Ebʼ li naʼlebʼ choʼq re Xhuhil li qachʼutam Qayuʼam ut Qakʼanjel joʼ aj Paabʼanel

4-10 RE FEBRERO

XCHAQʼALIL RU LI RAATIN LI YOS | ROMANOS 1-3

«Miqakanabʼ xtzolbʼal li qachʼool ut li qakʼaʼuxl»

lv 16 raqal 6

Kʼaʼut Junelik Saqaq Ru li Qachʼool ut li Qakʼaʼuxl?

⁶ Naqanaw naq moko kaʼaj tawiʼ li xtenamit li Jehobʼa kʼeebʼilebʼ saʼ xchʼool xnawbʼal kʼaru li us ut li inkʼaʼ us. Joʼkan naq li Apostol Pablo kixtzʼiibʼa saʼ li Santil Hu: «Li maawaʼebʼ aj Judiiy li maakʼaʼebʼ xChaqʼrabʼ nekeʼxbʼaanu li naxye li Chaqʼrabʼ xbʼaan naq nekeʼreekʼa saʼ xchʼoolebʼ, [...] us ta maakʼaʼebʼ xChaqʼrabʼ, xchaqʼrabʼebʼ ribʼ xjunesebʼ. Nekeʼxkʼut naq li kʼaru yeebʼil xbʼaan li Chaqʼrabʼ, aʼan tzʼiibʼanbʼil saʼ xchʼoolebʼ. Aʼ ajwiʼ li reekʼobʼaal xchʼoolebʼ joʼwiʼ li xkʼaʼuxebʼ nachʼolobʼank re: wan naq aʼan najitok rehebʼ, wan naq aʼan nakolok rehebʼ» (Romanos 2:14, 15, Li Santil Hu, Sociedad Bíblica de Guatemala, [SBG]). Wankebʼ li qas qiitzʼin nekeʼxbʼaanu li naxye li Santil Hu xbʼaan naq li xchʼool nataqlank rehebʼ; usta maakʼaʼ nekeʼxnaw chirix li xchaqʼrabʼ li Jehobʼa.

lv 17 raqal 8, 9

Kʼaʼut Junelik Saqaq Ru li Qachʼool ut li Qakʼaʼuxl?

⁸ Kʼaru tento tqabʼaanu re naq li qachʼool ut li qakʼaʼuxl tixnaw kʼaru li us ut li inkʼaʼ us? Wankebʼ nekeʼxye naq ebʼ li raanm nataqlank rehebʼ, joʼkan naq nekeʼxye: «Xinbʼaanu li naraj li waanm». Abʼan, qajultikaq naq li qaanm naru tooxkʼe saʼ chʼaʼajkilal xbʼaan naq yalaq kʼaru naxrahi ru. Li Santil Hu naxye aʼin: «Qʼaxal aj bʼalaqʼ li xchʼool li poyanam, kʼajoʼ xyibʼal ru chiru chixjunil li kʼaʼaq re ru. Maajun natawok ru li naxkʼoxla» (Jeremias 17:9, SBG). Joʼ xqakʼe reetal inkʼaʼ tqabʼaanu li naraj li qaanm malaj li qachʼool; tento tqabʼaanu bʼan li naraj li Jehobʼa.a

⁹ Wi li qachʼool ut li qakʼaʼuxl tzolbʼil chiʼus rikʼin li Santil Hu, tqabʼaanu li naraj li Yos. Laaʼo inkʼaʼ naqaj naq tchʼinaaq xchʼool li Jehobʼa. Joʼkan kixbʼaanu laj Nehemias, li awabʼej re li tenamit Jerusalen; usta wank chaq xwankil re xpatzʼbʼal ral li tumin re li tenamit, moko kixbʼaanu ta. Kʼaʼut inkʼaʼ kixbʼaanu? Li awabʼej kixye: «Xbʼaan naq ninxiwa ru li Yos» (Nehemias 5:15, SBG). Laj Nehemias inkʼaʼ kiraj xyoobʼankil xjosqʼil li Jehobʼa rikʼin xchʼiʼchʼiʼinkil li tenamit. Joʼkan bʼiʼ, wi naqaxuwa ru li Yos tqasikʼ qanaʼlebʼ saʼ li Santil Hu re naq tqakʼoxla chiʼus kʼaru tento tqabʼaanu.

Qasikʼaq li tertokil pek

w08-S 15/6 30 raqal 5

Li xqatzol saʼ li hu Romanos

3:4. Naq inkʼaʼ naxkʼul ribʼ li raatin li winq rikʼin li naxye li Raatin li Yos, tqakʼe reetal naq yaal li naxye li Yos wi naqapaabʼ li esil li wank saʼ li Santil Hu ut naqabʼaanu joʼ naraj aʼan. Joʼkan ajwiʼ, naq naqakʼe qachʼool chi xpuktesinkil li Xʼawabʼejilal li Yos ut naqakʼehebʼ li qas qiitzʼin choʼq xtzolom li Jesus naqatenqʼahebʼ ajwiʼ naq teʼril naq paabʼajel li Yos.

w08-S 15/6 29 raqal 6

Li xqatzol saʼ li hu Romanos

3:24, 25 Chanru naq li xkamik li Jesus kiruuk xkuybʼal li xmaakebʼ li qas qiitzʼin li keʼwank chaq junxil, naq toj maajiʼ nakamk li Jesus? Li xbʼeen propesiiy li naʼaatinak chirix li Sikʼbʼil Ru li natawmank saʼ Genesis 3:15, kitzʼaqlok ru saʼ li chihabʼ 33 naq keʼxkamsi li Jesukriist chiru jun li cheʼ (Gal. 3:13, 16). Abʼanan, saʼ li hoonal naq li Jehobʼa kixye li propesiiy aʼin, choʼq re aʼan chanchan tawiʼ naq ak xtojmank rix li maak ut li kamk, xbʼaan naq maakʼaʼ naru naramok chiru xbʼaanunkil li naraj. Joʼkan naq, saʼ xkʼabʼaʼ li tixbʼaanu li Jesus naq tixqʼaxtesi li xyuʼam, li Jehobʼa kiruuk xkuybʼal xmaakebʼ li ralal xkʼajol laj Adan li nekeʼxpaabʼ li yeechiʼom aʼin. Li xkamik li Jesus naxbʼaanu ajwiʼ naq teʼwakliiq wiʼ chik chi yoʼyo ebʼ laj paabʼanel li keʼwank chaq junxil (Hech. 24:15).

11-17 RE FEBRERO

XCHAQʼALIL RU LI RAATIN LI YOS | ROMANOS 4-6

«Li Yos naxkʼutbʼesi naq nokooxra»

w11-S 15/6 12 raqal 5

Li Yos naxkʼutbʼesi naq nokooxra

⁵ Laj Pablo kiʼok xchʼolobʼankil li kikʼulmank: «Xbʼaan jun chi winq kiʼok chaq li maak saʼ ruuchichʼochʼ, ut xbʼaan li maak kichalk li kamk. Joʼkan naq li kamk kichalk saʼ xbʼeenebʼ chixjunil li poyanam xbʼaan naq chixjunilebʼ keʼmaakobʼk» (Rom. 5:12, SBG). Saʼ jalan chik xraqal li Santil Hu, li Yos naxkʼut chiqu chanru xtawbʼal ru aʼin. Joʼ naqanaw, li Jehobʼa kiʼok xyobʼtesinkil ebʼ li qas qiitzʼin naq kixkʼe xyuʼam laj Adan ut xʼEva, li tzʼaqalebʼ ru xyuʼam joʼ aʼan. Ut moqon kixkʼe jun li chaqʼrabʼ rehebʼ li wank xyaalalil, bʼarwiʼ kixye naq wi nekeʼxqʼet aʼin teʼkamq (Gen. 2:17). Ra xyeebʼal, abʼan li xbʼeen winq ut ixq keʼxqʼet ribʼ chiru li Jehobʼa, ut rikʼin aʼin keʼxkʼutbʼesi naq inkʼaʼ nekeʼxkʼulubʼa joʼ aj Kʼehol Chaqʼrabʼ ut joʼ li Nimajwal Awabʼej (Deu. 32:4, 5).

w11-S 15/6 12 raqal 6

Li Yos naxkʼutbʼesi naq nokooxra

⁶ Ak kimaakobʼk laj Adan saʼ Eden naq keʼyoʼlaak ebʼ li ralal xkʼajol. Joʼkan naq chixjunilebʼ keʼrechani li maak ut ebʼ li chʼaʼajkilal li tixkʼam chaq. Abʼan li Jehobʼa inkʼaʼ kixqʼabʼaʼebʼ rikʼin li xmaak laj Adan, xbʼaan naq moko aʼanebʼ ta keʼqʼetok re li xchaqʼrabʼ, joʼkan ajwiʼ, saʼebʼ li kutan aʼan toj maajiʼ nakʼemank chaq junaq li chaqʼrabʼ (Gen. 2:17). Saʼ xkʼabʼaʼ aʼin, chixjunilebʼ keʼrechani li maak. Chalen chaq, li maak ut li kamk wank chaq xwankil saʼ xbʼeenebʼ li qas qiitzʼin toj naq li Yos kixkʼe li chaqʼrabʼ rehebʼ laj Israel, bʼarwiʼ naxkʼut naq aʼanebʼ aj maak (taayaabʼasi Romanos 5:13, 14). Li maak li kixkanabʼ laj Adan naru xjuntaqʼeetankil rikʼin junjunq li yajel li naqechani rikʼinebʼ li qanaʼ qayuwaʼ. Abʼanan wankebʼ li kokʼal saʼ li junkabʼal nekeʼrechani li yajel rikʼinebʼ li xnaʼ xyuwaʼ ut wankebʼ inkʼaʼ. Abʼan, maaʼani naru naxkol ribʼ chiru li maak. Chiqajunilo xqechani li xmaak laj Adan ut saʼ xkʼabʼaʼ aʼin nokookamk. Ma truhanq xtuqubʼankil ru li chʼaʼajkilal aʼin?

w11-S 15/6 13 raqal 9, 10

Li Yos naxkʼutbʼesi naq nokooxra

⁹ Kʼaru naraj xyeebʼal li aatin Griego li najalmank ru choʼq «koxraqeʼq rikʼin li tiikil chʼoolej» ut «naxkʼam chaq li tiikil chʼoolej»? Jun laj jalol aatin re li Santil Hu kixtzʼiibʼa: «Aʼin jun li eetalil li naʼaatinak chirix li chaqʼrabʼ joʼ li nabʼaanumank saʼ jun li raqlebʼaal aatin. Moko yook ta chi aatinak chirix li tixjal saʼ li xyuʼam junaq li qas qiitzʼin, yook bʼan chi aatinak chirix li xwanjik chiru li Yos [...]. Saʼ li eetalil aʼin, li Yos aʼan laj raqol aatin li naxtenqʼa li kiqʼabʼaak, ut naru xyeebʼal naq, wank chiru li Yos saʼ xkʼabʼaʼ naq kiqʼabʼaak, abʼan li Yos kixkol rix».

¹⁰ Chanru truuq chi raqok aatin saʼ tiikilal «laj raqol aatin saʼ xbʼeen chixjunil li ruuchichʼochʼ» xkolbʼal rix junaq li poyanam li yook chi qʼabʼaak? (Gen. 18:25, SBG). Kiruuk xbʼaanunkil saʼ xkʼabʼaʼ li xrahom naq kixtaqla chaq li Ralal li jun chiru saʼ Ruuchichʼochʼ ut chi joʼkan kixkʼe li naʼajmank. Li Jesus kixbʼaanu chi tzʼaqal re ru li rajom li Xyuwaʼ usta kiʼaaleek, keʼxseʼe ut keʼxrahobʼtesi. Maajunwa kixtzʼeqtaana li xyuwaʼ toj reetal naq kikamk chiru jun li cheʼ (Heb. 2:10). Chi joʼkan, kixqʼaxtesi li xyuʼam re xkolbʼalebʼ li ralal xkʼajol laj Adan, malaj, rachʼabʼankilebʼ chiru li maak ut li kamk (Mat. 20:28; Rom. 5:6-8).

Qasikʼaq li tertokil pek

w08-S 15/6 29 raqal 7

Li xqatzol saʼ li hu Romanos

6:3-5, SBG, Kʼaru naraj xyeebʼal li subʼeʼk saʼ haʼ «saʼ xkʼabʼaʼ li Kristo Jesus» ut li subʼeʼk saʼ haʼ saʼ xkʼabʼaʼ li «xkamik»? Naq li Jehobʼa naxyulebʼ ru ebʼ laj paabʼanel rikʼin santil musiqʼej, nekeʼok chi tzʼaqonk rikʼin li Jesus ut tzʼaqonk saʼ li chʼuut li xjunxaqalil li Kriist bʼarwiʼ aʼan li xjolomil (1 Cor. 12:12, 13, 27; Col. 1:18). Aʼin li xsubʼeʼk saʼ haʼ saʼ xkʼabʼaʼ li Jesukriist. Ebʼ li yulbʼilebʼ ru nekeʼsubʼeʼk ajwiʼ saʼ haʼ saʼ xkʼabʼaʼ li xkamik li Kriist naq nekeʼxqʼaxtesi ribʼ chi kʼanjelak ut nekeʼxtzʼeq chirix xchʼoolebʼ wank arin chi junelik saʼ Ruuchichʼochʼ. Joʼkan naq, li xkamikebʼ chanchan li kixbʼaanu li Jesus usta li xkamikebʼ inkʼaʼ naru qakolbʼal. Li subʼeʼk saʼ haʼ saʼ xkʼabʼaʼ li xkamik li Kriist natzʼaqlok ru naq nekeʼkamk ut nekeʼwakliik wiʼ chik chi yoʼyo re naq teʼwanq saʼ choxa.

w14-S 1/6 11 raqal 1

Kʼaru li oybʼenihom wank rehebʼ linxeʼtoonil yuwaʼ?

Naq teʼwakliiq wiʼ chik chi yoʼyo li inkʼaʼ usebʼ xnaʼlebʼ, ma traqmanq aatin saʼ xkʼabʼaʼ li keʼxbʼaanu naq toj maajiʼ nekeʼkamk? Inkʼaʼ. Saʼ Romanos 6:7 naxye: «Li ak xkamk, maakʼaʼ chik xwankil li maak saʼ xbʼeen». Joʼ naqil, ebʼ li inkʼaʼ usebʼ xnaʼlebʼ ak keʼxtoj rikʼin xyuʼamebʼ li keʼxbʼaanu chaq, joʼkan naq traqmanq aatin rikʼin li teʼxbʼaanu naq teʼwakliiq wiʼ chik chi yoʼyo, ut inkʼaʼ rikʼin li keʼxbʼaanu naq toj maajiʼ nekeʼkamk. Kʼaʼut us naq tbʼaanumanq chi joʼkan?

18-24 RE FEBRERO

XCHAQʼALIL RU LI RAATIN LI YOS | ROMANOS 7, 8

«Ma yooko xyoʼoninkil chi anchal qachʼool?»

w12-S 15/7 11 raqal 17

Li Jehobʼa nokoorachʼabʼ chi tzʼaqal

¹⁷ Naq laj Pablo kixchʼolobʼ chirix li achʼabʼank li tixbʼaanu li Jehobʼa chirixebʼ li nekeʼloqʼonink re arin saʼ li Ruuchichʼochʼ, kixye naq ebʼ li qas qiitzʼin aʼin «qʼaxal yo chi xrahinkil ut xyoʼoninkil naq taakʼutbʼesimanq» anihebʼ li ralal xkʼajol li Yos. Chirix chik aʼan kixye: «Li ruuchichʼochʼ [...] taaʼachʼabʼaaq chiru xwankil li qʼaak ut toxtaw li wank chi achʼabʼanbʼil, aʼ li xnimal xloqʼal ebʼ li ralal xkʼajol li Yos» (Rom. 8:19-21, SBG). Saʼ li raqal aʼin «li ruuchichʼochʼ» aʼanebʼ li qas qiitzʼin li teʼwanq xyuʼam chi junelik saʼ li Ruuchichʼochʼ. Aʼanebʼ teʼxtaw rusilal naq «taakʼutbʼesimanq» ebʼ li ralal xkʼajol li Yos li sikʼbʼilebʼ ru, li ttiklaaq naq ebʼ li sikʼbʼilebʼ ru, li ak keʼwakliik wiʼ chik chi yoʼyo saʼ choxa, teʼxtenqʼa li Kriist chi risinkil li maaʼusilal saʼ li Ruuchichʼochʼ ut re naq li «xkʼihalebʼ li tenamit» teʼwanq saʼ li Ruuchichʼochʼ naq chʼinaʼusaq chik (Apoc. 7:9, 14, SBG).

w12-S 15/3 23 raqal 11

Choosahoq rikʼin li qoybʼenihom

¹¹ Li Jehobʼa kixkʼe roybʼenihom ebʼ li qas qiitzʼin naq kixye chaq naq jun li alal kʼajolbʼej tixrachʼabʼebʼ chiru laj Tza, «li najter kʼantiʼ» (Gen. 3:15; Apoc. 12:9, SBG). Li Jesukriist aʼan li xbʼeen alal kʼajolbʼej (Gal. 3:16). Li xkamik ut li xwaklijik wiʼ chik chi yoʼyo kiruuk xbʼaanunkil naq ebʼ li qas qiitzʼin naru teʼwanq roybʼenihom naq teʼkoleʼq chiru li maak ut li kamk. Li xtzʼaqlojik ru li yeechiʼom aʼin naxchap ribʼ rikʼin naq tkʼutbʼesimanq anihebʼ li ralal xkʼajol li Yos. Aʼin tkʼulmanq naq ebʼ li sikʼbʼilebʼ ru, li ak keʼwakliik wiʼ chik chi yoʼyo, joʼ li xkabʼ alal kʼajolbʼej, teʼxtenqʼa li Kriist chi xsachbʼal li xmaaʼusilal li ruuchichʼochʼ li wank saʼ ruqʼ laj Tza (Apoc. 2:26, 27). Aʼin tixkʼam chaq li kolbʼa ibʼ choʼq rehebʼ li junchʼol chik chi karneer li teʼkoleʼq saʼ li nimla rahilal (Apoc. 7:9, 10, 14).

w12-S 15/3 23 raqal 12

Choosahoq rikʼin li qoybʼenihom

¹² Naq yooq chi Awabʼejink li Kriist chiru li jun mil chihabʼ «li ruuchichʼochʼ» sahaq tzʼaqal saʼ xchʼool. Chiruhebʼ li chihabʼ aʼin tkʼutbʼesimanq anihebʼ li ralal xkʼajol li Yos naq teʼkʼanjelaq choʼq aj tij rochbʼen li Kriist ut teʼxkʼam chaq saʼ xbʼeenebʼ li qas qiitzʼin li rusilal li xkamik li Jesus. Rubʼel li Xʼawabʼejilal li Yos saʼ choxa, ebʼ li poyanam li teʼabʼinq yooqebʼ xkanabʼankil li maak ut li kamk. Timil timil teʼisiiq rubʼel «xwankil li qʼaak». Wi chiru li jun mil chihabʼ inkʼaʼ teʼxtzʼeqtaana li Jehobʼa ut teʼxqʼax ru naq teʼyaleʼq rix jun sutaq chik, teʼril li xkʼabʼaʼebʼ tzʼiibʼanbʼil chi junajwa saʼ «li xhuhil li yuʼam» ut teʼxtaw «li wank chi achʼabʼanbʼil, aʼ li xnimal xloqʼal ebʼ li ralal xkʼajol li Yos» (Apoc. 20:7, 8, 11, 12, SBG). Kʼajoʼ xchaabʼilal li oybʼenihom aʼin!

Qasikʼaq li tertokil pek

w17.06-S 3

Ma jultik aawe?

Kʼaru xjalanil wank xtaqenkil «li kʼaʼ re ru naxrahi li tzʼejwalej» ut xtaqenkil «li naxrahi li musiqʼej»? (Rom. 8:6, SBG)

Li naxkʼoxla li naxrahi li tzʼejwalej naxkʼe xchʼool chirix li naraj ut li narataw li tibʼelej ut junelik naʼaatinak chirix aʼin. Li naxkʼoxla li naxrahi li musiqʼej naxkʼe xchʼool chirix li Yos ut nakʼoxlak joʼ aʼan. Naxkanabʼ naq li santil musiqʼej naxbʼeresi li xkʼaʼuxl. Xkʼoxlankil li naxrahi li tzʼejwalej naxkʼam chaq li kamk; ut xkʼoxlankil li musiqʼej, naxkʼam chaq yuʼam ut tuqtuukilal (w16.12-S, perel 15 toj 17).

w09-S 15/11 7 raqal 20

Kʼaru naxkʼut chaawix laatij?

²⁰ Wank sut maare inkʼaʼ tqanaw kʼaru tqapatzʼ naq tootijoq qajunes. Laj Pablo kixye: «Inkʼaʼ naqanaw chan tzʼaqal ru tootijoq. Abʼan aʼ ajwiʼ li Musiqʼej natzʼaamank chiqix rikʼin jiqʼok chʼool li inkʼaʼ naru xyeebʼal yal rikʼin aatin. Ut li Yos, li chʼolchʼo chiru kʼaru wank saʼ chʼoolej, naxnaw kʼaru xkʼaʼuxl li Musiqʼej» (Rom. 8:26, 27, SBG). Li Jehobʼa kixbʼaanu naq ttzʼiibʼamanq saʼ li Santil Hu naabʼal li tij. Saʼ xkʼabʼaʼ naq aʼan kimusiqʼank re, naxnaw li keʼraj xyeebʼal ebʼ li keʼtzʼiibʼank re li Santil Hu. Joʼkan ajwiʼ, naxnaw qu chiʼus. Joʼkan naq, naq naqoksi ebʼ li tij aʼin naxkʼulubʼa chanchan tawiʼ laaʼo xooyeehok re ut naxsume. Li Jehobʼa naxsume li qatij naq li santil musiqʼej «natzʼaamank», malaj naʼokenk chiqix. Wi naqanaw chiʼus li Raatin li Yos, inkʼaʼ chik chʼaʼajkaq chiqu xnawbʼal kʼaru tqapatzʼ saʼ li qatij.

25 RE FEBRERO TOJ 3 RE MARZO

XCHAQʼALIL RU LI RAATIN LI YOS | ROMANOS 9-11

«Li reetalil li xcheʼul li oliibʼ»

w11-S 15/5 23 raqal 13

Kʼajoʼ xchamal li xnaʼlebʼ li Yos!

¹³ Laj Pablo naxjuntaqʼeeta ebʼ li teʼokenq saʼ xyanq li ralal xkʼajol laj Abrahan rikʼinebʼ li ruqʼ li xcheʼul li oliibʼ (Rom. 11:21). Li cheʼ aʼin reetalil li xtzʼaqlojik li rajom li Yos chirix li sumwank li kixbʼaanu rikʼin laj Abrahan. Li xxeʼil li oliibʼ sant ut reetalil li Jehobʼa, xbʼaan naq aʼan nakʼehok re xyuʼam li Israel saʼ musiqʼej (Isa. 10:20; Rom. 11:16). Li xtoonal reetalil li Jesus, li xbʼeen li tchalq saʼ xyanq li ralal xkʼajol laj Abrahan. Ut ebʼ li ruqʼ li cheʼ reetalil li teʼwanq ajwiʼ saʼ xyanq li ralal xkʼajol laj Abrahan.

w11-S 15/5 24 raqal 15

Kʼajoʼ xchamal li xnaʼlebʼ li Yos!

¹⁵ Joʼkan naq, kʼaru kixbʼaanu li Jehobʼa re naq ttzʼaqloq ru li rajom? Joʼ naxchʼolobʼ laj Pablo, saʼ xnaʼaj li ruqʼ li cheʼ li keʼtoqeʼk keʼxkʼe jalan chik. Aʼin naraj xyeebʼal naq keʼaweʼk li kʼicheʼil oliibʼ saʼ xyanq li tzʼaqal oliibʼ (taayaabʼasi Romanos 11:17, 18). Ebʼ li sikʼbʼilebʼ ru li chalenaqebʼ saʼ jalan chik tenamit, saʼ xyanqebʼ aʼin wankebʼ laj paabʼanel re li chʼuut Roma li maawaʼebʼ aj Judiiy, keʼaweʼk malaj keʼkʼeheʼk saʼ li reetalil li xcheʼul li oliibʼ. Chi joʼkan keʼokenk ajwiʼ saʼ xyanq li ralal xkʼajol laj Abrahan. Usta saʼ xtiklajik moko keʼruuk ta chi tzʼaqonk saʼ li sumwank aʼin, xbʼaan naq chanchanebʼ li ruqʼ li kʼicheʼil oliibʼ, li Jehobʼa kixbʼaanu naq teʼruuq chi wank saʼ xyanqebʼ laj Judiiy saʼ musiqʼej (Rom. 2:28, 29).

w11-S 15/5 25 raqal 19

Kʼajoʼ xchamal li xnaʼlebʼ li Yos!

¹⁹ Chʼolchʼo tzʼaqal naq li rajom li Yos chirix «li xʼIsrael li Yos» jwal chaabʼil chanru yook chi tzʼaqlok ru (Gal. 6:16, SBG). Joʼ kixye laj Pablo, «taakoleʼq chixjunil laj Israel» (Rom. 11:26, SBG). Naq twulaq xqʼehil li xaqabʼanbʼil xbʼaan li Jehobʼa, «chixjunil laj Israel», malaj ebʼ laj Israel saʼ musiqʼej, teʼkʼanjelaq saʼ choxa joʼ awabʼej ut joʼ aj tij. Maakʼaʼ naru tramoq chiru li Yos naq ttzʼaqloq ru li rajom!

Qasikʼaq li tertokil pek

w13-S 15/6 25 raqal 5

Kanabʼ naq li Jehobʼa tatxqʼus

⁵ Chanru naroksi li xwankilal li Xnimal Ru aj Pakʼonel saʼ xbʼeenebʼ li inkʼaʼ nekeʼraj xkʼulubʼankil naq teʼpakʼeʼq? Naq li sebʼ inkʼaʼ naruhank roksinkil re xbʼaanunkil li kʼanjel li xkʼoxlamank wiʼ, maare t-oksimanq re xbʼaanunkil jalan chik malaj ttzʼeqmanq. Nakʼulmank aʼin xbʼaan naq laj pakʼonel inkʼaʼ kixkʼanjela chiʼus. Abʼanan, aʼin maajunwa nakʼulmank rikʼin laj Pakʼonel qe (Deut. 32:4). Naq junaq li qas qiitzʼin inkʼaʼ naxkanabʼ naq tpakʼeʼq, aʼan wank re. Li Jehobʼa naroksi li xwankil saʼ xbʼeenebʼ li poyanam joʼ chanru nekeʼxkanabʼ naq teʼpakʼeʼq malaj inkʼaʼ. Li nekeʼxkʼulubʼa naq teʼpakʼeʼq xbʼaan li Jehobʼa, us nekeʼelk. Qilaq jun li eetalil, li sikʼbʼilebʼ ru aʼanebʼ li sekʼ li keʼuxtaanaak ru li keʼpakʼek joʼ jun li «sekʼ chaabʼil xkʼanjel». Abʼan, li inkʼaʼ nekeʼxkʼulubʼa li naxye li Yos nekeʼkanaak joʼ li sekʼ li «xkʼulubʼebʼ [...] li tojbʼamaak ut li sachk» (Rom. 9:19-23, SBG).

it-1-S 456 raqal 4

Naxkʼe xchʼool (kaqalink, nakaqalink)

Qʼaxal nekeʼxloqʼoni li Yos, abʼan moko joʼ ta naraj aʼan. Wank sut junaq li qas qiitzʼin naru tixkʼe xchʼool chirix junaq li naʼlebʼ abʼan moko us ta li yook xbʼaanunkil ut inkʼaʼ nawulak chiru li Yos. Joʼkan keʼxkʼul naabʼalebʼ laj Judiiy li keʼwank chaq saʼ li xbʼeen siʼeent chihabʼ. Keʼxkʼoxla naq teʼxtaw li xtiikilal xchʼoolebʼ saʼ xkʼabʼaʼ li xbʼaanuhomebʼ li wank saʼ li Xchaqʼrabʼ laj Moises. Abʼan laj Pablo kixkʼut naq moko us ta yookebʼ xloqʼoninkil li Yos xbʼaan naq moko nekeʼxbʼaanu ta joʼ tzʼaqal naxye li Yos. Joʼkan naq, inkʼaʼ keʼxkʼul li xtiikilal xchʼoolebʼ li nachalk rikʼin li Yos. Tento naq teʼril li xpaltilebʼ ut teʼsutqʼiiq rikʼin li Yos saʼ xkʼabʼaʼ li Kriist re naq tiikaqebʼ xchʼool chiru li Yos ut teʼachʼabʼaaq chiru li Chaqʼrabʼ (Ro 10:1-10). Laj Saulo re Tarso aʼan jun rehebʼ aʼin, qʼaxal kixkʼe xchʼool chirix li xpaabʼalebʼ laj Judiiy, joʼkan naq kixrahobʼtesi li xchʼuut li Yos ut kiraj xjukʼbʼal. Kixkʼe xchʼool chi xyuʼaminkil li Chaqʼrabʼ chi tzʼaqal re ru, ut kixye naq maajun truuq xwechʼbʼal rix (Gal 1:13, 14; Flp 3:6). Abʼanan, moko us ta chanru kixkʼe xchʼool chirix li xpaabʼalebʼ laj Judiiy. Abʼan, saʼ xkʼabʼaʼ naq kixbʼaanu chi anchal xchʼool, li Jehobʼa kiruxtaana ru saʼ xkʼabʼaʼ li Kriist ut kixkʼut chiru li bʼe li nakʼamok saʼ li tzʼaqal paabʼal (1Ti 1:12, 13).

[Kʼe reetal]