugbe eyae rai evaọ odibọgba na.
3 Esẹgbini nọ e rẹ jọ usu kugbe emọ rai u re ru nọ a jẹ sai fiobọhọ kẹ ae wo ẹnyaharo wọhọ etausiuwoma. Orọnikọ oghọghọ gbe evevọwẹ nọ esẹgbini rai a be jọ odibọgba na wo ọvo emọ na i ti muẹrohọ họ, rekọ a ti muẹrohọ epanọ esẹgbini rai a bi ro dhesẹ uyoyou rai kẹ Jihova gbe amọfa. (Izie. 6:5-7) Usu nọ esẹgbini e rẹ jọ kugbe emọ rai evaọ usiuwoma ota u gbe wuzou ghele nọ emọ na e be rro te ahwo no na. Ọsẹgboni jọ nọ a wo emọ esa nọ e rrọ umuo ikpe 15 rite 21 a ruabọhọ usu nọ a rẹ jọ kugbe emọ na ẹsikpobi evaọ odibọgba na. Ọsẹ na ọ ta nọ: “Ma re wuhrẹ ai oware okpokpọ jọ ẹsikpobi. Yọ ma rẹ daoma ruẹ nọ a reawere usiuwoma na je wo ọbọga noi ze.”
4 Oma Oruẹrẹhọ Kugbe: Iviuwou jọ e ruẹ nọ u re fiobọhọ gaga re a kuomagbe ruẹrẹ oma kpahe kẹ odibọgba na. Evaọ ẹsibuobu, o rẹ were emaha na nọ uviuwou u te kuomagbe bi wuhrẹ epanọ a rẹ rọ ta usiuwoma, nọ a rẹ jọ kẹ ae uvẹ re a ta usiuwoma kẹ ohwohwo. Iviuwou jọ e rẹ rọ umutho iminiti jọ ru onana evaọ obọ ekuhọ uwuhrẹ uviuwou rai.
5 Ma re wo oghọghọ ziezi nọ ma te lele ahwo nọ ma you ru oware nọ u wuzou nọ o rẹ kẹ evawere. O rẹ ginẹ jọ oware omawere kẹ ahwo uviuwou nọ a tẹ be jọ odibọgba nuwou ruọ uwou na ruiruo kugbe je ru izihebro avọ ebe-iwuhrẹ Ebaibol kugbe! Nọ whẹ avọ uviuwou ra wha bi kuomagbe gọ Jihova na, whọ sae rọ oghọghọ ta nọ: “Rọ kẹ omẹ avọ uwou mẹ ỌNOWO na ma rẹ gọ.”—Jos. 24:15.