Yehowa hɩɖɛ tɔm cɛyɩ ɖɛ-ɛsɩndaa kpem

1-2. Ɛzɩma ɖɩlaba nɛ ɖɩna se Yehowa hɩɖɛ tɔm cɛyɩ Yesu ɛsɩndaa?

YEHOWA hɩɖɛ tɔm cɛyɩ Yesu ɛsɩndaa nɛ pɩkɩlɩ pɩ-tɩŋa. Nɔɔyʋ tiyele nɛ patɩlɩ Yehowa hɩɖɛ nɛ pɩtalɩ Yesu. Ɛzɩ tɔm ñʋʋ ŋgʋ kɩɖɛwa yɔ kɩwɩlʋʋ yɔ, Yesu tisi faaa nɛ ɛsɩ Yehowa hɩɖɛ yɔɔ se pɩsa nɛ ɛwɩlɩ se Yehowa kɛ kiɖeɖeu nɛ mbʋ payɩ ɛlakɩ yɔ pɩtʋʋzaa. (Mark. 14:36; Ebr. 10:​7-9) Nɛ Pɩnzɩ kudoku kewiyitu tɔɔʋ wayɩ, Yesu kaɣ tisuu faaa nɛ ɛpɩsɩnɩ e-ɖoŋ kpeekpe nɛ ɛcɛlɩ Yehowa mbʋ pʋyɔɔ yɔ ɛsɔɔlaa se Yehowa hɩɖɛ yɔɔ ɛñalɩ. (1 Kɔr. 15:​26-28) Sɔɔlɩm mbʋ Yesu wɛnɩ Ɛsɔ hɩɖɛ yɔɔ yɔ, pɩwɩlɩɣ ɖɔɖɔ se taabalɩyɛ kɩbanɖɛ wɛ ɛ nɛ ɛ-Caa pɛ-hɛkʋ taa. Pɩtʋʋ fɛyɩ paa ññɩɩ se Yesu kaasɔɔlɩ Yehowa siŋŋ.

² Yesu kɔm tɛtʋ yɔɔ ɛ-Caa hɩɖɛ taa. (Yoh. 5:43; 12:13) Eyeba nɛ ɛ-wayɩ tɩŋɩyaa tɩlɩ ɛ-Caa hɩɖɛ. (Yoh. 17:​6, 26) Ɛyɔɔdɩ Yehowa hɩɖɛ taa nɛ hɩɖɛ nɖɩ ɖɩ-taa ɖɔɖɔ ɛlabɩ maamaaci lakasɩ. (Yoh. 10:25) Nɛ alɩwaatʋ ndʋ Yesu tɩmaɣnɩ Yehowa se ɛcɔnɩ ɛ-tɔmkpɛlɩkɩyaa yɔɔ yɔ, ɛyɔɔdaa se: «Ña-hɩɖɛ nɖɩ ŋcɛlɩ-m yɔ ɖɩ-yɔɔ lɛ, cɔnɩ pɔ-yɔɔ.» (Yoh. 17:11) Ye Yehowa hɩɖɛ tɔm ɛcɛyɩ Yesu ɛsɩndaa kpem mbʋ yɔ, ɛzɩma nɔɔyʋ pɩzɩɣ nɛ ɛyɔɔdɩ se ɛkɛ Krɩstʋ wayɩ tɩŋɩyʋ toovenim tʋ ɛlɛ ɛɛsɩŋ ɛ-Caa hɩɖɛ nɖɩ yaa ɛɛlakɩnɩ-ɖɩ tʋmɩyɛ?

3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Ða Krɩstʋ mba, ɖɩñakɩ pana se ɖɩtɩŋ Yesu nɩŋgbanzɩ taa, pʋyɔɔ lɛ ɛ-Caa hɩɖɛ mʋ ñɩm ɖɛ-ɛsɩndaa. (1 Pɩy. 2:21) Tɔm ñʋʋ kʋnɛ kɩ-taa, ɖɩkaɣ naʋ mbʋ pʋyɔɔ Yehowa cɛlɩ ɛ-hɩɖɛ mba posusuu «Kewiyaɣ tɔm kɩbandʋ» yɔ. (Mat. 24:14) Ðɩkaɣ naʋ ɖɔɖɔ ɛzɩma pɩwɛɛ se Yehowa hɩɖɛ tɔm ɛcɛyɩ ɖa-taa paa weyi lɛ ɛ-ɛsɩndaa yɔ.

ƐLƖZƖ «SAMAƔ NAKƐYƐ NƐ PAYAA-KƐ NƐ Ɛ-HƖÐƐ»

4. (a) Tʋmɩyɛ ndɩ Yesu ɖʋ ɛ-tɔmkpɛlɩkɩyaa pʋcɔ nɛ ɛpɩsɩɣ ɛsɔdaa? (b) Tɔm ndʋ yɔɔ ɖɩkaɣ cosuu?

⁴ Pʋcɔ nɛ Yesu pɩsɩɣ ɛsɔdaa lɛ, eheyi ɛ-tɔmkpɛlɩkɩyaa se: «Ɩkaɣ mʋʋ ɖoŋ alɩwaatʋ ndʋ fezuu kiɖeɖeu tiki mɩ-yɔɔ yɔ, nɛ ɩkaɣ kɛʋ ma-aseɣɖe tɩnaa Yeruzalɛm taa, Yuudee tɩŋa taa nɛ Samaarii taa, nɛ piwolo pɩtalɩ tɛtʋ hɔɔlʋʋ ŋgʋ kɩkɩlɩ posuu yɔ kɩ-taa.» (Tʋma 1:8) Ye mbʋ, pɩtɩkɛ Izrayɛɛlɩ ɛjaɖɛ taa ɖeke tɔmkpɛlɩkɩyaa kaɣ susuu tɔm kɩbandʋ, ɛlɛ pakaɣ-tʋ susuu paa le. Pɩkaɣ yebu nɛ ajɛɛ kpeekpe taa ɛyaa hiɣ waɖɛ nɛ papɩsɩ Krɩstʋ wayɩ tɩŋɩyaa. (Mat. 28:​19, 20) Ɛlɛ Yesu yɔɔdaa se: «Ɩkaɣ kɛʋ ma-aseɣɖe tɩnaa.» Ɛzɩ pɩkaɣ cɛyʋʋ se tɔmkpɛlɩkɩyaa kɩfama mba patɩlɩ Yehowa hɩɖɛ na? Yaa pakaɣ kɛʋ Yesu aseɣɖe tɩnaa ɖeke? Kɛdaɣ ŋga kɛwɛ Tʋma Labʋ ñʋʋ 15 taa yɔ kasɩɣnɩ-ɖʋ se ɖicosi tɔm ndʋ tɩ-yɔɔ.

5. Ɛzɩma apostoloowaa nɛ Yeruzalɛm ɛzʋtʋyaa pawɩlaa se pɩcɛyaa se ɛyaa kpeekpe ɩtɩlɩ Yehowa hɩɖɛ? (Cɔnɩ ɖɔɖɔ kɩlɛmʋʋ.)

⁵ Pɩnaɣ 49 taa, apostoloowaa nɛ Yeruzalɛm ɛzʋtʋyaa pekpeɣlaa se pana mbʋ pɩwɛɛ se Sɩɩnaa layaa mba patɩpɛlɩ-wɛ yɔ pala pʋcɔ nɛ papɩsɩ Krɩstʋ mba yɔ. Pɔkɔwaɣ kediɣzaɣ ŋga ka-ñʋʋ lɛ, Yesu neu Yakubu yɔɔdɩ se: «[Pɩyɛɛrɩ] kɛdɩ tete ɛzɩma Ɛsɔ kɛzɩ ɛ-lɩmaɣza nɛ ajɛɛ yɔɔ kajalaɣ ɖeɖe se ɛlɩzɩ a-taa samaɣ nakɛyɛ nɛ payaa-kɛ nɛ ɛ-hɩɖɛ yɔ.» A-hɩɖɛ tɔm Yakubu yɔɔdaɣ? Yakubu yɔɔdɩ tɔm ndʋ nayʋ Amoosi yɔɔdaa yɔ nɛ ɛsɔzɩ se: «Se pɩsa nɛ ɛyaa mba pakazaa yɔ, papɩzɩ nɛ pañɩnɩ Yehowa siŋŋ, pa nɛ ajɛɛ tɩŋa taa mba, mba paya-wɛ nɛ ma-hɩɖɛ yɔ, Yehowa yɔɔdʋʋna.» (Tʋma 15:​14-18) Pɩtasɩna se tɔmkpɛlɩkɩyaa kɩfama mba pɛkpɛlɩkɩɣ nɛ patɩlɩ Yehowa lɛ, pakaɣ-wɛ ‘yaʋ ɖɔɖɔ nɛ ɛ-hɩɖɛ.’ Pɩwɩlɩɣ se pakaɣ lɩzʋʋ aseɣɖe Ɛsɔ hɩɖɛ yɔɔ nɛ ɛyaa kaɣ-wɛ ɖɔɖɔ tɩlʋʋ nɛ hɩɖɛ nɖɩ.

6-7. (a) Ɛbɛ yɔɔ Yesu kaakɔm tɛtʋ yɔɔ? (b) Lɩmaɣzɩyɛ lɛɛɖɛ nɖɩ yɔɔ ɛɛkɔma nɛ ɖɩ-tɔm cɛyaa nɛ pɩkɩlɩ?

⁶ Yesu hɩɖɛ tɔbʋʋ lɛ se «Yehowa kɛ ñʋʋ yabʋ,» nɛ ɛwɩlaa se ɛ-yɔɔ Yehowa tɩŋɩɣna nɛ ɛyakɩ mba pɛwɛnɩ tisuu yɔ pa-ñʋʋ. Yesu kɔm tɛtʋ yɔɔ se ɛcɛlɩ e-wezuu ɛyaa yɔɔ. (Mat. 20:28) Ɛhɛyɩ kɩhɛyʋʋ pʋ-ñʋʋ taa se pɩsa nɛ paya ɛyaa ñʋʋ nɛ pehiɣ wezuu maatɛŋ.—Yoh. 3:16.

⁷ Ɛlɛ, ɛbɛ yɔɔ pɩɩcɛyaa se paya ɛyaa ñʋʋ? Mbʋ pɩɩlabɩ Edɛɛnɩ kaɖaɣ taa yɔ pʋyɔɔ pɩɩcɛyaa se paya ɛyaa ñʋʋ. Ɛzɩ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, Aɖam nɛ Ɛva pakaɖɩnɩ Yehowa; piyeba nɛ pelesi wezuu maatɛŋ caɣʋ waɖɛ. (Kiɖe 3:​6, 24) Ɛlɛ, nabʋyʋ tɔm kaacɛyɩ kpem nɛ pɩkɩlɩ ɛyaa ñʋʋ yabʋ tɔm. Sataŋ kaayɔɔdɩ cɛtɩm tɔm Yehowa yɔɔ. (Kiɖe 3:​4, 5) Pʋyɔɔ lɛ, pɩcɛyaa se ɛyaa ɩtɩlɩ se Yehowa tɩla kɩwɛɛkɩm nabʋyʋ nɛ ɛ-hɩɖɛ kɛ kiɖeɖeye. Yesu kaakɛ Yehowa lone taa caɣyʋ nɛ Yehowa hɩɖɛ kaawɛ ɛ-yɔɔ, pʋyɔɔ lɛ ɛnʋ kɩlɩnɩ yebu nɛ Yehowa hɩɖɛ yɔɔ ñalɩ.

8. Ɛbɛ pɩpɔzʋʋ se Yesu wayɩ tɩŋɩyaa tɩŋa ɩtɩlɩ?

⁸ Yuuda mba nɛ Sɩɩnaa layaa mba payɩ pakaɣ wɩlʋʋ se pɛwɛnɩ tisuu Yesu yɔɔ yɔ, pɩkaɣ pɔzʋʋ se patɩlɩ weyi ɛ-cɔlɔ pa-ñʋʋ yabʋ lɩɣna yɔ, pʋ-tɔbʋʋ se Yesu Caa, Yehowa. (Yoh. 17:3) Pɩtasɩ lɛ, ɛzɩ Yesu yɔ pakaɣ-wɛ yaʋ nɛ Yehowa hɩɖɛ. Pɩkaɣ pɔzʋʋ ɖɔɖɔ se patɩlɩ mbʋ pʋyɔɔ pɩcɛyaa se hɩɖɛ nɖɩ ɖɩ-yɔɔ ɛñalɩ yɔ. Mbʋ kaɣnɩ yebu nɛ pehiɣ ñʋʋ yabʋ. (Tʋma 2:​21, 22) Ye mbʋ, pɩɩpɔzaa se Yesu wayɩ tɩŋɩyaa tɩŋa ɩkpɛlɩkɩ nɛ patɩlɩ Yehowa nɛ Yesu. Pɩɩɖɩɣzɩɣ-ɖʋ se Yesu tɛzɩ adɩma wena ɛlaba nɛ pama-yɛ Yohanɛɛsɩ ñʋʋ 17 taa yɔ nɛ tɔm tʋnɛ: «Meyeba nɛ patɩlɩ ña-hɩɖɛ nɛ mankaɣ yebu nɛ patɩlɩ-ɖɩ, se pɩsa nɛ sɔɔlɩm mbʋ ŋsɔɔlɩnɩ-m yɔ, pɩwɛɛ pa-taa nɛ ma nɛ wɛ ɖɩwɛɛ nɔɔ kʋɖʋmaɣ.»—Yoh. 17:26.

«ƖKƐ MA-ASEƔÐE TƖNAA»

9. Ɛzɩma ɖɩpɩzɩɣ ɖɩwɩlɩ se Yehowa hɩɖɛ tɔm cɛyɩ ɖɛ-ɛsɩndaa?

⁹ Ye mbʋ, pɩcɛyaa se Yesu wayɩ tɩŋɩyaa toovenim mba iyele nɛ Yehowa hɩɖɛ yɔɔ ñalɩ. (Mat. 6:​9, 10) Pɩwɛɛ se Yehowa hɩɖɛ tɔm ɛcɛyɩ pɛ-ɛsɩndaa nɛ pɩkɩlɩ hɩla lɛɛna. Nɛ pɩpɔzʋʋ se pala nabʋyʋ keekee nɛ pawɩlɩ se ɖɩ-tɔm cɛyɩ pɛ-ɛsɩndaa. Ɛlɛ, ɛbɛ ɖɩpɩzɩɣ ɖɩla nɛ ɖiyele nɛ Yehowa hɩɖɛ yɔɔ ñalɩ nɛ ɖɩtɛ ɖɩwɩlɩ se tɔm ndʋ Sataŋ yɔɔdɩ Yehowa yɔɔ yɔ tɩkɛ cɛtɩm?

10. Izaayii ñʋŋ 42-44 taa, ɛbɛ Yehowa pɔzɩ mba paasɛɣ-ɩ yɔ se pala? (Izaayii 43:9; 44:​7-9) (Cɔnɩ ɖɔɖɔ kɩlɛmʋʋ.)

¹⁰ Pɔyɔɔdɩ mbʋ ɖɩpɩzɩɣ ɖɩla nɛ ɖiyele nɛ Yehowa hɩɖɛ yɔɔ ñalɩ yɔ pɩ-tɔm Izaayii ñʋŋ 42-44 taa. Ñʋŋ ɛnɩ ɩ-taa, Yehowa pɔzɩ ɛyaa mba paasɛɣ-ɩ yɔ se pawɩlɩ se pɛ-ɛsɔnaa kɛ toovenim ɛsɔnaa. Ɛya ɖɔɖɔ aseɣɖe tɩnaa se pɔkɔɔ nɛ palɩzɩ aseɣɖe ɛsɔnaa mba pɔ-yɔɔ. Ɛlɛ nɔɔyʋ tɩpɩzɩ nɛ ɛlɩzɩ aseɣɖe.—Kalɩ Izaayii 43:9; 44:​7-9.

11. Tɔm ndʋ Yehowa heyiɣ ɛ-samaɣ Izaayii 43:​10-12 taa?

¹¹ Kalɩ Izaayii 43:​10-12. Yehowa heyiɣ ɛ-samaɣ se: «Mɩkɛnɩ ma-aseɣɖe tɩnaa, nɛ mɛkɛnɩ Ɛsɔ.» Yehowa wɛɛ nɛ ɛpɔzʋʋ-wɛ se pocosi tɔm pɔzʋʋ pʋnɛ pɩ-yɔɔ: «Ɛsɔ nɔɔyʋ wɛɛ nɛ pɩtasɩnɩ-m yaa we?» (Iza. 44:8) Ðɩwɛnɩ waɖɛ se ɖicosi tɔm pɔzʋʋ mbʋ pɩ-yɔɔ. Ðɩtɩŋɩɣnɩ ɖɔ-yɔɔdaɣ nɛ ɖa-lakasɩ yɔɔ nɛ ɖɩwɩlɩɣ se Yehowa ɖeke kɛnɩ Ɛsɔ toovenim tʋ. Ɛ-hɩɖɛ kpaɖɩ hɩla lɛɛna kpeekpe. Ðɩtɩŋɩɣnɩ ɖe-wezuu caɣʋ yɔɔ nɛ ɖɩwɩlɩɣ se ɖɩsɔɔlɩ Yehowa siŋŋ nɛ ɖɩñɔnɩ-ɩ kpam paa Sataŋ eeyeki se pɩwɛɛ-ɖʋ kɛlɛʋ yɔ. Nʋmɔʋ ŋgʋ, kɩ-yɔɔ ɖɩtɩŋɩɣna nɛ ɖiyeki se Yehowa hɩɖɛ yɔɔ ɛñalɩ.

12. Ɛzɩma tɩyɛ natʋ tɔm ndʋ tɩwɛ Izaayii 40:​3, 5 taa yɔ tɩlaba?

¹² Ye ɖɩlʋkɩ Yehowa hɩɖɛ yɔɔ yɔ, ɖɩmaɣzɩɣnɩ Yesu Krɩstʋ. Izaayii kaayɔɔdɩ ɖɔɖɔ natʋ tɔm natʋyʋ se nɔɔyʋ kaɣ ‘ɖʋʋ Yehowa nʋmɔʋ’ [yaa ɛkaɣ-kʋ ‘ñɔɔzʋʋ,’ pɩ-tɛɛ tɔm.] (Iza. 40:3) Ɛzɩma tɔm ndʋ tɩlaba? Yohanɛɛsɩ Lɩm mɩyɩsɩyʋ ñɔɔzɩ Yesu nʋmɔʋ, ɛlɛ toovenim taa lɛ, «Yehowa nʋmɔʋ» ɛñɔɔzaa mbʋ pʋyɔɔ yɔ Yesu kɔm Yehowa hɩɖɛ taa nɛ ɛyɔɔdaɣ ɖɔɖɔ Yehowa hɩɖɛ taa. (Mat. 3:3; Mark. 1:​2-4; Luka 3:​3-6) Natʋ tɔm ndʋ, tɩyɔɔdʋʋ ɖɔɖɔ se: «Pɩkaɣ kuluu Yehowa samtʋ yɔɔ nɛ pɩwɩlɩ.» (Iza. 40:5) Ɛzɩma tɩyɛ? Alɩwaatʋ ndʋ Yesu kɔm tɛtʋ yɔɔ yɔ, ɛlabɩ mbʋ payɩ Yehowa kaatiyi-i se ɛla yɔ ɖeyi ɖeyi nɛ pɩɩwɛ ɛzɩ Yehowa maɣmaɣ kɔmnɩ tɛtʋ yɔɔ yɔ.—Yoh. 12:45.

13. Ɛzɩma tɩyɛ ɖɩpɩzɩɣ nɛ ɖɩmaɣzɩnɩ Yesu?

¹³ Ɛzɩ Yesu yɔ, ɖa ɖɔɖɔ ɖɩkɛ Yehowa aseɣɖe tɩnaa. Payaɣ-ɖʋ nɛ Yehowa hɩɖɛ nɛ ɖiheyiɣ ɛyaa mba payɩ ɖɩkatɩɣ yɔ e-piti tʋma tɔm. Ɛlɛ pɩsa nɛ ɖɩkɛ aseɣɖe tɩnaa kɩbama lɛ, pɩwɛɛ ɖɔɖɔ se ɖiyele nɛ ɛyaa tɩlɩ mbʋ payɩ Yesu laba se Yehowa hɩɖɛ yɔɔ ɛñalɩ yɔ. (Tʋma 1:8) Nɔɔyʋ tɩlɩzɩ aseɣɖe Yehowa yɔɔ nɛ pɩtalɩ Yesu, nɛ ɛnʋ ɖɩmaɣzɩɣna. (Natʋ 1:5) Ɛlɛ ɛzɩma ɖɔɖɔ ɖɩwɩlɩɣ se Yehowa hɩɖɛ tɔm cɛyɩ ɖɛ-ɛsɩndaa siŋŋ?

ƐZƖMA ÐƆÐƆ ÐƖWƖLƖƔ SE YEHOWA HƖÐƐ TƆM CƐYƖ ÐƐ-ƐSƖNDAA SIŊŊ?

14. Ɛzɩ pɔyɔɔdʋʋ Keɣa 105:3 taa yɔ, ɛzɩma pɩlakɩ-ɖʋ Yehowa hɩɖɛ yɔɔ?

¹⁴ Ða-taa wɛ leleŋ nɛ Yehowa hɩɖɛ. (Kalɩ Keɣa 105:3.) Pɩkɛdɩɣnɩ Yehowa pɩdɩɩfɛyɩ alɩwaatʋ ndʋ ɖɩkʋndʋʋnɩ ɛ-hɩɖɛ yɔ. (Yer. 9:​23, 24; 1 Kɔr. 1:31; 2 Kɔr. 10:17) Ye pɔtɔm se ɛyʋ «ɛkʋndɩ Yehowa yɔɔ» yɔ, pʋ-tɔbʋʋ lɛ se ɛ-taa ɛla leleŋ se Yehowa kɛ ɛ-Ɛsɔ. Pɩkɛnɩ-ɖʋ waɖɛ sɔsɔɖɛ se ɖiheyi ɛyaa lalaa se Yehowa kɛ kiɖeɖeu nɛ mbʋ payɩ ɛlakɩ yɔ pɩtʋʋzaa. Pɩtɩmʋna se fɛyɛ ɛkpa-ɖʋ se ɖiheyi ɖa-tʋmɩyɛ taa taabalaa, ɖo-sukuli taa taabalaa, ɖɔ-cɔlɔ mba nɛ ɛyaa lalaa se ɖɩkɛ Yehowa Aseɣɖe Tɩnaa. Eleeu sɔɔlaa se ɛɖɩɣ-ɖʋ nʋmɔʋ nɛ ɖitaaheyi ɛyaa lalaa Yehowa hɩɖɛ yɔɔ tɔm. (Yer. 11:21; Natʋ 12:17) Toovenim taa lɛ, Sataŋ nɛ mba pɛyɛlɩɣnɩ ɛ-cɛtɩm tɔm yɔ, pɔsɔɔlaa se ɛyaa ɩsɔɔ Yehowa hɩɖɛ yɔɔ. (Yer. 23:​26, 27) Ɛlɛ, sɔɔlɩm mbʋ ɖɩwɛnɩ Yehowa hɩɖɛ yɔɔ yɔ piyeki nɛ ɖɩnɩɣ leleŋ ɖɩ-yɔɔ «evemiye kpeekpe.»—Keɣ. 5:11; 89:16.

15. Ye pɔtɔm se ɖɩyaa Yehowa hɩɖɛ yɔ, pʋ-tɔbʋʋ lɛ suwe?

¹⁵ Ðiwoki pɩ-yɔɔ nɛ ɖɩyaɣ Yehowa hɩɖɛ. (Yow. 2:32; Roma 10:​13, 14) Ye pɔtɔm se ɖɩyaa Yehowa hɩɖɛ yɔ, pɩtɩwɩlɩ se ye ɖɩtɩlɩ hɩɖɛ nɖɩ nɛ ɖɩlakɩnɩ-ɖɩ tʋmɩyɛ yɔ pɩtɛma. Ɛlɛ pɩwɛɛ ɖɔɖɔ se ɖɩtɩlɩ se ɛwɛ keekee, ɖɩtaɣ-ɩ liu nɛ ɖɩpɩsɩɣnɩ ɛ-yɔɔ se ɛsɩnɩ-ɖʋ nɛ eɖiyi-ɖʋ. (Keɣ. 20:7; 99:6; 116:4; 145:18) Pɩtasɩ lɛ, ɖiheyiɣ ɛyaa lalaa Yehowa hɩɖɛ nɛ ɛ-wɛtʋ kɩbandʋ yɔɔ tɔm, nɛ ɖiseɣtiɣ-wɛ se pekpiɖi pa-kɩwɛɛkɩm yɔɔ nɛ pala mbʋ pɩpɩzɩɣ piyele nɛ pɔ-tɔm kɛdɩnɩ-ɩ yɔ.—Iza. 12:4; Tʋma 2:​21, 38.

16. Ɛzɩma ɖɩpɩzɩɣ nɛ ɖɩwɩlɩ se Sataŋ kɛ cɛtɩyʋ?

¹⁶ Ðitisiɣ faaa se ɖɩtɔɔ kʋñɔŋ Yehowa hɩɖɛ yɔɔ. (Yak. 5:​10, 11) Ye ɖɩɖɔkʋʋ ɖe-siɣsiɣ wɛtʋ Yehowa ɛsɩndaa kʋñɔmɩŋ taa yɔ, ɖɩwɩlɩɣ se Sataŋ kɛ cɛtɩyʋ. Yɔɔb alɩwaatʋ taa, Sataŋ yɔɔdɩ tɔm tʋnɛ Yehowa sɛyaa yɔɔ: «Ɛyʋ kɛyɩɣ mbʋ payɩ ɛwɛna yɔ nɛ ɛcɛlɩ e-wezuu yɔɔ.» (Yɔɔb 2:4) Sataŋ yɔɔdaa se ɛyaa sɛɣ Yehowa alɩwaatʋ ndʋ pɩtɩŋa pɩɖɔŋnɩ-wɛ camɩyɛ yɔ tɩ-taa ɖeke. Ɛlɛ ye pakatɩ wɛtʋ kaɖɛ ñɩndʋ natʋyʋ yɔ, pakaɣ yebu Yehowa sɛʋ. Ɛyʋ siɣsiɣ tʋ Yɔɔb wɩlaa se Sataŋ tɔm ndʋ tɩtɩkɛ toovenim. Ða ɖɔɖɔ ɖɩwɛnɩ waɖɛ se ɖɩwɩlɩ se paa ɛbɛ Sataŋ ɛkɔnɩ ɖɔ-yɔɔ yɔ, ɖɩɩkaɣ yebu Yehowa sɛʋ kpa. Ða-taa pɩzɩɣ nɛ pɩtɛ kiya se Yehowa hɩɖɛ yɔɔ lɛ, ɛkaɣ ɖɔ-yɔɔ cɔnʋʋ.—Yoh. 17:11.

17. Ɛzɩ pɔyɔɔdʋʋ 1 Pɩyɛɛrɩ 2:12 taa yɔ, ɛzɩma ɖɩpɩzɩɣ nɛ ɖɩkɔnɩ samtʋ Yehowa hɩɖɛ yɔɔ?

¹⁷ Ðɩwɛnɩ ñamtʋ Yehowa hɩɖɛ yɔɔ. (Adu. 30:9; Yer. 7:​8-11) Ɛyaa sɩm-ɖʋ se ɖɩkɛ Yehowa Aseɣɖe Tɩnaa, pʋyɔɔ lɛ mbʋ ɖɩlakɩ yɔ pɩpɩzɩɣ nɛ pɩsa ɛ-hɩɖɛ yaa pipisi-ɖɩ. (Kalɩ 1 Pɩyɛɛrɩ 2:12.) Ye mbʋ, ɖɩsɔɔlaa se ɖɩla mbʋ payɩ ɖɩpɩzɩɣ yɔ nɛ ɖɩtɩŋnɩ ɖa-lakasɩ nɛ ɖɔ-yɔɔdaɣ yɔɔ nɛ ɖɩsa Yehowa. Ye ɖɩlakɩ mbʋ yɔ, ɖɩkaɣ kɔnʋʋ samtʋ Yehowa hɩɖɛ yɔɔ paa ɖɩtɩtalɩ pilim yɔ.

18. Ɛbɛ ɖɔɖɔ ɖɩpɩzɩɣ ɖɩla nɛ ɖɩwɩlɩ se Yehowa hɩɖɛ tɔm cɛyɩ ɖɛ-ɛsɩndaa? (Kalɩ ɖɔɖɔ pɩ-tɛɛ tɔm.)

¹⁸ Yehowa hɩɖɛ tɔm cɛyɩ ɖɛ-ɛsɩndaa nɛ pɩkɩlɩ ndʋ ɛyaa maɣzɩɣ ɖɔ-yɔɔ yɔ. (Keɣ. 138:2) Ɛbɛ yɔɔ? Mbʋ pʋyɔɔ yɔ alɩwaatʋ ndʋ ɖɩlakɩ Yehowa sɔɔlɩm yɔ, ɖoŋ ɖoŋ lɛ pɩɩkɛdɩɣnɩ ɛyaa nɛ papɩzɩɣ nɛ pɔyɔɔdɩ tɔm kɩdɛkɛdɩtʋ ɖɔ-yɔɔ.a Yesu tisi faaa nɛ ɛsɩ ɛzɩ kɩwɛɛkɩm laɖʋ sɔsɔ nɔɔyʋ yɔ se piyele nɛ pasa Yehowa hɩɖɛ. ‘Enim fɛyɛ,’ pʋ-tɔbʋʋ se ɛtaakɩlɩɣ nɩɣzʋʋ lɩmaɣza wena ɛyaa lalaa kaawɛnɩ ɛ-yɔɔ yɔ a-yɔɔ. (Ebr. 12:​2-4) Ɛɛkam ɛ-lɩmaɣza Yehowa sɔɔlɩm labʋ yɔɔ.—Mat. 26:39.

19. (a) Ɛzɩma pɩlakɩ-ŋ Yehowa hɩɖɛ yɔɔ? (b) Nɛ ɛbɛ yɔɔ?

¹⁹ Ða-taa wɛ leleŋ nɛ Yehowa hɩɖɛ nɛ pɩkɛnɩ-ɖʋ hɩɖɛ ɖʋʋ se payaa-ɖʋ se Yehowa Aseɣɖe Tɩnaa. Yehowa hɩɖɛ tɔm cɛyɩ siŋŋ ɖɛ-ɛsɩndaa, pʋyɔɔ lɛ ɖiwoki pɩ-yɔɔ nɛ ɖɩsaŋɩ-ɩ paa piyeki se ɖɔ-tɔm ɛtaakɛdɩnɩ ɛyaa lalaa yɔ. Halɩ Yehowa hɩɖɛ tɔm cɛyɩ ɖɛ-ɛsɩndaa nɛ pɩkɩlɩ ndʋ ɛyaa maɣzɩɣ ɖɔ-yɔɔ yɔ. Ye mbʋ, ɖɩtɛ ɖa-taa se ɖiwoki pɩ-yɔɔ nɛ ɖɩsaŋ Yehowa hɩɖɛ paa Sataŋ ɛwɛɛ nɛ ɛñakɩ pana se ɛɖɩɣ-ɖʋ nʋmɔʋ yɔ. Ye ɖɩlakɩ mbʋ yɔ, ɛzɩ Yesu Krɩstʋ yɔ, ɖɩwɩlɩɣ se Yehowa hɩɖɛ tɔm cɛyɩ ɖɛ-ɛsɩndaa nɛ pɩkɩlɩ pɩtɩŋa.