¿Taxka chuh spitzkʼahojkanh hebʼ yaʼ kamom hunekxa?

JILAʼ TZET YALNI TEʼ BIBLIA

«Xhkawxi pax hinkʼul yinh Komam Dios han to yeli xhpitzkʼahojkanh sunil hej kamom.» (Hechos 24:15, Teʼ Nuevo Testamento Yin̈ Abʼxubʼal, akʼnhebʼil tzʼibʼ.)

TZET SKʼULAL CHAKANOJ JET JOTAJNHENI

Chahaʼ yaqʼlobʼal kokʼul yet ta xhkamoj mak xhjoche (2 Corintios 1:3, 4).

Chʼeloj niman xiwkilal jinh tet naj kamikal (Hebreos 2:15).

Chahaʼ skawxobʼal kokʼul jilnoj kokamom (Juan 5:28, 29).

¿CHUH JAʼNI YULUJ KOKʼUL YINH TZET CHAL TEʼ BIBLIA?

Hoʼ. Jilaʼ oxebʼoj tzetet chʼaʼni jahaʼ yuluj kokʼul:

• Komam Dios xwatxʼen qʼinal. Teʼ Biblia chal teʼ ta yaʼ Jehová «xʼaʼni koqʼinal kohunil» (Hechos17:24,25; Salmo 36:9). Ta xkʼojihapnoj yaʼ yaʼni koqʼinal kohunil mach yaʼtajojpax tet yaʼ spitzkʼanojkanh hebʼ yaʼ kamom.

• Yettax payxa ay anma pitzkʼabʼilkanh yuh Komam Dios. Teʼ Biblia chal teʼ ta waxajwanh anma pitzkʼabʼilkanh sat txʼotxʼ txʼotxʼ tiʼ—ix bʼoj winaj nanannhe sqʼinal. Ay mak lanhanto skami xpitzkʼalaxkanh; yajaʼ ay huneʼxa yaʼ winaj skanhxa tzʼayik skami xpitzkʼahotkanh (Juan 11:39-44).

• Komam Dios kaw matxa xhtecha yuh yaʼ yaʼni sqʼinal hebʼ yaʼ kamom. Yaʼ Jehová syah yaʼ naj kamikal chil yaʼ naj haka yet aʼom howalil (1 Corintios 15:26). Kaw matxa xhtecha yuh yaʼ stanhtzeniloj huneʼ yet aʼom howalil tiʼ chubʼ yaʼ huneʼ tiʼ yet spitzkʼanojkanh yaʼ anma. Maktaj ayiktoj yinh snabʼal yaʼ choche yaʼ chʼehikʼoj sat txʼotxʼ txʼotxʼ hunekxa (Job 14:14, 15).