Egbodibo Usi Uwoma Na

JIHOVA ọ kẹ omai oriruo ọgbagba nọ ma re lele, koyehọ Ọmọ riẹ, Jesu Kristi. (1 Pita 2:21) Nọ ohwo o te zihe ruọ olele Jesu no, ọ rẹ jọ omọvo egbodibo Ọghẹnẹ nọ e rẹ ta usi uwoma na. Nọ Jesu o je dhesẹ nọ onana o te wha omosasọ ze, ọ ta nọ: “Wha nyabru omẹ ze, whai kpobi nọ e be ruẹ uye, nọ ewha egbẹgbẹdẹ e rrọ uzou, mẹ te sasa owhai oma. Wha rehọ owhowha mẹ je wuhrẹ mi omẹ, keme mẹ rrọ wowolẹ je wo omaurokpotọ, wha re ti wo omosasọ kẹ omarai.” (Mat. 11:28, 29) Epanọ ọ ya eyaa na, ere o be via kẹ ohwo kpobi nọ ọ jẹ uzizie yena rehọ!

² Jesu nọ ọ rrọ Ọgbodibo Ologbo Ọghẹnẹ, o se ahwo jọ re a jọ ilele riẹ. (Mat. 9:9; Jọn 1:43) O wuhrẹ i rai oghẹrẹ nọ a re ru iruo odibọgba na, o te je vi ai re a ru iruo evona nọ o je ru na. (Mat. 10:1–11:1; 20:28; Luk 4:43) Uwhremu na, o vi ahwo udhosa-gbikpe efa re a nyai whowho usi uwoma Uvie Ọghẹnẹ. (Luk 10:1, 8-11) Okenọ Jesu o vi ilele nana vrẹ, ọ ta kẹ ae nọ: “Ohwo kpobi nọ ọ gaviezọ kẹ owhai ọ gaviezọ kẹ omẹ. Yọ ohwo kpobi nọ o rri owhai vo o rri omẹ vo re. Ofariẹ, ohwo kpobi nọ o rri omẹ vo o rri Ọnọ o vi omẹ ze vo re.” (Luk 10:16) Jesu ọ rehọ enẹ fiẹgba họ epanọ iruo nọ a kẹ ilele na i wuzou te. A dikihẹ kẹ Jesu avọ Ọghẹnẹ nọ Ọ Mai Kpehru na! Ere ọvona o rẹ jọ kẹ ahwo kpobi nọ a jẹ uzizie Jesu nana rehọ inọ: “Nyaze te jọ olele mẹ.” (Luk 18:22; 2 Kọr. 2:17) Ahwo kpobi nọ a jẹ uzizie na rehọ a wo iruo nọ Ọghẹnẹ ọ kẹ rai inọ a whowho usi uwoma Uvie na je wuhrẹ ahwo zihe ruọ ilele.​—Mat. 24:14; 28:19, 20.

³ Nọ ma jẹ uzizie Jesu inọ ma lele iei rehọ no na, ma wo uvẹ-ọghọ nọ ma rọ “riẹ” Jihova Ọghẹnẹ gbe Jesu Kristi. (Jọn 17:3) A wuhrẹ omai idhere Jihova no. Avọ obufihọ riẹ, ma sai nwene iroro mai no, whẹ uruemu okpokpọ na họ oma no, je nwene edhere uzuazọ mai rọwokugbe izi ikiẹrẹe Jihova no. (Rom 12:1, 2; Ẹf. 4:22-24; Kọl. 3:9, 10) Uvi edẹro nọ ma wo o wọ omai rehọ oma mai mudhe kẹ Jihova jẹ rehọ ame-ọhọ dhesẹ iẹe via. Evaọ oke ame-ọhọ mai a rọ rehọ omai mu egbodibo.

⁴ Hae kareghẹhọ ẹsikpobi inọ, o gba omai họ nọ abọ ọfuafo gbe udu ofuafo ma rẹ rọ gọ Ọghẹnẹ. (Ol. 24:3, 4; Aiz. 52:11; 2 Kọr. 6:14–7:1) Ma wo obruoziẹ-iroro ọfuafo no fikinọ ma fi ẹrọwọ họ Jesu Kristi. (Hib. 10:19-23, 35, 36; Evia. 7:9, 10, 14) Pọl ukọ na ọ hrẹ Ileleikristi inọ a ru eware kpobi rọ kẹ Ọghẹnẹ oruaro re a gbe ru amọfa zoruẹ hẹ. Pita ukọ na ọ ta nọ emamọ uruemu u re ru nọ amọfa a re ro kurẹriẹ ziọ ukoko na. (1 Kọr. 10:31, 33; 1 Pita 3:1) Ẹvẹ whọ sai ro fiobọhọ kẹ ohwo jọ te epanọ ọ sai ro kuomagbe omai jọ ọgbodibo usi uwoma na?

IWHOWHO-UVIE EKPOKPỌ

⁵ No okenọ who ro mu Ebaibol họ ewuhrẹ kugbe ohwo ze whọ rẹ rọ tuduhọ iẹe awọ re ọ hae ta eware nọ o bi wuhrẹ na kẹ amọfa. Ọ sae ta eware nọ o bi wuhrẹ na kẹ imoni riẹ, egbẹnyusu riẹ, ibe iruiruo riẹ, gbe amọfa evaọ oke gheghe. Nọ obọdẹ edhere jọ nọ a re ro wuhrẹ ahwo ọkpokpọ re a jọ ilele Jesu Kristi nọ e rrọ egbodibo usi uwoma na. (Mat. 9:9; Luk 6:40) Ababọ avro, nọ ohwo ọkpokpọ na o bi fi eware nọ o bi wuhrẹ họ iruo je bi wobọ evaọ usi uwoma ota oke-gheghe ziezi na, ọ te ta nọ ọ gwọlọ lele ukoko na kpohọ usi uwoma ota.

ITEE NỌ A RẸ NYATE RE A TẸ JỌ OWHOWHO-UVIE

⁶ Taure whọ tẹ te ta kẹ ohwo inọ o kpohọ usi uwoma ota no uwou ruọ uwou evaọ orọ ọsosuọ, jọ u mu owhẹ ẹro nọ ọ nyate itee nọ a gwọlọ mi iwhowho-uvie. Nọ ohwo o te lele omai kpohọ usi uwoma ota, yọ o bi dhesẹ kẹ ahwo inọ omọvo Isẹri Jihova ọ rrọ. Fikiere a rẹ rehọ iẹe nọ o nwene uzuazọ riẹ rọwokugbe izi ikiẹrẹe Jihova no yọ ọ rẹ sae jọ owhowho-uvie nọ ọ re họ-ame he.

⁷ Nọ who bi wuhrẹ kugbe ohwo jẹ be rehọ ehri-izi Ebaibol ta ẹme kugbei na, ẹsejọhọ whọ riẹ eware jọ kpahe iẹe no. Ẹsejọhọ who muẹrohọ no nọ o bi ru lele eware nọ o bi wuhrẹ na. Rekọ u wo eware jọ nọ i kpomahọ uzuazọ ọmọ-uwuhrẹ na nọ ekpako na a te gwọlọ nọ a re lele owhẹ avọ iẹe ta.

⁸ Ọnọ o re koko iruẹru ugboma ekpako na họ na o ti ru re ekpako ivẹ (ọvo jọ omọvo Ogbẹgwae Iruo Ukoko na) a lele owhẹ avọ ọmọ-uwuhrẹ Ebaibol na ta ẹme kpahe eware enana. Evaọ ikoko nọ ekpako e jọ bu tere he, ọkpako avọ odibo oruiruo nọ o te a sai ru onana. Inievo nọ a salọ inọ a ru onana a rẹ daoma re a ru ei ababọ oke oraha. Otẹrọnọ okenọ a ro kpohọ ewuhrẹ ukoko dede a rọ vuẹ ae nọ ọmọ-uwuhrẹ ra na ọ gwọlọ jọ owhowho-uvie, ẹsejọhọ a te daoma lele owhẹ avọ iẹe ta ẹme nọ ewuhrẹ na ọ tẹ fa no. Ẹkeriotọ na ọ rẹ jọ whẹtiẹ whẹtiẹ. Re a tẹ rọwo nọ ọmọ-uwuhrẹ na ọ sae jọ owhowho-uvie nọ ọ re họ-ame he, o re ru eware nana hrọ:

1. (1) Ọ rọwo nọ Ebaibol na yọ Ẹme Ọghẹnẹ nọ a rọ ẹgba ẹzi riẹ kere.​—2 Tim. 3:16.

2. (2) Ọ riẹ jẹ rọwo igogo iwuhrẹ Ikereakere na re okenọ a tẹ nọe enọ, ọ vẹ kẹ uyo nọ o rọwokugbe Ebaibol na orọnikọ wọhọ epanọ egagọ erue a bi wuhrẹ hẹ hayo epaọ iroro obọriẹ hẹ.​—Mat. 7:21-23; 2 Tim. 2:15.

3. (3) O bi koko ujaje Ebaibol nọ o ta nọ o re kuomagbe ahwo Jihova evaọ iwuhrẹ ukoko otẹrọnọ ọ sai ru ere.​—Ol. 122:1; Hib. 10:24, 25.

4. (4) Ọ riẹ oware nọ Ebaibol na o wuhrẹ kpahe ọfariẹ-ogbe, onọ o kẹre te ẹnwae-obro, aye hayo ọzae nọ a re wo vrẹ ọvo, gbe ọzae avọ ọzae hayo aye avọ aye nọ a rẹ wezẹ kugbe, yọ o bi yeri uzuazọ nọ o rọwokugbe iwuhrẹ nana. Otẹrọnọ ohwo na avọ aye jọ a be rria uwou hayo avọ ọzae jọ a be rria uwou yọ ohwo na omoni riẹ hẹ, o rẹ jọ nọ aimava na a ruọ orọo lele uzi no.​—Mat. 19:9; 1 Kọr. 6:9, 10; 1 Tim. 3:2, 12; Hib. 13:4.

5. (5) O bi koko uzi Ebaibol nọ o ta nọ ma siomano idieda-thomawa, yọ ọ rẹ lọ hayo rehọ imu egaga nọ i re mu hayo nọ i re nwene iroro na vievie he, nọ a rẹ rehọ orọnọ fiki ẹyao ho.​—2 Kọr. 7:1; Ẹf. 5:18; 1 Pita 4:3, 4.

6. (6) Ọ riẹ epanọ u wuzou te re ọ whaha usu uyoma.​—1 Kọr. 15:33.

7. (7) O siomano ikoko egagọ erue kpobi nọ ọ jọ vẹre no riẹriẹriẹ. O gbe bi kpohọ egagọ rai hayo wobọ evaọ iruẹru rai hi.​—2 Kọr. 6:14-18; Evia. 18:4.

8. (8) O bi dhomahọ iruẹru isuẹsu akpọ na vievie he.​—Jọn 6:15; 15:19; Jem. 1:27.

9. (9) Ọ rọwo je bi ru lele oware nọ Ebaibol na ọ ta evaọ Aizaya 2:4 kpahe iruẹru erẹwho na.

10. (10) Ọ ginẹ gwọlọ jọ omọvo Isẹri Jihova.​—Ol. 110:3.

⁹ Otẹrọnọ oghẹrẹ nọ ọmọ-uwuhrẹ na ọ rehọ eme nana jọ u vẹ ekpako na ẹro ho, a rẹ nọe, a sae rehọ eria Ikereakere nọ a fodẹ na rọ ta kpahe ẹme na. U wuzou re ọ riẹ nọ enọ i re lele Isẹri Jihova kpohọ usi uwoma ota a rẹ jọ ahwo nọ a bi yeri uzuazọ rọwokugbe eware nana nọ Ebaibol ọ ta na. Eme nọ ọ be ta i re fiobọhọ kẹ ekpako na riẹ sọ ọ riẹ oware nọ a rẹro mi ei jegbe sọ o te umuo nọ ọ sai ro mu usi uwoma họ ẹnya.

¹⁰ Ekpako na a rẹ vuẹ ọmọ-uwuhrẹ na ababọ oke oraha otẹrọnọ o te. Evaọ ẹsibuobu, a sai ru ere evaọ obọ ekuhọ ẹkeriotọ na. Otẹrọnọ o te, ekpako na a re dede ohwo na rehọ sasasa wọhọ owhowho-uvie. (Rom 15:7) A rẹ tuduhọ iẹe awọ re o mu usi uwoma ota họ ẹnya ababọ oke oraha re ọ jẹ niyẹrẹ evaọ urere amara na. Ekpako na a rẹ sae vuẹe inọ ọmọ-uwuhrẹ Ebaibol o te zihe ruọ owhowho-uvie nọ ọ re họ-ame he ọ jẹ niyẹrẹ usi uwoma ota ọsosuọ riẹ, a re kere odẹ riẹ fihọ Congregation’s Publisher Record ọvo jọ, a ve fi ei họ efaele ukoko na. Ekpako na a re mi owhowho-uvie na ovuẹ omobọ ohwo nana re ukoko na o ruẹse rẹrote iruẹru egagọ Isẹri Jihova evaọ akpọ-soso, gbe re owhowho-uvie na ọ sai wobọ evaọ iruẹru ukoko na, a vẹ jẹ sai fiobọhọ kẹe gọ Ọghẹnẹ ziezi. U te no ere no, ekpako na e rẹ sae kareghẹhọ iwhowho-uvie ekpokpọ inọ evuẹ omobọ ohwo jọ kpobi nọ a rehọ, a rẹ rẹrotei lele epanọ o rrọ Global Data Protection Policy of Jehovah’s Witnesses nọ o rrọ jw.org.

¹¹ Ma tẹ daoma re ma riẹ owhowho-uvie ọkpokpọ na ziezi jẹ be hai jiri ei kẹ ẹnyaharo nọ o wo no o sae tuduhọ iẹe awọ gaga. O sai ru ei niyẹrẹ usi uwoma ota kamara kamara je tube ru ei daoma viere evaọ egagọ Jihova.​—Fil. 2:4; Hib. 13:2.

¹² Nọ ekpako na a tẹ ruẹ nọ ọmọ-uwuhrẹ Ebaibol na o te kẹ usi uwoma ota no, yọ o te ohwo nọ a rẹ kẹ obe A Koko Omai Họ re Ma Ru Oreva Jihova na no. Nọ ọ tẹ niyẹrẹ ọsosuọ riẹ no, a re ru owhowhovia ọkpẹkpẹe kẹ ukoko na inọ o zihe ruọ owhowho-uvie ọkpokpọ nọ ọ re họ-ame he no.

EPANỌ A RE RO FIOBỌHỌ KẸ EMAHA

¹³ Emaha e rẹ sae jọ iwhowho-uvie re. Jesu o dede emaha na rehọ jẹ lẹ kẹ ae. (Mat. 19:13-15; 21:15, 16) Dede nọ esẹgbini họ enọ i wo owha ẹruorote emọ rai, amọfa evaọ ukoko na a rẹ sai fiobọhọ kẹ emaha nọ u no udu ze inọ a rẹ ta usi uwoma Uvie na. Whọ tẹ rrọ ọyewọ, emamọ oriruo ra evaọ iruo odibọgba na o rẹ tuduhọ emọ ra awọ ziezi re a wo ọwhọ evaọ egagọ Ọghẹnẹ. Nọ u te no ọmọ nọ o wo emamọ uruemu eva ze nọ ọ gwọlọ ta oware nọ ọ rọwo kẹ amọfa, didi obufihọ ọfa a rẹ sae kẹe?

¹⁴ U re woma re ọsẹ hayo oni ọmọ na o lele ọkpako jọ nọ ọ rrọ Ogbẹgwae Iruo Ukoko na ta ẹme sọ ọmọ na o te ohwo nọ ọ rẹ jọ owhowho-uvie. Ọnọ o re koko iruẹru ugboma ekpako na họ na o ti ru re ekpako ivẹ (ọvo jọ omọvo Ogbẹgwae Iruo Ukoko na) a lele ọmọ na avọ ọsẹgboni riẹ hayo ohwo nọ ọ be yọrọ iẹe nọ ọ rrọ ukoko na ta ẹme. Otẹrọnọ ọmọ na ọ riẹ igogo iwuhrẹ Ebaibol na jẹ kẹ imuẹro inọ ọ gwọlọ mu usi uwoma ota họ, onana u re dhesẹ nọ o wo ẹnyaharo ziezi no. Nọ a tẹ kiẹ kpahe eware nana no gbe efa nọ e wọhọ enọ a rẹ rọ kiẹ ahwo nọ a kpako no riwi na, ekpako ivẹ na a rẹ sae jiroro sọ ọmọ na o te ohwo nọ ọ rẹ jọ owhowho-uvie nọ ọ re họ-ame he. (Luk 6:45; Rom 10:10) Nọ a tẹ be kiẹ ọmaha riwi, u du gwọlọ nọ a rẹ ta ẹme kpahe eware nọ a re ro lele ọkpako ta ẹme he, enọ i kiekpahe ọmaha ha.

¹⁵ Evaọ oke ẹkeria na, ekpako na a re jiri ọmọ na kẹ ẹnyaharo riẹ jẹ tuduhọ iẹe awọ re o fi utee ame-ọhọ họ. Nọ orọnọ ọsẹgboni na a daoma gaga nọ a ro wuhrẹ ọmọ rai uzẹme na, u fo nọ a re jiri ai re. Re ọsẹgboni na a gbẹ sai fiobọhọ kẹ ọmọ rai, ekpako na a rẹ vuẹ ae re a se oria “Ovuẹ Rọkẹ Esẹgbini nọ E Rrọ Ileleikristi” nọ o rrọ ẹwẹ-obe avọ 179-181 na.

OMAUROMUDHE GBE AME-ỌHỌ

¹⁶ Otẹrọnọ whọ riẹ Jihova je you rie, yọ who bi dhesẹ onana ẹkwoma izi riẹ nọ who bi koko je bi wobọ evaọ usi uwoma ota, u fo nọ who ru usu ra kugbei ga ziezi. Evaọ oghẹrẹ vẹ? Ẹkwoma uzuazọ ra nọ who re ro mudhe kẹe, whọ vẹ rọ ame-ọhọ dhesẹ iẹe via.​—Mat. 28:19, 20.

¹⁷ Re a rọ oware mudhe u dhesẹ nọ a re fi ei họ oria sa rọkẹ iruo Ọghẹnẹ. Re whọ roma mudhe kẹ Ọghẹnẹ u dhesẹ nọ whọ rẹ lẹ sei whọ vẹ jọ olẹ na ya eyaa kẹe inọ whọ te rehọ uzuazọ ra rọ gọe jẹ nya evaọ idhere riẹ. U dhesẹ nọ ọye ọvo whọ rẹ gọ bẹdẹ bẹdẹ. (Izie. 5:9) Nọ oware nọ ohwo o re ru kẹ omobọ riẹ. Ohwo ọvo ọ sai ru ei kẹ owhẹ hẹ.

¹⁸ Rekọ, nọ whọ tẹ jọ oria idhere ta kẹ Jihova inọ whọ rehọ oma ra kpobi kẹe no, oware ofa jọ o riẹ nọ who re ru. U fo nọ who re dhesẹ kẹ amọfa nọ whọ roma mudhe kẹ Ọghẹnẹ no. Who re dhesẹ iẹe via ẹkwoma ame-ọhọ, wọhọ epanọ Jesu o ru. (1 Pita 2:21; 3:21) Whọ tẹ gbaemu no inọ whọ gwọlọ gọ Jihova jẹ gwọlọ họ-ame, eme who re ru? Whọ rẹ ta oware nọ whọ gwọlọ ru na kẹ ọnọ o re koko iruẹru ugboma ekpako na họ. O ti ru re ekpako sa-sa a lele owhẹ ta ẹme re a ruẹ sọ whọ nyate itee Ebaibol rọkẹ ame-ọhọ. Rọkẹ evuẹ efa, iviena se “Ovuẹ Rọkẹ Owhowho-Uvie nọ Ọ re Họ-Ame He,” nọ o rrọ ẹwẹ-obe avọ 182-184 ọrọ obe nana, gbe “Enọ kẹ Ahwo nọ A Gwọlọ Họ-Ame,” nọ o rrọ ẹwẹ-obe avọ 185-207.

IYẸRẸ KPAHE ẸNYAHARO ODIBỌGBA NA

¹⁹ U kri gaga no nọ iyẹrẹ kpahe ẹnyaharo egagọ uzẹme evaọ akpọ-soso e be rọ kẹ ahwo Jihova uduotahawọ. Anwọ okenọ Jesu Kristi ọ rọ kake ta kẹ ilele riẹ nọ a ti whowho usi uwoma na evaọ otọakpọ na soso, o rrọ Ileleikristi uzẹme oja gaga re a riẹ epanọ a ti ro ru onana.​—Mat. 28:19, 20; Mak 13:10; Iruẹru 1:8.

²⁰ O jẹ hae were ilele Jesu ikpe-udhusoi ọsosuọ nọ a te yo iyẹrẹ kpahe ẹnyaharo iruo usi uwoma ota na. (Mak 6:30) Obe Iruẹru Ikọ o vuẹ omai nọ ahwo nọ a bu te oware wọhọ udhozeza (120) a jariẹ okenọ a ku ẹzi ọfuafo ku ilele na evaọ Pẹntikọst 33 C.E. U kri hi, unu ilele na u te bu te oware wọhọ idu esa (3,000) je ti te oware wọhọ idu isoi (5,000). A niyẹrẹ nọ “Jihova o te je ku enọ o bi ti siwi kugbe ai kẹdẹ kẹdẹ” gbe nọ “ogbotu izerẹ buobu i je kurẹriẹ ziọ ẹrọwọ na.” (Iruẹru 1:15; 2:5-11, 41, 47; 4:4; 6:7) A re gbiku uduotahawọ nọ usi ẹvi nana o wha se ilele na ha! Ababọ avro, emamọ iyẹrẹ nana e kẹ rai ajọwha nọ a rọ nyaharo evaọ iruo nọ Ọghẹnẹ ọ kẹ rai na, ghelọ ukpokpoma ogaga nọ isu egagọ ahwo Ju a wha ze!

²¹ Evaọ oware wọhọ ukpe 60-61 C.E., Pọl ọ niyẹrẹ evaọ ileta riẹ ro se ahwo Kọlọsi inọ usi uwoma na “o be mọ ibi jẹ be nyaharo evaọ akpọ na soso” gbe nọ “a whowho [i rie] evaọ udevie emama kpobi nọ e rrọ otọ odhiwu na” no. (Kọl. 1:5, 6, 23) Ileleikristi ọsosuọ na a je ru lele Ẹme na, yọ ẹzi ọfuafo ọ kẹ rai ẹgba nọ a rọ ta usi uwoma na gaga taure uyero-akpọ ahwo Ju na u te ti kuhọ evaọ 70 C.E. O jẹ kẹ uvi Ileleikristi yena uduotahawọ gaga nọ a te yo iyẹrẹ epanọ iruo na e jẹ nya!

²² Epọvo na re, ukoko Jihova oke nana o be daoma re u wo okerefihotọ iruo nọ a bi ru ro ru Matiu 24:14 gba, onọ o ta nọ: “A te ta usi uwoma Uvie na evaọ akpọ na soso re o jọ isẹri kẹ erẹwho na kpobi, kẹsena urere na o vẹ te ze.” Mai idibo Ọghẹnẹ nọ e roma mudhe no, ma wo iruo nọ ma re ru kpata kpata. Mai omomọvo ma rẹ daoma ruẹ nọ ma ru iruo na fuafo taure urere na o tẹ te ze. Jihova ọ te ruẹ nọ a ru iruo nana re, yọ ma tẹ jariẹ wobọ, Jihova ọ te hwosa kẹ omai.​—Izik. 3:18-21.

IYẸRẸ USI UWOMA OTA RA

²³ Eme ma rẹ niyẹrẹ riẹ? Ẹmẹwẹ-obe Iyẹrẹ Usi Uwoma Ota nọ ukoko na u ru na u dhesẹ eware nọ ma re kere fihọ iẹe. Rekọ, eware nọ ma be te ta na e sai fiobọhọ.

²⁴ Evaọ uhie “Ebe nọ Whọ rọ Kẹ Ahwo (Te Enọ A Printi gbe Erọ Itanẹte)” na, kere unu ebe​—te enọ a printi hayo enọ e rrọ itanẹte​—nọ whọ rọ kẹ ahwo nọ a re họ-ame evaọ ukoko na ha. Evaọ oria “Ividio nọ Who Dhesẹ” na, kere unuẹse nọ who dhesẹ ividio mai jọ kẹ ahwo.

²⁵ Whọ tẹ be niyẹrẹ “Izihebro,” kele unuẹse nọ who zihe bru omomọvo re whọ gbẹ tua isiuru ahwo nọ a re roma mudhe jẹ họ-ame evaọ ukoko na ha. A rẹ sai ru ozihebro ẹkwoma ohwo nọ a rẹ nyabru, ileta nọ a re kere, ifonu nọ a re ro se ohwo, uwou nọ a rẹ rehọ ifonu hayo Itanẹte vi, hayo ebe mai jọ nọ a rẹ rehọ se ohwo. Oke kpobi nọ ohwo o te ru obe-uwuhrẹ Ebaibol kugbe ohwo, ọ sai kele iei ozihebro. Ọsẹ hayo oni ọ sai kele ozihebro ọvo koka koka nọ o te ru egagọ uviuwou yọ ọmọ nọ ọ re họ-ame he ọ riẹ.

²⁶ Dede nọ a re ru obe-uwuhrẹ Ebaibol koka koka wọhọ epanọ o rẹ mae jọ, obe-uwuhrẹ ọvo a re kele iei kamara kamara. Iwhowho-uvie a re kere unu ebe-iwuhrẹ Ebaibol sa-sa nọ a ru evaọ amara na. Ebe-iwuhrẹ Ebaibol nọ a rẹ niyẹrẹ rai họ enọ a ru kugbe ahwo nọ a re roma mudhe jẹ họ-ame he. Nọ omọvo ogbẹgwae iruo ukoko na ọ tẹ ta kẹ owhẹ nọ who wuhrẹ kugbe oniọvo nọ ọ siọ iruo Uvie na ba no, whọ sai je kele obe-uwuhrẹ Ebaibol na, hayo nọ who te bi wuhrẹ kugbe ohwo nọ ọ họ-ame obọ nọ o ri wuhrẹ obe Reawere Uzuazọ Bẹdẹ Bẹdẹ! na re he.

²⁷ U wuzou re whọ niyẹrẹ “Euwa” ra gbagba. Onana yọ oke nọ whọ rọ ta usi uwoma no uwou ruọ uwou, ru izihebro, ru ebe-iwuhrẹ Ebaibol, hayo nọ whọ rọ ta usi uwoma evaọ oke-gheghe kẹ ahwo nọ a re roma mudhe jẹ họ-ame he. Otẹrọnọ iwhowho-uvie ivẹ e rrọ usi uwoma ota, aimava a sai kele oke na, rekọ omọvo o re kele ozihebro hayo obe-uwuhrẹ Ebaibol nọ a ru. Ọsẹ gbe oni a te kuobọgbe wuhrẹ emọ rai evaọ Egagọ Uviuwou a rẹ sai kele auwa ọvo evaọ oka. Inievo-emezae a sai kele oke nọ a rọ kẹ ovuẹ ogbotu. Ohwo nọ ọ fa ovuẹ ogbotu fihọ ẹvẹrẹ ọfa ọ sai kele oke na re. Eware jọ e riẹ nọ i wuzou nọ ma rẹ jọ kele oke he, wọhọ oke nọ ma rọ ruẹrẹ oma họ kẹ usi uwoma ota, nọ ma ro kpohọ ewuhrẹ omakugbe kẹ usi uwoma ota, oke nọ ma ro fiobọhọ ru eware jọ, gbe eware itieye na.

²⁸ Owhowho-uvie ọvuọvo ọ rẹ rehọ obruoziẹ-iroro riẹ nọ ọ rọ Ebaibol wuhrẹ no avọ ozodhẹ Ọghẹnẹ jiroro oke nọ o re kele inọ ọ rọ ta usi uwoma. Iwhowho-uvie jọ e be ta usi uwoma evaọ eria nọ ahwo a jọ bu gaga, rekọ efa e be ta usi uwoma evaọ eria nọ umutho ahwo a be rria, yọ onana o rẹ gwọlọ nọ a nya ugbothabọ. Ekwotọ usi uwoma ota i wo ohẹriẹ; oghẹrẹ nọ iwhowho-uvie a re rri odibọgba rai u wo ohẹriẹ. Utu Ẹruorote na o be gba iroro riẹ họ ikoko nọ e rrọ akpọ na soso ho evaọ oghẹrẹ nọ a re kele oke nọ a rọ ta usi uwoma, yọ a fi ohwo ọvo họ nọ ọ rẹ ta onọ amọfa a re ru kẹ ae he.​—Mat. 6:1; 7:1; 1 Tim. 1:5.

²⁹ A rẹ niyẹrẹ iminiti hi hayo kere iminiti ba auwa ha, rekọ auwa ọsoso a re kere. Okenọ a sae rọ niyẹrẹ iminiti họ, nọ owhowho-uvie ọ gbẹ be sae ta usi uwoma tere he fikinọ ọ who no, ẹyao o kru rie fihọ otọ, ọ rrọ uwou nọ a jẹ rẹrote ekpako, hayo eware itieye efa i bru rie abọ họ. Owhowho-uvie otiọye na ọ rẹ sae niyẹrẹ ekpekpahọ iminiti 15, koyehọ ọ rẹ sae niyẹrẹ iminiti 15, iminiti 30, iminiti 45, erere vrẹ, o gbahọ nọ o rẹ jọ auwa ọsoso ho. O tẹ make rọnọ iminiti 15 ọvo ọ rọ ta usi uwoma evaọ amara, ọ rẹ niyẹrẹ riẹ. A re kele iei kugbe iwhowho-uvie nọ e be niyẹrẹ oke kpobi. Ọruẹrẹfihotọ nana o tẹ jẹ rọkẹ owhowho-uvie nọ oware jọ u kru fihọ otọ evaọ ubroke, o sae jọ nọ fiki ẹyao ọgaga hayo omonwa ogaga jọ ọ sai no uwou evaọ amara ha hayo bu vrẹ ere. Ahwo nọ ọruẹrẹfihotọ nana ọ rrọ kẹ ọvo họ enọ uyero hayo ẹbẹbẹ jọ u bru abọ họ. Ogbẹgwae Iruo Ukoko na o rẹ jiroro sọ owhowho-uvie o te kẹ ọruẹrẹfihotọ nana.

CONGREGATION’S PUBLISHER RECORD

³⁰ A re kere iyẹrẹ nọ whọ rọ ta usi uwoma kamara kamara fihọ Congregation’s Publisher Record. Evuẹ nana nọ a kere fihotọ na e rrọ rọkẹ ukoko nọ ohwo ọ rrọ. Whọ tẹ gwọlọ kwa kpohọ ukoko ofa, ruẹ nọ whọ vuẹ ekpako ukoko nọ whọ rrọ. Okere-obe na ọ te daoma ruẹ nọ a vi evuẹ ra se ukoko okpokpọ ra na. Onana u ti ru nọ ekpako na a ti ro dede owhẹ rehọ je fiobọhọ kẹ owhẹ evaọ egagọ Jihova. Otẹrọnọ who no ukoko ra kpohọ oria ofa yọ whọ te rria vrẹ emerae esa ha, iviena gbẹ hai vi iyẹrẹ usi uwoma ota ra se ukoko nọ who no ze na.

OWARE NỌ MA JẸ NIYẸRẸ USI UWOMA OTA MAI

³¹ Kọ o rẹ thọrọ owhẹ ẹro ẹsejọ re whọ niyẹrẹ iruo usi uwoma ota ra? Ababọ avro, mai kpobi ma gwọlọ ekareghẹhọ ẹsejọ. Rekọ ma tẹ riẹ nọ u fo re ma niyẹrẹ jẹ riẹ oware nọ u ro wuzou re ma ru ere, o sae jọ lọlọhọ kẹ omai re ma kareghẹhọ niyẹrẹ mai.

³² Ahwo jọ a nọ no inọ: “Nọ orọnọ Jihova ọ riẹ oware nọ me bi ru evaọ iruo riẹ na, fikieme mẹ jẹ niyẹrẹ kẹ ukoko na?” Uzẹme o rrọ inọ Jihova ọ riẹ oware nọ ma bi ru, ọ tẹ jẹ riẹ otẹrọnọ uzuazọ mai kpobi ma bi ro ru iruo na hayo sọ umutho jọ ọvo ma bi ru kpakiyọ ma sai ru vrẹ ere. Rekọ kareghẹhọ nọ Jihova o kere unu edẹ nọ Noa ọ jọ evaọ okọ na gbe unu ikpe nọ ahwo Izrẹl a ghoro evaọ udhude na fihọ otọ. Ọghẹnẹ o kere unu ahwo nọ a yoẹme gbe unu ahwo nọ a ghẹmeeyo evaọ etoke sa-sa fihọ otọ. O kere epanọ a ro fi ẹkwotọ Kenan kparobọ othotha gbe eware nọ emamọ ibruoziẹ Izrẹl a ru. Ẹhẹ, o kere eware buobu kpahe iruẹru idibo riẹ. Ọ rehọ ẹzi riẹ kẹ ahwo kere eware nana fihọ otọ, onọ u ru omai riẹ epanọ o rri eware nọ a re kere fihọ otọ gbagba.

³³ Iku nọ a kere fihọ Ebaibol na i dhesẹ via inọ iyẹrẹ nọ ahwo Jihova a nẹ gbe eware nọ a kere fihọ otọ e rrọ gbagba. Evaọ ẹsibuobu, a gbẹ hae fodẹ ugogo inọmba na ha, a hae sai kere iku na oghẹrẹ nọ a re ro wo otoriẹ rai totọ họ. Rri iriruo nana: Emuhọ 46:27; Ọnyano 12:37; Ibruoziẹ 7:7; 2 Ivie 19:35; 2 Iruẹru-Ivie 14:9-13; Jọn 6:10; 21:11; Iruẹru Ikọ 2:41; 19:19.

³⁴ Dede nọ ma rẹ niyẹrẹ eware kpobi nọ ma bi ru evaọ egagọ Jihova ha, iyẹrẹ nọ ma be hae nẹ na i wo iruo gaga kẹ ukoko Jihova. Evaọ ikpe-udhusoi ọsosuọ, nọ ilele na a no obonọ a jọ nyae ta usi uwoma ze, a niyẹrẹ “eware kpobi nọ a ru je wuhrẹ” kẹ Jesu. (Mak 6:30) Ẹsejọ, iyẹrẹ e sai dhesẹ via nọ abọjọ odibọgba mai na o gwọlọ ẹromuhọ. Iyẹrẹ na e rẹ sai dhesẹ via nọ ma bi wo ẹnyaharo evaọ abọjọ rekọ ma gbe bi vihọ tere evaọ unu iwhowho-uvie he. O sae jọ nọ iwhowho-uvie e gwọlọ uduotahawọ hayo ebẹbẹ jọ e riẹ nọ o gwọlọ nọ a re kuhọ. Esẹro nọ i wo owha-iruo yena a re muẹrohọ iyẹrẹ na jẹ daoma riẹ oware kpobi nọ u bi ru nọ ahwo jọ hayo ukoko na soso a gbe bi wo ẹnyaharo ho, a vẹ kpọe họ.

³⁵ Iyẹrẹ i re je fiobọhọ kẹ ukoko Jihova riẹ eria nọ a mae jọ gwọlọ ahwo nọ a rẹ ta usi uwoma. Eria vẹ a be mae jọ jẹ ovuẹ na rehọ? Diẹse ẹnyaharo ọ rrọ tere he? Ebe vẹ a mae gwọlọ nọ a re ro fiobọhọ kẹ ahwo wuhrẹ uzẹme na? Iyẹrẹ i re fiobọhọ kẹ ukoko Jihova riẹ ebe nọ a mae gwọlọ kẹ usi uwoma ota evaọ abọ sa-sa akpọ na je ru epanọ ebe yena e rẹ rọ kaki te ai obọ.

³⁶ Rọkẹ ibuobu mai, iyẹrẹ e rẹ kẹ uduotahawọ. Kọ eva e gbẹ be hae were omai nọ ma te yo kpahe iruo nọ inievo mai a bi ru rọ ta usi uwoma na evaọ akpọ na soso? Iyẹrẹ ẹvi nọ ma bi wo u re fiobọhọ kẹ omai riẹ epanọ ukoko Jihova o be nyaharo te. Iku eware nọ inievo mai a rọ ẹro ruẹ e rẹ sasa omai oma jẹ kẹ omai ajọwha nọ o rẹ wọ omai wobọ ziezi evaọ usi uwoma ota na. (Iruẹru 15:3) Iyẹrẹ nọ ma rẹ nẹ u wuzou, yọ u re je dhesẹ nọ ma you inievo mai nọ e rrọ oria kpobi. Nọ edhere jọ nọ ma re ro dhesẹ nọ ma bi ru lele ọruẹrẹfihotọ ukoko Jihova.​—Luk 16:10; Hib. 13:17.

FI ITEE HỌ KẸ OMARA

³⁷ Ẹjiroro ọvo ọ riẹ hẹ nọ ma rẹ rọ rehọ usi uwoma ota mai rọ wawo orọ omọfa. (Gal. 5:26; 6:4) Iyero ahwo i wo ohẹriẹ. Evaọ abọdekọ riẹ, o rẹ sai fiobọhọ kẹ omai gaga nọ ma te fi itee nọ ma rẹ sai le tobọ họ nọ ma rẹ rọ wawo sọ ma bi wo ẹnyaharo evaọ odibọgba na. Ma tẹ be sai le itee nana tobọ, o rẹ kẹ omai evawere inọ ma le oware jọ tobọ.

³⁸ O rrọ vevẹ inọ Jihova o bi gine ru nọ a bi ro koko ahwo nọ o ti siwi evaọ “uye ulogbo” na họ vẹrẹ vẹrẹ. Ma be rria etoke nọ eruẹaruẹ Aizaya i bi ro rugba: “Ọnọ ọ rrọ kakao na o ti zihe ruọ odu, yọ ọnọ o tulo ho na o ti zihe ruọ orẹwho ulogbo. Mẹ omamẹ, Jihova, me ti ru ei re o via vẹrẹ nọ oke riẹ u te te.” (Evia. 7:9, 14; Aiz. 60:22) Uvẹ-ọghọ ulogbo o rrọ nọ ma rọ rrọ egbodibo nọ i bi whowho usi uwoma na evaọ edẹ urere nana!​—Mat. 24:14.