Naq nakaawekʼa naq inkʼaʼ chik nakaakuy

«Saʼ xkʼabʼaʼ naq junelik yook inkʼaʼuxl xinkʼoxla xkamsinkil wibʼ» (xʼAdriana, Brasil).

MA XAAWEKʼA junsutaq naq inkʼaʼ chik sa wankat ut nakaawaj kamk? Wi joʼkan, maare taataw ru li kirekʼa li xʼAdriana. Aʼan xyajerk xbʼaan naq numtajenaq xkʼaʼuxl, ra xchʼool ut inkʼaʼ chik naxnaw kʼaru tixbʼaanu. Moqon chik, laj bʼanonel kixye re, naq nim li xyajel chirix li rahil chʼoolejil.

Kʼe reetal li kixkʼul laj Kaoru, jun li winq re Japon li kirilebʼ li xnaʼ xyuwaʼ naq yajebʼ ut cheekebʼ. Aʼan naxye: «Saʼebʼ li kutan chaq aʼan, kaw nikineʼxtaqla saʼ linkʼanjel. Moqon, inkʼaʼ chik xwaj waʼak ut inkʼaʼ xinruuk chi wark. Xwaj raj kamk re naq inkʼaʼ chik tinkʼul li rahilal».

Jun li winq re Nigeria li naxkʼabʼaʼi Ojebode naxye: «Junelik ra chaq inchʼool, ut yalaq kʼaru nikinxkʼe chi yaabʼak. Xinkʼoxla ajwiʼ xkamsinkil wibʼ». Laj Ojebode, laj Kaoru ut li xʼAdriana inkʼaʼ xeʼxkamsi ribʼ, abʼan, ra xyeebʼal, rajlal chihabʼ kachʼin chik ma waqxaqibʼ siʼeent mil li qas qiitzʼin nekeʼxbʼaanu aʼin.

BʼAR TAATAW AATENQʼANKIL

Li xkʼihal li nekeʼxkamsi ribʼ aʼanebʼ li winq, ut naabʼal rehebʼ inkʼaʼ nekeʼxpatzʼ xtenqʼ xbʼaan naq nekeʼxutaanak. Abʼanan, li Jesukriist kixye naq li yajebʼ nekeʼraj junaq laj bʼanonel (Lucas 5:31). Joʼkan bʼiʼ, wi joʼkan nakaawekʼa, matxutaanak chi xsikʼbʼal aatenqʼ. Naabʼal li nekeʼyajerk chirix li rahil chʼoolejil keʼusaak bʼayaq xbʼaan naq keʼxbʼaanu joʼ kixye laj bʼanonel. Laj Ojebode, laj Kaoru ut li xʼAdriana keʼxsikʼ xtenqʼ rikʼin jun laj bʼanonel ut anaqwan sa chik nekeʼrekʼa ribʼ.

Re risinkil li yajel chirix li rahil chʼoolejil, wankebʼ laj bʼanonel nekeʼxkʼe li bʼan, nekeʼxye naq tat-aatinaq chirix aʼin re naq taawisi saʼ laachʼool malaj taabʼaanu li wiibʼ chi naʼlebʼ aʼin. Joʼkan ajwiʼ, ebʼ li yaj nekeʼraj naq li xjunkabʼal ut li ramiiw teʼtenqʼanq rehebʼ, teʼxtaw ru li nekeʼxkʼul ut wanqebʼ xkuyum. Li Jehobʼa aʼan jun chaabʼil amiiw ut naxkʼe qe li chaabʼil tenqʼ aʼin: li Santil Hu, li Raatin.

MA WANK KʼARU TRUUQ XTUQUBʼANKIL RU CHI JUNAJWA?

Rajlal naʼilmank naq li nekeʼyajerk chirix li rahil chʼoolejil naʼajmank naq yooqebʼ chi bʼaneʼk chiru naabʼal kutan ut tento teʼxjal li xyuʼamebʼ re xkuybʼal li yajel. Abʼanan, wi laaʼat yookat xkuybʼal li yajel chirix li rahil chʼoolejil, chʼolchʼooq chaawu naq t-usaaq chixjunil saʼ li kutan chalkebʼ re. Aʼan naxkʼoxla laj Ojebode, li naxye: «Nawaj rilbʼal chanru ttzʼaqloq ru Isaias 33:24, bʼarwiʼ naxye naq twulaq xkutankil naq maajun chik li poyanam tixye: “Yajin”». Tixkʼojobʼ ajwiʼ aachʼool xnawbʼal naq li Yos ak kixyeechiʼi «jun akʼ ruuchichʼochʼ» bʼarwiʼ maakʼaʼaq chik li «rahilal» chi moko li xrahil aachʼool malaj aakʼaʼuxl (Apocalipsis 21:1, 4). Li xrahil aachʼool tsachq chi junajwa. Maajunwa chik taawekʼa aʼin chi moko taajultika (Isaias 65:17).

Li xraqal li Santil Hu li truuq aatenqʼankil

Li Yos naxtaw ru li nakaawekʼa

«Laaʼin li Qaawaʼ, laaYos, chapchookat chawuqʼ inbʼaan. Laaʼin ninyehok aawe: “Matxiwak, laaʼin nintenqʼank aawe”» (Isaias 41:13).

Kaʼajwiʼ li Jehobʼa naxtaw ru chiʼus li naqekʼa ut naraj qatenqʼankil.

Kʼoxla rix li naxye li Raatin li Yos

Laj Elias «qʼaxal kixrahi li kamk ut kixye: “Tzʼaqalaq li rahilal aʼin, at Qaawaʼ! Us raj wi tinaakʼe chi kamk”» (1 Reyes 19:4).

Laj Ojebode naxye: «Xkʼoxlankil rix li naxye li Raatin li Yos xinxtenqʼa. Xinkʼe reetal naq li Propeet Elias kirekʼa ajwiʼ aʼin».

Kʼam aawe rikʼinebʼ li eetalil li wank saʼ li Santil Hu

Li Jesus kixye re laj Pedro: «Laaʼin xintijok chawix re naq inkʼaʼ taalajq laapaabʼaal» (Lucas 22:32).

Naq ak oxibʼ sut xyeebʼal naq inkʼaʼ naxnaw ru li Jesus, laj Pedro jwal kiʼok xkʼaʼuxl joʼkan naq kʼajoʼ naq kiyaabʼak. Laj Kaoru naxye: «Kʼajoʼ naq kixkawresi inchʼool xnawbʼal naq li Jehobʼa ut li Jesus keʼril li kirekʼa chaq laj Pedro».

Maajunwa chik taawekʼa aʼin chi moko taajultika (Isaias 65:17)