Ma Be Kpọ Iwuhrẹ Ethọthọ nọ I Kri Otọ no Vi
1 U kri gaga no nọ Setan ọ be rọ rehọ iwuhrẹ erue gbe eviẹhọ ro su ahwo buobu thọ. Ọ wha iwuhrẹ erue wọhọ Esanerọvo, ẹwẹ nọ o re whu hu, gbe erae ehẹle haro no. O bi fi avro họ udu ahwo buobu inọ Ọghẹnẹ ọ rrọ họ, gbe inọ Ọghẹnẹ o wo eme Ebaibol na ha. Ohẹriẹ-ovioma gbe ẹzi orẹwho-mẹ-oja yọ eware efa jọ nọ Ẹdhọ ọ be rọ whaha ahwo re a siọ uzẹme na ba ẹriẹ. (2 Kọr. 4:4) Ẹvẹ ma sae rọ kpọ iwuhrẹ erue enana nọ i kri otọ no na vi?—2 Kọr. 10:4, 5.
2 I Kpomahọ Iroro Ahwo No: Iwuhrẹ egagọ nọ ohwo ọ rọwo kri no u re kpomahọ iroro riẹ didi. Ahwo jọ a wo orọwọ othọthọ no anwọ oke emaha ze. Re ma sai fi obọ họ kẹ ahwo otiọye na, o gwọlọ nọ ma rẹ tẹme evaọ oghẹrẹ nọ u re dhesẹ adhẹẹ kẹ eriwo rai.—1 Pita 3:15.
3 Ma rẹ sai dhesẹ adhẹẹ kẹ ahwo otiọye na ẹkwoma uvẹ nọ ma rẹ kẹ ae re a ta oware nọ a rọwo gbe oware nọ a rọ rọwo ere. (Jem. 1:19) Ẹsejọhọ a rọwo nọ ohwo o wo ẹwẹ nọ o re whu hu, fikiere a bi rẹro nọ a te wariẹ ruẹ ohwo oyoyou rai jọ nọ o whu nọ ẹzi riẹ o kpohọ obọfa nyae ria. Hayo a re ru ehaa-eriosehọ keme a rri uvẹ nọ onana o rẹ kẹ ae nọ a re ro ku oma gbe uviuwou rai ghaghae. Ma tẹ be gaviezọ kẹ ae u ti fi obọ họ kẹ omai riẹ oware nọ o rrọ iroro rai, u ve je fi obọ họ kẹ omai ta ẹme nọ o re duobọte ai udu.—Itẹ 16:23.
4 Rọ Aro Kele Jesu: Jesu o fi uvi oriruo hotọ k’omai evaọ oghẹrẹ nọ ọ rọ kuyo enọ nọ ọzae jọ nọ ọ riẹ uzi gaga ọ nọ riẹ. Jesu ọ ta oware nọ ọzae na o re ru kẹe he, keme ẹsejọhọ ọzae na ọ hae te siọ eme na fiki orọwọ jọ nọ o kru ghaghae. Ukpoye, Jesu o si iroro riẹ kpohọ Ikereakere na, jẹ nọe re ọ ta iroro riẹ, ọ tẹ rọ ẹkwoma ọtadhesẹ fi obọ họ kẹe roro.—Luk 10:25-37.
5 Ẹme Ọghẹnẹ ọ sai fi obọ họ kẹ ahwo nọ a gbẹ rọwo iwuhrẹ erue he. (Hib. 4:12) Ma tẹ be roma totọ wuhrẹ amọfa uzẹme na, u ti fi obọ họ kẹ ae siọ iwuhrẹ erue, a vẹ jẹ uzẹme na rehọ nọ o rẹ sai si ai no igbo iwuhrẹ erue.—Jọn 8:32.