Ọkobaro

Nọ ma te fi itee họ evaọ egagọ Jihova, ẹsiẹe ma rẹ rọ rehọ ẹgba mai ruiruo ziezi. (1Kọ 9:26) Yọ itee nọ ma re fihọ i re fiobọhọ kẹ omai rehọ oke mai ruiruo ziezi taure ekuhọ uyero-akpọ nana u te ti te. (Ẹf 5:15, 16) Wha sae jọ egagọ uviuwou rai ta kpahe itee jọ nọ wha ti le evaọ ukpe iruo nọ o be tha na. Whọ rẹ jọ obe ewuhrẹ nana ruẹ izoẹme nọ e ta kpahe itee sa-sa nọ wha sai roro kpahe.—Jem 1:5.

Wọhọ oriruo, kọ whai ahwo uviuwou na kpobi wha sai fiobọhọ kẹ omọvo jọ evaọ uviuwou na re o ru ọkobaro oke-kpobi? Otẹrọnọ ozọ u bi mu owhẹ nọ whọ te sai ru euwa ra gba ha, lele ekobaro jọ nọ uyero rai o wọhọ ora na ta ẹme. (Itẹ 15:22) Wha sae tubẹ jọ egagọ uviuwou rai kiẹ ọkobaro oke-kpobi jọ riwi dede. Kẹsena who ve kere omaa epanọ whọ te sai ro ru euwa ra gba fihotọ. Otẹrọnọ whọ jọ ọkobaro vẹre, roro kpahe epanọ uyero ra o rrọ enẹna sọ whọ sae wariẹ muhọ.

Kọ ahwo jọ evaọ uviuwou ra a sai ru ọkobaro obufihọ evaọ amara ọvo hayo bu vi ere? Otẹrọnọ oma ra o ga tere he, whọ sai ru ọkobaro obufihọ nọ whọ tẹ rehọ omoke jọ kpohọ usi uwoma kẹdẹ kẹdẹ. Yọ otẹrọnọ whọ sai kpohọ usi uwoma evaọ udevie oka ha fiki iruo ra hayo isukulu, whọ sae salọ amara nọ wha ti kpohọ ehọlide hayo amara nọ o wo Ẹdẹ-Ọmaha gbe Ẹdoka isoi ro ru ọkobaro obufihọ. Kere amara nọ who ti ro ru ọkobaro obufihọ gbe omaa nọ who ti ro ru ei fihọ ekalẹnda ra.—Itẹ 21:5.

WHA RRI IVIDIO NA WHA WO UDU . . . EKOBARO, KẸSENA WHA VẸ KUYO ONỌ NANA:

• Eme oriruo Sista Aamand o wuhrẹ omai kpahe oghẹrẹ nọ Jihova ọ rẹ rọ rẹrote ahwo nọ a bi ru ọkobaro?