Fi Itee Abọ-Ẹzi Họ
1 Ẹvẹ ọghọ riẹ ọ rẹ rro te re a jiri Jihova bẹdẹ bẹdẹ! Re u fi obọ họ k’omai nyate ute yena, ma rẹ sai fi itee abọ-ẹzi efa họ enẹna ma vẹ dao oma le ai t’obọ. Onana o rẹ lẹliẹ omai rehọ ẹgba mai ruiruo evaọ edhere nọ o wo areghẹ. (1 Kọr. 9:26) Didi itee whọ rẹ sai le te obọ?
2 Ewuhrẹ Ebaibol: Kọ whọ rẹ ruẹrẹ oma kpahe kẹ iwuhrẹ ukoko na kpobi? O tẹ rrọ ere, kọ whọ ruẹrẹ oke fihọ kẹ ekiakiẹ gbe eroro evaọ okenọ who te bi wuhrẹ? Wọhọ oriruo, okenọ whọ tẹ be ruẹrẹ oma kpahe kẹ Uwuhrẹ Uwou-Eroro na gbe Uwuhrẹ Obe Ukoko ẹkpoka na, who re siusi fihọ iyo na ọvo manikọ who re rri ikereakere nọ a fodẹ na je roro kpahe ẹjiroro nọ a rọ kẹ oruvẹ na? Kọ whọ sai ru ei fihọ ute ra re who ru ekiakiẹ kpahe ugogo eme jọ k’oka k’oka no eria nọ a fihọ kẹ isase Ebaibol evaọ Isukulu Odibọgba Esuo-Ọghẹnẹ na ze? Ekiakiẹ eme abọ-ẹzi itieye na e rẹ gwọlọ oke gbe omodawọ, rekọ e rẹ wha irere ilogbo ze.—Itẹ 2:4, 5.
3 Iwuhrẹ Ukoko: Ute ofa jọ họ re ma kpohọ iwuhrẹ isoi ukoko na kpobi kẹse kẹse. Ete nọ ma rẹ kaki te obei re ma ku oma gbe ibe ẹrọwọ mai je kuomagbe ole gbe olẹ emuhọ na u re fi obọ họ k’omai bọ ẹzi ukoko na ga. Ma rẹ sae jẹ dao oma kuyo evaọ ewuhrẹ kpobi re jẹ dao oma ru ẹnyaharo evaọ oghẹrẹ nọ ma rẹ rọ k’iyo mai. Ẹsejọhọ whọ rẹ sai dhesẹ epanọ ikereakere jọ nọ ọ rrọ edhe-ẹme na o ro wo obọ kugbe ẹme nọ a be ta na hayo whọ sae fodẹ epanọ ẹme na o ro kie kpahe uzuazọ ikẹdẹ kẹdẹ.—Hib. 10:24, 25.
4 Usiuwoma Ota: Odibọgba mai o re wo ẹnyaharo gaga evaọ okenọ ma te fi itee họ. Kọ who wo ute ọ euwa kẹ omobọ ra nọ whọ m’omaa nọ whọ rẹ raha evaọ usiuwoma ota k’amara k’amara? Oyena u bi fi obọ họ kẹ ahwo jọ. Hayo kọ whọ sai ru ẹnyaharo evaọ abọ odibọgba ra jọ, wọhọ Ebaibol na nọ who re ro ruiruo evaọ iruo ọ n’uwou ruọ uwou na, eruo emamọ izihebro, omodawọ re who muọ obe-uwuhrẹ Ebaibol jọ họ, hayo ewuhrẹ ra nọ who re ru woma viere evaọ etoke ebe-uwuhrẹ?
5 Esẹ gbe ini, wha be ta udu họ emọ rai awọ re a fi itee họ evaọ iruo Jihova? Fi obọ họ kẹ ae ruẹ nnọ iruo nọ a re ru wọhọ ọkobaro, imishọnare, hayo omọvo uviuwou Ebẹtẹle yọ obọdẹ edhere nọ a re ro dhesẹ epanọ ovuhumuo rai kẹ Jihova o diwi te.—Ọtausi. 12:1.
6 Nọ ma be kiẹ iruẹru mai, bi fi itee abọ-ẹzi họ, je bi ruiruo re ma nyate itee na, ma te ruẹ oghọghọ ulogbo evaọ iruo mai jẹ jọ ehri uduotahawọ kẹ amọfa.—Rom. 1:12.