Uvitha Obọdẹ orọ Awake! nọ Ma ti Fihọ Ada Evaọ November!
1 Ahwo buobu a wo uvi enọ nọ a be nọ kpahe erere nọ Ebaibol na u wo. Otẹrọnọ ahwo-akpọ a kere i rie, ẹvẹ a bi ro sei Ẹme Ọghẹnẹ? Fikieme mẹ jẹ rẹroso Ebaibol na re o kpọ ithihi mẹ? Didi irere i re te omẹ nọ mẹ tẹ raha oke gbe ẹgba mẹ ro se je wuhrẹ Ebaibol na? Efafa Ebaibol vẹ u fo nọ me re se? Enọ nana họ enọ jọ nọ a kuyo rai evaọ uvitha obọdẹ orọ Awake! November nọ uzoẹme riẹ o ta nọ “Can You Trust the Bible?” (Kọ Whọ Sai Fi Eva Họ Ebaibol Na?)
2 Ma gwọlọ nọ ma rẹ ghale uvitha obọdẹ orọ Awake! nana kẹ ahwo kpobi evaọ ẹkwotọ mai. O tẹ lọhọ, daoma wobọ evaọ usiuwoma nuwou ruọ uwou kugbe ukoko ra evaọ Ẹdẹ-Ọmaha kpobi nọ ọ rọ amara November na. Dhesẹ Awake! nana kẹ imoni ra, ahwo nọ wha gbẹ rọ ighẹ, ibe-iruiruo, iticha ra, ibe emọ-isukulu, gbe izihebro ra. Wha ejọ lele oma nọ who te bi kpohọ eki je kpohọ erẹ. Ekpako na a vi efa kugbe enọ wha be hai wo vẹre, re ukoko na o sai wo enọ i re te ai ruiruo.
3 Mu Obe-Uwuhrẹ Ebaibol Họ: Otẹrọnọ ohwo ọ rehọ emagazini na, whọ sai mu ọruẹrẹfihotọ nọ o re su kpohọ obe-uwuhrẹ Ebaibol họ taure who te ti ku ẹme ra họ. Wọhọ oriruo, whọ sae ta nọ, “Oke ofa nọ me te zihe ze, o te were omẹ re me dhesẹ oware nọ Ebaibol o ta kpahe onọ nana k’owhẹ, ‘Eme họ ẹjiroro Ọghẹnẹ kẹ otọakpọ na?’ ” Nọ who ti zihe wha obe ọ Ebaibol Wuhrẹ na lele oma, re who dhesẹ ẹwẹ-obe avọ 4-5 kẹ ohwo na, hayo tẹme kpahe edhe-ẹme 1-3 evaọ uzou avọ 3. Edhere ọfa, whọ sae ta nọ, “Oke ofa nọ me te zihe ze, mẹ te gwọlọ nọ me re lele owhẹ tẹme kpahe eruẹaruẹ Ebaibol jọ nọ u bi rugba enẹna.” Nọ who te zihe, dhesẹ uzou avọ 9 orọ obe Ebaibol Wuhrẹ na kẹ ohwo na whọ vẹ rehọ edhe-ẹme 1-3 ro lele iei tẹme. Hayo whọ sae ta kẹ ohwo na inọ: “O be hae jọ bẹbẹ kẹ ahwo buobu re a wo otoriẹ oware nọ a bi se evaọ Ebaibol na. Oke ọfa nọ me te zihe ze, mẹ te gwọlọ nọ me re dhesẹ oghẹrẹ nọ whọ sai ro wo otoriẹ Ebaibol na ziezi k’owhẹ.” Nọ who te zihe, dhesẹ obe Ebaibol Wuhrẹ na kẹe, je dhesẹ oghẹrẹ nọ ma re ro ru uwuhrẹ na.
4 Ebaibol na ọvo ma sae jọ duku “ikere ẹri,” nọ e rẹ sai ru omai “wha ẹro te usiwo.” (2 Tim. 3:15) Fikiere, jomai kpobi ma daoma re ma rọ ajọwha wobọ evaọ ẹghale uvitha obọdẹ orọ Awake! nana ro fiobọhọ kẹ ahwo fi eva họ Ebaibol na!