THUTO 01
Baibili i Nga ku Batsha Chini?
Bunji gwedu ti na dzibuzo ne kwe buchilo, ku dziyila, lufu, ne chi nowo shingikala mu chibaka chi no zha. Kakale to zwibuzwa ne kwe buchilo gwe zhuba ne zhuba, se ku zwichidza kene ku be ne nsha wa ka shatha. Bathu banjinji ba no wana ili kuti Baibili ha i to ba batsha koga ne dabilo dze buzo wulu dze buchilo ngono kakale i no ba kumbuludza ne kwe buchilo. A u no kumbula kuti Baibili i nga batsha nngwe wa u no ziba?
1. I buzo dzipi dzingwe dzi no dabigwa ne Baibili?
Baibili i no dabila buzo idzedzi wulu: Buchilo gwa ka tangisa chini? Ini ti chila? Ini bathu ba ka lulwama be dziyila? Ko shingikalani ha nthu e fa? Ha ili kuti nngwe ne nngwe u no shaka mbakiso, ini kuli zhele nghwa? Shango i nowo shingikaligwa neni mu chibaka chi no zha? Baibili i no ti kulumbidza ku shaka dabilo dze buzo dzi nonga idzedzi, ngono dzimiliyoni dze bathu dza ka shathisiwa ne dzidabilo dzayo.
2. Baibili i nga ti batsha chini ku shathila buchilo?
Baibili i no ti kumbuludza zwibuyanana. Ha ti lakidzila, i no diya misha kuti i nga be ne ku shatha kwe malebeswa chini. Kakale i no ti kumbuludza kuti ti nga mililana ne stress chini ne se kwa ti nga shathila mishingo yedu. U nowo zwidiya kuti Baibili i no diyani ne kwe khani idzedzi ne dzingwe ha ta ka dwilila ti zwidiya. U nga pelela u dumana ne kuti “Hwalo dze Ndzimu dzose [chingwe ne chingwe chi mu Baibili] . . . dzakalulwamila” ku batsha.—2 Timoti 3:16.
Tshambiso iyeyi ha i to misila Baibili. Ngono, i no ku sendedzela ku shakisisa Baibili ne bukuko. Ndizo, ti ku kulumbidza kuti u bale ndimana dza ka lakidziwa mu dzithuto idzedzi, ne ku dzi fanidzanya ne cha u no zwidiya.
ZWIDIYE KWA KA NGINILILA
Zwidiye kuti Baibili ya ka batsha bathu chini, ne se kwa u nga shathila ku i bala, kakale ne kuti ini ili chithu cha ka lulwama kuti u batshiwe ku i hwisisa.
3. Baibili i nga ti lakidza zila
Baibili i no fanana ne chedza chikulu. I nga ti batsha ku tola zila ya ka lulwama mu buchilo, kakale i nga ti batsha ku ziba zwi chowo shingikala.
Bala Pisalema 119:105, ngono mu be mu lebesana ne kwe buzo dzi no tobela:
Nkwali we pisalema iyeyi wa ka be e linga Baibili chini?
Iwe u no linga Baibili chini?
4. Baibili i nga dabila buzo dzedu
Nkadzi nngwe wa ka zwibonegwa kuti Baibili ya ka dabila dzibuzo dza ka be dzi ndziyidza mu makole manjinji. Zana VIDIYO, mu be mu lebesana ne kwe buzo dzi no tobela.
Mu vidiyo iyeyi, nkadzi iwoyo wa ka be a na dzibuzo dzipi?
Ku zwidiya Baibili kwa ka mbatsha chini?
Baibili i no ti kulumbidza kuti ti buzwe dzibuzo. Bala Matewu 7:7, mu be mu lebesana ne kwe buzo i no tobela:
I buzo dzipi dza u nadzo dzi nga dabigwa ne Baibili?
5. U nga shathila ku bala Baibili
Bunji gwe bathu ba no shathila ku bala Baibili ngono ichecho cho ba batsha. Zana VIDIYO, mu be mu lebesana ne kwe buzo dzi no tobela.
Mu vidiyo iyeyi, bathu ba chechana ba ka be be zwiwa chini ne kwe ku bala?
Nenguba ba si nga de ku bala, ini be shathila ku bala Baibili ngwenu?
Baibili ikati i nga ti diya ne zila i no nyaladza ne ku ti pa thembo. Bala Baroma 15:4, mu be mu lebesana ne buzo i no tobela:
A thembiso ye Baibili ne kwe nyaladzo ne thembo i no ku shathisa?
6. Bangwe ba nga ti batsha ku hwisisa Baibili
Bathu banjinji ba ka bona kuti pezhugwi kwe ku zwibalila Baibili ne bukwabo, ku lebesana ne bangwe ne kwayo ko batsha kwazo. Bala Mishingo 8:26-31, mu be mu lebesana ne kwe buzo i no tobela:
Ti nga hwisisa Baibili chini?—Bona ndimana 30 ne 31.
Nlume we ku Ethiopia wa ka be e sheta batsho ku hwisisa Hwalo. Ngwenu bathu banjinji ba no bona ku batsha kwazo ku lebesana ne kwe Baibili ne bangwe
BATHU BANGWE BA KATI: “Ku zwidiya Baibili wu zwichinyila nako.”
U nga ba dwa u tini? Ne kutini?
CHA WA ZWIDIYA
Baibili i no ti kumbuludza ne kwe buchilo, i no dabila buzo wulu, kakale i no pa bathu nyaladzo ne thembo.
U Nga Tini?
Baibili i nga ti kumbuludza ne zila ipi?
Baibili i no dabila buzo dzipi dzingwe?
U nga da ku zwidiyani mu Baibili?
SHAKISISA
Bona se kwa ngwenu ti nga shingisa cha ti no kumbuludziwa ne Baibili.
“Zwidiyo zwe Baibili—Buchenjedu gu singa Pelegwe ne Chibaka” (Thungamakole No. 1 2018)
Bona se kwa Baibili ya ka batsha nlume wa ka be e gwisana ne mazwiwo ku dwa mu buchechana gugwe.
Se Kwa Buchilo Gwangu gu Ptshwa gu no Shathisa Gwa ka Tangisa (2:53)
Lingilila se kwa Baibili i kumbuludza ne kwe buchilo gwe nsha.
“Zwithu Zwi li 12 Zwi Nga Batsha Misha ku Dwilila” (Mukani! No. 2 2018)
Zwidiye se kwa Baibili i chenesa kwa ka tambunuka ne kwe khani ye kuti ndiyani dumbu u no laula shango.
Ini wa ka Fanila ku Zwidiya Baibili?—Vidiyo ya ka Pelela (3:14)