ENỌ IZOGE NA

Ẹvẹ U Wuzou te re A Riẹ Ohwo Okpodẹ Evaọ Itanẹte?

Uzoge jọ nọ a re se Elaine ọ ta nọ: “Nọ mẹ ruẹ nọ ibe emọ isukulu mẹ a wo egbẹnyusu buobu evaọ itanẹte, me te je roro nọ, ‘Ahwo buobu a riẹ rai!’ Uzẹme riẹ họ, oware nana o jẹ lẹliẹ omẹ re ae ihri.”

Kọ oware utioye o via kẹ owhẹ no ẹdẹjọ? O tẹ rrọ ere, uzoẹme nana u ti fiobọhọ kẹ owhẹ whaha epanọ who re ro wo isiuru okpodẹ evaọ itanẹte.

Ebẹbẹ vẹ e rẹ sai noi ze?

Ebaibol na ọ ta evaọ obe Itẹ 22:1 nọ: “U fo re a salọ emamọ odẹ viukpọ efe obuobu.” Fikiere o thọ họ re ohwo o wo emamọ odẹ hayo re o ru eware nọ eva riẹ e rẹ rọ were amọfa.

Rekọ ẹsibuobu, onana o sae whae ze nọ ahwo a rẹ rọ gwọlọ wo okpodẹ. Kọ ẹbẹbẹ jọ o sai noi ze? Onya, nọ ọ rrọ ikpe 16 ọ ta nọ Ee:

“Mẹ rẹ ruẹ ahwo nọ a re ru ugberuo, wọhọ oriruo, emọ jọ a rẹ la no uwou-ehru edhe-ivẹ ziọ otọ evaọ obọ isukulu mai re a ruẹse riẹ ae okpodẹ.”

Ahwo jọ a re vidio eware igheghe nọ a ru, kẹsena a ve fi ae họ itanẹte re ehwa rai a ruẹsi muẹrohọ ae. Wọhọ oriruo, izoge jọ a re vidio omai rai nọ a be re odha nọ a rẹ rọ fọrọ iwu, a ve fi ividio na họ itanẹte. Odha yọ oware nọ a rẹ re he keme o wo ekẹmika nọ o rẹ sae wha ẹyao se ohwo.

Ebaibol na ọ ta nọ: “Wha rehọ . . . omorro ru oware ovo ho.”—Ahwo Filipai 2:3.

Roro kpahe onana:

● Ẹvẹ okpodẹ nọ a re wo evaọ itanẹte u wuzou kẹ owhẹ te?
● Kọ whọ sai ru oware nọ u re fi uzuazọ ra họ ọza fikinọ nọ whọ gwọlọ nọ ehwa ra a riẹ owhẹ ziezi?

Ẹme nọ ehwa ra a ta

“Nọ ahwo a te bi ru oware kpobi nọ o gwọlọ re amọfa a sae riẹ ae ziezi makọ evaọ itanẹte, a jẹ be rọ fiki oyena nwene oghẹrẹ nọ a rẹ ta ẹme, sẹ oghẹrẹ ọsẹ jọ, hayo ru eware evaọ oghẹrẹ jọ, a sai kie ruọ ẹbẹbẹ. Riẹ nọ whọ te vioja riẹ ẹdẹfa nọ who te ru eware nọ whọ riẹ nọ i yoma fikinọ whọ gwọlọ nọ ahwo a riẹ owhẹ ziezi.”—Leianna.

“Ahwo nọ a rẹ viẹ ahwo họ roro nọ a viodẹ”

Orọnikọ ẹsikpobi ahwo nọ a gwọlọ wo okpodẹ evaọ itanẹte a re ru eware nọ i re fi uzuazọ rai họ ọza ha. Erica nọ ọ rrọ ikpe 22 ọ ta kpahe oware jọ nọ ahwo jọ a re ru re a sae riẹ ae okpodẹ inọ:

“Ahwo jọ a re fi ifoto buobu nọ a ro kugbe amọfa evaọ oke sa-sa họ itanẹte, re ahwo a ruẹsi roro nọ a wo egbẹnyusu buobu nọ a rẹ raha oke kugbe. Onana o sae ginẹ lẹliẹ ahwo roro nọ a gine viodẹ gaga.”

Cara nọ ọ rrọ ikpe 15 ọ ta nọ ahwo jọ a rẹ rọ edhere nana rọ viẹ amọfa họ, inọ:

“Mẹ riẹ ahwo jọ nọ a ro ifoto evaọ obọ uwou rai rekọ a ve ru ei wọhọ ẹsenọ a jọ epati ro ifoto na.”

Matthew nọ ọ rrọ ikpe 22 ọ ta nọ o ru ọkpọ oware utioye na no ẹdẹjọ, ọ ta nọ:

“Me ru ifoto jọ nọ me fihọ itanẹte wọhọ ẹsenọ mẹ jọ Mount Everest ro ẹe dede nọ me ri te unuakpọ Asia ẹdẹvo ho!”

Ebaibol na ọ ta nọ: “Ma be gwọlọ ru eware kpobi avọ oruọzewọ.”—Ahwo Hibru 13:18.

Roro kpahe onana:

● Otẹrọnọ whọ be hai kpohọ itanẹte, kọ whọ be hai ru eware eviẹhọ nọ e rẹ lẹliẹ ahwo roro nọ whọ viodẹ?
● Kọ ifoto nọ whọ be hai fihọ itanẹte gbe eware nọ whọ be hai kere i bi dhesẹ oghẹrẹ ohwo nọ whọ ginẹ rrọ gbe eware nọ whẹ rọwo?

Ẹme nọ ehwa ra a ta

“Ahwo jọ a re ru oware kpobi nọ o gwọlọ re eware nọ a bi ru e sae were ahwo buobu. Rekọ oghẹrẹ vẹ whọ gwọlọ nọ ahwo a riẹ owhẹ, ohwo nọ ọ rẹ ta ugbẹta, sẹ ekpehre osẹ, je dhesẹ oma fiki eware nọ o wo? Manikọ whọ gwọlọ nọ ahwo a riẹ owhẹ fiki emamọ uruemu ra hayo ororokẹ nọ who wo kẹ amọfa? Nọ eware nọ who bi ru evaọ itanẹte e tẹ were ahwo, o sae lẹliẹ eva were owhẹ, rekọ ruẹ nọ emamọ eware who bi ru.”—Hannah.

Kọ egbẹnyusu buobu nọ ohwo o re wo u re fiobọhọ?

Ahwo buobu a re roro nọ oware nọ o rẹ lẹliẹ ohwo viodẹ evaọ itanẹte họ, nọ o te wo ahwo buobu nọ a mu usu kugbei re a hae ruẹ eware nọ o bi ru evaọ itanẹte, yọ eware nọ o re ru e rẹ were ae. Matthew nọ ma fodẹ no vẹre na ọ ta nọ ere ọ jẹ hai roro, ọ ta nọ:

“Mẹ rẹ nọ ahwo nọ, ‘Bro ahwo a mu usu kugbe owhẹ re a hae ruẹ eware nọ who bi ru evaọ itanẹte?’ hayo ‘Bro ahwo eware nọ whọ be hae ru e rẹ were?’ Re mẹ sai wo ahwo buobu nọ i re mu usu kugbe omẹ evaọ itanẹte, mẹ jẹ hai mu usu kugbe ahwo nọ mẹ riẹ hẹ yọ me je rẹro nọ a ti mu usu kugbe omẹ re a sae ruẹ eware nọ me bi ru. Mẹ tẹ jẹ gwọlọ epanọ a rẹ rọ riẹ omẹ okpodẹ. Yọ itanẹte u ru nọ isiuru mẹ na e rọ ga thesiwa.”

Iwoho na: 1. Uzoge ọmọtẹ jọ nọ o bi rri unuahwo nọ a ta nọ eware nọ o bi ru evaọ itanẹte e were rai, yọ ovao riẹ o rrọ ohwohwẹ. 2. Ọmọtẹ ọvona ọ be lalọ iswiti nọ e vọ omodhe. 3. Ọmọtẹ na ọ rọ obọ duọ eva riẹ, yọ o mu ovao họ. — Okpodẹ nọ a rẹ riẹ ohwo evaọ itanẹte ọ wọhọ emu nọ ọ rẹ kẹ ohwo ẹgba ha, ọ rẹ mere rekọ ọ rẹ vọ ohwo eva ha

Maria nọ ọ rrọ ikpe 25 ọ ta nọ oware nọ ahwo jọ a re rri ro dhesẹ epanọ a riẹ e rai te họ, unu ahwo nọ a mu usu kugbei nọ a be ruẹ eware nọ a be hai ru gbe unu ahwo nọ eware nọ a bi ru e be hae were evaọ itanẹte, ọ ta nọ:

“Nọ ọmọtẹ o te fi ifoto riẹ họ itanẹte rekọ ahwo nọ a ta nọ ifoto na ọ were e rai a bu tere he, ọmọtẹ na o ve roro nọ o wo erru hu. Rekọ iroro itieye na e thọ. Dede na, ahwo buobu nọ oware utioye o via kẹ no a re roro epọvo na re. Rekọ omarai a be kẹ uye na nwane wọhọ epanọ ahwo nọ a rẹ gwọlọ ẹme evaọ itanẹte a re ru ohwo.”

Ebaibol na ọ ta nọ: “Wha joma wo omorro ho, ma wha oma-uhrowo fihọ udevie mai hi, ma re ohwohwo ihri gbe he.”—Ahwo Galesha 5:26.

Roro kpahe onana:

● Kọ itanẹte i re ru nọ whọ rẹ rọ gwọlọ rehọ omara wawọ amọfa?
● Kọ oware nọ o be hae mae jọ owhẹ oja họ unu ahwo nọ a mu usu kugbe owhẹ evaọ itanẹte manikọ epanọ who re ro wo emamọ egbẹnyusu?a

Ẹme nọ ehwa ra a ta

“Nọ whọ tẹ gwọlọ nọ ahwo a riẹ owhẹ ziezi evaọ itanẹte, who re ru eware nọ whọ rẹ rọ were ahwo, yọ onana u dhesẹ nọ whọ rẹ jọ wọhọ e rai. Onana u ti ru nọ whọ te rọ gwọlọ tẹrovi oghẹrẹ nọ ahwo a bi rri owhẹ jẹ gwọlọ ru oware kpobi nọ ọ rẹ were ahwo. Ohwo kpobi ọ rẹ gwọlọ nọ eware nọ o bi ru e rẹ were amọfa, rekọ nọ ohwo ọ tẹ tẹrovi epanọ o re ro wo okpodẹ, kọ oyena ọvo o re roro kpahe.”—Joshua.

Whaha “omaurokpotọ eviẹhọ”

Ahwo jọ a rẹ rehọ eware nọ a wo gbe eware nọ a ru no rọ ya-oma, rekọ a rẹ tae wọhọ ẹsenọ a wo omaurokpotọ gaga.

● “Anwẹnọ mẹ rọ dẹ omoto ọkpokpọ mẹ na, ahwo a be jọ omẹ wẹ hẹ, a rẹ gwọlọ nọ mẹ wọ ae!”
● “Oghẹrẹ nọ ahwo a bi ro jiri omẹ fiki oghẹrẹ nọ mẹ kpọ fihọ no o ga wumuo ho, yọ onana o rẹ kẹ omẹ uye!”

Ohwo nọ ọ be ta ẹme na ọ rẹ tae wọhọ ẹsenọ oware na o be kẹe uye re ahwo a roro nọ o wo omaurokpotọ, rekọ oma ọ be ya na.

Oware nọ u re noi ze: Nọ ohwo ọ tẹ be rọ oghẹrẹ edhere nana ya-oma, u re kie kpei keme ahwo a rẹ riẹ vevẹ nọ ohwo na ọ be ya-oma. Yọ fikinọ omaurokpotọ nana yọ ọrọ eviẹhọ, o re tu ahwo oma vi ẹsenọ ohwo na ọ hai dhesẹ vevẹ nọ ọ be ya-oma.

Fikiere oke ọfa kpobi nọ who ti kere ẹme hayo fi ifoto họ itanẹte, yọroma rọkẹ oghẹrẹ omaurokpotọ eviẹhọ nana. Whọ sai fi ohrẹ Ebaibol nana họ iruo: “Jọ omọfa o jiri owhẹ, orọnikọ unu obọra ha.”—Itẹ 27:2.