Gbaudu Ta Usiuwoma Evaọ Eria Iruo Hayo Ekiọthuọ
1. Fikieme ma gbẹ dhozọ usiuwoma ota evaọ eria iruo gbe ekiọthuọ họ?
1 Kọ ozọ usiuwoma ota evaọ eria ekiọthuọ u re mu owhẹ? Otẹrọ ere, o kẹ owhẹ uye he, makọ Pọl nọ ọ jẹ rọ aruọwha ta usiuwoma, u wo okejọ nọ o jọ bẹbẹ kẹe re, rekọ ọ gbaudu ta usiuwoma na. (1 Tẹs. 2:2) Ma te jọ obotọ ta kpahe eware jọ nọ e rẹ wha ozodhẹ ze, gbe epanọ ma sai ro fi ai kparobọ.
2. Fikieme ma gbẹ ruawa ha inọ eva e te dha ahwo nọ ma ti weze bru evaọ eria ekiọthuọ?
2 Kọ Eva E te Dhae Inọ Ma bi Kpokpo Ai? Evaọ eria iruo hayo ekiọthuọ buobu, iruiruo a re rẹro inọ ahwo a te nyaze. Ẹsibuobu a te whẹtiẹ owhẹ h’oma, ẹsejọhọ bi roro nọ whọ wha iruo jọ ze hayo whọ gwọlọ dẹ oware jọ. Whọ tẹ sẹ osẹ ra kpatiẹ jẹ rrọ whẹtiẹ whẹtiẹ, u ti ru ai rọ ọghọ kẹ owhẹ.
3. Ẹvẹ ma sae rọ whaha evarudha enọ e be dẹ eware?
3 Kọ Mẹ rẹ jọ Oria nọ Ahwo Buobu A be jọ Dẹ Eware Ta Usiuwoma? Re ma siọ eva ba erudha enọ e be dẹ eware, o tẹ lọhọ, nya evaọ okenọ ahwo buobu a rẹ jọ etẹe hẹ, wọhọ oriruo, evaọ okenọ a rovie obọ. Ọnọ ọ be rẹrote uwou-eki na ọ tẹ be ta ẹme kugbe ohwo, hẹrẹ re whọ tẹ ta usiuwoma kẹe. Whọ ta eme buobu hu.
4. Eme ma rẹ sae ta nọ ma tẹ be ta usiuwoma evaọ oria iruo hayo ekiọthuọ?
4 Kọ Eme Mẹ te Ta? Enọ e rrọ etẹe a tẹ vrẹ omọvo, kake ta ẹme kẹ ọnọ o wuzou rai. Whọ sae ta inọ: “A rẹ kaki di owhai họ uwou hu fiki iruo rai [hayo fiki eki rai], oyejabọ ma jẹ nyabru owhẹ ziọ oria iruo ra. Mẹ riẹ nọ obọ ra o rrọ oware, fikiere mẹ te ta ẹme bu hu.” Re a seba eroro nọ ma be zẹ ebe mai, o rẹ mai woma re ma siọ azọhọ unevaze ba ẹfodẹ ajokpanọ ohwo na ọ nọ omai kpahe iẹe. Ẹsejọ o rẹ gwọlọ nọ ma mi ọga hayo emadamu na uvẹ re ma tẹ te ta usiuwoma kẹ iruiruo riẹ. Uzoẹme ọvona whọ rẹ rọ ta ẹme kẹ iruiruo na kpobi. Ọjọ o te bi ru iruo, ta umutho ẹme kẹe, whọ vẹ kẹe omobe-ovẹvẹ. A gbe wo uvẹ vievie he, ẹsejọhọ a te kẹ owhẹ uvẹ inọ whọ nyasiọ ebe jọ ba kẹ ae.
5. Fikieme u ro fo re ma ta usiuwoma evaọ eria iruo gbe eki?
5 Jesu avọ Pọl a ta usiuwoma kẹ ahwo evaọ eria iruo rai (Mat. 4:18-21; 9:9; Iruẹru 17:17) Lẹ se Jihova re ọ kẹ owhẹ udu nọ whọ sai ro ru epọvo na. (Iruẹru 4:29) Enwene ẹsikpobi a rẹ jọ eria iruo ruẹ ahwo, fikiere u ti woma re whọ hae ta usiuwoma evaọ eria itieye.