¿Taxka xhtanhojiloj syaʼtajil?

JILAʼ TZET YALNI TEʼ BIBLIA

«Haʼ Komam sunujiloj yal sat hebʼ yaʼ, matxa bʼaqʼinh chuhuj kamikal, matxa oqʼilal, matxa mak chʼahoj skʼul, matxa mak chʼabʼenoj syaʼtajil, haxka tzettikʼa ye yet yalanhto xax tanhkanoj.» (Apocalipsis [Revelación] 21:4, Teʼ Nuevo Testamento Yin̈ Abʼxubʼal, akʼnhebʼil tzʼibʼ.)

TZET SKʼULAL CHAKANOJ JET JOTAJNHENI

Xhjotajnheʼ ta mataj Komam Dios chʼaniti syaʼtajil jibʼanh (Santiago 1:13).

Chahaʼ yaqʼlobʼal kokʼul jotajnheni ta Komam Dios xtxum yaʼ syaʼtajil chʼekʼtoj jinh (Zacarías 2:8).

Chahaʼ skawxobʼal kokʼul ta chʼapnoj stzʼayikal bʼay matxa xhjilaʼ syaʼtajil (Romanos 16:20).

¿CHUH JAʼNI YULUJ KOKʼUL YINH TZET CHAL TEʼ BIBLIA?

Hoʼ. Jilaʼ kabʼoj tzetet chʼaʼni jahaʼ yuluj kokʼul:

• Komam Dios syah yaʼ syaʼtajil bʼoj xtxʼojal. ¿Tzet yuh yabʼensbʼa yaʼ yet xʼekʼtoj syaʼtajil yinh skonhobʼ yaʼ? Chal teʼ Biblia ta yaʼ xʼaykʼay tet yaʼ yet ayej konhobʼ xʼuni xtxʼojal yinh skonhobʼ yaʼ (Jueces 2:18).

  Mach kʼuluj yilni yaʼ anma chʼunikoj xtxʼojal yinh yet anmahil. Yuxin teʼ Biblia chal teʼ ta syah yaʼ anma potxʼwahom (Proverbios 6:16, 17).

• Komam Dios chakoj yaʼ hunun anma yinh skʼul. Waxanhkami chawalaʼ ta hachnhe hawotaj syaʼtajil chʼekʼtoj yinh haqʼinal, yotajpax yaʼ Jehová tzet chawaʼle (1 Pedro 5:7).

  Yaʼ sikʼlebʼilxa yokoj yahawoj txʼotxʼ txʼotxʼ yuh yaʼ Jehová, hayaʼ chʼinojiltoj syaʼtajil chʼekʼtoj yinh sqʼinal hunun anma (Mateo 6:9, 10). Yalanhto maxhto chul huneʼ tzʼayik tuʼ, sunil anma chisayni Komam chaʼ yaʼ yaqʼlobʼal skʼul (Hechos 17:27; 2 Corintios 1:3, 4).