ENỌ IZOGE NA

Ẹvẹ Ebaibol na Ọ Sai ro Fiobọhọ Kẹ Omẹ?—Abọ 3: Wuhrẹ Eware Buobu no Isase Ebaibol Ra Ze

Eme nọ e rrọ Ebaibol na i bu wo umuo ho. Ẹsejọ ohwo ọ sae ta nọ, ‘diẹse me je muhọ ese yo!’ Eme o sai fiobọhọ kẹ owhẹ? Rehọ Ebaibol na wọhọ oghoghẹrẹ emu nọ a ruẹrẹ fihọ ehru emẹjẹ. Emu na kpobi whọ te nwane re he, ukpoye, onọ o rẹ mae were owhẹ whọ te re.

Epọvo na Ebaibol ọ rrọ re. Re whọ sai wo erere ziezi nọ who te bi se Ebaibol, who se gidi gidi hi, muẹrohọ oware nọ who bi se na.

Eware nọ ma te ta kpahe

Fikieme o rọ roja re whọ hae romatotọ se Ebaibol na?

Whọ tẹ be romatotọ se Ebaibol, ẹsiẹe whọ sai ro wuhrẹ eware buobu noi ze. Joma kẹ oriruo jọ. Nọ ohwo o te bi gbe iti, o te du iti na họ ame ọrrorro jẹ nwani si ei no, iti na ọ te daruọ ame na tere he. Rekọ ọ tẹ nyasiọ iti na ba ame ọrrorro na, ẹsiẹe o re mu ame na ziezi.

Egho nọ a gbe iti fihọ, usi o rrọ udevie riẹ. Ofẹ jọ egho na, iti na o mu ame na tere he keme a du rie họ ame na kri hi. Ofẹ nọ o kiọkọ, iti na o mu ame na ziezi keme ọ jọ ame na kri ziezi.

Epọvo na isase Ebaibol e rrọ re. Ukpenọ ma re se Ebaibol na ehruehru vrẹ ọvo, joma romatotọ se Ebaibol na, jẹ daoma re iroro mai e jọ oware nọ ma bi se. Ere odibo Ọghẹnẹ nọ o kere Olezi avọ 119 o ru. Ọ ta kpahe ẹme Ọghẹnẹ inọ: “Mẹ rẹ romatotọ roro kpahe iẹe ẹsikpobi.”—Olezi 119:97.

Ẹme yena o dhesẹ nọ ohwo ọ rẹ rehọ okpẹdoke soso keria bi roro kpahe oware nọ o se evaọ Ebaibol ho. Ẹme nọ ọso-ilezi na ọ be ta na họ, ọ jẹ họrọ oma ha, ukpoye, o bi se na, yọ o bi roro kpahe oware nọ o bi se. Onana u fiobọhọ kẹe je ru oware nọ o rẹ were Ọghẹnẹ.—Olezi 119:98-100.

“Oni mẹ ọ vuẹ omẹ ẹdẹ jọ nọ, edẹ ihrẹ eye e rrọ oka-ọvo, yọ who re ru eware buobu kẹ omara evaọ edẹ nana. Kọ Jihova nọ o bi ru eware kpobi kẹ owhẹ na, whọ gbẹ rehọ omoke jọ wuhrẹ kpahe iẹe?”—Melanie.

Nọ ma te bi lele ehrẹ Ebaibol, ma te jẹ emamọ iroro. Wọhọ oriruo, u re fiobọhọ kẹ omai riẹ oghẹrẹ ahwo nọ ma re lele nya usu. Yọ ẹsenọ oware jọ hayo ohwo jọ ọ tẹ be gwọlọ lẹliẹ omai họ ru oware nọ o rẹ dha Ọghẹnẹ eva, ehrẹ Ebaibol i re fiobọhọ kẹ omai riẹ oware nọ ma re ru.

Eme whọ rẹ sai ru re whọ sai wuhrẹ eware buobu evaọ Ebaibol na?

Ma oma oware nọ whọ gwọlọ ru. Oniọvo-ọmọtẹ jọ nọ ọ rrọ uzoge nọ a re se Julia ọ ta nọ: “U fo re ohwo o wo oma isase Ebaibol, ọ vẹ jẹ hai lele oma na. Ọ rẹ daoma riẹ oware nọ ọ gwọlọ se, oke nọ o ti ro sei, gbe oria nọ ọ te jọ sei.”

Oniọvo-ọmọtẹ nọ o bi kere oke nọ ọ te hai ro se Ebaibol fihọ ekalẹnda.

Hai se Ebaibol na evaọ oke nọ a gbe ro kpokpo owhẹ hẹ. Sista Gianna nọ ọ rrọ uzoge ọ fodẹ oware jọ nọ ma rẹ sai ru. Ọ ta nọ: “Whọ tẹ gwọlọ se Ebaibol, whọ sae kpohọ oria jọ nọ u foma nọ edo ọ rrọ họ. Whọ sae jẹ vuẹ ahwo uwou ra oke nọ who fihọ nọ who re ro se Ebaibol, re a gbe kpokpo owhẹ hẹ nọ oke yena o te te.”

Otẹrọnọ ifonu hayo ekọmputa who bi jo se, ru ei fihọ oghẹrẹ nọ iwou nọ a bi vi se owhẹ i gbe ro kpokpo owhẹ hẹ. Whọ sai tube se Ebaibol nọ a printi dede. Ahwo nọ a re ru ekiakiẹ a ta nọ ohwo o te bi se obe nọ a printi, oware nọ o bi se o rẹ ro ẹe uzou vi ẹsenọ o te bi sei no ifonu hayo ekọmputa riẹ ze. Iroro riẹ e rẹ jẹ jọ oware nọ o bi se na ziezi.

“Nọ me te bi se obe evaọ ifonu hayo ekọmputa, iroro mẹ e rẹ dọmu oria ọvo ho. Iwou nọ a bi vi se omẹ i re si iroro mẹ no oware nọ me bi se, yọ ifonu mẹ o re fu no ẹsejọ. Itanẹte i re je kpokpo re. Rekọ o tẹ rọ obe nọ a printi, mẹ rẹ ruawa yena kpobi hi. Emelo ọ tẹ rrọ oria na no ọvo, yọ ẹme re no.”—Elena.

Rọ olẹ muhọ. Re who te ti mu Ebaibol họ ese, lẹ se Jihova re o fiobọhọ kẹ owhẹ riẹ otọ oware nọ who bi se na, re whọ sai wuhrẹ eware buobu noi ze. Ẹdẹfa, whọ vẹ jẹ sae kareghẹhọ oware nọ who se.—Jemis 1:5.

Nọ whọ tẹ lẹ kpobi no, je muhọ ese no, who se gidi gidi hi. Daoma ru ekiakiẹ. Ẹvẹ whọ sai ro ru ei? Otẹrọnọ JW Library nọ ọ rrọ ifonu ra who bi jo se, hayo evaọ itanẹte, whọ tẹ nẹ owọ Ebaibol nọ who bi se na, whọ te ruẹ izoẹme efa nọ i ru oria Ebaibol yena vẹ.

Hae nọ omara enọ. Whọ sae nọ omara nọ: ‘Eme oria Ebaibol nana o wuhrẹ omẹ kpahe Jihova? Kọ emamọ oware jọ vẹ oria nana o ta kpahe Jihova nọ mẹ sae rehọ aro kele?’ (Ahwo Ẹfisọs 5:1) ‘Ẹvẹ mẹ sae rọ rehọ oware nọ mẹ jọ oria Ebaibol nana wuhrẹ ro yere akpọ mẹ?’ (Olezi 119:105) ‘Ẹvẹ mẹ sae rọ rehọ oware nọ me se evaọ oria Ebaibol nana ro fiobọhọ kẹ amọfa?’—Ahwo Rom 1:11.

Whọ sae jẹ nọ omara nọ: ‘Ẹvẹ oria Ebaibol nana u ro wobọ kugbe oware nọ oma Ebaibol na soso o ta kpahe?’ Onọ nana u wuzou gaga. Ẹvẹ ma rọ ta ere? Keme no obe Emuhọ rite obe Eviavia, u wo ovuẹ ọvo jọ nọ u wuzou gaga nọ o ta kpahe. Oye họ epanọ Uvie Ọghẹnẹ u ti ro ru odẹ Jihova fo gbe oware nọ o lẹliẹ e riẹ mu omai ẹro inọ Jihova họ ọnọ o fo nọ o re su omai jẹ vuẹ omai oware nọ ma re ru.

Ẹme nọ ehwa ra a ta

“Otẹrọnọ iku e rẹ were owhẹ gaga, whọ sai wuhrẹ kpahe iku ahwo nọ a jọ akpọ nọ a kere fihọ Ebaibol na. Whọ tẹ gwọlọ wuhrẹ kpahe emamọ uruemu jọ nọ ma rẹ sai wo, whọ sai se iku Devidi. Ebaibol na ọ ta kpahe oware kpobi nọ ma gwọlọ riẹ. Whọ tẹ riẹ oware nọ whọ gwọlọ se no, whọ vẹ daoma kiẹ kpahe iẹe ọvo.”—Judah.

“Nọ me te bi se Ebaibol, mẹ rẹ romatotọ kiẹ kpahe ohwo nọ me bi se kpahe na, re mẹ riẹ sọ ọ jọ emamọ ohwo hayo ekpehre ohwo. Mẹ rẹ nọ omamẹ nọ: ‘Kọ oghẹrẹ uzuazọ vẹ ohwo nana je yeri? Kọ eme ọ via kẹe? Kọ eme iku ohwo nana i wuhrẹ omẹ?’”—Mackenzie.

“Me re ru ekiakiẹ kpahe obe Ebaibol nọ mẹ gwọlọ se. Wọhọ oriruo, mẹ rẹ kiẹ re mẹ riẹ oke nọ a ro kere iei, ohwo nọ o kere i rie gbe ugogo oware nọ a be jọ obe yena ta kpahe. Eware buobu nọ e via nọ a kere fihọ Ebaibol na i kiekpahe oke ma na. Ekiakiẹ nọ me re ru e rẹ lẹliẹ omẹ riẹ oghẹrẹ nọ eware e jọ dẹẹ kẹ ahwo oke yena, me ve wuhrẹ mi ai.”—Elle.

“Nọ me te bi se Ebaibol, mẹ rẹ vuẹ omamẹ nọ mẹ te rehọ oware nọ ma bi se na wuhrẹ amọfa. Mẹ rẹ nọ omamẹ nọ, ‘Kọ mẹ riẹ otọ oware na te epanọ mẹ sae rọ rehọ iẹe wuhrẹ omọfa? Kọ oriruo vẹ mẹ sae ro ru ẹme na vẹ?’ Enọ nana i re fiobọhọ kẹ omẹ romatotọ se oware re mẹ riẹ otọ riẹ ziezi. Ọrue ọ riẹ hẹ, epanọ ohwo o wuhrẹ amọfa kpahe oware jọ te, ere ọyomariẹ ọ rẹ riẹ oware na te re.”—Owen.