Eware Imuozọ E rẹ Via Evaọ Etoke Ẹmo
Eware iyoma nọ e rẹ via evaọ etoke ẹmo gbe ozighi, e rẹ kaki no ohwo iroro ho. Te isoja te ahwo gheghe nọ a rọ ẹro ruẹ ẹmo no a riẹ okpẹtu nọ ẹmo ọ rẹ wha ze.
ISOJA
“Nọ ẹmo ọ tẹ rrọ otọ, whọ rẹ ruẹ ahwo nọ a be nwoma fihotọ gbe ahwo nọ a bi whu. Idudu e rẹ jọ ohwo kpobi oma.”—Gary, Britain.
“Egbọlọ i kie omẹ uke gbe ovao yọ mẹ ruẹ ahwo buobu nọ a kpe fihọ otọ, te emaha te ahwo nọ a kpako gaga no. Ẹmo o re ru owhẹ ga oghẹrẹ udu uyoma jọ.”—Wilmar, Colombia.
“Nọ a tẹ sa ohwo evaọ iraro ra, o rẹ kaki no owhẹ iroro ho. Whọ rẹ gbẹ kareghẹhọ oghẹrẹ nọ ohwo na o je ro bo gbe epanọ o je ro dimẹ. Ohwo na ọ rẹ thọrọ owhẹ ẹro vievie he.”—Zafirah, United States.
AHWO GHEGHE
“O jọ omẹ oma nọ eva e te gbẹ sae were omẹ ofa ha. Ozọ u je mu omẹ nọ me ti whu evaọ ẹmo na, rekọ ahwo uviuwou mẹ gbe egbẹnyusu mẹ ozọ o jẹ mai mu omẹ kẹ.”—Oleksandra, Ukraine.
“Ozọ u je mu omai gaga keme ma dikihẹ uhie be hẹrẹ emu no ighọjọ ivẹ aso rite ighọjọ ikpegbọvo aso okiokiọ riẹ, avọ awa inọ ẹsejọhọ egbọlọ e sai kie omai.”—Daler, Tajikistan.
“A jọ ẹmo kpe ọsẹgboni mẹ. Me te zihe ruọ ọmọ nọ o wo ọsẹgboni hi. Me gbe wo ohwo ọvo nọ ọ rẹ sasa omẹ oma hayo rẹrote omẹ hẹ.”—Marie, Rwanda.
Ghelọ okpẹtu nọ ẹmo ọ wha se ahwo nọ ma fodẹ na, enẹna udu u te rai otọ no. Rekọ ere ọvo ho, u mu rai ẹro nọ ẹmo gbe ozighi i ti kuhọ kẹle. Evaọ uvitha Uwou-Eroro nana, ma te ruẹ oware nọ Ebaibol na ọ ta kpahe epanọ onana o te rọ via.