Uyoyou Ọghẹnẹ gbe orọ Ọrivẹ​—Oghẹrẹ nọ A ro Woi

Dede nọ Ileleikristi a gbe bi koko Uzi Mosis na ha, Jihova ọ gbẹ gwọlọ nọ ma koko izi ivẹ nọ e mae rro na ghele, re ma you Ọghẹnẹ gbe ọrivẹ mai. (Mt 22:37-39) A yẹ omai ze avọ uyoyou utionana ha. Ma rẹ daoma woi hrọ. Evaọ oghẹrẹ vẹ? Edhere jọ họ, Ebaibol na nọ ma re se kẹdẹ kẹdẹ. Ma te roro kpahe iruemu sa-sa Jihova nọ a fodẹ evaọ Ebaibol na, ma te ruẹ “eru ỌNOWO” na. (Ol 27:4) Nọ oke o be nyaharo na, uyoyou nọ ma wo kẹe o vẹ te rro, ma ve ti roro wọhọ epanọ o re roro. Uyoyou nana o te wọ omai koko izi riẹ, onọ u kugbe amọfa nọ ma re you nevaze je fiobọhọ kẹ. (Jọ 13:34, 35; 1Jọ 5:3) Dao eware esa nana, i ti ru isase Ebaibol si owhẹ urru:

• Jọ iroro ra ruẹ, je fi omara họ ughe na. Dae rehọ iẹe nọ whọ rrọ etẹe. Eme whọ be ruẹ, yo, je se ore riẹ? Eme who roro nọ ahwo nọ a rrọ etẹe a bi ru?

  

• Nwene epanọ whọ be hai ro sei. Salọ ọjọ evaọ usu enana: Se do via, hayo rri lele ọnọ a se do via. Se kpahe ohwo jọ evaọ Ebaibol na hayo uzoẹme jọ ukpenọ who re se izou na othotha. Wọhọ oriruo, rehọ Appendix A7 hayo B12 evaọ Efafa Akpọ Ọkpokpọ ọrọ Ikereakere Efuafo Na ro se kpahe Jesu. Se uzou nọ a rehọ ese okpẹdẹ na no ze re. Se ebe Ebaibol na lele oke nọ a ro kere ai.

  

• Se re who wo otoriẹ. O tẹ make rọnọ uzou ovo who se kẹdẹ kẹdẹ je wo otoriẹ riẹ u woma vi ẹsenọ whọ rẹ dhẹ izou buobu duwu sidhe nọ who se. Roro kpahe oghẹrẹ nọ o rọ via. Riẹ iku na totọ. Rehọ emapo gbe eria ikere nọ e rrọ udevie ewẹ-ebe na gbẹ riẹ iku na. O tẹ kawo kiẹ oria jọ nọ who wo otoriẹ riẹ hẹ riwi. O tẹ lọhọ, raha enwenọ oke ovo nọ who ro se na ro roro ziezi.