MWBR19 11 Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
4-10 NOVEMBRE
ÑƖM MBƲ PƖWƐ ƐSƆTƆM TAA YƆ | 1 YOHANƐƐSƖ 1-5
“Ɩtaasɔɔlɩ ɛjaɖɛ yaa wondu ndʋ tɩwɛ ɛjaɖɛ yɔɔ yɔ”
(1 Yohanɛɛsɩ 2:15, 16) Ɩtaasɔɔlɩ ɛjaɖɛ yaa wondu ndʋ tɩwɛ ɛjaɖɛ yɔɔ yɔ. Ye nɔɔyʋ ɛsɔɔlʋʋ ɛjaɖɛ yɔ, Caa sɔɔlɩm fɛyɩ ɛ-taa; 16 mbʋ pʋyɔɔ yɔ mbʋ payɩ pɩwɛ ɛjaɖɛ yɔɔ yɔ—tomnaɣ kɔɖɛyɩ nɛ ɛsa kɔɖɛyɩ nɛ mbʋ ɛyʋ wɛnɩ wezuu caɣʋ taa yɔ pɩ-wɩlʋʋ se pana-pʋ—pɩtɩlɩɩnɩ Caa cɔlɔ, ɛlɛ pɩlɩnɩ ɛjaɖɛ cɔlɔ.
w05 1/1 10 § 13
Maɣzɩnɩ kɩɖaʋ ŋgʋ Yesu hawa yɔ
13 Nabɛyɛ pɩzɩɣ nɛ pamaɣzɩ se pɩtɩkɛ mbʋ payɩ pɩwɛ ɛjaɖɛ yɔɔ yɔ pɩtɩŋa pɩfɛyɩnɩ ɖeu. Paa mbʋ yɔ, ɛjaɖɛ nɛ ɖɩ-yɔɔ wondu papɩzɩɣ nɛ pepeɣzi-ɖʋ kɛlɛʋ yem nɛ ɖiyele Yehowa sɛʋ. Sataŋ ɛyaɖɛ yɔɔ wonuu nakʋyʋ ɩɩsɩɣnɩ-ɖʋ se ɖɩñɔtɩnɩ Ɛsɔ. Pʋyɔɔ lɛ, ye ɖɩwɛɛ nɛ ɖɩsɔɔlʋʋ ɛjaɖɛ yɔɔ wondu yɔ, paa pɩtɩɩkɛ ndʋ ɖɩmaɣzɩɣ se tɩwɛ ɖeu yɔ, ɖɩwɛɛ nɛ ɖɩsʋzʋʋ ɖa-tɩ kaɖɛ naɖɩyɛ taa. (1 Timootee 6:9, 10) Pɩtasɩ lɛ, ɛjaɖɛ yɔɔ wondu sakɩyɛ wɛɛ nɛ tɩtɩtɩɩwɛʋ ɖeu nɛ tɩpɩzɩɣ nɛ tɩwɛɛkɩ ɖa nɛ Ɛsɔ ɖa-taabalɩyɛ. Ye ɖɩcɔŋnɩ filim yaa teelee yɔɔ ɖʋtʋ ndʋ tɩ-taa nɛ puuyaɣ lakasɩ, tomnaɣ yɔɔ wondu ñɩnʋʋ lɩmaɣza yaa kʋzʋʋ kɩdɛkɛdʋʋ yɔ, pɩpɩzɩɣ nɛ pɩpaɣzɩ-ɖʋ kɛdɩnʋʋ nɛ ɖɩtɔlɩ kpaca taa. Ye ɖɩɖʋʋ taabalɩyɛ nɛ mba pɔsɔɔlɩ kpem se piɖeni-wɛ ɛjaɖɛ yɔɔ yaa paɖaɣnɩ walɩsʋʋ pa-tʋma yɔ, ɖa ɖɔɖɔ wondu ndʋ tɩ-tɔm kɔŋ pɩcɛyɩ ɖe-wezuu caɣʋ taa nɛ pɩkɩlɩ.—Maatiyee 6:24; 1 Kɔrɛntɩ mba 15:33.
(1 Yohanɛɛsɩ 2:17) Pɩtasɩ lɛ, ɛjaɖɛ ɖiɣni ɖɛʋ nɛ ɖɩ-kɔɖɛyɩ ɖɔɖɔ, ɛlɛ weyi ɛlakɩ Ɛsɔ sɔɔlɩm yɔ, ɛwɛɣ tamtam.
w13 15/8 27 § 18
“Ɩmaɣzɩ nɛ ɩna ɛyaa mba pɩwɛɛ se ɩkɛna” yɔ
18 Mbʋ pɩpɩzɩɣ pɩtasɩ-ɖʋ sɩnʋʋ nɛ ɖɩkpa ɖa-tɩ nɛ “ wondu ndʋ tɩwɛ ɛjaɖɛ yɔɔ yɔ” lɛ se tɔm ndʋ fezuu tuyi Yohanɛɛsɩ nɛ ɛma yɔ tɩwɛɛ ɖa-ñʋʋ taa. Ɛmawa se: “ɛjaɖɛ ɖiɣni ɖɛʋ nɛ ɖɩ-kɔɖɛyɩ ɖɔɖɔ, ɛlɛ weyi ɛlakɩ Ɛsɔ sɔɔlɩm yɔ, ɛwɛɣ tamtam.” (1 Yohanɛɛsɩ 2:17) Sataŋ yeki se ɖɩmaɣzɩ se ɛjaɖɛ ɖɩnɛ ɖɩwɛɣ tam. Ɛlɛ wiɖiyi pakaɣ-ɖɩ ɖɩzʋʋ. Mbʋ payɩ Sataŋ ɛjaɖɛ haɣ yɔ, pɩ-taa nabʋyʋ ɩɩkaɣ wɛʋ tam. Ye ɖɩtɔzʋʋ tɔm ndʋ tɩ-yɔɔ yɔ, Sataŋ ɛɛpɩzɩɣ nɛ ɛkpa-ɖʋ ɛ-kpaca taa.
Ðɩñɩnɩ fezuu taa ñɩm
(1 Yohanɛɛsɩ 2:7, 8) Man-kʋsɔɔlaa, pɩtɩkɛ paɣtʋ kɩfatʋ natʋyʋ manɖʋʋ-mɩ, ɛlɛ paɣtʋ kɩbɩndʋ ndʋ paacɛlɩ-mɩ kpaɣnɩ ɖooo kiɖe tɛɛ yɔ. Paɣtʋ kɩbɩndʋ ndʋ, ndʋ lɛ tɔm ndʋ ɩnɩwa yɔ. 8 Pɩtasɩ lɛ, manɖʋʋ-mɩ paɣtʋ kɩfatʋ natʋyʋ, ndʋ tɩkɛ toovenim ɛ-hɔɔlʋʋ taa nɛ mɩ-hɔɔlʋʋ taa yɔ, mbʋ pʋyɔɔ yɔ cɩkpɛndʋʋ ɖiɣni ɖɛʋ nɛ toovenim ñalɩmɩyɛ tɛm paɣzʋʋ ñandʋʋ.
w13 15/9 10 § 14
Yehowa lɔŋ tasʋʋ tʋʋzaa
14 Krɩstʋ mba Grɛɛkɩ Masɩ taa suni lɔŋ tasʋʋ mbʋ piseɣtiɣ-ɖʋ se ɖɩsɔɔlɩ ɖama yɔ. Yesu yɔɔdaa se paɣtʋ sɔsɔtʋ naalɛ ñɩndʋ lɛ se: “Sɔɔlɩ ña-taabalʋ ɛzɩ ña-maɣmaɣ yɔ.” (Mat. 22:39) Yesu neu Yakubu yɔɔdaɣ sɔɔlɩm tɔm ɖɔɖɔ lɛ, ɛya-pʋ se “wiyaʋ paɣtʋ” (Yak. 2:8) Apostoloo Yohanɛɛsɩ mawa se: “Man-kʋsɔɔlaa, pɩtɩkɛ paɣtʋ kɩfatʋ natʋyʋ manɖʋʋ-mɩ, ɛlɛ paɣtʋ kɩbɩndʋ ndʋ paacɛlɩ-mɩ kpaɣnɩ ɖooo kiɖe tɛɛ yɔ.” (1 Yohanɛɛsɩ 2:7, 8) Ɛbɛ Yohanɛɛsɩ yaɣaɣ se “paɣtʋ kɩbɩndʋ”? Ɛyɔɔdaɣ sɔɔlɩm paɣtʋ tɔm na. Tɩkɛ “kɩbɩndʋ” mbʋ pʋyɔɔ yɔ pɩlabɩ pɩnzɩ sakɩyɛ lɛ Yesu ɖʋʋ paɣtʋ ndʋ yɔ, “ɖooo kiɖe tɛɛ.” Ɛlɛ tɩkɛ ɖɔɖɔ “kɩfatʋ” mbʋ pʋyɔɔ yɔ pɩpɔzʋʋ Yesu wayɩ tɩŋɩyaa se pɛwɛɛnɩ sɔɔlɩm mbʋ pɩ-taa paañɩnɩɣ pa-maɣmaɣ pɛ-kɛzaɣ yɔ nɛ pɩpɔzaa se pawɩlɩ-pʋ alɩwaatʋ ndʋ pakatʋʋ wɛtʋ kɩfatʋ yɔ. Ɛzɩ Yesu wayɩ tɩŋɩyaa yɔ, ɖa-taa wɛ leleŋ se pahaɣ-ɖʋ lɔŋ tasʋʋ mbʋ pɩsɩɣnɩ-ɖʋ se ɖɩlʋbɩnɩ piɖeni men-ɖeke wɛtʋ ndʋ tɩtɔyɩ kedeŋa yɔɔ yɔ nɛ tɩcamɩɣ sɔɔlɩm mbʋ ɖɩwɛnɩ ɖo-koobu yɔɔ yɔ.
(1 Yohanɛɛsɩ 5:16, 17) Ye nɔɔyʋ ɛna e-koobu, eɖiɣni labʋ kɩwɛɛkɩm mbʋ pɩɩkɔŋnɩ sɩm yɔ yɔ, ɛtɩmɩ ɛ-yɔɔ, nɛ Ɛsɔ kaɣ ɛlɛ haʋ wezuu, ɛɛɛ, ɛhaɣ wezuu mba paalakɩ kɩwɛɛkɩm mbʋ pɩkɔŋnɩ sɩm yɔ. Kɩwɛɛkɩm nabʋyʋ wɛɛ, nɛ pɩkɔŋnɩ sɩm. Maaheyiɣ-i se ɛtɩmɩ kɩwɛɛkɩm mbʋ pɩ-yɔɔ. 17 Mbʋ payɩ pɩfɛyɩ siɣsiɣ yɔ pɩkɛ kɩwɛɛkɩm, ɛlɛ kɩwɛɛkɩm nabʋyʋ wɛɛ nɛ pɩɩkɔŋnɩ sɩm.
it-2 491 § 1
Kpaɣʋ nɛ kpeɣu
Pʋmʋnaa se ɖɩtɩmnɩ Ɛsɔ se ekpeɣu lalaa pa-kɩwɛɛkɩm, halɩ ɖɩpɩzɩɣ ɖɩtɩmɩ ɛgbɛyɛ kpeekpe yɔɔ. Moyizi labɩ mbʋ Izrayɛɛlɩ samaɣ yɔɔ. Ekuli samaɣ kɩwɛɛkɩm yɔɔ nɛ ɛpɔzɩ Yehowa se ɛkpaɣ ekpeɣu-kɛ nɛ ɛlɛ nɩɩ ɛ-adɩma ana. (Kɩg 14:19, 20) Patʋlaɣ templo nɔnɔsɩ lɛ, Salomɔɔ ɖɔɖɔ tɩmɩ nɛ ɛpɔzɩ Yehowa se ye samaɣ ɛlabɩ kɩwɛɛkɩm nɛ kekpiɖi pɩ-yɔɔ nɛ kapɩsɩ kɔkɔɔ ɛ-cɔlɔ yɔ, ekpeɣu-kɛ. (1Aw 8:30, 33-40, 46-52) Ɛsdrasɩ kuli Yuuda ñɩma mba palɩnɩ yomiye taa nɛ pɔkɔɔ yɔ pa-kɩwɛɛkɩm yɔɔ. Ɛzɩma ɛtɩmnɩ ɛ-laŋɩyɛ nɛ eseɣti samaɣ yɔ, piyeba nɛ samaɣ lɛɣzɩ kɛ-wɛtʋ se kehiɣ kpaɣʋ nɛ kpeɣu Yehowa cɔlɔ. (Ɛsdrasɩ 9: 13–10:4, 10-19, 44) Yakubu seɣti weyi pɩwɩɣ-ɩ fezuu taa yɔ se ɛyaa ɛgbɛyɛ taa ɛzʋtʋyaa nɛ patɩmɩ ɛ-yɔɔ, nɛ “ye ɛlabɩ kɩwɛɛkɩm yɔ, pakaɣ-ɩ pʋ kpeɣu.” (Yak 5:14-16) Paa mbʋ yɔ “kɩwɛɛkɩm mbʋ pɩkɔŋnɩ sɩm yɔ” pɩwɛɛ; pɩkɛ kɩwɛɛkɩm mbʋ palakɩ fezuu kiɖeɖeu yɔɔ yɔ, ɛyʋ maɣmaɣ ɛɖʋ ɛ-ñʋʋ taa nɛ ɛla kɩwɛɛkɩm mbʋ yɔ, paakpeɣ-i pʋ. Pɩfɛyɩ se Krɩstʋ mba ɩtɩmɩ mba paɖʋʋ pa-taa nɛ palakɩ kɩwɛɛkɩm mbʋ yɔ pɔ-yɔɔ.—1Yo 5:16; Mt 12:31; Ebr 10:26, 27; kalɩ ESPRIT; PÉCHÉ.
Bibl kalʋʋ
(1 Yohanɛɛsɩ 1:1–2:6) Mbʋ pɩɩwɛ kiɖe tɛɛ, mbʋ ɖɩnɩ pɩ-tɔm, mbʋ ɖɩnanɩ ɖɛ-ɛsa, mbʋ ɖɩcɔnaa nɛ ɖe-nesi tukuna, pɩlɩɩnɩ wezuu tɔm yɔɔ, 2 (ɛɛɛ, palɩzɩ wezuu nɛ pawɩlɩ, nɛ ɖɩnawa nɛ ɖɩwɛɛ ɖɩlɩzɩɣ aseɣɖe nɛ ɖɩkɛdɩɣ-mɩ wezuu maatɛŋ tɔm, ŋgʋ kɩɩwɛ Caa cɔlɔ nɛ palɩzɩ-kʋ nɛ pawɩlɩ-ɖʋ yɔ), 3 mbʋ ɖɩnawa nɛ ɖɩnɩɩ pɩ-tɔm yɔ, ɖɩwɛɛ nɛ ɖɩkɛdɩɣ-mɩ pʋ ɖɔɖɔ, se pɩsa nɛ mɩ ɖɔɖɔ ɩpɩzɩ ɩɖʋ-ɖʋ nɛ taabalɩyɛ. Nɛ ɖa nɛ mɩ ɖa-taabalɩyɛ nɖɩ, ɖɩwɛ ɖa nɛ Caa nɛ ɛ-Pɩyalʋ Yesu Krɩstʋ pɛ-hɛkʋ taa. 4 Nɛ ɖɩwɛɛ ɖɩmaɣ tɔm tʋnɛ se pɩsa nɛ ɖa-taa leleŋ wɛɛ pilim. 5 Tɔm ndʋ ɖɩnɩ ɛ-cɔlɔ nɛ ɖisusuu-mɩ yɔ, ndʋ yɔ: Ɛsɔ kɛ ñalɩmɩyɛ, nɛ cɩkpɛndʋʋ fɛyɩ ɛ-taa paa ññɩɩ. 6 Ye ɖɩtɔŋ se: “Ðɩwɛɛ nɛ ɖɩɖʋʋ-ɩ nɛ taabalɩyɛ,” ɛlɛ ɖiwoki pɩ-yɔɔ nɛ ɖɩɖɔŋ cɩkpɛndʋʋ taa yɔ, ɖiɖiɣni cɛtʋʋ nɛ ɖɩɩcakɩ wezuu ŋgʋ kɩlabɩ nɔɔ kʋɖʋmaɣ nɛ toovenim yɔ. 7 Ɛlɛ, ye ɖɩwɛɛ nɛ ɖɩɖɔŋ ñalɩmɩyɛ taa ɛzɩ ɛ-maɣmaɣ ɛwɛʋ ñalɩmɩyɛ taa yɔ, pʋbʋ lɛ, taabalɩyɛ wɛ ɖɛ-hɛkʋ taa, nɛ ɛ-Pɩyalʋ Yesu calɩm ñalɩɣ kɩwɛɛkɩm tɩŋa ɖɔ-yɔɔ. 8 Ye ɖɩtɔŋ se: “Ðɩfɛyɩnɩ kɩwɛɛkɩm” yɔ, ɖɩwɛɛ nɛ ɖipeɣziɣ ɖa-tɩ nɛ toovenim fɛyɩ ɖa-taa. 9 Ye ɖiheyiɣ ɖa-kɩwɛɛkɩm yɔ, ɛkɛ toovenim tʋ nɛ siɣsiɣ tʋ se ekpeɣ-ɖʋ ɖa-kɩwɛɛkɩm nɛ ɛñalɩ ɖɔ-yɔɔ mbʋ payɩ pɩfɛyɩ siɣsiɣ yɔ. 10 Ye ɖɩtɔŋ se: “Ðɩtɩla kɩwɛɛkɩm” yɔ, ɖɩwɛɛ nɛ ɖɩpɩsɩɣ-ɩ cɛtɩyʋ, nɛ ɛ-tɔm fɛyɩ ɖa-taa.
2 Men-piya cikpesi, mamaɣ-mɩ tɔm tʋnɛ se pɩsa nɛ ɩtaala kɩwɛɛkɩm. Ɛlɛ, ye nɔɔyʋ ɛlabɩ kɩwɛɛkɩm nabʋyʋ yɔ, ɖɩwɛnɩ sɩnɩyʋ nɔɔyʋ Caa cɔlɔ, Yesu Krɩstʋ, weyi ɛkɛ siɣsiɣ tʋ yɔ. 2 Nɛ ɛkɛ ceɣu kɩlaʋ ɖa-kɩwɛɛkɩm yɔɔ, paa mbʋ yɔ pɩtɩkɛ ɖa-ñɩmbʋ ɖeke yɔɔ ɛlɛ ɛjaɖɛ kpeekpe ñɩmbʋ yɔɔ ɖɔɖɔ. 3 Nɛ pʋnɛ ɖiɖiɣziɣna se ɖɩkpɛlɩkaa nɛ ɖɩtɩlɩ-ɩ: ye ɖiwoki pɩ-yɔɔ nɛ ɖɩɖɔŋ ɛ-paɣtʋ yɔɔ yɔ. 4 Weyi ɛtɔŋ se: “Mɛnkpɛlɩkaa nɛ mantɩlɩ-ɩ,” ɛlɛ ɛɛɖɔŋ ɛ-paɣtʋ yɔɔ yɔ ɛkɛ cɛtɩyʋ, nɛ toovenim fɛyɩ ɛyʋ ɛnʋ ɛ-taa. 5 Ɛlɛ weyi ɛɖɔŋ ɛ-tɔm yɔɔ yɔ, toovenim taa lɛ Ɛsɔ sɔɔlɩm talɩ pilim ɛyʋ ɛnʋ ɛ-taa. Mbʋ ɖɩtɩlɩɣna se ɖa nɛ ɩ ɖɩwɛ nɔɔ kʋɖʋmaɣ. 6 Weyi ɛtɔŋ se ɛ nɛ ɩ pɛwɛ nɔɔ kʋɖʋmaɣ tam yɔ, pɩkɛnɩ-ɩ ɖɔɖɔ kɩjɛyʋʋ se ewolo pɩ-yɔɔ nɛ ɛɖɔ ɛzɩ ɛlɛ ɖɔɖɔ ɖɔm yɔ.
11-17 NOVEMBRE
ÑƖM MBƲ PƖWƐ ƐSƆTƆM TAA YƆ | 2 YOHANƐƐSƖ 1–YUUDI
Pɩpɔzʋʋ se ɖɩlʋ nɛ ɖɩwɛɛ toovenim taa
(Yuudi 3) Man-kʋsɔɔlaa, maawɛɛ nɛ mañakɩ pana siŋŋ se mama-mɩ ɖa-tɩŋa ɖa-ñʋʋ yabɩtʋ tɔm, ɛlɛ mana se pɩcɛyaa se mama-mɩ nɛ menseɣti-mɩ se ɩlʋ siŋŋ tisuu mbʋ paha ɛyaa kiɖeɖema tam kʋɖʋm nɛ pɩkpaɣ pɩɖɛɛ yɔ pɩ-yɔɔ.
w04 15/9 11-12 § 8-9
“Iwolo pɩ-yɔɔ nɛ ɩkpa ɖoŋ Kɩbaɣlʋ taa”
8 Masɩ sɩnɩɣnɩ-ɖʋ se ɖɩtɩlɩ Sataŋ lɩmaɣza nɛ e-ajitu nʋmɔŋ camɩyɛ. (2 Kɔrɛntɩ mba 2:11) Eleeu kaayeba nɛ ɛyʋ siɣsiɣ tʋ Yɔɔb sʋʋ liidiye kʋñɔŋ taa, ɛ-ɛyaa kʋsɔɔlaa sɩ, ɛ-hɔʋ taa ñɩma kaɖɩnɩ-ɩ, ɛhɩnɩ kʋdɔŋ sɔsɔʋ nakʋyʋ nɛ cɛtɩm taabalaa yɔɔdɩ tɔm kɩdɛkɛdɩtʋ ɛ-yɔɔ. Piitibi Yɔɔb yɔɔɔ nɛ ɛmaɣzɩ se Ɛsɔ lɔ-ɩ. (Yɔɔb 10:1, 2) Paa pɩtɩkɛ Sataŋ maɣmaɣ ɛkɔŋnɩnɩ kʋñɔmɩŋ ɛnɩ ɛyaa yɔɔ sɔnɔ yɔ, ɛpɩzɩɣ nɛ ɛtɩŋnɩ ɩ-yɔɔ nɛ ɛtakɩ-ɖʋ.
9 Mbʋ mbʋ pɩpɩzɩɣ nɛ pɩkɔnɩ-ɖʋ kaɖɛ fezuu taa yɔ, pɩtɔyɩ sɔnɔ. Ðɩwɛ ɛjaɖɛ nɖɩ ɖɩ-taa ɛyaa seɣ tomnaɣ yɔɔ wondu wayɩ nɛ pa-paa fɛyɩnɩ fezuu taa kaɖʋsɩ yɔ. Ðoŋ ɖoŋ lɛ, pɔyɔɔdʋʋ kʋzʋʋ kɩdɛkɛdʋʋ tɔm Raadiyoowaa nɛ Teeleewaa yɔɔ ɛzɩ pɩkɛ leleŋ pʋyʋ yɔ. Ɛyaa sakɩyɛ ɖɔɖɔ sɔɔlɩ leleŋ nɩʋ “mbʋ ɛzɩ paasɔɔlɩ Ɛsɔ lɛ.” (2 Timootee 3:1-5) Lɩmaɣza ana apɩzɩɣ nɛ awɛɛnɩ ɖoŋ ɖe-fezuu taa wɛtʋ yɔɔ, pʋyɔɔ pɩwɛɛ se ‘ɖɩlʋ siŋŋ tisuu yɔɔ.’—Yuudi 3.
Ðɩñɩnɩ fezuu taa ñɩm
(Yuudi 4) Mamaɣ-mɩ mbʋ pʋyɔɔ yɔ, ɛyaa nabɛyɛ sʋ mɩ-hɛkʋ taa lɔɔɔ nɛ Masɩ kaayɔɔdɩ pɔ-tɔm hʋʋ pʋnɛ pɩ-tɔm ɖooo lɔŋ; pɛkɛ ɛyaa mba paañaŋ Ɛsɔ nɛ pawaɣnɩ Ɛsɔ lootiye nɛ palakɩ lakasɩ nzɩ sɩwɛ fɛyɛ yɔ, nɛ pekiziɣ weyi e-ɖeke koŋ ɛkɛ ɖa-tʋ nɛ ɖa-Kɩbaɣlʋ yɔ, Yesu Krɩstʋ.
(Yuudi 12) Pɛkɛ kaaŋ weyi ɩmɛlɩ lɩm tɛɛ mɩ-sɔɔlɩm kazandʋ wiye, alɩwaatʋ ndʋ pɛkpɛndɩɣ mɩ-yɔɔ nɛ ɩtɔkɩ kazandʋ yɔ, pɛkɛ ninɖiɣyaa mba pacalɩɣ pa-tɩ nɛ sɔɔndʋ ɛɛkpaɣ-wɛ yɔ; pɛkɛ mɩndʋ ndʋ tɩ-taa lɩm fɛyɩ nɛ helim cɔzʋʋ-tʋ yɔ; pɛkɛ tɩŋ weyi ɩɩlʋlʋʋ pee alɩwaatʋ yɔɔ yɔ, weyi ɩsɩbɩ tam nabʋlɛ nɛ pɛkpɛzɩ-ɩ yɔ;
it-1 879
Sɔɔlɩm kazandʋ
Bibl tɩyɔɔdɩ mbʋ sɔɔlɩm kazandʋ ndʋ tɩɩkɛnaa yɔ pɩ-tɔm nɛ ɛzɩma palakaɣ-tʋ yɔ. (Yuudi 12) Pɩtɩkɛ kɩbaɣlʋ Yesu Krɩstʋ yaa ɛ-apostoloowaa kaaɖʋnɩ paɣtʋ se palakɩ-tʋ nɛ pɩtʋʋ fɛyɩ se pɩtɩkɛ mbʋ pɩkɛnɩ kɩjɛyʋʋ se palakɩ yɔ, yaa mbʋ pɩwɛɛ se palakɩ tam yɔ. Nabɛyɛ tɔm se pɩkɛ kazandʋ ndʋ Krɩstʋ ñɩma mba pɛwɛnɩ ñɩm yɔ palakaɣ nɛ payaɣ po-koobiya mba pɛwɛ tanɩm taa yɔ. Solisi, lelaa, ñɩm tɩnaa nɛ kʋñɔndɩnaa pekpeɣlaɣ ɛzɩ hɔʋ kʋɖʋmʋʋ yɔ nɛ palakɩ kazandʋ ndʋ.
it-2 805
Kaaʋ
Grɛɛkɩ tɔm piye spi·lasʹ wɩlɩɣ se pɩkɛ kaaʋ yaa pɩyɛ sɔsɔɖɛ nɖɩ ɖɩmɛlɩ lɩm tɛɛ yɔ. Yuudi labɩnɩ tʋmɩyɛ tɔm piye nɖɩ alɩwaatʋ ndʋ ɛyɔɔdaɣ ɛyaa mba pɛmɛlɩɣ ɛgbɛyɛ taa nɛ pepeɣziɣ koobiya yɔ pɔ-tɔm. Kaaŋ weyi ɩwɛ lɩm tɛɛ yɔ, ɩkɔŋnɩ kaɖɛ mɛlɛnaa mbʋ ɖɔɖɔ ɛyaa mba pɛmɛlɩɣ ɛgbɛyɛ taa mbʋ yɔ pɔkɔŋnɩ kaɖɛ koobiya. Ɛyɔɔdɩ ɛyaa mba pɔ-tɔm se: “Pɛkɛ kaaŋ weyi ɩmɛlɩ lɩm tɛɛ mɩ-sɔɔlɩm kazandʋ wiye, alɩwaatʋ ndʋ pɛkpɛndɩɣ mɩ-yɔɔ nɛ ɩtɔkɩ kazandʋ yɔ.”—Yuudi 12.
(Yuudi 14, 15) Ɛɛɛ, Enɔɔkɩ weyi ɛkɛ ɛyʋ lʋbɛ tʋ Aɖam liɖe taa yɔ, ɛɛyɔɔdɩ ɖɔɖɔ pɔ-yɔɔ natʋ tɔm se: “Ɩna! Yehowa kɔma, ɛ nɛ e-tiyiyaa kiɖeɖema kudokiŋ hiŋ sakɩyɛ se ɛhʋʋnɩ ɛyaa tɩŋa tɔm, nɛ ɛkʋ mba paañaŋ Ɛsɔ yɔ pɔ-tɔm kaañamtʋ lakasɩ nzɩ palaba yɔ sɩ-tɩŋa sɩ-yɔɔ, nɛ tɔm kɩdɛkɛdɩtʋ sɔsɔtʋ tɩŋa, ndʋ kɩwɛɛkɩm laɖaa mba paañaŋ Ɛsɔ yɔ pɔyɔɔdɩ ɛ-yɔɔ yɔ tɩ-yɔɔ.”
“Eɖeni Ɛsɔ”
Natʋ tɔm ndʋ Yehowa kaaheyi Enɔɔkɩ? Ndʋ yɔ: “Ɩna [Yehowa] kɔma, ɛ nɛ ɛyaa kiɖeɖema canɖaŋ canɖaŋ, se ɛhʋʋnɩ ɛyaa kpeekpe tɔm nɛ ɛɖʋ fɛyɛ kɩwɛɛkɩm laɖaa kpeekpe, pa-azuluma lakasɩ kpeekpe yɔɔ, tɔm ɖoŋ ndʋ ndʋ kɩwɛɛkɩm laɖaa yɔɔdɩ ɛ-yɔɔ yɔ.” (Yuudi 14, 15) Kajalaɣ ɖeɖe lɛ, ɖɩyʋsɩ se Enɔɔkɩ yɔɔdɩ tɔm ndʋ ɛzɩ tɩtɛm labʋ yɔ. Pʋwayɩ, nayaa nabɛyɛ yɔɔdɩ natʋ tɔm mbʋ ɖɔɖɔ ɛzɩ tɩtɛm labʋ yɔ. Pɩwɩlɩɣ se natʋ tɔm ndʋ, nabʋyʋ taapɩzɩɣ se pɩɖɩɣ-tʋ nʋmɔʋ se tɩtaala, pʋyɔɔ pɔyɔɔdɩ-tʋ ɛzɩ tɩtɛm labʋ yɔ.—Izaayii 46:10.
“Eɖeni Ɛsɔ”
Enɔɔkɩ kɩɖaʋ kɩbaŋʋ kʋnɛ kiyeki se ɖɩpɔzɩ ɖa-tɩ se ɖɩwɛnɩ lɩmaɣza wena Yehowa wɛnɩ ɛjaɖɛ ɖɩnɛ ɖɩ-yɔɔ yɔ? Tɔm ndʋ Enɔɔkɩ susini abalɩtʋ yɔ, titukuuni ɖɔɖɔ ɛjaɖɛ nɖɩ ɖɩwɛ sɔnɔ yɔ. Ɛzɩ Enɔɔkɩ kaayɔɔdʋʋ yɔ, Yehowa ɖɩzɩ ɛjaɖɛ kɩdɛkɛdɩyɛ nɖɩ nɛ Tɛʋ Sɔsɔʋ Noowa alɩwaatʋ taa. Ɛzɩma paaɖɩzɩ ɛjaɖɛ kɩdɛkɛdɩyɛ nɖɩ yɔ, pɩwɩlɩɣ-ɖʋ ɖɔɖɔ se Yehowa kaɣ ɛjaɖɛ kɩdɛkɛdɩyɛ ɖɩnɛ ɖɔɖɔ ɖɩzʋʋ. (Maatiyee 24:38, 39; 2 Pɩyɛɛrɩ 2:4-6) Yehowa nɛ e-tiyiyaa kiɖeɖema pakaɣ tɔm hʋnʋʋ ɛjaɖɛ kɩdɛkɛdɩyɛ ɖɩnɛ ɛzɩ ɛɛlabʋ Noowa alɩwaatʋ taa yɔ. Pɩcɛyaa se ɖa-tɩŋa ɖɩmaɣzɩɣ Enɔɔkɩ tɔm yɔɔ, nɛ ɖɩsɩnɩ lalaa ɖɔɖɔ nɛ peɖiɣzina se pakaɣ ɛjaɖɛ ɖɩnɛ ɖɩzʋʋ. Pʋtɔma yɔ, ɖɔ-hɔʋ taa mba nɛ ɖa-taabalaa ɩɩkaɣ-ɖʋ welisinuu. Pɩpɩzɩɣ nɛ pɩyɔbɩ-ɖʋ se ɖe-ɖeke ɖɩlakɩnɩ Yehowa sɔɔlɩm. Ɛlɛ Yehowa taayele Enɔɔkɩ wiɖiyi kaaʋ, nɛ ɛɛkaɣ ɛ-sɛyaa siɣsiɣ tɩnaa yebu sɔnɔ ɖɔɖɔ.
Bibl kalʋʋ
(2 Yohanɛɛsɩ 1-13) Ma abalʋ weyi ɛsʋtʋyaa yɔ, mamaɣnɩ takayaɣ kanɛ asɛyʋ weyi Ɛsɔ lɩzaa yɔ nɛ e-piya, mba mɔnsɔɔlɩ-wɛ toovenim taa yɔ, nɛ pɩtɩkɛ men-ɖeke mɔnsɔɔlɩnɩ-wɛ ɛlɛ mba payɩ pɛkpɛlɩkaa nɛ patɩlɩ toovenim yɔ ɖɔɖɔ, 2 toovenim mbʋ pɩwɛ ɖa-taa nɛ pɩkaɣ wɛʋ ɖɔ-cɔlɔ tamtam yɔ pɩ-yɔɔ. 3 Caa Ɛsɔ nɛ Yesu Krɩstʋ weyi ɛkɛ Caa Pɩyalʋ yɔ po-lootiye, pa-pʋtɔdɩyɛ naʋ, nɛ pa-laŋhɛzɩyɛ kaɣ wɛʋ ɖɔ-cɔlɔ, pɩ nɛ toovenim nɛ sɔɔlɩm. 4 Man-taa wɛ leleŋ siŋŋ, mbʋ pʋyɔɔ yɔ mana ñe-piya nasɩyɩ, siɖiɣni ɖɔm toovenim taa ɛzɩ Caa ɖʋʋ-ɖʋ paɣtʋ yɔ. 5 Pʋyɔɔ lɛɛlɛɛyɔ lɛ, asɛyʋ, mɔnpɔzʋʋ-ŋ se ɖɩsɔɔlɩ ɖama. (Pɩtɩkɛ paɣtʋ kɩfatʋ natʋyʋ manɖʋʋ-ŋ, ɛlɛ ndʋ ɖɩɩwɛna kpaɣnɩ ɖooo kiɖe tɛɛ yɔ.) 6 Nɛ sɔɔlɩm tɔbʋʋ yɔ: ɖiwolo pɩ-yɔɔ nɛ ɖɩɖɔ ɛzɩ ɛ-paɣtʋ pɔzʋʋ yɔ. Paɣtʋ yɔ, ɛzɩ ɩnɩʋ kpaɣnɩ ɖooo kiɖe tɛɛ yɔ: pɩwɛɛ se iwolo pɩ-yɔɔ nɛ ɩɖɔ sɔɔlɩm taa. 7 Mbʋ pʋyɔɔ yɔ peɣziyaa sakɩyɛ lɩ ɛjaɖɛ yɔɔ, mba paayɔɔdʋʋ kaɣlaa se Yesu Krɩstʋ kɔm tomnaɣ taa yɔ. Peɣziyu nɛ Krɩstʋ koyindu lɛ. 8 Ɩkpa mɩ-tɩ, se pɩsa nɛ itaalesi mbʋ ɖɩlabɩ tʋmɩyɛ nɛ ɖihiɣ yɔ, ɛlɛ se ɩpɩzɩ nɛ ihiɣ kɩhɛyʋʋ pilim. 9 Weyi ɛɖɛɣnɩ ɛsɩndaa nɛ ɛɛwɛɣ Krɩstʋ wɩlɩtʋ taa tam yɔ, ɛfɛyɩnɩ Ɛsɔ. Weyi ɛwɛɣ wɩlɩtʋ ndʋ tɩ-taa tam yɔ, ɛnʋ wɛnɩnɩ Caa nɛ Pɩyalʋ. 10 Ye nɔɔyʋ ɛkɔŋ mɩ-cɔlɔ nɛ ɛtɩɖɔkɩ wɩlɩtʋ ndʋ yɔ, ɩtaamʋ-ɩ mɩ-ɖɩsɩ taa yaa ɩtaasɛɛ-ɩ. 11 Mbʋ pʋyɔɔ yɔ weyi ɛsɛɣ-ɩ yɔ, ɛ nɛ ɩ pakaɣ ɛ-tʋma kɩdɛkɛda. 12 Paa mɛwɛnɩ tɔm sakɩyɛ se mamaɣ-mɩ yɔ, mantɩsɔɔlɩ se mama-mɩ tʋ takayaɣ taa nɛ tɔlɩm, ɛlɛ mantaɣ liu se mankaɣ kɔm mɩ-cɔlɔ nɛ mɔyɔɔdɩnɩ-mɩ nɛ nɔɔ, se pɩsa nɛ mɩ-taa leleŋ wɛɛ pilim. 13 Ñɔ-kɔɔ weyi Ɛsɔ lɩzaa yɔ, e-piya tiyiɣni-ŋ sɩ-sɛtʋ.
18-24 NOVEMBRE
ÑƖM MBƲ PƖWƐ ƐSƆTƆM TAA YƆ | NATƲ 1-3
“Mansɩm ña-lakasɩ”
(Natʋ 1:20) Piyele nɛ tɩɩnzɩ lʋbɛ nzɩ ŋna me-nesi kɩbanzɩ taa nɛ sika kanɖʋnaa ɖɩzɩyɛ lʋbɛ yɔ, pɔ-yɔɔ mɛsaɣ tɛɛ tɔm kiɖeɖetu yɔ: Tɩɩnzɩ lʋbɛ nzɩ sɩsɩŋnɩ agbaa lʋbɛ tɛ Ɛsɔ tiyiyaa, nɛ kanɖʋnaa ɖɩzɩyɛ lʋbɛ ñasɩŋnɩ agbaa lʋbɛ.
w12 10/15 14 § 8
Fezuu ŋgʋ ŋwɛna?
8 Pɩsa nɛ ɖɩlɔ lɩmaɣza ana lɛ, pɩwɛɣ ɖeu se ɖɩtɔzɩ se pɔyɔɔdɩ Yesu tɔm se “tɩɩnzɩ lʋbɛ wɛ e-nesi kɩbanzɩ taa.” Kajalaɣ lɛ tɩɩnzɩ lʋbɛ sɩŋnɩ ɛzʋtʋyaa mba pɛkɛ patam numwaa yɔ, nɛ pʋwayɩ lɛ ɛgbɛyɛ taa ɛzʋtʋyaa kpeekpe. Yesu pɩzɩɣ nɛ eɖiyi “tɩɩnzɩ” nzɩ sɩwɛ e-nesi taa yɔ, nɛ sɩla mbʋ ɛnawa se pɩtʋʋzaa yɔ. (Natʋ 1:16, 20) Ye mbʋ, Yesu weyi ɛkɛ ɛgbɛyɛ Ñʋʋdʋ yɔ, ɛwɛnɩ ɖoŋ ɛzʋtʋyaa agbaa kpeekpe yɔ. Ye pɩpɔzʋʋ ɛzʋtʋyʋ nɔɔyʋ lɔŋ sɩɣzʋʋ yɔ, Weyi “ɛ-ɛsa wɛɛ ɛzɩ miŋ nzʋlʋmɩyɛ yɔ” ɛkaɣ-ɩ sɩnʋʋ alɩwaatʋ ndʋ tɩmʋnaa yɔ, tɩ-taa. (Natʋ 1:14) Ɛlɛ pʋcɔ nɛ alɩwaatʋ ndʋ tɩtalɩ lɛ, pɩwɛɛ se ɖɩwɛɛnɩ ñamtʋ mba fezuu kiɖeɖeu sɩnaa nɛ palɩzɩ se peɖiyi-ɖʋ yɔ, pɔ-yɔɔ; mbʋ pʋyɔɔ yɔ Pɔɔlɩ mawa se: “Ɩña mba pɛɖɛɣ nɔɔ mɩ-hɛkʋ taa yɔ nɛ iluzi mɩ-tɩ pɛ-tɛɛ, mbʋ pʋyɔɔ yɔ pɛwɛɛ nɛ pefeŋiɣ mɩ-yɔɔ ɛzɩ mba pakaɣ labʋ akɔnta yɔ, se pɩsa nɛ pala tʋmɩyɛ nɖɩ nɛ taa leleŋ nɛ pataalabɩ-ɖɩ nɛ mɔla, ye pɩtɩkɛ mbʋ yɔ pɩkaɣ-mɩ sɩbɩnʋʋ.”—Ebr. 13:17.
(Natʋ 2:1, 2) Ɛsɔ tiyiyu weyi ɛwɛ Efɛɛzɩ ɛgbɛyɛ taa yɔ, ma-ɩ se: Weyi ɛɖɔkɩ tɩɩnzɩ lʋbɛ e-nesi kɩbanzɩ taa nɛ ɛɖɔŋ sika kanɖʋnaa ɖɩzɩyɛ lʋbɛ hɛkʋ taa yɔ, tɔm tʋnɛ ɛyɔɔdʋʋ: 2 ‘Mansɩm ña-lakasɩ, nɛ ña-tʋmɩyɛ ɖoŋ ñɩnɖɛ, nɛ ña-laŋɩyɛ ɖɔkʋʋ, nɛ manawa se ŋŋpɩzɩɣ nɛ ŋkatɩ ɛyaa kɩdɛkɛdaa, nɛ manawa ɖɔɖɔ se ŋtakɩ mba pɔtɔŋ se pɛkɛ apostoloowaa, ɛlɛ patɩkɛ yɔ, nɛ ŋna se pɛkɛ cɛtɩyaa.
w12 15/4 29 § 11
Yehowa huuzuu ɖɔ-yɔɔ se ɖihiɣ ñʋʋ yabʋ
11 Natʋ ndʋ pɔyɔɔdɩ tɩ-tɔm Natʋ ñʋŋ 2 nɛ 3 taa yɔ tɩ-taa, Yesu weyi paha-ɩ ɖoŋ yɔ, ewoba nɛ ekilimi agbaa lʋbɛ wena awɛ Aazii cikpeluu taa yɔ, a-yɔɔ. Natʋ ndʋ tɩwɩlɩɣ se Yesu pɩzaa nɛ ɛyʋsɩ mbʋ mbʋ pɩlakaɣ ɖeyi ɖeyi agbaa ana a-taa yɔ. Halɩ ɛya ɛyaa nabɛyɛ hɩla. Ɛsam paa ɛgbɛyɛ nɖɩ lɛ, kɩbam mbʋ ɖɩlakɩ yɔ pɩ-yɔɔ, nɛ ɛtasɩ-yɛ ɖɔɖɔ lɔŋ weyi pɩpɔzʋʋ yɔ. Ɛbɛ pɩwɩlɩɣ? Agbaa lʋbɛ ana asɩŋnɩ Krɩstʋ ñɩma patam numwaa kpaɣnɩ pɩnaɣ 1914. Ɛlɛ lɔŋ weyi patasɩ-yɛ yɔ, ɩwazɩɣ Ɛsɔ samaɣ agbaa kpeekpe. Ye mbʋ, pɩtʋʋ fɛyɩ se Yehowa tɩŋɩɣnɩ ɛ-Pɩyalʋ yɔɔ nɛ eɖiyiɣ ɛ-samaɣ. Ɛbɛ pɩwɛɛ se ɖɩla nɛ ɖiyuu mbʋ pɩwazɩ-ɖʋ?
w01 15/1 20-21 § 20
Ña nɛ Yehowa ɛgbɛyɛ ɩɖɔ
20 Pɩsa nɛ ɖɩñɔɔnɩ Yehowa ɛgbɛyɛ nɛ ɖa nɛ ɖɩ ɖɩɖɔŋ lɛ, pɩwɛɛ se ɖitisi se Ɛsɔ ha waɖɛ Yesu se ɛkɛ “ɛgbɛyɛ ñʋʋdʋ.” (Efɛɛzɩ mba 5:22, 23) Ɛlɛ pɩwɛɛ se ɖɩtɩlɩ ɖɔɖɔ tɔm ndʋ Yehowa yɔɔdɩ Izaayii 55:4 taa yɔ se: “Ɩna, mɛncɛlɩ-ɩ se ɛkɛ ɛyaa aseɣɖe tʋ ajɛɛ wiyaʋ nɛ cɩca.” Pʋyɔɔ ɖɩɩpɩtɩɣ se Yesu sɩm ɛzɩma eɖiyi-ɖʋ yɔ. Ɛsɩm e-heɣsi nɛ sɩ-lakasɩ. Ewoba nɛ ekilimi Aazii cikpeluu agbaa lʋbɛ yɔɔ lɛ, ɛyɔɔdɩ tam kagbanzɩ se: “Mansɩm ña-lakasɩ.” (Natʋ 2:2, 19; 3:1, 8, 15) Yesu sɩm ɖɔɖɔ ɖa-kɩcɛyɩm ɛzɩ ɛ-Caa yɔ. Pʋcɔ nɛ ɛwɩlɩɣ ɛ-tɔmkpɛlɩkɩyaa ɛzɩma patɩmɩ yɔ lɛ, ɛyɔɔdaa se: “Mɩ-Caa tɩlɩ mbʋ pɩtɛɖɩɣ-mɩ yɔ, halɩ pʋcɔ nɛ ɩpɔzʋʋ-ɩ.”—Maatiyee 6:8-13.
Ðɩñɩnɩ fezuu taa ñɩm
(Natʋ 1:7) Ɩna! Eɖiɣni kɔm nɛ ɛsɔmɩndʋ, nɛ paa ɛsɩyɛ nɖɩ lɛ ɖɩkaɣ-ɩ naʋ, pɩkpɛndɩnɩ mba paasɔbɩ-ɩ kɩgbɛzɛŋ yɔ; nɛ ɛ-yɔɔ lɛ, tɛtʋ yɔɔ cejewe kpeekpe kaɣ nɩʋ siziŋ nɛ ama a-laŋa taa. Ɛɛɛ, Amɛn.
Ɛsɔ Kewiyaɣ ɖeziɣ ko-koyindinaa
10 Pahʋʋnɩ ɛyaa tɔm. Paa Ɛsɔ Kewiyaɣ koyindinaa ɩsɔɔlaa yaa patɩsɔɔlɩ yɔ, pakaɣ naʋ lakasɩ lɛɛsɩ nɛ sɩkaɣ yebu nɛ sɔɔndʋ kpa-wɛ nɛ pɩkɩlɩ. Yesu yɔɔdaa se: “Pakaɣ naʋ ɛyʋ Pɩyalʋ kɔŋ ɛsɔdaa mɩndʋ yɔɔ, ɛ nɛ e-ɖoŋ sɔsɔŋ nɛ ɛ-paɣlɩka sɔsɔɔ.” (Maarkɩ 13:26) Yesu ɖoŋ wɩlʋʋ pʋnɛ, pɩwɩlɩɣ se ɛkɔm se ɛhʋʋnɩ ɛyaa tɔm. Yesu yɔɔdaɣ kɛdɛzaɣ kɩyakɩŋ natʋ tʋnɛ lɛ, ɛtazɩ ɖoŋlɛɛɖɛ ɛzɩma pakaɣ hʋnʋʋ ɛyaa tɔm alɩwaatʋ ndʋ tɩ-taa yɔ, pɩ-taa tete. Tɔm ndʋ tɩwɛ heŋ nɛ pʋŋ eduuye taa. (Kalɩ Maatiyee 25:31-33, 46.) Ɛyaa siɣsiɣ tɩnaa mba patɩnɩ Ɛsɔ Kewiyaɣ yɔɔ yɔ, mba pakaɣ kpaɣʋ se pɛkɛ “heŋ” nɛ peɖiɣziɣna se ‘pa-ñʋʋ yabɩtʋ talaa’ lɛ, ‘pakʋyʋʋ pasɩŋ nɛ pakʋsɩ pa-ñʋŋ.’ (Luka 21:28) Ɛlɛ Ɛsɔ koyindinaa paba yɔ, pakaɣ-wɛ kpaɣʋ ɛzɩ “pʋŋ” yɔ nɛ alɩwaatʋ ndʋ panaɣ se “powoki tam tam [ɖezuu] taa” yɔ lɛ, pakaɣ ‘paɣzʋʋ tɩmʋʋ.’—Maatiyee 24:30, ABT; Natʋ 1:7.
(Natʋ 2:7) Weyi ɛwɛnɩ nɩŋgbaŋʋʋ yɔ, ɛnɩɩ tɔm ndʋ fezuu heyiɣ agbaa yɔ: Weyi ɛwakɩ yɔ, mankaɣ-ɩ haʋ waɖɛ se ɛtɔɔ wezuu tɩʋ ŋgʋ kɩwɛ Ɛsɔ tɛ paradisuu taa yɔ ki-pee.
w09 15/1 31 § 1
Natʋ takayaɣ taa tɔm kɩcɛyɩtʋ
2:7—Ɛbɛ “Ɛsɔ tɛ paradisuu” kɛnaa? Patam numwaa pama tɔm tʋnɛ, pʋyɔɔ yɔ, paradisuu ŋgʋ kɩsɩŋnɩ ɛsɔdaa, ɖenɖe Ɛsɔ maɣmaɣ wɛɛ yɔ. Patam numwaa kaɣ wɛnʋʋ waɖɛ se pɔtɔɔ “wezuu tɩʋ.” Pakaɣ wɛnʋʋ maasɩkɩ maasɩkɩ wɛtʋ.—1 Kɔr. 15:53.
Bibl kalʋʋ
(Natʋ 1:1-11) Natʋ ndʋ tɩ-yɔɔ Yesu Krɩstʋ kulaa yɔ, ndʋ Ɛsɔ cɛlɩ-ɩ se ɛwɩlɩ e-yomaa mbʋ piileɖiɣ lɛ, pɩwɛɛ se pɩla yɔ. Nɛ etiyi e-tiyiyu nɛ ɛtɩŋnɩ ɛ-yɔɔ nɛ ɛwɩlɩ-tʋ pɩtɩŋnɩ yʋsasɩ yɔɔ e-yom Yohanɛɛsɩ, 2 weyi ɛlɩzɩ aseɣɖe tɔm ndʋ Ɛsɔ cɛlaa nɛ aseɣɖe nɖɩ Yesu Krɩstʋ lɩzaa yɔ pɔ-yɔɔ yɔ, ɛɛɛ, ɛlɩzɩ aseɣɖe mbʋ payɩ ɛnawa yɔ pɩ-yɔɔ. 3 Koboyaɣ tʋ lɛ weyi ɛkalɩɣ natʋ tɔm tʋnɛ nɛ nɔɔ kɩkʋyaɣ yɔ nɛ mba pewelisiɣ-tʋ nɛ pɔɖɔŋ tɔm ndʋ pama tɩ-taa yɔ tɩ-yɔɔ yɔ, mbʋ pʋyɔɔ yɔ alɩwaatʋ ndʋ paɖʋwa yɔ tɩñɔtaa 4 Ma Yohanɛɛsɩ mamaɣnɩ takayaɣ kanɛ agbaa lʋbɛ wena awɛ Aazii egeetiye taa yɔ Tɛtɛ nɛ ɩwɛɛnɩ lootiye nɛ laŋhɛzɩyɛ nɖɩ ɖɩlɩnɩ “Weyi ɛwɛɛ nɛ weyi ɛɛwɛɛ nɛ weyi eɖiɣni kɔm yɔ” ɛ-cɔlɔ yɔ, nɛ nɖɩ ɖɩlɩnɩ feziŋ lʋbɛ weyi ɩwɛ e-kewiyaɣ kpelaɣ ɛsɩndaa yɔ ɩ-cɔlɔ yɔ, 5 nɛ nɖɩ ɖɩlɩnɩ Yesu Krɩstʋ, weyi ɛkɛ “Aseɣɖe Tʋ Siɣsiɣ tʋ,” “sɩɖaa taa kajalaɣ pɩɣa” nɛ “tɛtʋ yɔɔ awiya Ñʋʋdʋ” yɔ ɛ-cɔlɔ yɔ. Ɛnʋ weyi ɛsɔɔlɩ-ɖʋ nɛ eholi-ɖʋ ɖa-kɩwɛɛkɩm taa pɩtɩŋnɩ ɛ-maɣmaɣ ɛ-calɩm yɔɔ yɔ— 6 nɛ ɛlabɩ-ɖʋ se ɖɩkɛ kewiyaɣ nakɛyɛ, nɛ cɔjɔnaa se ɖɩɖʋ ɛ-Caa Ɛsɔ lɩm—ɛɛɛ, ɛnʋ tɩnɩ samtʋ nɛ ɖoŋ tamtam. Amɛn. 7 Ɩna! Eɖiɣni kɔm nɛ ɛsɔmɩndʋ, nɛ paa ɛsɩyɛ nɖɩ lɛ ɖɩkaɣ-ɩ naʋ, pɩkpɛndɩnɩ mba paasɔbɩ-ɩ kɩgbɛzɛŋ yɔ; nɛ ɛ-yɔɔ lɛ, tɛtʋ yɔɔ cejewe kpeekpe kaɣ nɩʋ siziŋ nɛ ama a-laŋa taa. Ɛɛɛ, Amɛn. 8 “Mɛkɛnɩ Alɩfaa nɛ Omega,” Yehowa Ɛsɔ yɔɔdʋʋna, “Weyi ɛwɛɛ nɛ weyi ɛɛwɛɛ nɛ weyi eɖiɣni kɔm yɔ, Ðoŋ Tɩŋa Tʋ.” 9 Ma Yohanɛɛsɩ, mi-koobu nɛ weyi mɩ nɛ ɩ ɩka kʋñɔŋ nɛ kewiyaɣ nɛ laŋɩyɛ ɖɔkʋʋ ɖa nɛ Yesu ɖɔ-nɔɔ kʋɖʋmaɣ labʋ taa yɔ, maawɛ lɩm hɛkʋ taa tɛtʋ ndʋ payaɣ se Patɩmoosɩ yɔ tɩ-taa, mbʋ pʋyɔɔ yɔ mɔyɔɔdaɣ Ɛsɔ tɔm nɛ malɩzɩɣ aseɣɖe Yesu yɔɔ. 10 Pɩtɩŋnɩ fezuu yɔɔ lɛ, mana man-tɩ Kɩbaɣlʋ kɩyakʋ wiye, nɛ manɩɩ nɔɔ ɖoŋ ñɩŋga nakɛyɛ ma-wayɩ, kewiɣ ɛzɩ ɛgandɩyɛ yɔ, 11 kɔtɔŋaɣ se: “Mbʋ ŋnaɣ yɔ, ma-pʋ takayaɣ kikpiyaɣ taa nɛ ŋtiyini-kɛ agbaa lʋbɛ wena awɛ: Efɛɛzɩ, Simiirɩnɩ, Pɛɛrɩgam, Tiyaatiiri, Saardɩ, Filaadɛlɩfii, nɛ Lawodisee yɔ.”
25 NOVEMBRE–1ER DÉCEMBRE
ÑƖM MBƲ PƖWƐ ƐSƆTƆM TAA YƆ | NATƲ 4-6
Kpaŋnaŋ caɣyaa naanza
(Natʋ 6:2) Nɛ na, mana kpaŋnʋ kʋhʋlʋm nɔɔyʋ, nɛ weyi ɛɛcaɣ ɛ-yɔɔ yɔ ɛɖɔkɩ tɔʋ; nɛ pɛcɛlɩ-ɩ awiya hulaɣ, nɛ ɛlɩɩ ɛzɩ waɖʋ yɔ se ɛtɛzɩ wabʋ.
Kpaŋnaŋ caɣyaa naanza—Mba pɛkɛnaa?
Anɩ lɛ kpaŋnʋ kʋhʋlʋm caɣyʋ? Pʋwayɩ Bibl taa Natʋ takayaɣ kanɛ, kalɩzɩ pɩ-taa se ɛsɔdaa kpaŋnʋ caɣyʋ ɛnʋ lɛ “Ɛsɔ Tɔm.” (Natʋ 19:11-13) Yesu Krɩstʋ payaɣ Bibl taa se Tɔm, mbʋ pʋyɔɔ yɔ ɛnʋ kɛnɩ Ɛsɔ tɔm ɖɔkɩyʋ. (Yohanɛɛsɩ 1:1, 14) Pɩtasɩ lɛ, paya-ɩ se “Awiya taa Wiyaʋ nɛ kɩbaɣlaa taa Kɩbaɣlʋ” nɛ pɔtɔ ɖɔɖɔ se ɛkɛ “Tʋtʋyɛ tʋ.” (Natʋ 19:16) Pɩwɩlɩɣ kpayɩ kpayɩ se paha-ɩ ɖoŋ se ɛkɛ wiyaʋ nɛ ɛla you, ɛlɛ ɛɛkpakɩɣ e-ɖoŋ se ɛlabɩnɩ kɩdɛkɛdɩm nabʋyʋ. Ɛlɛ pɩpɔzʋʋ ɖicosi tɔm pɔzʋʋ nabʋyʋ yɔɔ.
wp17.3 4 § 5
Kpaŋnaŋ caɣyaa naanza—Mba pɛkɛnaa?
Ɛzɩmtaa kpaŋnaŋ caɣyaa paɣzɩɣ pe-seya? Yʋsɩ se kajalaɣ tʋ, Yesu, paɣzɩ e-seya alɩwaatʋ ndʋ ɛpaɣzɩ tɔɔʋ kewiyitu yɔ. (Natʋ 6:2) Ɛzɩmtaa Yesu pɩsɩ Wiyaʋ ɛsɔdaa? Pɩtɩkɛ alɩwaatʋ ndʋ pefezi-i nɛ sɩɖaa taa nɛ ɛkpa ɛsɔdaa yɔ. Bibl wɩlɩɣ se ɛkpa ɛsɔdaa lɛ, ɛtɩpɩsɩ Wiyaʋ kpaagbaa. (Ebree 10:12, 13) Yesu heyi ɛ-wayɩ tɩŋɩyaa yʋsaɣ ŋga kakaɣ-wɛ sɩnʋʋ nɛ patɩlɩ alɩwaatʋ ndʋ ɛkaɣ paɣzʋʋ kewiyitu tɔɔʋ ɛsɔdaa yɔ. Ɛtɔm se alɩwaatʋ ndʋ ɛpaɣzɩɣ kewiyitu tɔɔʋ yɔ, wezuu caɣʋ kaɣ labʋ kaɖɛ ɛjaɖɛ yɔɔ. Yoŋ, ñɔɔsɩ nɛ kʋdɔmɩŋ pakaɣ tɔyʋʋ. (Maatiyee 24:3, 7; Luka 21:10, 11) Caama You kajalaɣ ñɩŋgʋ labɩ pɩnaɣ 1914 taa nɛ pɩtɛ lɛ, ɛjaɖɛ yɔɔ wɛtʋ lɛɣzɩ nɛ wezuu caɣʋ wɛɛ kaɖɛ kpem, ɛzɩ Bibl kaayɔɔdʋʋ se pɩkaɣ wɛʋ “wayɩ wayɩ wɛɛ” yaa kɛdɛzaɣ kɩyakɩŋ taa yɔ.—2 Timootee 3:1-5.
(Natʋ 6:4-6) Kpaŋnʋ lɛlʋ lɩɩ, ɛsɛwa ɛzɩ miŋ yɔ, nɛ weyi ɛɛcaɣ ɛ-yɔɔ yɔ paha-ɩ nʋmɔʋ se ɛlɩzɩ laŋhɛzɩyɛ tɛtʋ yɔɔ se pɩsa nɛ ɛyaa kʋ ɖama, nɛ paacɛlɩ-ɩ laɣɖɛ sɔsɔɖɛ naɖɩyɛ. 5 Ɛkpɛzɩ kɩtaaɖʋʋ naadozo ñɩŋgʋ lɛ, manɩɩ ɛsadʋ naadozo ñɩnʋ yɔɔdaa se: “Kɔɔ!” Nɛ na, mana kpaŋnʋ kɩkpɛɛdʋ nɔɔyʋ, nɛ weyi ɛɛcaɣ ɛ-yɔɔ yɔ ɛɖɔkɩ kɩmaɣzʋʋ e-nesi taa. 6 Manɩ nabʋyʋ taŋ ɛzɩ nɔɔ nakɛyɛ yɔ ɛsadɩnaa naanza mba pɛ-hɛkʋ taa nɛ kɔtɔŋ se: “Payakɩ blee litri kʋɖʋmʋʋ dinaarɩ kʋɖʋmʋʋ, nɛ orjɩ litrinaa naadozo dinaarɩ kʋɖʋmʋʋ; nɛ taawɛɛkɩ oliivi num nɛ vɛɛ.
Kpaŋnaŋ caɣyaa naanza—Mba pɛkɛnaa?
Kpaŋnʋ caɣyʋ ɛnʋ ɛsɩŋnɩ you. Yʋsɩ se pɩtɩkɛ ajɛɛ naayɛ ɖeke taa ɛɖɔɔnɩ laŋhɛzɩyɛ, ɛlɛ tɛtʋ kpeekpe yɔɔ. You sɔsɔʋ nakʋyʋ labɩ pɩnaɣ 1914 taa, nɛ kajalaɣ ɖeɖe lɛ palabʋ you nɛ kitukuni ɛjaɖɛ kpeekpe yɔ. Pʋwayɩ lɛ, you sɔsɔʋ naalɛ ñɩŋgʋ la ɛjaɖɛ kpeekpe yɔɔ nɛ kɩkʋ ɛyaa pɩkɩlɩ kajalaɣ ñɩŋgʋ. Akɔntanaa nabɛyɛ wɩlɩɣ se ɛyaa mba pakʋ yoŋ taa kpaɣnɩ pɩnaɣ 1914 yɔ, pɛcɛzɩ miiliyɔɔwaa 100. Pɩtasɩ lɛ, ɛyaa sakɩyɛ mʋ heŋ siŋŋ.
wp17.3 5 § 4-5
Kpaŋnaŋ caɣyaa naanza—Mba pɛkɛnaa?
“Nɛ na, mana kpaŋnʋ kɩkpɛɛdʋ nɔɔyʋ, nɛ weyi ɛɛcaɣ ɛ-yɔɔ yɔ ɛɖɔkɩ kɩmaɣzʋʋ e-nesi taa. Manɩ nabʋyʋ taŋ ɛzɩ nɔɔ nakɛyɛ yɔ ɛsadɩnaa naanza mba pɛ-hɛkʋ taa nɛ kɔtɔŋ se: ‘Payakɩ blee litri kʋɖʋmʋʋ dinaarɩ kʋɖʋmʋʋ, nɛ orjɩ litrinaa naadozo dinaarɩ kʋɖʋmʋʋ; nɛ taawɛɛkɩ oliivi num nɛ vɛɛ.’”—Natʋ 6:5, 6.
Kpaŋnʋ caɣyʋ ɛnʋ ɛsɩŋnɩ ñɔɔsɩ. Ðɩyʋsɩ cɩnɛ se tɔɔnaɣ wɛ kɛdɛɖaɣ kpem nɛ pʋyɔɔ lɛ, pɩpɔzʋʋ “dinaarɩ” kʋɖʋmʋʋ, pʋ-tɔbʋʋ se kajalaɣ pɩnzɩ mɩnʋʋ taa kɩyakʋ pilim tʋmɩyɛ liidiye, pʋcɔ nɛ ɛyʋ pɩzɩ nɛ ɛya mɩla caɖaɣ kʋɖʋmaɣ. (Maatiyee 20:2; nwt) Pɩpɔzʋʋ liidiye nɖɩ ɖɔɖɔ pʋcɔ nɛ ɛyʋ pɩzɩ nɛ ɛya amala caɖasɩ 3 mbʋ yɔ; ɛyaa sakɩyɛ ɛsɩndaa alɩwaatʋ ndʋ tɩ-taa lɛ, mɩla mʋ ñɩm nɛ pɩkpaɖɩ amala. Ɛzɩma ɛyʋ pɩzɩɣ ɛla nɛ ɛcɔnɩ ɛ-hɔʋ yɔɔ wɛtʋ ndʋ tɩ-taa? Papaɣ ɛyaa se pataawɛɛkɩ tɔɔnaɣ, halɩ pɩkpɛndɩnɩ wondu ndʋ palakaɣnɩ tɔɔnasɩ paa ɖooye alɩwaatʋ ndʋ tɩ-taa yɔ, ɛzɩ oliivi num nɛ vɛɛ mbʋ yɔ.
(Natʋ 6:8) Nɛ na, mana kpaŋnʋ nɔɔyʋ, ɛ-yɔɔ wɛ ɛzɩ tɔlɩma yɔ, nɛ weyi ɛɛcaɣ ɛ-yɔɔ yɔ ɛ-hɩɖɛ lɛ Sɩm. Nɛ Pɩlaʋ tɩŋaɣ ɛ-wayɩ kpam. Nɛ paha-wɛ ɖoŋ tɛtʋ hɔɔlʋʋ naanza ñɩŋgʋ yɔɔ, se patɩŋnɩ laɣɖɛ nɖɩ ɖɩɖaɣlaa yɔ nɛ ñɔɔsɩ nɛ kɩjɩkpʋʋ ŋgʋ kɩhaɣ sɩm yɔ nɛ tɛtɛgbɩna wena awɛ tɛtʋ yɔɔ yɔ pɔ-yɔɔ nɛ pakʋ ɛyaa.
wp17.3 5 § 8-10
Kpaŋnaŋ caɣyaa naanza—Mba pɛkɛnaa?
Kpaŋnʋ caɣyʋ naanza tʋ sɩŋnɩ sɩm mbʋ pɩlɩɣnɩ kʋdɔmɩŋ nɛ kʋñɔmɩŋ lɛɛŋ cɔlɔ yɔ. Pɩnaɣ 1914 tɛma nɛ pɩla pazɩ lɛ, kʋdɔŋ ŋgʋ payaɣ se grippe espagnole yɔ, kɩkʋ ɛyaa miiliyɔɔwaa hiŋ sakɩyɛ. Kʋdɔŋ ŋgʋ kɩkpa ɛyaa ɛzɩ miiliyɔɔwaa 500 mbʋ yɔ, nɛ pa-taa lɛ, ye pakpaɣ ɛyaa 3 yɔ, ɛyʋ 1 ɖeke pɩzɩna nɛ ɛcaɣ wezuu!
Ɛlɛ pʋwayɩ lɛ, kʋdɔmɩŋ lɛɛŋ kɔm nɛ ɩkʋ ɛyaa sakɩyɛ siŋŋ nɛ pɩkpaɖɩ grippe espagnole. Ñɩnɩyaa kɔm nɛ pana se ɛyaa miiliyɔɔwaa mɩnɩŋ sakɩyɛ sɩbɩnɩ kʋdɔŋ ŋgʋ payaɣ se ɛsɔkʋdɔŋ yɔ, pɩnzɩ 1900 waa taa. Ða-alɩwaatʋ taa, paa ɖɔkɔtɔnaa tʋmɩyɛ ɛɖɛnɩ ɛsɩndaa yɔ, SIDA, kpeziwɩlaɣ nɛ wɩsɩ kʋdɔŋ pakʋ ɛyaa miiliyɔɔwaa sakɩyɛ.
Paa pɩtɩɩkɛ ɛzɩma yɔ, yoŋ, ñɔɔsɩ, nɛ kʋdɔmɩŋ ndɩ ndɩ kɔŋnɩ ɛyaa sɩm. Pɩlaʋ wɛ ɛyaa sakɩyɛ libu yɔɔ nɛ kɩɩhaɣ-wɛ lidaʋ nakʋyʋ.
Ðɩñɩnɩ fezuu taa ñɩm
(Natʋ 4:4) Kewiyaɣ kpelisi 24 cɔ kewiyaɣ kpelaɣ ŋga nɛ sɩta, nɛ mana ɛzʋtʋyaa 24 pacaɣ kewiyaɣ kpelisi nzɩ sɩ-yɔɔ, posu tokonaa kʋhʋlʋmaa, nɛ pa-ñʋŋ taa nɛ sika awiya hulasɩ.
(Natʋ 4:6) Nabʋyʋ kaawɛ kewiyaɣ kpelaɣ ɛsɩndaa, pɩnɩɣzɩnɩ teŋgu ŋgʋ kɩwɛ ɛzɩ ñɩnʋʋ yɔ, ɛzɩ krisɩtaalɩ pɩyɛ yɔ. Ɛsadɩnaa naanza kaawɛ kewiyaɣ kpelaɣ hɛkʋ taa nɛ kewiyaɣ kpelaɣ cɔlɔ kpɛɛɛ, ɛsa kaasu pɔ-yɔɔ ɖo, pɛ-ɛsɩndaa nɛ pa-wayɩ.
re 76-77 § 8
Yehowa ɛsɔdaa Kewiyaɣ Kpelaɣ keɖeɣa
8 Yohanɛɛsɩ nawa se caanaʋ taa lɛ, palɩzaɣ cɔjɔnaa se pala tʋmɩyɛ Kediɣzaɣ kizinziku tɛɛ. Ye mbʋ, mbʋ pɩ-tɔm ɛyɔɔdɩ pʋwayɩ yɔ, ɛna-pʋ lɛ, pɩɖɩɣzɩ-ɩ kpem. Ɛtɔm se: “Kewiyaɣ kpelisi 24 cɔ kewiyaɣ kpelaɣ ŋga nɛ sɩta, nɛ mana ɛzʋtʋyaa 24 pacaɣ kewiyaɣ kpelisi nzɩ sɩ-yɔɔ, posu tokonaa kʋhʋlʋmaa, nɛ pa-ñʋŋ taa nɛ sika awiya hulasɩ.” (Natʋ 4:4) Toovenim, ɛtɩna cɔjɔnaa, ɛlɛ ɛzʋtʋyaa 24, palɩzɩ-wɛ se pɛkɛ awiya nɛ papam awiya hulasɩ. Mba ɛzʋtʋyaa mba pɛkɛnaa? Mba lɛ Krɩstʋ ñɩma patam numwaa mba pefezi-wɛ pakpa ɛsɔdaa se pala tʋma wena Yehowa ɖʋ-wɛ yɔ. Ɛzɩma ɖɩlaba nɛ ɖɩna?
re 80 § 19
Yehowa ɛsɔdaa Kewiyaɣ Kpelaɣ keɖeɣa
19 Ɛbɛ ɛsadɩnaa mba pasɩŋnaa? Nayʋ Ezekɩyɛɛlɩ na natʋ natʋyʋ nɛ tɩsɩɣnɩ-ɖʋ se ɖɩtɩlɩ. Ezekɩyɛɛlɩ na Yehowa caɣ kewiyaɣ kpelaɣ yɔɔ nɛ ɛsadɩnaa mba pɛwɛ ɛzɩ mba Yohanɛɛsɩ nawa yɔ, pɔcɔɔ-ɩ nɛ pata. (Ezekɩyɛɛlɩ 1:5-11, 22-28) Pʋwayɩ lɛ, Ezekɩyɛɛlɩ na ɛsɔdaa kɛɛkɛɛ nɛ tiyiyaa nabɛyɛ wɛ kɩ-wayɩ. Ɛlɛ lɛɛlɛɛyɔ lɛ, Kerebimwaa ɛnawa. (Ezekɩyɛɛlɩ 10:9-15) Ye mbʋ, ɛsadɩnaa naanza waa mba Yohanɛɛsɩ nawa yɔ, pasɩŋnɩ Kerebimwaa sakɩyɛ mba Ɛsɔ lɩzaa nɛ pɛwɛɛnɩ waɖɛ sɔsɔɖɛ naɖɩyɛ ɛ-ɛgbɛyɛ taa yɔ. Pɩtɩɖɩɣzɩ Yohanɛɛsɩ se kerebimwaa mba pɔñɔtɩnɩ Yehowa kpam, mbʋ pʋyɔɔ yɔ caanaʋ taa kediɣzaɣ kizinziku taa kerebimwaa naalɛ mba pamanɩ sika yɔ, kaawɛ ɛgbɛyɛ ɖʋʋ aɖakaɣ ŋga kasɩŋnɩ Yehowa kewiyaɣ kpelaɣ yɔ kɔ-yɔɔ. Kerebimwaa mba pɛ-hɛkʋ taa panɩɣaɣ Yehowa nɔɔ ŋga kahaɣaɣ paɣtʋ samaɣ yɔ.—Ejipiti Lɩʋ 25:22; Keɣa 79:1.
(Natʋ 5:5) Ɛlɛ ɛzʋtʋyaa taa kʋɖʋm heyi-m se: “Yele wiu. Na! Yuuda cejewiye taa mʋʋzʋʋ, Daviid liɖe, waba se kikuli takayaɣ kikpiyaɣ nɛ ka-kɩtaaɖɩŋ lʋbɛ.”
cf 36 § 5-6
Na! Mʋʋzʋʋ ŋgʋ kɩlɩnɩ Yuuda cejewiye taa yɔ
5 Ðoŋ ɖoŋ lɛ, mʋʋzʋʋ sɩŋnɩ abalɩtʋ. Wiɖiyi ŋtɛm katʋʋ mʋʋzʋʋ na? Pɩtɩla ɖenɖe pasɩɣ tɛtɛgbɩna nɛ ɛyaa woki nɛ pɔcɔŋna yɔ, peeɖe ŋna-kʋ, nɛ peeɖe lɛ, paɖɩɣ kpɩna yɔɔ se ataala ɛyaa pʋyʋ. Ɛlɛ paa peeɖe ŋna mʋʋzʋʋ yɔ, pɩtʋʋ fɛyɩ se kɩkpa-ŋ sɔɔndʋ. Kpɩnɛ sɔsɔɖɛ nɖɩ paa ɛbɛ ɛsɩndaa ɖɩwɛɛ yɔ, sɔɔndʋ ɛɛpɩzɩɣ pɩkpa-ɖɩ nɛ ɖise. Bibl yɔɔdɩ mʋʋzʋʋ tɔm se “kɩwɛ ɖoŋ pɩdɩɩfɛyɩ kpɩna taa . . ., sɔɔndʋ ɛɛkpaɣ-kʋ nɛ nɔɔyʋ katɩnʋʋ.” (Aduwa 30:30) Abalɩtʋ ndʋ Krɩstʋ wɛna.
6 Iyele nɛ ɖɩna nʋmɔʋ naadozo weyi ɩ-yɔɔ Yesu tɩŋɩɣna nɛ ɛwɩlɩɣ se ɛwɛnɩ mʋʋzʋʋ abalɩtʋ yɔ: Ɛlʋbɩ toovenim yɔɔ, ɛñɔnɩ siɣsiɣ wɛtʋ nɛ ɛkaɖɩnɩ ɖɔɖɔ nazɩm. Ðɩɩtazɩɣ nʋmɔŋ ɛnɩ ɩ-taa lɛ, ɖɩnaɣ ɛzɩma ɖɩmaɣzɩnɩ-ɩ nɛ ɖɩwɛɛ ɖɔɖɔ abalɩtʋ paa pɩfɛyɩ-ɖʋ kɛlɛʋ yɔ.
Bibl kalʋʋ
(Natʋ 4:1-11) Pʋwayɩ lɛ, na, mana patʋlɩ nɔnɔɔ nakɛyɛ ɛsɔdaa, nɛ kajalaɣ nɔɔ ŋga manɩwa kɛwɛɛ nɛ kɔyɔɔdʋʋnɩ-m yɔ, kewiɣ ɛzɩ ɛgandɩyɛ yɔ, kɔtɔŋaɣ se: “Kpa cɩnɛ, nɛ mankaɣ-ŋ wɩlʋʋ mbʋ pɩwɛɛ se pɩla yɔ.” 2 Pʋwayɩ lɛ, mancaŋ mana man-tɩ fezuu ɖoŋ taa, nɛ na, kewiyaɣ kpelaɣ nakɛyɛ kaawɛ ko-lone taa ɛsɔdaa, nɛ nɔɔyʋ kaacaɣ kewiyaɣ kpelaɣ ŋga kɔ-yɔɔ. 3 Nɛ Weyi ɛɛcaɣaa yɔ, ɛ-wɛtʋ kaawɛ ɛzɩ yaasɩpɩ pɩyɛ nɛ sarɩdʋwaanɩ pɩyɛ yɔ, nɛ tɩŋgaɣyʋʋ nakʋyʋ kaacɔ kewiyaɣ kpelaɣ nɛ kɩta, kɩ-wɛtʋ kaawɛ ɛzɩ emeroodi pɩyɛ yɔ. 4 Kewiyaɣ kpelisi 24 cɔ kewiyaɣ kpelaɣ ŋga nɛ sɩta, nɛ mana ɛzʋtʋyaa 24 pacaɣ kewiyaɣ kpelisi nzɩ sɩ-yɔɔ, posu tokonaa kʋhʋlʋmaa, nɛ pa-ñʋŋ taa nɛ sika awiya hulasɩ. 5 Tɛʋ ñɩlɩsʋʋ nɛ nɔsɩ taŋ nɛ tɛʋ nazʋʋ palɩɣaɣnɩ kewiyaɣ kpelaɣ cɔlɔ; nɛ kanɖʋnaa lʋbɛ kaawɛɛ nɛ pamʋʋ kewiyaɣ kpelaɣ ɛsɩndaa, nɛ pasɩŋnɩ Ɛsɔ feziŋ lʋbɛ. 6 Nabʋyʋ kaawɛ kewiyaɣ kpelaɣ ɛsɩndaa, pɩnɩɣzɩnɩ teŋgu ŋgʋ kɩwɛ ɛzɩ ñɩnʋʋ yɔ, ɛzɩ krisɩtaalɩ pɩyɛ yɔ. Ɛsadɩnaa naanza kaawɛ kewiyaɣ kpelaɣ hɛkʋ taa nɛ kewiyaɣ kpelaɣ cɔlɔ kpɛɛɛ, ɛsa kaasu pɔ-yɔɔ ɖo, pɛ-ɛsɩndaa nɛ pa-wayɩ. 7 Ɛsadʋ kajalaɣ ñɩnʋ kaawɛ ɛzɩ mʋʋzʋʋ yɔ, nɛ ɛsadʋ naalɛ ñɩnʋ kaawɛ ɛzɩ neɣye abalɩñɩnɖɛ yɔ, nɛ ɛsadʋ naadozo ñɩnʋ ɛsɩndaa kaawɛ ɛzɩ ɛyʋ ɛsɩndaa yɔ, nɛ ɛsadʋ naanza ñɩnʋ kaawɛ ɛzɩ keziye nɖɩ ɖiɖiɣni kʋyʋʋ yɔ. 8 Piyele nɛ ɛsadɩnaa naanza mba yɔ, pa-taa paa weyi kaawɛnɩ keŋ loɖo; ɛsa kaasu pɔ-yɔɔ nɛ pɩcɔɔ-wɛ nɛ pɩta nɛ pɛ-tɛɛ ɖɔɖɔ. Nɛ pɔyɔɔdʋʋ kaahɛzaɣ, ɖoo nɛ wɩsɩ se: “Kiɖeɖeu, kiɖeɖeu, kiɖeɖeu lɛ Yehowa Ɛsɔ, Ðoŋ Tɩŋa Tʋ, weyi ɛɛwɛɛ nɛ weyi ɛwɛɛ nɛ weyi eɖiɣni kɔm yɔ.” 9 Alɩwaatʋ ndʋ ɛsadɩnaa cɛlɩɣ samtʋ nɛ hɩɖɛ ɖʋʋ nɛ sɛtʋ Weyi ɛcaɣ kewiyaɣ kpelaɣ yɔɔ, Weyi ɛwɛ wezuu tamtam yɔ, 10 ɛzʋtʋyaa 24 mba, pɔtɔlʋʋ Weyi ɛcaɣ kewiyaɣ kpelaɣ yɔɔ yɔ ɛ-ɛsɩndaa nɛ pɛsɛɣ Weyi ɛwɛ wezuu tamtam yɔ, nɛ pɛpɛɖɩɣ pa-awiya hulasɩ kewiyaɣ kpelaɣ ɛsɩndaa, nɛ pɔtɔŋ se: 11 “Ŋmʋnaa, Yehowa ɖɛ-Ɛsɔ, se ŋmʋ samtʋ nɛ hɩɖɛ ɖʋʋ nɛ ɖoŋ, mbʋ pʋyɔɔ yɔ ŋlɩzɩ pɩtɩŋa payɩ, nɛ ñɔ-sɔɔlɩm yɔɔ pɩwɛɛ nɛ ñɔ-sɔɔlɩm yɔɔ ŋlɩzɩ-pʋ.”