Ẹvẹ Whọ Te k’Uyo?
1. Fikieme ma jẹ rọ aro kele oriruo Jesu nọ a tẹ nọ omai onọ?
1 Oghẹrẹ nọ Jesu ọ rọ k’iyo enọ nọ a nọ riẹ u gb’ahwo oke riẹ unu, yọ ere o rrọ te inẹnẹ. Nọ a tẹ nọ omai oghẹrẹ enọ sa-sa evaọ odibọgba na, u fo re ma rọ aro kele oghẹrẹ nọ Jesu ọ rọ kẹ ahwo uyo.—1 Pita 2:21.
2. Eme ọ rẹ sai fi obọ họ k’omai k’uyo onọ ziezi?
2 Gaviezọ Tao: Jesu ọ jẹ hai roro kpahe oware nọ o wọ ohwo nọe onọ taure ọ tẹ k’uyo. Ẹsejọ onana o rẹ gwọlọ nọ whọ nọ ohwo na onọ zihe re whọ riẹ oware nọ o wọ riẹ nọ onọ na. O sae jọnọ oware nọ who gbe bi ru Kresimesi hi u bi gb’ohwo jọ unu, o vẹ wọe nọ owhẹ nọ, “Kọ whọ rọwo Jesu?” Whọ tẹ riẹ ugogo oware nọ o wọ ohwo na nọ onọ na, whọ te sae jẹ iroro kugbe ei ziezi.—Luk 10:25-37.
3. Ebe vẹ ma wo nọ e rẹ sai fi obọ họ k’omai duku iyo Ikereakere nọ e rẹ v’eva?
3 Rehọ Ebaibol na k’Uyo: O rẹ mai woma re whọ k’uyo onọ no Ebaibol na ze. (2 Tim. 3:16, 17; Hib. 4:12) Omobe ọ Izoẹme Ebaibol rọ kẹ Iroro e Jẹ na gbe orọ Epanọ A ro Muhọ Jẹ Ruabọhọ Ebaibol E rọ Jiroro na i fi obọ họ kẹ ahwo buobu k’iyo egbagba no. O tẹ make rọnọ ohwo na ọ gbẹ make rọwo eme Ebaibol na ha, whọ sae rọ edhere areghẹ si eme no Ebaibol na ze ro kugbe lele iei t’ẹme. Tuduhọ ohwo na awọ re o roro ziezi kpahe uvi eme areghẹ nọ e rrọ Ebaibol na. Ẹkwoma aruorokele Jesu, iyo ra e te “wọhọ ibi igoru nọ a fihọ udevie isiliva”—nọ e rrọ ghaghae, wowoma avọ ọghọ.—Itẹ 25:11.
4. Oke vẹ ma gbẹ rọ daoma k’uyo onọ kpobi hi?
4 Kọ Onọ Kpobi Ma rẹ k’Uyo Riẹ? Otẹrọnọ whọ gbẹ riẹ uyo onọ jọ họ, jọ oma o vuọ owhẹ hẹ re whọ ta nnọ: “Mẹ riẹ uyo na ha, rekọ me ti ru ekiakiẹ kpahe onọ ra na, me ve ti zihe ze te k’owhẹ uyo na.” Omaurokpotọ utioye gbe isiuru nọ who dhesẹ kpahe ohwo na o sai ru ei rọwo nọ who zihe ze oke ọfa. Who te muẹrohọ nọ ohwo ọ be nọ onọ re o ro mu avro họ, rọ aro kele Jesu re whọ siọ eme ithethei ba ẹta. (Luk 20:1-8) Epọvo na re, otẹrọnọ ohwo jọ nọ o wo isiuru kpahe uzẹme na ha ọ be gwọlọ vravro rọ raha oke ra, rọ areghẹ ku ẹme na họ, re whọ rehọ oke ra gwọlọ ahwo nọ a wo isiuru kpahe uzẹme na.—Mat. 7:6.
5. Oriruo vẹ Jesu o fihotọ evaọ oghẹrẹ nọ ọ rọ k’iyo enọ? (Rri ẹkpẹti nọ ọ rrọ ẹwẹ-obe nana re.)
5 Jesu ọ riẹ nọ re ọ sai “se isẹi kẹ uzẹme” na ziezi, nọ o kẹre te iyo enọ ahwo nọ a ginẹ gwọlọ riẹ uzẹme na nọ ọ rẹ kẹ, ọ rẹ rọ ẹro suọ Jihova. (Jọn 18:37) Uvẹ-ọghọ ulogbo o rrọ re ma rọ aro kele Jesu evaọ iyo nọ ma rẹ kẹ ‘enọ i wo eva ezi kẹ uzuazọ ebẹdẹ bẹdẹ’!—Iruẹru 13:48.
Igogo-Eme nọ A rẹ Kareghẹhọ
◼ Gaviezọ ziezi re whọ riẹ ẹjiroro nọ ohwo na ọ be rọ nọ onọ na.—Luk 8:18.
◼ Rehọ Ebaibol na rọ k’uyo. Ebe mai nọ a kere no Ebaibol na ze e sai fi obọ họ k’owhẹ riẹ epanọ whọ sae rọ rehọ Ikereakere na ruiruo ziezi.—Hib. 4:12.
◼ Dhesẹ orimuo, omaurokpotọ, jẹ t’ẹme avọ adhẹẹ.—Kọl. 4:6.