Tzolom 4
Chanru tqanaw ru li Yos
Naru tqanaw ru li Jehobʼa naq naqil xsaʼ li Santil Hu. Najter qʼe kutan li Yos kixsikʼebʼ winq re naq teʼxtzʼiibʼa li xkʼaʼuxl. Li tasal hu aʼin Santil Hu nayeemank re. Saʼebʼ li kutan aʼin, naru tqanaw ru li Yos rikʼin rilbʼal xsaʼ li Santil Hu; chisaʼ wank li raatin malaj li resil li Jehobʼa. Joʼkan naq Raatin li Yos nayeemank re. Naru tqapaabʼ li naxye li Santil Hu xbʼaan naq ‹moko natikʼtiʼik ta li Yos.› (Hebreos 6:18.) Joʼkan bʼi, saʼ li Raatin li Yos wank li yaal (Juan 17:17).
Li Santil Hu aʼan jun rehebʼ li maatan li xqakʼul rikʼin li Yos. Aʼan chanchan jun li esilhu li naxtzʼiibʼa jun li chaabʼil yuwaʼbʼej choʼq rehebʼ li ralal xkʼajol. Naxye qe naq li Yos tixchʼinaʼusa ru li Ruuchichʼochʼ bʼarwiʼ twanq li yuʼam, aʼan li sahilal naʼajej. Naxye ajwiʼ qe li kixbʼaanu chaq najter qʼe kutan, li yook chi xbʼaanunkil anaqwan ut li tixbʼaanu saʼ li kutan chaalel choʼq rehebʼ li ralal xkʼajol, li tiikebʼ xchʼool. Joʼkan ajwiʼ nokooxtenqʼa chi xtuqubʼankil ru li qachʼaʼajkilal ut xtawbʼal li sahil chʼoolejil (2 Timoteo 3:16, 17).
Ebʼ laj testiiw re li Jehobʼa ramiiwebʼ li Yos ut tateʼxtenqʼa chi xtawbʼal ru li naxkʼut li Santil Hu. Kaʼajwiʼ taaye rehebʼ naq taawaj tzolok chirix li Santil Hu. Moko teʼxpatzʼ ta xtojbʼal naq tateʼxtzol (Mateo 10:8). Joʼkan ajwiʼ naru tatwulaq saʼ xchʼutamebʼ. Ebʼ li chʼutam aʼin nekeʼuxmank saʼ li naʼajej re loqʼonink, Chʼutlebʼaal Kabʼl rehebʼ laj Testiiw re li Jehobʼa nayeemank re. Wi tatchʼutlaaq rikʼinebʼ, tnumtaaq saʼ junpaat laanawom chirix li Yos.
Naru tqanaw ru li Yos naq tookʼoxlaq chirix li kixbʼaanu chaq. Li Santil Hu naxye naq li Yos kixyiibʼ li choxa ut li ruuchichʼochʼ (Génesis 1:1). Naq li Jehobʼa kixyiibʼ li choxa kixyiibʼ ajwiʼ li Saqʼe. Li saqʼe nim xwankil, naxkʼe xtiqwal, xsaqenk ut maajaruj tchupq; joʼkan naq kaʼajwiʼ li Yos kiru xyiibʼankil. Kʼaru naxkʼut chiqu aʼin chirix li Yos? Naxkʼut chiqu naq li Jehobʼa nim xwankil ut wank xnaʼlebʼ xbʼaan naq kiʼajmank choxahil naʼlebʼ re xyiibʼankil li Saqʼe.
Li xyoobʼtesihom li Jehobʼa naxkʼutbʼesi naq nokooxra. Kʼoxlan chirix chixjunil li kʼiila paay ru li kiʼil qʼeen li wank saʼ Ruuchichʼochʼ. Li Jehobʼa kiru raj xkʼeebʼal qe jun paay ajwiʼ ru li kiʼil qʼeen malaj maajun, abʼan moko joʼkan ta kixbʼaanu. Kixkʼe qe jalan jalanq rilobʼaal, xnimal, xbʼonol ut xsahil. Aʼin naxkʼutbʼesi naq li Jehobʼa nokooxra, qʼun xchʼool ut chaabʼil qikʼin (Salmo 104:24).