‘Jọ A Ru Eware Kpobi Rọkẹ Ọbọga’
1 Evaọ eyeri kugbe inievo mai, ma re ru oware nọ u woma rọkẹ ọbọga rai. Onana u dhesẹ nọ ma re roro kpahe ẹthọ isiuru abọ-ẹzi rai. Ma te bi ru oghẹrẹ ọ iruo jọ nọ a rẹ jọ wha okwakwa hayo iruẹru jọ haro, o gwọlọ nọ ma rẹ yọroma re eware nọ ma re ru e siọ inievo mai ba ezoruẹ.—2 Kọr. 6:3; Fil. 1:9, 10.
2 Ejọ i duomahọ ekiọthuọ sa-sa no, bi rri ibe Ileleikristi wọhọ ehreki. Ikoko ezazẹ jọ e rẹ tuduhọ ahwo ẹro rai awọ re a rri ohwo kpobi wọhọ ọhreki—kugbe enọ te ae te a gbẹ rrọ egagọ ọvọ na. Inievo jọ a koko unu Isẹri buobu họ no avọ ẹjiroro nọ a rẹ rọ tuduhọ ae awọ re a kuomagbe ekiọthuọ jọ. Efa e rẹ wha ekiọthuọ rai haro ẹkwoma ẹkpọ ekwakwa nọ a n’ekpẹ rai hi, ebe, hayo ekasẹte ro bru ibe enọ e rọwo. Kọ u fo re Oleleikristi ọ rehọ uvẹ ọnyakugbe riẹ orọ ahwo ukoko na rọ wha inievo abọ-ẹzi riẹ re? Ijo!—1 Kọr. 10:23, 24, 31-33.
3 U Fo re Inievo A Yọroma: Orọnikọ onana u dhesẹ nọ Oleleikristi ọ rẹ sae thueki kugbe oniọvo ho ho. Oyena yọ ẹme obọ ohwo. Ghele na, ejọ i re mu ẹguae ekiọthuọ nọ e rẹ tuduhọ uvo-uthe họ, yọ a rẹ kpakpa ibe enọ e rọwo re a jọ ehreki rai hayo enọ a rẹ gbẹ zọhọ ugho thueki na. Ekiọthuọ enana buobu i re kie, jẹ wha esa ilogbo se enọ i duomahọ iẹe. Dede nọ isiuru re a wo ugho okpakpata oye o wọ enọ i duomahọ ekiọthuọ na, ọnọ o mu rie họ na o re roro nọ ọ kare afuẹwẹ hẹ otẹrọnọ ekiọthuọ na o kie. Ọ rẹ romatotọ roro kparo kpahe epanọ u ti kpomahọ ewoma abọ-ẹzi gbe ọrọ ugboma inievo riẹ otẹrọnọ ekiọthuọ na o kie. Enọ i wo ọkwa owha-iruo ukoko a rẹ yọroma gaga kpahe oghẹrẹ ọ ekiọthuọ rai keme amọfa a re rri rai avọ adhẹẹ yọ a re fievahọ ae ziezi. O rẹ jọ thọthọ re a rọ evaifihọ ọyena ruiruo thọthọ. A rẹ sai mi ohwo ọkwa-iruo otẹrọnọ oniọvo jọ o ku adhẹẹ nọ amọfa a wo kẹe fiẹ.
4 Ute mai o rẹ jọ onọ a re ro “ru eware kpobi rọkẹ [ọbọga].” (1 Kọr 14:26) Ma rẹ whaha eruo oware kpobi nọ o rẹ wha iruẹru ekiọthuọ haro evaọ udevie ukoko na. Eware itieye na i wo uvumọ abọ kpahe ẹjiroro Ikereakere mai nọ ma bi ro kokohọ na ha.—Hib. 10:24, 25.