UZOẸME UWUHRẸ 15
OLE AVỌ 124 Ma Hai Yoẹme
Jọ Ukoko na O Were Owhẹ Vi Epaọ Anwẹdẹ
“Wha kareghẹhọ enọ e be kobaro evaọ udevie rai, enọ e ta ẹme Ọghẹnẹ kẹ owhai.”—HIB. 13:7.
OWARE NỌ A JARIẸ TA KPAHE
A jariẹ ta kpahe eware nọ ma re ru re ukoko Jihova o gbẹ hae were omai oma.
1. Ẹvẹ ahwo Jihova a je ro ru eware dẹdẹ evaọ oke ikọ na?
OWARE kpobi nọ Jihova ọ vuẹ idibo riẹ nọ a ru, ọ rẹ gwọlọ nọ a ru ei dẹdẹ. Ọ gwọlọ nọ ma ru eware zighi zighi hi. (1 Kọr. 14:33) Oware jọ nọ ọ ta nọ ma ru họ, ma ta usi uwoma nya akpọ na soso re. (Mat. 24:14) Jesu ọye Jihova o ro mu ohwo nọ o wuzou iruo na. Yọ oghẹrẹ nọ Jesu o bi ro su omai u ru nọ ma be sae rọ ta usi uwoma na dẹdẹ. Evaọ oke ikọ na, a rehọ ikoko mu eria avọ eria, yọ a rehọ ekpako mu evaọ ukoko kpobi re a vuẹ inievo na oware nọ a re ru. (Iruẹru 14:23) Utu ekpako gbe ikọ nọ e jọ obọ Jerusalẹm a jẹ hae gba ẹgwae. Oware kpobi nọ a gba a vẹ vuẹ inievo na. Kọ oye ikoko na kpobi a re ru. (Iruẹru 15:2; 16:4) Yọ fikinọ a jẹ hae daoma ru oware nọ ikọ gbe ekpako na a ta, “ikoko na e tẹ jọ gaga evaọ ẹrọwọ na je bi vihọ.”—Iruẹru 16:5.
2. Anwọ 1919, ẹvẹ Jihova o bi ro wuhrẹ ahwo riẹ?
2 Jihova o gbe bi fiobọhọ kẹ ahwo riẹ re a ru eware kpatiẹ nẹnẹ. Anwọ 1919 Jesu ọ be rọ rehọ utu ahwo jọ dhesẹ oghẹrẹ nọ ma re ro ru iruo usi uwoma ota na kẹ omai, a tẹ be jẹ rọ ẹme Ọghẹnẹ kuọ omai.a (Luk 12:42) Ahwo nana yọ ezae nọ a rọ ẹzi wholo. A bu hu. Rekọ ma ruẹ nọ Jihova ọ be ghale ae gaga evaọ iruo na.—Aiz. 60:22; 65:13, 14.
3-4. (a) Kẹ oriruo jọ nọ u dhesẹ nọ ma te bi ru oware nọ ukoko o ta u woma vi ọvuọ oriẹ nọ ma re ru. (b) Eme ma te ta kpahe evaọ uzoẹme nana?
3 Ma hae sai ru iruo na ha, ogbẹrọnọ Jesu o bi wuhrẹ omai oghẹrẹ nọ ma re ro ru iruo na kpatiẹ hẹ. (Mat. 28:19, 20) Ma rehọ iẹe nọ a kẹ omai oria nọ ma rẹ jọ ta usi uwoma ha. Ohwo kpobi, oria nọ u je rie ọ hai jo kpohọ usi uwoma. O hae te whae ze nọ a hae te rọ jọ eria jọ ta usi uwoma ha, rekiyọ ahwo buobu a be jọ eria efa ta usi uwoma ẹsikpobi. Nọ ahwo jọ a tẹ jariẹ ta no, itu efa a vẹ jẹ nyaze iẹe te ta. Kọ whọ sai roro te irere efa nọ i re te omai nọ ma te bi ru eware kpatiẹ evaọ ukoko na?
4 Oghẹrẹ nọ Jesu o je ru eware okenọ ọ jọ otọakpọ, u ru nọ ma rọ riẹ epanọ ma re ru eware kpatiẹ nẹnẹ. Ma te jọ uzoẹme nana ta ẹme kpahe oriruo nọ Jesu o fihotọ kẹ omai, gbe oghẹrẹ nọ ukoko na u bi ro lele oriruo na. Ma te jẹ ta kpahe oware nọ ma re ru nọ u re dhesẹ nọ ukoko Jihova o were omai.
UKOKO NA U BI LELE ORIRUO JESU
5. Eme o dhesẹ nọ ma bi lele oriruo Jesu? (Jọn 8:28)
5 Okenọ Jesu ọ jọ otọakpọ, eware nọ o wuhrẹ mi Ọsẹ obọ odhiwu riẹ ọvo o je ru jẹ ta. Fikinọ ma be rọ aro kele Jesu, eware nọ ma jọ Ebaibol ruẹ ọvo ma re ru je wuhrẹ ahwo. (Se Jọn 8:28; 2 Tim. 3:16, 17) Oke kpobi a be hae kareghẹhọ omai re ma hai se ẹme Ọghẹnẹ je ru oware nọ ma se. Kinọ ma te bi ru ere, erere vẹ o re te omai?
6. Ẹvẹ Ebaibol nọ ma re wuhrẹ u re ro fiobọhọ kẹ omai?
6 Ebe ukoko na nọ ma re ro wuhrẹ Ebaibol, u re fiobọhọ kẹ omai gaga. O rẹ whae ze nọ ma rẹ rọ riẹ sọ eware nọ ukoko u bi wuhrẹ omai na Ebaibol i no ze. Nọ ma jẹ ruẹ nọ oware nọ ukoko na o be vuẹ omai na o ginẹ rrọ Ebaibol, o vẹ lẹliẹ omai fievahọ ukoko Jihova gaga.—Rom 12:2.
7. Usi uwoma eme Jesu ọ jẹ ta, kọ ẹvẹ ukoko na o bi ro lele oriruo Jesu?
7 Jesu ọ jẹ ta “usi uwoma Uvie Ọghẹnẹ.” (Luk 4:43, 44) Yọ ọ vuẹ ilele riẹ nọ a ta usi uwoma Uvie na. (Luk 9:1, 2; 10:8, 9) Nẹnẹ re, ohwo kpobi nọ ọ rrọ ukoko Jihova ọ be ta usi uwoma Uvie na. Ohwo ọvo ọ be ta nọ me wo uvẹ hẹ hẹ hayo inọ iruo e vọ omẹ abọ evaọ ukoko na. Yọ ma be ta usi uwoma evaọ oria kpobi nọ ma be rria.
8. Obọdẹ iruo vẹ Ọghẹnẹ ọ kẹ omai?
8 Eva e be were omai gaga nọ ma be rọ ta usi uwoma Uvie Ọghẹnẹ kẹ ahwo! Ahwo kpobi uvẹ nana u te obọ họ. Wọhọ oriruo, okenọ Jesu ọ jọ otọakpọ na, ọ kẹ izi imuomu uvẹ hẹ re a vuẹ ahwo nọ ọye họ Ọmọ Ọghẹnẹ. (Luk 4:41) Nẹnẹ, re a tẹ te kẹ ohwo uvẹ inọ o lele inievo ukoko na kpohọ usi uwoma, ọ rẹ jọ ohwo nọ o bi ru oreva Ọghẹnẹ. Nọ ma tẹ be ta usi uwoma oke kpobi evaọ oria kpobi nọ ma rrọ, u dhesẹ nọ iruo usi uwoma ota na e were omai gaga. Ma gwọlọ nọ ma rẹ kọ ibi ovuẹ Uvie na fihọ idu ahwo je zihe nyai ku ame ku ai wọhọ epanọ Jesu o je ru.—Mat. 13:3, 23; 1 Kọr. 3:6.
9. Eme ukoko na o bi ru re ahwo a riẹ odẹ Ọghẹnẹ?
9 Jesu o ru nọ ahwo a rọ riẹ odẹ Ọghẹnẹ. Nọ Jesu ọ jẹ lẹ se Ọsẹ obọ odhiwu riẹ ọ ta nọ: “Me dhesẹ odẹ ra via kẹ ae no.” (Jọn 17:26) Ere ọvona re nẹnẹ, ukoko Jihova o be daoma gaga re ahwo a riẹ odẹ Ọghẹnẹ. Who te rri Ebaibol Efafa Akpọ Ọkpokpọ ọrọ Ikereakere Efuafo Na, whọ rẹ ruẹ nọ a fi odẹ Ọghẹnẹ họ eria nọ a si odẹ na no evaọ Ebaibol buobu. Yọ a fa Ebaibol na fihọ evẹrẹ nọ i bu vi egba ivẹ gbe udhosa-gbikpe (270). A jọ oria Ẹme-Ofiba A4 gbe A5 evaọ Ebaibol Efafa Akpọ Ọkpokpọ na ta kpahe oware nọ o lẹliẹ omai fi odẹ Ọghẹnẹ họ eria nọ a si rie no na. Evaọ Ebaibol Efafa Akpọ Ọkpokpọ ọrọ Oyibo nọ a re se Study Bible, u wo oria jọ nọ a re se Appendix C. A jariẹ ta kpahe oware nọ o lẹliẹ omai fi odẹ Ọghẹnẹ họ eria nọ i bu te egba ivẹ gbe ọgbagbihrẹ (237) evaọ Ikereakere Griki Ileleikristi na.
10. Eme ẹme nọ aye obọ Myanmar na ọ ta na ọ lẹliẹ owhẹ riẹ?
10 Ma gwọlọ nọ ma re fiobọhọ kẹ ahwo buobu re a riẹ odẹ Ọghẹnẹ wọhọ epanọ Jesu o ru. Nọ aye jọ nọ ọ kpako te ikpe udhosa-gbihrẹ no evaọ obọ Myanmar o yo odẹ Ọghẹnẹ, aro o su rie ame. Ọ ta nọ: “Nẹnẹ họ ẹdẹ ọsosuọ nọ me ro yo nọ Jihova họ odẹ Ọghẹnẹ. . . . Oware nọ wha wuhrẹ omẹ nẹnẹ na, a rẹ ruẹ oware nọ o rro tei hi.” Oware nana u dhesẹ nọ a te wuhrẹ ohwo nọ o wo omaurokpotọ odẹ Ọghẹnẹ, u re duobọtei gaga.
GBẸ HAI RU EWARE NỌ I DHESẸ NỌ UKOKO NA O BE WERE OWHẸ OMA
11. Eme ekpako a re ru nọ u re dhesẹ nọ ukoko Jihova o were rai gaga? (Rri uwoho na re.)
11 Eme ekpako ukoko a re ru nọ u re dhesẹ nọ ukoko Ọghẹnẹ o were rai? Nọ ukoko u te kere se ai nọ jọ a ru oware jọ, a rẹ romatotọ se ẹme nọ ukoko o ta na, a vẹ jẹ daoma gaga re a ru ei. Orọnikọ epanọ a re ru ẹme gbe epanọ a rẹ lẹ evaọ ewuhrẹ ọvo ukoko u bi wuhrẹ ekpako na ha. Rekọ te epanọ a rẹ rẹrote igodẹ Jesu. Nọ ekpako ukoko a te ru oware nọ ukoko o vuẹ rai, erere o re te inievo na, eva e rẹ were ai, o vẹ jẹ lẹliẹ ae riẹ nọ a you rai.
Ekpako na a rẹ tuduhọ omai awọ re ma ru oware nọ ukoko Jihova o ta (Rri edhe-ẹme avọ 11)b
12. (a) Fikieme ma je ru oware nọ enọ e be kobaro na a vuẹ omai? (Ahwo Hibru 13:7, 17) (b) Eme u ro fo re ma hai rri eware nọ ekpako gbe amọfa nọ a ro mu a be riẹ ru?
12 Nọ ekpako na a tẹ vuẹ omai nọ ma ru oware jọ, joma ru ei avọ evawere. Ma te ru ere, u re ru owha nọ a wọ na vori omojọ. Ebaibol o tuduhọ omai awọ nọ joma yoẹme kẹ enọ e be kobaro evaọ udevie mai jẹ romakpotọ kẹ ae. (Se Ahwo Hibru 13:7, 17.) Ma riẹ nọ ẹsikpobi oyena o rẹ lọhọ họ. Fikieme? Keme inievo nana nọ e be kobaro na, eware e rẹ thọ ae obọ ẹsejọ. Ma te bi rri eware nọ a be riẹ ru hu ukpenọ ma re rri ofẹ nọ a be jọ daoma, o te lẹliẹ omai jọ abọ ewegrẹ mai. Eme o lẹliẹ omai ta ere? O te whae ze nọ ma gbẹ te rọwo eme jọ nọ ukoko Ọghẹnẹ o be ta kẹ omai hi. Yọ oware nọ ahwo nọ a mukpahe ukoko na a gwọlọ nọ ma ru oye. Rekọ ẹvẹ ma sae rọ kẹnoma kẹ ewegrẹ mai je vuhu erue nọ a bi gu kpahe ukoko na mu?
WHỌ JỌ EME RAI O LẸLIẸ UKOKO NA NO OWHẸ OMA HA
13. Ẹvẹ ewegrẹ Ọghẹnẹ a gwọlọ nọ ma rri ukoko na?
13 Ahwo nọ a be wọso Ọghẹnẹ a rẹ gwọlọ ru re ma rri emamọ eware nọ ukoko Ọghẹnẹ o bi ru wọhọ ikpehre eware. Joma kẹ oriruo jọ. Ma jọ Ebaibol wuhrẹ nọ Jihova ọ gwọlọ nọ ahwo nọ a be gọe kpobi a rẹ jọ fuafo tẹtẹtẹ. A re ru ikpehre eware he. A vẹ jẹ gọe oghẹrẹ nọ ọ gwọlọ. Ọ ta nọ ohwo jọ o te bi ru oware uyoma, yọ ọ gwọlọ kurẹriẹ hẹ, jọ a si ei no ukoko na no. (1 Kọr. 5:11-13; 6:9, 10) Nwanọ epanọ Ikereakere na e ta na ma bi ru. Rekọ ahwo nọ a mukpahe ukoko na a be ta nọ ekpehre oware ma bi ru na, izi mai e ga hrọ, ma re gu ahwo ẹdhọ, ma re mukpahe ahwo.
14. Ono o bi ru nọ ahwo a bi ro gu erue kpahe ukoko na?
14 Riẹ ohwo nọ ọ be lẹliẹ ae ta ikpehre eme kpahe omai na. Setan Ẹdhọ na ọye ọ be lẹliẹ ae gu erue fihọ omai uzou na. Setan họ “ọsẹ ọrue.” (Jọn 8:44; Emu. 3:1-5) Kọ ẹvẹ o gbe gu erue kpahe ukoko Jihova ha? Ọye o bi gele ahwo nọ a rrọ abọ riẹ uzou họ re a wọ eku họ omai uzou na. Nẹnẹ o muhọ họ, o ru rie evaọ oke ikọ na, makọ okenọ Jesu ọ jọ otọakpọ.
15. Ẹvẹ isu egagọ na a ru Jesu gbe ilele riẹ?
15 Dede nọ Ọmọ Ọghẹnẹ yọ ohwo ọgbagba, okenọ o je ru iruo igbunu, eguegu idibo Setan a je gu erue fihọ iẹe uzou. Oke jọ isu egagọ na a ta kẹ ahwo inọ “osu idhivẹri na” ọye ọ kẹ Jesu ẹgba nọ o bi ro le idhivẹri no ahwo oma. (Mak 3:22) Nọ a mu Jesu no, nọ a jẹ rehọ iẹe gu ẹdhọ, isu egagọ na a bọwo e riẹ ota inọ ọ ta eme-aghọ. A bẹbẹ ogbotu na họ inọ jọ a bo nọ jọ a kpe Jesu no. (Mat. 27:20) Nọ Jesu o kpobọ odhiwu no, nọ ilele riẹ a jẹ ta usi uwoma, ahwo nọ a mukpahe ae a tẹ “lẹliẹ ahwo erẹwho na họ jẹ ta udu rai raha” re a kpokpo Ileleikristi. (Iruẹru 14:2, 19) Enẹ Uwou-Eroro Akpegbivẹ 1, 1998 o ta kpahe ẹme nọ ọ rrọ Iruẹru Ikọ 14:2 na: “O vọ rai eva ha re a siọ ovuẹ na ọvo, rekọ otu ewọsuọ ahwo Ju na a te muọ erue họ ẹvaha, be gwọlọ ta udu ahwo orẹwho Egedhọ na raha suọ Ileleikristi na.”
16. Eme ma rẹ kareghẹhọ nọ a tẹ ta ọrue kpahe ukoko na?
16 Ọrue nọ Ẹdhọ o je gu evaọ oke ikọ na o te kẹe he. Rite inẹnẹ na o gbe “bi su akpọ na soso thọ.” (Evia. 12:9) Who te yo ikpehre eme jọ nọ ahwo a be ta kpahe ukoko na hayo inievo jọ, kareghẹhọ nọ ere ọvona ewegrẹ Ọghẹnẹ a gu erue kpahe Jesu gbe ikọ riẹ. Ebaibol ọ ta nọ a ti kpokpo ahwo Jihova je gu erue fihọ ae uzou. (Mat. 5:11, 12) Nwanọ oye o be via na. Ma tẹ kareghẹhọ nọ ahwo nọ a be lalọ ọrue na kpobi, Ẹdhọ ọye ọ be rehọ ai ru iruo, ma ti ru oware jọ vẹrẹ vẹrẹ. Eme ma ti ru?
17. Eme ma re ru nọ a te bi gbiku erue kẹ omai? (2 Timoti 1:13) (Rri ẹkpẹti na “Oware nọ Who re Ru nọ Who te Yo Iku Erue.”)
17 Whọ gaviezọ kẹ iku erue he. Ohwo jọ o te bi gbiku erue, Pọl ukọ na ọ vuẹ omai oware nọ ma re ru. Ọ ta kẹ Timoti nọ jọ ọ “vẹvẹ otujọ unu inọ” jọ a “gaviezọ kẹ iku erue” he. A vẹ jẹ “siọ iku erue nọ e rẹ wha ọghọ se Ọghẹnẹ hẹ.” (1 Tim. 1:3, 4; 4:7) Ọmọ nọ ọ be zọrọ evaọ otọ, oware kpobi ọ rẹ tọlọ fihọ unu. Ọkpako o re ru ere he keme ọ riẹ nọ o sae wha ẹyao se ohwo, hayo kpe ohwo dede. Ere ọvona re, ma rẹ siọ iku erue thahe thahe keme ma riẹ obonọ i bi no ze. “Emamọ eme” gbe iku uzẹme ọvo ma rẹ raha oke mai gaviezọ kẹ.—Se 2 Timoti 1:13.
18. Eme ma re ru nọ u re dhesẹ nọ ukoko Jihova o be mere omai oma?
18 Eware esa ọvo ma ta ẹme te evaọ usu eware buobu nọ i dhesẹ nọ ukoko na u bi lele oriruo Jesu. Fikiere nọ who te bi wuhrẹ Ebaibol kẹ omobọ ra, muẹrohọ eware efa nọ i dhesẹ nọ ukoko na u bi lele oriruo Jesu. Rehọ eware nọ who wuhrẹ tuduhọ inievo ukoko ra awọ re ukoko na o hae mere ae oma. Talamu Jihova, re who je kru ukoko na ga keme ukoko na Jihova o bi ro ru oware nọ ọ gwọlọ ru. (Ol. 37:28) Jọ eva e hae were omai ẹsikpobi inọ ma rrọ ukoko Jihova, ukoko nọ uyoyou o rrọ, ukoko nọ ahwo a be jọ rọ eva rai kpobi gọ Jihova.
ẸVẸ WHỌ TE KẸ UYO ENỌ NANA?
Ẹvẹ ahwo Ọghẹnẹ a be rọ rehọ aro kele Jesu?
Eme ma rẹ hai ru nọ u re dhesẹ nọ ukoko Jihova nọ ma rrọ na o were omai?
A te bi gbiku erue, eme who re ru?
OLE AVỌ 103 Esẹro na Yọ Ezae nọ A rọ Kẹ Ekẹ
a Rri ẹkpẹti na “Fikieme Ma rọ Ta nọ 1919?” nọ o rrọ obe Egagọ Efuafo Jihova—E Nwa Zihe Ze No! ẹwẹ. 102-103.
b UWOHO NA: Nọ ekpako na a gba ẹgwae kpahe usi uwoma ẹgbede no, ọsẹro utu usi uwoma na ọ tẹ be vuẹ iwhowho-uvie na oware nọ a ta na, yọ a dikihẹ kiukeku ugbẹhẹ na.