A Ou Yu Kyan Paadn Piipl Laik Ou Jeuova Paadn Dem?

1-2. (a) Wa mait-a mek it riili aad fi wi paadn sumadi? (b) Wa Denise did du fi shuo se shi paadn di man we ort ar fambili?

YU FAIN it aad fi paadn piipl? Nof a wi fain it aad, speshali wen sumadi se ar du sopm we bon wi bad. Bot wi kyan du som tingz we kyan elp wi fi no fiil so beks an paadn piipl. Laik luk pan wa did apm wid wan sista we niem Denisea we did afi paadn sumadi. Iina 2017, Denise an ar fambili did go a di Worl Ed Afis fi di Jeuova Witnis dem we did jos uopm. Wen dem did a go baka dem yaad, wan neks kyaar lik op iina fi dem kyaar. Denise did blakout wen di aksident apm. Wen shi wiek op shi fain out se ar pikni dem did get ort bad an ar ozban, Brian, ded. Wen shi did a tingk bout aal a wa did apm, shi se: “Mi did fiil sad bad an mi neehn nuo wa fi du wid miself.” Afta dat, shi fain out se a no laik se di jraiva kudn ier ar si gud ar notn laik dat mek im lik op iina dem. Shi prie tu Jeuova fi gi ar piis iina ar aat.

² Di jraiva we lik op iina dem get chaaj fi kil Denise ozban. An ef dem se im gilti, im wuda go a prizn fi it. Bot di aadis ting a dat Denise wuda afi go a kuot go taak bout wa apm fi di kuot mek op dem main bout wa fi du wid di man. Denise se: “Mi fiil laik sumadi tier out mi stichiz dem an chuo wan gyalan a saalt iina mi kot kaa mi did afi taak bout aal a wa did apm iina di aksident, so it komiin laik di aksident did a apm agen.” Kopl wiik afta dat, Denise did de a kuot an a get redi fi taak tu di man we did ort ar fambili iina di aksident. Wa yu tingk shi se? Shi beg di joj fi paadn di man.b Wen shi don taak, di joj staat fi baal. Im se: “A 25 ier nou mi a joj an mi neva ier notn laik dis iina kuot yet. Mi neva ier di sumadi we dem fambili get ort a beg fi di sumadi we ort dem fambili. Mi neva ier sitn laka dis yet we shuo se piipl kyan lov piipl so an paadn dem.”

3. Wa did elp Denise fi paadn di man?

³ Wa did elp Denise fi paadn di man a dat shi tingk bout di wie ou Jeuova paadn piipl. (Mai. 7:18) Wen wi tangk Jeuova fi ou im paadn wi, it a-go push wi fi paadn ada piipl tu.

4. Wa Jeuova waahn wi fi du? (Ifiijan 4:32)

⁴ Jeuova waahn wi fi redi fi paadn piipl jos laik ou im redi fi paadn wi. (Riid Ifiijan 4:32.) An a siem wie im waahn wi fi paadn di wan dem we ort wi tu. (Sa. 86:5; Luuk 17:4) Iina da lesn ya, wi a-go luk pan chrii tingz we a-go elp wi fi paadn piipl muor.

WEN SUMADI ORT YU, NO GWAAN LAIK SE YU NO FIIL BAD

5. Azkaadn tu Pravorbz 12:18, ou wi mait-a fiil wen sumadi ort wi?

⁵ It mait-a bon wi bad wen sumadi se ar du sitn bad tu wi, wos ef dat de sumadi de a wi gud fren ar sumadi iina wi fambili. (Sa. 55:12-14) Somtaim di pien we wi fiil iina wi aat komiin laik sumadi tab wi wid wan naif. (Riid Pravorbz 12:18.) Wi mait-a gwaan laik se wi no fiil bad wen sumadi ort wi. Bot ef wi du dat, it wuda komiin laik se sumadi tab wi wid wan naif an wi lef di naif iina wi an ekspek se wi a-go get beta. A siem so wi kyaahn ekspek se wi a-go fiil beta ef wi gwaan laik se notn neehn apm we ort wi.

6. Wa wi mait-a du wen sumadi du ar se sitn we ort wi?

⁶ Wen sumadi du ar se sitn we ort wi, di fos ting wi mait-a du a get beks. Di Baibl tel wi se ye, wi mait-a get beks som a di taim, bot it waan wi se wi no fi stie beks wid di sumadi we ort wi. (Sa. 4:4; Ifii. 4:26) Wi no fi du dis kaa nof taim wi du tingz bies pan ou wi fiil. An nof taim wen wi beks, wi no en op du sitn we gud. (Jmz. 1:20) So memba dis, wi mait-a fiil beks wen sumadi ort wi, bot wi no afi stie beks wid dem.

7. Wa a som ada wie we wi mait-a fiil wen sumadi du sopm we ort wi?

⁷ Wen piipl chriit wi bad, it ort wi iina aal kain-a difrant wie. Laik wan sista we niem Ann se: “Wen mi did a pikni, mi faada lef mi mada an go marid tu wi elpa. Mi did fiil laik se a lef im lef mi tu. An wen dem av pikni, mi did fiil laik se im av di pikni dem we im waahn so im neehn niid mi agen. So wen mi did a gruo mi did fiil laik se nobadi neehn waahn mi.” Wan sista we niem Georgette tel wi ou shi did fiil wen ar ozban gi ar bon. Shi se: “Mi an im did a fren fram wi a pikni. An di tuu a wi yuus tu paiyanier an wok tugeda iina sorvis. Im brok mi aat.” An wan sista we niem Nayuomi se: “Mi neehn nuo se mi ozban wuda du sitn we wuda ort mi so. So wen im tel mi se im did a wach bluu muuvi an dem ting de baka mi bak, mi did fiil laik im did a tel mi bier lai fram lang taim.”

8. (a) Wa a som a di riizn dem we mek wi fi paadn piipl? (b) Wa a som a di gud sitn dem we a-go apm wen wi paadn piipl? (Luk pan di paat we niem “Wa Wi Fi Du Ef Sumadi Du Sitn We Ort Wi Bad?”)

⁸ Wi na’av no kanchuol uova wa piipl mait-a se ar du tu wi, bot wi kyan kanchuol wa wi se ar du tu dem. Muor taim di bes ting fi du a fi paadn dem. An dis a kaa wi lov Jeuova an im waahn wi fi paadn piipl. Ef wi stie beks an no paadn dem, wi mait-a en op du bie fuulinish an en op aalwiez a fiil sik. (Pr. 14:17, 29, 30) Luk pan wa did apm tu da sista ya we niem Christine. Shi se: “Wen sumadi du sitn we ort mi an mi fiil beks bout it, mi aadli sumail. An mi nyam aal kain-a fuulinish an mi no get nof sliip an it aada fi mi kanchuol ou mi fiil. An dis kaaz bie prablem bitwiin mi an mi ozban an wid ada piipl tu.”

9. Wa mek wi fi tap av op piipl iina wi aat?

⁹ Bot wa ef di sumadi we du sitn fi ort yu no uon op tu wa dem did du? Wi kyan stil diil wid it iina wan gud wie. Laik Georgette we wi did taak bout aredi se: “Afta a wail mi neehn av op mi ozban we did lef mi iina mi aat agen. Kaaz a dat, mi fiil wan piis iina mi aat an main.” Wen wi no av op sumadi iina wi aat agen, wi no en op a chriit ada piipl bad kaaz a wa a gwaan wid wi. An it mek wi kyan gwaan wid wi laif an api agen. (Pr. 11:17) Bot wa ef yu stil no redi fi paadn sumadi?

WA KYAN ELP WI FI NO AALWIEZ FIIL ORT AN AV OP PIIPL IINA WI AAT?

10. Wa mek wi fi gi wiself taim fi fiil beta wen sumadi du sitn we mek wi fiil ort? (Luk pan di picha dem tu.)

¹⁰ Wan a di ting dem we kyan elp wi fi no av op piipl iina wi aat a fi gi wiself taim fi fiil beta. Jos laik ou ef sopm did apm tu sumadi we ort dem bad an dem go a dakta fi get elp, dem wuda niid taim fi get beta gud. A siem wie so ef sumadi du wi sopm we mek wi fiil ort, wi wuda niid taim fi fiil beta so dat wi kyan paadn di sumadi we ort wi.​—Iik. 3:3; 1 Pii. 1:22.

11. Wen yu prie tu Jeuova, ou it kyan elp yu fi paadn piipl?

¹¹ Prie tu Jeuova an aks im fi elp yu fi paadn piipl.c Ann, we wi did taak bout aredi, tel wi ou it did elp ar wen shi prie. Shi se: “Mi aks Jeuova fi paadn aal a wi we iina mi fambili fi di wie ou wi did diil wid tingz. Den mi rait wan leta tu mi faada an tel im se mi paadn dem.” Ann se it neehn iizi fi shi du wa shi du, bot shi se: “Kaa mi a chrai fi paadn piipl laik ou Jeuova paadn dem, mi uop se dat a-go mek mi faada an im waif waahn fi lorn muor bout Jeuova.”

12. Wa mek wi fi luk pan tingz di wie ou Jeuova luk pan it? (Pravorbz 3:5, 6)

¹² No fiil se di wie ou yu fiil bout tingz aalwiez rait, jos nuo se a di wie ou Jeuova luk pan tingz aalwiez rait. (Riid Pravorbz 3:5, 6.) Jeuova nuo wa a di bes ting fi wi. (Aiz. 55:8, 9) An im naa go aks wi fi du notn we a-go ort wi. An wen im tel wi se wi fi paadn piipl, wi kyan nuo fi shuor se it a-go mek tingz wok out gud fi wi. (Sa. 40:4; Aiz. 48:17, 18) Bot ef wi du wa wi waahn fi du, wi mait-a no paadn nobadi. (Pr. 14:12; Jer. 17:9) Nayuomi, we wi did taak bout aredi, se: “Wen mi jos fain out se mi ozban did a wach bluu muuvi an dem ting de, mi did fiil laik se mi did av di rait fi no paadn im kaa mi did fried se im mait-a ort mi agen ar im wudn memba umoch im did ort mi. An mi did a tel miself se Jeuova andastan ou mi did a fiil. Bot den mi staat fi si se kaa Jeuova andastan mi dat no miin se im aarait wid wa mi a du. An im nuo ou mi fiil an nuo se mi a-go niid taim fi fiil beta, bot im stil waahn mi fi paadn piipl.”d

CHRAI FI TINGK BOUT TINGZ IINA WAN GUD WIE

13. Azkaadn tu Ruoman 12:18-21, wa wi fi du?

¹³ Wen wi paadn sumadi we ort wi bad, wi no fi onggl se wi naa go taak bout wa apm. An wos ef di sumadi we ort wi a wan a wi breda ar sista, wi waahn fi du evriting we wi kyan du fi mek op bak wid dem. (Mat. 5:23, 24, NWT ) So insted-a fi aalwiez beks wid di sumadi, wi a-go mek op wi main fi paadn dem. (Riid Ruoman 12:18-21; 1 Pii. 3:9) Wa kyan elp wi fi du dat?

14. Wa wi fi chrai aad fi du, an wa mek?

¹⁴ Chrai fi luk pan di sumadi we ort wi di wie ou Jeuova luk pan dem. Jeuova aalwiez luk fi di gud iina ada piipl. (2 Kr. 16:9; Sa. 130:3) Eniting we wi luk fa iina sumadi wi a-go fain it. So ef wi a luk fi sitn gud a dat wi a-go fain, an ef wi a luk fi sitn bad a dat wi a-go fain. Wen wi luk fi di gud iina ada piipl, wi a-go fain it iiziya fi paadn dem. Laik wan breda we niem Jarrod se, “Wen mi luk pan di wol iip a tingz we mi laik bout wan breda ar wan sista, mi fain it iiziya fi paadn dem.”

15. Wa mek a wan gud sitn fi tel sumadi se yu paadn dem?

¹⁵ Wan neda gud ting we wi fi du a fi tel di sumadi se wi paadn dem. Ier wa Nayuomi we wi taak bout aredi se. Shi se: “Mi ozban aks mi: ‘Yu figiv mi?’ Wen mi chrai fi ansa im an se ‘Mi figiv yu,’ it kudn kom outa mi mout. So dat mek mi si se mi neva did riili figiv im iina mi aat. Afta dat mi kuda se dem chrii wod de we miin nof, ‘Mi figiv yu.’ Mi kudn biliiv umoch beta mi did fiil afta mi did du dat. An di wie ou mi ozban did fiil gud wen im ier mi se so, it did mek im yai dem ful op a waata. An fram da taim de mi staat fi chos im agen an di tuu a wi a gud fren agen.”

16. Wa Jeuova waahn wi fi du?

¹⁶ Jeuova waahn wi fi paadn piipl. (Kol. 3:13) Bot wi stil mait-a fain it aad fi du. Bot wi kyan du it ef wi lorn fi diil wid ou wi fiil bout tingz an chrai fi tingk bout tingz iina wan gud wie.​—Luk pan di paat we niem “Chrii Tingz We Kyan Elp Wi Fi Paadn Piipl.”

TINGK BOUT DI GUD SITN DEM WE A-GO APM WEN YU PAADN PIIPL

17. A ou it a-go elp wi wen wi paadn piipl?

¹⁷ Si chrii riizn ya we mek wi fi paadn piipl. Di fos wan a dat wi a mek wi Faada, Jeuova we redi fi paadn piipl, api an wi a du laik im. (Luuk 6:36) An di sekan riizn a dat wi a mek im si se wi tangk im fi paadn wi. (Mat. 6:12, NWT ) An di tord wan a dat wi naa go get sik iizi an it a-go mek wi an wi fren dem tait tait.

18-19. Wa a som a di sitn dem we mait-a apm kaa wi redi fi paadn piipl?

¹⁸ Wen wi paadn sumadi, it mait-a mek wi get som blesn we wi neehn did a ekspek. Laik luk pan Denise we wi did taak bout aredi. Di man, we did kaaz di aksident we shi an ar fambili did iina, did plan fi kil imself afta dem did don chrai di kies. Bot kaa im si se Denise did paadn im, it toch im aat an mek im staat fi stodi di Baibl wid di Jeuova Witnis dem.

¹⁹ Wi mait-a fiil se fi paadn sumadi a wan a di aadis ting we wi eva a-go afi du, bot it mait-a bi wan a di ting dem we wi du we mek wi fiil gud. (Mat. 5:7, NWT ) So mek wi chrai aad fi du laik Jeuova we redi fi paadn piipl.