Epanọ Ahwo Uviuwou A Sae rọ Rọwokugbe re A w’Obọ Vọvọ—Evaọ Odibọgba Na
1 Eme ọ rẹ sasa udu vi ezae avọ eyae, esẹ gbe ini avọ emọ nọ i bi ruiruo kugbe evaọ odibọgba Oleleikristi, bi jiri odẹ Jihova evaọ ẹgbede? (Ol. 148:12, 13) U fo re iviuwou kpobi i wo emamọ omaa re a w’obọ ziezi evaọ usiuwoma ota. Kọ uviuwou ra u fi ẹdẹ họ k’oka k’oka nọ a rẹ rọ ta usiuwoma? O tẹ rọ ere, kiyọ ohwo kpobi ọ riẹ oware nọ ọ rẹ m’omaa kẹ yọ ọ rẹ sai w’obọ vọvọ.—Itẹ 21:5a.
2 Taure ẹdẹ usiuwoma ota ọ uviuwou na u te ti te, eme wha gbe kuobọgbe ruẹrẹ oma kpahe kẹ uzoẹme nọ uviuwou ra o te rọ ta usiuwoma ha? Etoke omaruẹrẹhọ o re fiobọhọ gaga, yọ o rẹ sae kpare uvi ẹzi okugbe uviuwou. Ẹvẹ o rẹ kẹ erere te nọ uviuwou u te kpohọ usiuwoma kugbe yọ ahwo uviuwou na kpobi a ruẹrẹ oma kpahe!
3 Ọsẹro ọnyawariẹ jọ o lele uviuwou jọ kpohọ iruo emagazini. Nọ o je lele ọmọtẹ rai jọ nya n’uwou ruọ uwou na, ọmọtẹ na ọ tẹ nọe nọ: “Ẹvẹ who ti lele omẹ nya kri te?” Kẹsena ọmọtẹ na ọ tẹ ta nọ o ti je lele ọsẹ riẹ nya. O jọ vevẹ inọ tei te ọsẹ riẹ a be ghinẹ reawere usiuwoma ota rai kugbe ziezi. Ẹzi uviuwou onana u woma kẹhẹ!
4 Iviuwou jọ e sai ruiruo ọkobaro ubroke kugbe evaọ amara ọvo evaọ ẹgbukpe na. Hayo o sae lọhọ re omọvo jọ evaọ uviuwou na ọ hai ruiruo ọkobaro ubroke kẹse kẹse hayo tube fi odẹ h’otọ wọhọ ọkobaro oke-kpobi. Ẹkwoma emamọ oma-ukokohọ gbe ọrọwokugbe, utiẹsejọ ahwo uviuwou na kpobi a rẹ sai ru ẹkabọ rai viharo evaọ usiuwoma ota na ẹkwoma uketha nọ a rẹ kẹ omọvo nọ o bi ruiruo ọkobaro na. Uviuwou na u re ghine wo oghale ẹkwoma erubuo iruo nana gbe ẹkwoma emamọ iyẹrẹ nọ a be reawere rai evaọ odibọgba na.—Mal. 3:10.
5 Abọ ọvọvọ nọ a re wo evaọ iruo usiuwoma na u ti fiobọhọ ru iviuwou jọ kpekpekpe, wo ọwhọ, wo ẹvi, jẹ were eva evaọ iruo Jihova!—Wawo Ahwo Filipai 2:1, 2.