A bi Kere Emagazini Mai re I Si Oghẹrẹ Ahwo Kpobi Urru
1. Ẹvẹ utu ọrigbo nọ o wo ẹrọwọ avọ areghẹ na o be rọ rehọ aro kele Pọl ukọ na?
1 Wọhọ epanọ Pọl ukọ na o je nwene onaa nọ ọ jẹ rọ ta usiuwoma na re ọ sai wo ‘oghẹrẹ ahwo kpobi’ tobọ na, ere ọvona ọrigbo nọ o wo ẹrọwọ avọ areghẹ na ọ be rọ emagazini mai ro wuhrẹ oghẹrẹ ahwo kpobi uzẹme Ebaibol na. (1 Kọr. 9:22, 23) Re ma sae rehọ Uwou-Eroro Na gbe Awake! ro ruiruo ziezi, u fo re ma riẹ oghẹrẹ ahwo nọ a wo họ iroro kere ai.
2. Amono a wo họ iroro kere Awake! na?
2 Awake!: A bi kere Awake! re u fi obọ họ kẹ ahwo nọ e wọhọ “ahwo Athẹns” nọ Pọl ọ ta usiuwoma kẹ. (Iruẹru 17:22) Ahwo yena a jọ Ileleikristi hi, yọ a riẹ Ikereakere na ziezi hi. Epọvo na re, ahwo nọ a be rọ fiki rai kere Awake! a wo umutho eriariẹ kpahe Ebaibol na hayo a wo vievie he. O sae jọnọ a riẹ iwuhrẹ Ebaibol na vievie he, a wo isiuru kpahe egagọ tere he, hayo a riẹ hẹ inọ Ebaibol na o re fi obọ họ kẹ omai. Ugogo ẹjiroro Awake! họ re u ru enọ i bi sei rọwo inọ Ọghẹnẹ ọ rrọ. Ẹjiroro ọfa họ re u ru ahwo rọwo Ebaibol na je fi obọ họ kẹ ọnọ o bi sei riẹ inọ Isẹri Jihova a wo ohẹriẹ no egagọ efa.
3. Amono a bi wo họ iroro kere Uwou-Eroro ọ uvitha uwuhrẹ na?
3 Uwou-Eroro Na: Enọ a wo họ iroro bi ro kere uvitha ẹgbede na a dina wo adhẹẹ kẹ Ọghẹnẹ gbe Ebaibol na. A wo umutho eriariẹ kpahe Ebaibol na rekọ a wo otoriẹ iwuhrẹ riẹ gbagba ha. A wọhọ ahwo nọ Pọl ọ ta kpahe inọ ‘a wo ozodhẹ Ọghẹnẹ’ na. (Iruẹru 13:14-16) Uvitha uwuhrẹ orọ Uwou-Eroro Na o rọ rrọ kẹ Isẹri Jihova. Pọl ọ rehọ e riẹ inọ enọ i bi se ileta riẹ a riẹ Ikereakere na je wo eriariẹ egbagba uzẹme na. (1 Kọr. 1:1, 2) Epọvo na re, a bi kere uvitha uwuhrẹ na rọkẹ enọ e be ziọ ewuhrẹ mai, a tẹ jẹ riẹ oghẹrẹ eme sa-sa nọ ukoko na u re ro ruiruo.
4. Fikieme u ro fo re ma riẹ eware nọ e rrọ Uwou-Eroro avọ Awake! nọ ma bi fihọ ada?
4 Dede nọ Uwou-Eroro avọ Awake! ma be hai kugbe rọ kẹ ahwo nọ ma te bi fi ai họ ada, ọvo ma be hae ta ẹme kpahe. Fikiere, hae daoma se ivẹ na re whọ riẹ eware nọ e rai eva. Who te ru ere, ẹsiẹe whọ te mae rọ riẹ uzoẹme nọ u ti si ahwo nọ whọ nyaku urru.